ರಾಜಕೀಯ ವಿಶ್ಲೇಷಣೆ | ತೆಲಂಗಾಣ ಗೆಲ್ಲುವ ಬಿಜೆಪಿ ಕನಸಿಗೆ ‘ಭಾಗ್ಯಲಕ್ಷ್ಮಿ’ಯ ಮುನ್ನುಡಿ
ಭಾಗ್ಯಲಕ್ಷ್ಮಿ ದೇಗುಲವನ್ನು ಚುನಾವಣಾ ವೇದಿಕೆಯಾಗಿಸಿಕೊಂಡ ಬಿಜೆಪಿಯ ಪ್ರಯತ್ನ ಮತ್ತು ಹೈದರಾಬಾದ್ ಹೆಸರನ್ನು ಭಾಗ್ಯನಗರವಾಗಿ ಮರು ನಾಮಕರಣ ಮಾಡುವ ಬಿಜೆಪಿ ನಾಯಕರ ಭರವಸೆಯ ಹಿಂದೆ 2023ರ ತೆಲಂಗಾಣ ವಿಧಾನಸಭೆ ಚುನಾವಣೆಯ ಕಾರ್ಯತಂತ್ರ ನಿಚ್ಚಳವಾಗಿರುವಂತೆ ಕಾಣಿಸುತ್ತದೆ.
Updated on:Nov 30, 2020 | 2:48 PM
ಹೈದರಾಬಾದ್: ಗ್ರೇಟರ್ ಹೈದರಾಬಾದ್ ಮಹಾನಗರ ಪಾಲಿಕೆ ಚುನಾವಣೆಯ ಪ್ರಚಾರಕ್ಕೆಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಭಾನುವಾರವಷ್ಟೇ ಮಹಾನಗರಕ್ಕೆ ಭೇಟಿ ನೀಡಿದ್ದರು. ಬೇಗಂಪೇಟ್ ವಿಮಾನ ನಿಲ್ದಾಣದಿಂದ ನೇರವಾಗಿ ಹೈದರಾಬಾದ್ ಓಲ್ಡ್ ಸಿಟಿಯಲ್ಲಿರುವ ಭಾಗ್ಯಲಕ್ಷ್ಮಿ ದೇಗುಲಕ್ಕೆ ತೆರಳಿ, ಆರತಿ ಬೆಳಗಿ ಪ್ರಚಾರ ಸಭೆ, ರೋಡ್ ಶೋಗಳಲ್ಲಿ ಪಾಲ್ಗೊಂಡರು.
ಅಮಿತ್ ಶಾ ಭೇಟಿಯಿಂದ ದೇಶದ ಗಮನ ಸೆಳೆದ ಭಾಗ್ಯಲಕ್ಷ್ಮಿ ದೇಗುಲ ದೊಡ್ಡ ಸುದ್ದಿಯೂ ಆಯಿತು. ಪ್ರಸಿದ್ಧ ಸ್ಮಾರಕ ಚಾರ್ಮಿನಾರ್ಗೆ ಹೊಂದಿಕೊಂಡಂತೆ ಇರುವ ಈ ದೇಗುಲವನ್ನು ಈ ಬಾರಿಯ ಹೈದರಾಬಾದ್ ಪಾಲಿಕೆ ಚುನಾವಣೆಯಲ್ಲಿ ಬಿಜೆಪಿ ಪ್ರಬಲ ಅಸ್ತ್ರವಾಗಿ ಬಳಸಿಕೊಂಡಿದೆ. ಅಮಿತ್ ಶಾ ಭೇಟಿಗೂ ಮೊದಲೇ ಬಿಜೆಪಿಯ ತೆಲಂಗಾಣ ಘಟಕ ಈ ದೇಗುಲವನ್ನು ಚುನಾವಣಾ ಕಥನದ (ಎಲೆಕ್ಷನ್ ನೆರೇಷನ್) ಭಾಗವಾಗಿಸಿಕೊಂಡಿತ್ತು.
ಹೈದರಾಬಾದ್ ನಗರದ ಹೆಸರನ್ನು ‘ಭಾಗ್ಯ ನಗರ’ ಎಂದು ಬದಲಿಸುವುದಾಗಿ ಯೋಗಿ ಆದಿತ್ಯನಾಥ್ ಸೇರಿದಂತೆ ಹಲವು ಹಿರಿಯ ನಾಯಕರು ನೀಡಿದ್ದ ಹೇಳಿಕೆಗಳನ್ನೂ ಇದೇ ಹಿನ್ನೆಲೆಯಲ್ಲಿ ಗಮನಿಸಬೇಕಿದೆ.
