ಗರ್ಭಾವಸ್ಥೆಯಲ್ಲಿ ಚರ್ಮದ ಸಮಸ್ಯೆ ಸಾಮಾನ್ಯವೇ?; ಅದರ ಲಕ್ಷಣಗಳೇನು?

ಗರ್ಭಾವಸ್ಥೆಯು ಮಹಿಳೆಯರಿಗೆ ಒಂದು ಸುಂದರವಾದ ಪ್ರಯಾಣವಾಗಿದೆ. 9 ತಿಂಗಳ ಈ ಜರ್ನಿ ಎಷ್ಟೇ ವಿಶೇಷವಾಗಿದ್ದರೂ ಆ ಮಹಿಳೆ ಸಾಕಷ್ಟು ಕಿರಿಕಿರಿ, ಅನಾರೋಗ್ಯವನ್ನು ಕೂಡ ಎದುರಿಸುತ್ತಾಳೆ. ಅನೇಕ ಗರ್ಭಿಣಿಯರು ಎದುರಿಸುವ ಸಾಮಾನ್ಯ ಸಮಸ್ಯೆಗಳೆಂದರೆ ಹಾರ್ಮೋನ್ ಏರಿಳಿತದಿಂದ ಅವರ ಚರ್ಮದಲ್ಲಿ ಆಗುವ ಬದಲಾವಣೆಗಳು. ಈ ಬದಲಾವಣೆಗಳು ಮೊಡವೆ, ಚರ್ಮದ ಹಿಗ್ಗುವಿಕೆ, ಚರ್ಮ ಕಪ್ಪಾಗುವಿಕೆ ಮತ್ತು ಮೆಲಸ್ಮಾದಂತಹ ಚರ್ಮದ ಸಮಸ್ಯೆಗಳಿಗೆ ಕಾರಣವಾಗಬಹುದು. ಹಾರ್ಮೋನ್‌ಗಳ ಹೆಚ್ಚಿದ ಮಟ್ಟಗಳು ಅದರಲ್ಲೂ ವಿಶೇಷವಾಗಿ ಈಸ್ಟ್ರೊಜೆನ್ ಮತ್ತು ಪ್ರೊಜೆಸ್ಟರಾನ್ ಚರ್ಮದಲ್ಲಿ ಎಣ್ಣೆಯ ಅಧಿಕ ಉತ್ಪಾದನೆಗೆ ಕಾರಣವಾಗಬಹುದು.

ಪಂಚಶೀಲ್ ಪಾರ್ಕ್‌ನ ಮ್ಯಾಕ್ಸ್ ಮಲ್ಟಿ ಸ್ಪೆಷಾಲಿಟಿ ಸೆಂಟರ್‌ನ ಡರ್ಮಟಾಲಜಿಯ ಹಿರಿಯ ಸಲಹೆಗಾರರಾದ ಡಾ. ದೀಪ್ತಿ ರಾಣಾ ಅವರ ಪ್ರಕಾರ, ಈ ಸಂದರ್ಭದಲ್ಲಿ ಮಹಿಳೆಯರಲ್ಲಿ ಪಿಗ್ಮೆಂಟೇಶನ್ ಹೆಚ್ಚಾಗಿ ಕಂಡುಬರುತ್ತದೆ.

ಮುಖದ ಮೇಲೆ ಕಂಡುಬರುವ ಅಲರ್ಜಿಯನ್ನು ಮೆಲಸ್ಮಾ ಎಂದೂ ಕರೆಯಲಾಗುತ್ತದೆ. ಹಾಗೇ, ದೇಹದ ಮಡಿಕೆಗಳ ವರ್ಣದ್ರವ್ಯ, ಮೊಲೆತೊಟ್ಟುಗಳ ಸುತ್ತಲಿನ ವರ್ಣದ್ರವ್ಯ ಮತ್ತು ಅರೋಲಾದಲ್ಲೂ ಚರ್ಮದ ಸಮಸ್ಯೆ ಕಂಡುಬರುತ್ತದೆ. ಭ್ರೂಣದ ಬೆಳೆಯುತ್ತಿರುವ ಗಾತ್ರದಿಂದಾಗಿ ಕೆಲವರಲ್ಲಿ ಮುಖದ ವರ್ಣದ್ರವ್ಯ ಬದಲಾಗಿ ಕಪ್ಪಾಗುತ್ತದೆ. ಸ್ತನ ಪ್ರದೇಶ ಮತ್ತು ಹೊಟ್ಟೆಯ ಸುತ್ತಲೂ ಚರ್ಮ ಹಿಗ್ಗುತ್ತದೆ.

ಕೆಲವೊಮ್ಮೆ ಮಹಿಳೆಯರು ಗರ್ಭಾವಸ್ಥೆಯಲ್ಲಿ ಅಥವಾ ಹೆರಿಗೆಯ ನಂತರ ಸಾಕಷ್ಟು ಕೂದಲು ಉದುರುವಿಕೆ ಮತ್ತು ಉಗುರುಗಳಲ್ಲಿ ಬಹಳಷ್ಟು ಬದಲಾವಣೆಗಳನ್ನು ನೋಡಬಹುದು. ಈ ವೇಳೆ ಉಗುರುಗಳು ಬಹಳ ವೇಗವಾಗಿ ಬೆಳೆಯುತ್ತವೆ ಮತ್ತು ಕೆಲವರಿಗೆ ಮೊಡವೆಗಳು ಉಲ್ಬಣಗೊಳ್ಳಬಹುದು. ಇನ್ನು ಕೆಲವರಿಗೆ ಮೈಯಲ್ಲಿ ತುರಿಕೆ ಉಂಟಾಗಿ ಅಲರ್ಜಿಯಾಗಬಹುದು.

ಮಗುವಿನ ಜನನದ ನಂತರ ಈ ಹೆಚ್ಚಿನ ಸಮಸ್ಯೆಗಳು ನಿವಾರಣೆಯಾಗುತ್ತವೆ. ಆದರೆ ಅವುಗಳಲ್ಲಿ ಕೆಲವು ಸಮಸ್ಯೆಗಳಾದ ಮೆಲಸ್ಮಾ, ಮೊಡವೆ ಮತ್ತು ಕೂದಲು ಉದುರುವಿಕೆ ಮುಂತಾದವುಗಳು ಹೆರಿಗೆಯ ನಂತರವೂ ಮುಂದುವರಿಯಬಹುದು. ಗರ್ಭಾವಸ್ಥೆಯಲ್ಲಿ ಈ ಯಾವುದೇ ರೀತಿಯ ಚರ್ಮದ ಸಮಸ್ಯೆಗಳನ್ನು ಗಮನಿಸಿದರೆ ವೈದ್ಯರನ್ನು ಭೇಟಿ ಮಾಡಬೇಕು.

ಇನ್ನಷ್ಟು ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 12:08 pm, Thu, 25 January 24