2020ರಲ್ಲಿ ಸ್ಥಾಪಿತವಾದ ಪಿಎಂ-ಕೇರ್ಸ್​​​ ಫಂಡ್​​ನಲ್ಲಿ ಒಂದು ವರ್ಷದಲ್ಲಿ ಸಂಗ್ರಹವಾದ ಹಣವೆಷ್ಟು? ಖರ್ಚಾಗಿದ್ದೆಷ್ಟು?-ಇಲ್ಲಿದೆ ವಿವರ

ಕೊವಿಡ್​ 19 ಸಾಂಕ್ರಾಮಿಕ ಪ್ರಾರಂಭವಾದ ಬಳಿಕ 2020ರ ಮಾರ್ಚ್​ 27ರಂದು ಪಿಎಂ ಕೇರ್ಸ್​ ಫಂಡ್​ (PM-CARES Fund-Prime Minister’s Citizen Assistance and Relief in Emergency Situations Fund) ಶುರುವಾಗಿದೆ. ಸದ್ಯ ಇರುವ ಕೊವಿಡ್​ 19 ಪರಿಸ್ಥಿತಿ ಮತ್ತು ಭವಿಷ್ಯದಲ್ಲಿ ಎದುರಾಗಬಹುದಾದ ಇಂಥ ಸಾಂಕ್ರಾಮಿಕಗಳ ವಿರುದ್ಧ ಹೋರಾಡುವುದು, ನಿಯಂತ್ರಣ ಮತ್ತು ಪರಿಹಾರಕ್ಕೆ ಅನುಕೂಲವಾಗುವ ಸಲುವಾಗಿ ನಿಧಿ ಸಂಗ್ರಹ ಮಾಡಲು ಈ ಪ್ರಧಾನಮಂತ್ರಿ ನಾಗರಿಕ ನೆರವು ಮತ್ತು ತುರ್ತು ಸಂದರ್ಭದಲ್ಲಿ ಪರಿಹಾರ ನಿಧಿ ಅಥವಾ ಪಿಎಂ ಕೇರ್ಸ್​ ಫಂಡ್​​ನ್ನು ಸ್ಥಾಪಿಸಿದ್ದು ಪ್ರಧಾನಮಂತ್ರಿಗಳು ಇದರ ಪದನಿಮಿತ್ತ ಅಧ್ಯಕ್ಷರಾಗಿರುತ್ತಾರೆ. ಹೀಗೆ 2020ರಲ್ಲಿ ಸ್ಥಾಪಿತವಾದ ಪಿಎಂ ಕೇರ್ಸ್​ ಫಂಡ್​​ನಲ್ಲಿ 2021ರ ಮಾರ್ಚ್​​ವರೆಗೆ ಅಂದರೆ ಒಂದು ವರ್ಷದಲ್ಲಿ 10,999 ಕೋಟಿ ರೂಪಾಯಿ ಸಂಗ್ರಹವಾಗಿದೆ ಮತ್ತು ಅದರಲ್ಲಿ 3,976 ಕೋಟಿ ರೂಪಾಯಿ ಅಥವಾ ಒಟ್ಟು ಹಣದ ಶೇ.36.17ರಷ್ಟು ಖರ್ಚಾಗಿದೆ ಎಂದು ಫಂಡ್​​ನ ವೆಬ್​ಸೈಟ್​​ನಲ್ಲಿ ಉಲ್ಲೇಖಿಸಲಾಗಿದೆ.

ಪಿಎಂ ಕೇರ್ಸ್​ ಫಂಡ್​​​ನಲ್ಲಿರುವ ಹಣ ಯಾವುದೇ ನೈಸರ್ಗಿಕ ವಿಪತ್ತಿನ ಪರಿಹಾರಕ್ಕೆ ನೀಡಲಾಗುವುದಿಲ್ಲ. ಅದಕ್ಕಾಗಿಯೇ ಬೇರೆ ನಿಧಿಗಳು ಈಗಾಗಲೇ ಇವೆ. ಪಿಎಂ ಕೇರ್ಸ್​ಗೆ ನೀಡುವ ದೇಣಿಗೆಗೆ ಆದಾಯ ತೆರಿಗೆ ಕಾಯ್ದೆಯಡಿ ವಿನಾಯಿತಿ ಇರುತ್ತದೆ. ಮೊದಲ ವರ್ಷದಲ್ಲಿ ಸಂಗ್ರಹವಾದ ಹಣದಲ್ಲಿ 3,976 ಕೋಟಿ ರೂ. ಖರ್ಚಾಗಿದ್ದು, ಇನ್ನೂ  7,014 ಕೋಟಿ ರೂಪಾಯಿ ಬಳಕೆಯಾಗದೆ ಹಾಗೇ ಉಳಿದಿದೆ ಎಂದು ವೆಬ್​ಸೈಟ್​​ನಲ್ಲಿ ಉಲ್ಲೇಖಿಸಲಾಗಿದೆ. ಹೀಗೆ ಖರ್ಚಾದ ಹಣದಲ್ಲಿ ಗರಿಷ್ಠ ಖರ್ಚಾಗಿದ್ದು, ಕೊವಿಡ್​ 19 ಲಸಿಕೆ ಡೋಸ್​​ಗಳ ಖರೀದಿಗೆ ಎಂದು ಹೇಳಲಾಗಿದೆ. ಅಂದರೆ 1,392 ಕೋಟಿ ರೂಪಾಯಿ (ಶೇ.35) ವೆಚ್ಚದಲ್ಲಿ 66 ಮಿಲಿಯನ್​ ಡೋಸ್​ಗಳನ್ನು  ಖರೀದಿ ಮಾಡಲಾಗಿದೆ. ಅದಾದ ಬಳಿಕ ಒಟ್ಟು 1,311 ಕೋಟಿ ರೂಪಾಯಿ (ಶೇ.33) ಯನ್ನು 50 ಸಾವಿರ ಮೇಡ್​​ ಇನ್​ ಇಂಡಿಯಾ (ಸ್ವದೇಶಿ) ವೆಂಟಿಲೇಟರ್​ ಖರೀದಿಗೆ ಮತ್ತು 1000 ಕೋಟಿ ರೂಪಾಯಿಯನ್ನು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ, ವಲಸಿಗರ ಕಲ್ಯಾಣಕ್ಕಾಗಿ ಕೊಡಲಾಗಿದೆ ಎಂದು ವಿವರಿಸಲಾಗಿದೆ.