ಸದಾ ಸುದ್ದಿಯಲ್ಲಿ ಭಾಗ್ಯಲಕ್ಷ್ಮಿ ದೇಗುಲ
ಈಚೆಗೆ ಸುರಿದ ಭಾರಿ ಮಳೆಯಿಂದ ಹೈದರಾಬಾದ್ ಜನರು ತತ್ತರಿಸಿದ್ದು ನಿಮಗೆ ನೆನಪಿರಬಹುದು. ಅಲ್ಲಿನ ಟಿಆರ್ಎಸ್ ಸರ್ಕಾರವು ಪ್ರವಾಹ ಸಂತ್ರಸ್ತರಿಗೆ ₹10,000 ಕೋಟಿ ಪರಿಹಾರ ಘೋಷಿಸಿತು. ಈ ಪರಿಹಾರ ವಿತರಣೆ ನಿಲ್ಲಿಸಬೇಕೆಂದು ರಾಜ್ಯ ಚುನಾವಣಾ ಆಯೋಗವು ನಿರ್ದೇಶನ ನೀಡಿತು. ರಾಜ್ಯ ಚುನಾವಣಾ ಆಯೋಗದ ಈ ನಿರ್ದೇಶನಕ್ಕೆ ಬಿಜೆಪಿ ಸಲ್ಲಿಸಿದ ದೂರು ಕಾರಣ ಎಂಬ ಪುಕಾರಿನ ಜೊತೆಗೆ, ಬಿಜೆಪಿ ತೆಲಂಗಾಣ ಘಟಕದ ಅಧ್ಯಕ್ಷ ಬಂಡಿ ಸಂಜಯ್ ಬರೆದಿದ್ದಾರೆ ಎನ್ನಲಾದ ಪತ್ರವೊಂದು ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿತ್ತು.
ಈ ಆರೋಪವನ್ನು ಸಾರಾಸಗಟಾಗಿ ನಿರಾಕರಿಸಿದ್ದ ಸಂಜಯ್ ಬಂಡಿ, ಓಲ್ಡ್ ಸಿಟಿಯಲ್ಲಿರುವ ಭಾಗ್ಯಲಕ್ಷ್ಮಿ ದೇಗುಲದಲ್ಲಿ ಈ ಕುರಿತು ಆಣೆ ಪ್ರಮಾಣ ಮಾಡಲು ಸಿದ್ಧನಿದ್ದೇನೆ ಎಂದು ಸವಾಲು ಹಾಕಿದ್ದರು. ಚುನಾವಣಾ ಆಯೋಗ ಸ್ಪಷ್ಟನೆ ನೀಡಬೇಕೆಂದು ಆಗ್ರಹಿಸಿದ್ದರು. ಕಳೆದ ಶುಕ್ರವಾರ ಸಂಜಯ್, ನೂರಾರು ಬೆಂಬಲಿಗರೊಂದಿಗೆ ಭಾಗ್ಯಲಕ್ಷ್ಮಿ ದೇಗುಲಕ್ಕೆ ಭೇಟಿ ನೀಡಿದ್ದನ್ನೂ ಇಲ್ಲಿ ಸ್ಮರಿಸಬಹುದು.
ಪ್ರಧಾನಿ ನರೇಂದ್ರ ಮೋದಿ ಅವರ ಸೋದರ, ಪ್ರಹ್ಲಾದ್ ಮೋದಿ ಕಳೆದ ಗುರುವಾರ ಭಾಗ್ಯಲಕ್ಷ್ಮಿ ದೇಗುಲಕ್ಕೆ ಭೇಟಿ ನೀಡಿದ್ದರು. ಕಳೆದ ವರ್ಷ ನಗರಕ್ಕೆ ಭೇಟಿ ನೀಡಿದ್ದ ಆರ್ಎಸ್ಎಸ್ ಸರಸಂಘಚಾಲಕ ಮೋಹನ್ ಭಾಗವತ್ ಸಹ ಭಾಗ್ಯಲಕ್ಷ್ಮಿಗೆ ಪೂಜೆ ಸಲ್ಲಿಸಿದ್ದರು. ಹೈದರಾಬಾದ್ಗೆ ಭೇಟಿ ನೀಡುವ ಬಿಜೆಪಿ ಮತ್ತು ಆರ್ಎಸ್ಎಸ್ನ ಪ್ರಭಾವಿ ನಾಯಕರು ಭಾಗ್ಯಲಕ್ಷ್ಮಿ ದೇಗುಲಕ್ಕೆ ಭೇಟಿ ನೀಡುವ ಶಿಷ್ಟಾಚಾರ ಬೆಳೆಸಿಕೊಂಡಿದ್ದಾರೆ.
ಬಹುಕಾಲದ ವಿವಾದ ಅಯೋಧ್ಯೆ ರಾಮ ಮಂದಿರದಂತೆಯೇ ಹೈದರಾಬಾದ್ನ ಭಾಗ್ಯಲಕ್ಷ್ಮಿ ದೇಗುಲವಿರುವ ಭೂಮಿಯೂ ಬಹುಕಾಲದಿಂದ ವಿವಾದಗ್ರಸ್ತವಾಗಿದೆ. ಚಾರ್ಮಿನಾರ್ಗೆ ಸೇರಿದ ಭೂಮಿಯಲ್ಲಿಯೇ ದೇಗುಲವಿದೆ ಎಂದು ಕೆಲವರು ಆರೋಪಿಸುತ್ತಾರೆ. ಹಲವರು ಇಂಥ ಆರೋಪಗಳನ್ನು ನಿರಾಕರಿಸಿ, ಚಾರ್ಮಿನಾರ್ಗಿಂತಲೂ ಮೊದಲು ಇಲ್ಲಿ ದೇಗುಲವಿತ್ತು ಎಂದು ವಾದಿಸುತ್ತಾರೆ.
