ಸರ್ಕಾರಿ ವಸತಿ ಖಾಲಿ ಮಾಡುವಂತೆ ಪಿಡಿಪಿ ಪಕ್ಷದ ನಾಲ್ವರಿಗೆ ಸೂಚನೆ; ಮೆಹಬೂಬಾ ಮುಫ್ತಿ ತೀವ್ರ ಆಕ್ರೋಶ

ಶ್ರೀನಗರ: ಪೀಪಲ್ಸ್ ಡೆಮಾಕ್ರಟಿಕ್ ಪಕ್ಷ(ಪಿಡಿಪಿ)ದ ನಾಲ್ವರು ನಾಯಕರಿಗೆ ಸರ್ಕಾರಿ ವಸತಿಯನ್ನು ಖಾಲಿ ಮಾಡುವಂತೆ ಸೂಚಿಸಲಾಗಿದೆ. ಪಿಡಿಪಿಯ ಮಾಜಿ ಸಚಿವ, ಪಾಂಪೋರ್​ ಶಾಸಕ ಝಹೂರ್​ ಮಿರ್​, ಮಾಜಿ ಶಾಸಕ ಮತ್ತು ಪಕ್ಷದ ಪ್ರಧಾನ ಕಾರ್ಯದರ್ಶಿ ನಿಜಾಮುದ್ದೀನ್​ ಭಟ್​, ಶೋಪಿಯಾನಾದ ಮಾಜಿ ಶಾಸಕ ಯೂಸುಫ್​ ಭಟ್​ ಮತ್ತು ಮಾಜಿ ಶಾಸಕ ಐಜಾಜ್​ ಮಿರ್​ ಅವರಿನ್ನೂ ಶ್ರೀನಗರದ ಸರ್ಕಾರಿ ವಸತಿಗಳಲ್ಲೇ ಇದ್ದರು. ಇದೀಗ ನಾಲ್ಕೂ ಮಂದಿಯ ಬಳಿ ಆ ಸರ್ಕಾರಿ ವಸತಿಯನ್ನು ಖಾಲಿ ಮಾಡುವಂತೆ ಸೂಚಿಸಲಾಗಿದೆ.

ಆದರೆ ಹೀಗೆ ತಮ್ಮ ಪಕ್ಷದ ನಾಲ್ವರ ಬಳಿ ಸರ್ಕಾರಿ ವಸತಿ ಖಾಲಿ ಮಾಡಲು ಸೂಚಿಸಿದ್ದರಿಂದ ಪಿಡಿಪಿ ಅಧ್ಯಕ್ಷೆ ಮೆಹಬೂಬಾ ಮುಫ್ತಿ ತೀವ್ರ ಕೋಪಗೊಂಡಿದ್ದಾರೆ. ಲೆಫ್ಟಿನೆಂಟ್ ಗವರ್ನರ್​ ಮನೋಜ್​ ಸಿನ್ಹಾ ಮಧ್ಯಪ್ರವೇಶ ಮಾಡಬೇಕು. ವಿಷಯ ಇತ್ಯರ್ಥ ಪಡಿಸಬೇಕು ಎಂದು ಆಗ್ರಹಿಸಿದ್ದಾರೆ. ನಮ್ಮ ಪಕ್ಷ ಪಿಡಿಪಿಯನ್ನು ಇಲ್ಲಿನ ಆಡಳಿತ ಟಾರ್ಗೆಟ್​ ಮಾಡುತ್ತಿದೆ. ಈ ನಾಲ್ವರೂ ಶಾಸಕರಿಗೆ ಪರ್ಯಾಯವಾಗಿ ಯಾವುದೇ ವ್ಯವಸ್ಥೆ ಮಾಡದೆ, ಏಕಾಏಕಿ ಸರ್ಕಾರಿ ವಸತಿ ತೊರೆಯುವಂತೆ ಹೇಳಲಾಗುತ್ತಿದೆ. ಹಾಗೇನಾದರೂ ಮಾಡಿದರೆ ನಾನು ಲೆಫ್ಟಿನಂಟ್​ ಗವರ್ನರ್​ ಆಡಳಿತವನ್ನೇ ಹೊಣೆ ಮಾಡುತ್ತೇನೆ ಎಂದು ಮನೋಜ್​ ಸಿನ್ಹಾರಿಗೆ ಪತ್ರವನ್ನೂ ಬರೆದಿದ್ದಾರೆ.

ಜಮ್ಮು-ಕಾಶ್ಮೀರದ ಆಡಳಿತ ಸದ್ಯ ಕೆಲವು ಹಳೇ ಪದ್ಧತಿಗಳನ್ನು ತೆಗೆದುಹಾಕಲು ನಿರ್ಧರಿಸಿದ್ದು, ಅದರ ಭಾಗವಾಗಿ ಸರ್ಕಾರಿ ಅಧಿಕಾರಿಗಳಿಗೆ ನೀಡಲಾಗಿದ್ದ ಸರ್ಕಾರಿ ವಸತಿಗಳನ್ನೂ ತೆರವುಗೊಳಿಸಿದೆ. ಇನ್ನು ಮಾಜಿ ಶಾಸಕರಿಗೂ ಖಾಲಿ ಮಾಡುವಂತೆ ಸೂಚಿಸಿದೆ.

ಇದನ್ನೂ ಓದಿ:Zika Virus: ಕೇರಳದಲ್ಲಿ 14 ಜನರಲ್ಲಿ ಝಿಕಾ ವೈರಸ್​ ಪತ್ತೆ; ರಾಜ್ಯ ಸರ್ಕಾರದ ಸಹಾಯಕ್ಕೆ ಆಗಮಿಸಿದ ಕೇಂದ್ರ ತಜ್ಞರ ತಂಡ