ಇನ್ನು ಪಿಎಂ ಕೇರ್ಸ್​ ಫಂಡ್​​ನ  201 ಕೋಟಿ ರೂಪಾಯಿಯನ್ನು ದೇಶಾದ್ಯಂತ ಸಾರ್ವಜನಿಕ ಆರೋಗ್ಯ ಕೇಂದ್ರಗಳಲ್ಲಿ ಒಟ್ಟು 162 ಪ್ರೆಶರ್​ ಸ್ವಿಂಗ್​ ಅಡ್ಸಾರ್ಪ್​ಶನ್​ (PSA) ವೈದ್ಯಕೀಯ ಆಮ್ಲಜನಕ ಜನರೇಶನ್​ ಘಟಕಗಳನ್ನು ಅಳವಡಿಸಲು ವಿನಿಯೋಗಿಸಲಾಗಿದೆ. 9 ರಾಜ್ಯಗಳಲ್ಲಿ 16 ಆರ್​ಟಿಪಿಸಿಆರ್​ ತಪಾಸಣಾ ಲ್ಯಾಬ್​ ಪ್ರಾರಂಭಿಸಲು ಹಾಗೂ ಮುಜಾಫರ್​​ಪುರ ಮತ್ತು ಪಾಟ್ನಾದ ಕೊವಿಡ್ 19 ಆಸ್ಪತ್ರೆಗಳಲ್ಲಿ 500 ಹಾಸಿಗೆಗಳನ್ನು ನಿರ್ಮಿಸಲು 50 ಕೋಟಿ ರೂಪಾಯಿ ನೀಡಲಾಗಿದೆ. ಎರಡು ಸ್ವಾಯಸ್ಥ ಸಂಸ್ಥೆ ಪ್ರಯೋಗಾಲಯಗಳನ್ನು, ಕೊವಿಡ್​ 19 ವ್ಯಾಕ್ಸಿನ್ ಬ್ಯಾಚ್​​ಗಳ ತಪಾಸಣೆಗಾಗಿ ಸೆಂಟ್ರಲ್​ ಡ್ರಗ್​ ಲ್ಯಾಬೋರೇಟರಿಗಳನ್ನಾಗಿ ನವೀಕರಿಸಲು  ಪಿಎಂ ಕೇರ್ಸ್​ ಫಂಡ್​​ನಿಂದ 20 ಕೋಟಿ ರೂ.ಕೊಡಲಾಗಿದೆ ಎಂದು ಮಾಹಿತಿ ನೀಡಲಾಗಿದೆ.

ಅಂದಹಾಗೆ, ಪಿಎಂ ಕೇರ್ಸ್​ ಫಂಡ್​ ಪ್ರಾರಂಭ ಮಾಡುವಾಗ ಆರಂಭಿಕವಾಗಿ ಅದರಲ್ಲಿ 3077 ಕೋಟಿ ರೂಪಾಯಿ ಇತ್ತು. 2021ರ ಮಾರ್ಚ್​ ಹೊತ್ತಿಗೆ 7679 ಕೋಟಿ ರೂ.ದೇಣಿಗೆ ಪಡೆದಿದೆ. ಅಸಲು ಮೊತ್ತದ ಮೇಲೆ  235 ಕೋಟಿ ರೂ.ಬಡ್ಡಿ ಹೊಂದಿದೆ. ಈ ಹಿಂದೆ ಸೆಪ್ಟೆಂಬರ್​​ನಲ್ಲಿ ಪಿಎಂ ಕೇರ್ಸ್​ ಬಗ್ಗೆ ಮಾಹಿತಿ ಕೇಳಿದಾಗ, ಕೇಂದ್ರ ಸರ್ಕಾರ ಮತ್ತು ಪ್ರಧಾನಿ ಕಾರ್ಯಾಲಯಗಳು ಅದನ್ನು ನಾವು ಕೊಡಲು ಸಾಧ್ಯವಿಲ್ಲ ಎಂದಿದ್ದವು. ಪಿಎಂ ಕೇರ್ಸ್​ ಫಂಡ್​​  ಮಾಹಿತಿ ಹಕ್ಕು ಕಾಯ್ದೆಯ ವ್ಯಾಪ್ತಿಯಲ್ಲಿ ಬರುವುದಿಲ್ಲ. ಯಾಕೆಂದರೆ ಇದು ಸಾರ್ವಜನಿಕ ಪ್ರಾಧಿಕಾರವಲ್ಲ. ಹಾಗೇ, ಇದನ್ನು ಕೇಂದ್ರ ಸರ್ಕಾರದ ಅಂಗಸಂಸ್ಥೆಯೆಂದು ಪರಿಗಣಿಸುವಂತಿಲ್ಲ ಎಂದಿದ್ದವು.

ಇದನ್ನೂ ಓದಿ: ನದಿ ಜೋಡಣೆಗೆ ಬಸವರಾಜ ಬೊಮ್ಮಾಯಿ ವಿರೋಧ! ದೆಹಲಿಯಲ್ಲಿ ಸಿಎಂ ಹೇಳಿದ್ದೇನು?