ಆದರೆ ಭಾರತೀಯ ಪುರಾತತ್ವ ಇಲಾಖೆಯು ಮಾತ್ರ ಈ ದೇಗುಲವನ್ನು ಸ್ಥಳಾಂತರಿಸಬೇಕು ಎಂಬ ನಿಲುವಿಗೆ ಹಲವು ದಶಕಗಳಿಂದ ಅಂಟಿಕೊಂಡಿದೆ. ಚಾರ್ಮಿನಾರ್ಗೆ ಹೊಂದಿಕೊಂಡಂತೆ ದೇಗುಲವಿರುವ ಕಾರಣದಿಂದಾಗಿಯೇ ಚಾರ್ಮಿನಾರ್ ಈವರೆಗೆ ವಿಶ್ವ ಪಾರಂಪರಿಕ ಸ್ಥಳಗಳ ಪಟ್ಟಿಯಲ್ಲಿ ಸ್ಥಾನ ಪಡೆಯಲಿಲ್ಲ ಎಂದು ಪುರಾತತ್ವ ಇಲಾಖೆ ಹೇಳಿದೆ.
ಭಾಗ್ಯಲಕ್ಷ್ಮಿ ದೇಗುಲ ಗರ್ಭಗೃಹವು ಚಾರ್ಮಿನಾರ್ನ ಗೋಡೆಗೆ ಹೊಂದಿಕೊಂಡಂತೆ ಇದೆ. ದೇಗುಲ ಕಟ್ಟಡದ ಕೆಲ ಭಾಗಗಳು ಮಿನಾರ ಪ್ರದೇಶದ ಒಳಗೆ ಬರುತ್ತದೆ. ಎರಡೂ ಕಟ್ಟಡಗಳ ನಡುವೆ ಸ್ಥಳವೇ ಇಲ್ಲ. ಚಾರ್ಮಿನಾರ್ ಸಂರಕ್ಷಣೆಗೆ ಇದು ಹಲವು ಸವಾಲುಗಳನ್ನು ಒಡ್ಡಿದೆ ಎಂಬ ಪುರಾತತ್ವ ಇಲಾಖೆ ಅಧಿಕಾರಿಗಳ ಹೇಳಿಕೆಯನ್ನು ದಿ ನ್ಯೂಸ್ ಮಿನಟ್ ಜಾಲತಾಣ ವರದಿ ಮಾಡಿದೆ.
2012ರಲ್ಲಿ ದಿ ಹಿಂದೂ ಪತ್ರಿಕೆಯೂ ಎರಡು ಚಿತ್ರಗಳನ್ನು ಮುದ್ರಿಸಿತ್ತು. 60 ವರ್ಷ ಹಳೆಯದು ಎನ್ನಲಾದ ಚಿತ್ರದಲ್ಲಿ ಚಾರ್ಮಿನಾರ್ ಸಮೀಪ ಭಾಗ್ಯಲಕ್ಷ್ಮಿ ದೇಗುಲ ಕಾಣಿಸುತ್ತಿರಲಿಲ್ಲ. ಚಾರ್ಮಿನಾರ್ಗಿಂತಲೂ ಭಾಗ್ಯಲಕ್ಷ್ಮಿ ದೇಗುಲ ಹಳೆಯದು ಎನ್ನುವವರು ಈ ಚಿತ್ರದ ಸತ್ಯಾಸತ್ಯತೆಯನ್ನು ಪ್ರಶ್ನಿಸಿದ್ದರು.
2023ಕ್ಕೆ ಸಿದ್ಧತೆ ಹೈದರಾಬಾದ್ ಅನ್ನು ಭಾಗ್ಯ ನಗರ (Bhagya Nagar) ಎಂದೇ ತಮ್ಮ ಭಾಷಣಗಳಲ್ಲಿ ಉಲ್ಲೇಖಿಸುವ ಬಿಜೆಪಿ ನಾಯಕರು, ಬಿಜೆಪಿ ಅಧಿಕಾರಕ್ಕೆ ಬಂದರೆ ನಗರದ ಹೆಸರು ಬದಲಿಸುವ ಭರವಸೆ ನೀಡಿದ್ದಾರೆ. ಆದರೆ ಊರಿನ ಹೆಸರು ಬದಲಿಸಲು ಮಹಾನಗರಪಾಲಿಕೆ ನಿರ್ಣಯ ಮಂಡಿಸಿ, ಅನುಮೋದಿಸಿ, ರಾಜ್ಯ ಸರ್ಕಾರಕ್ಕೆ ಕಳಿಸಿಕೊಡಬಹುದು. ಅದನ್ನು ಒಪ್ಪುವುದು ಅಥವಾ ಬಿಡುವುದು ರಾಜ್ಯ ಸರ್ಕಾರಕ್ಕೆ ಇರುವ ಅಧಿಕಾರ.
ಈ ವಿಚಾರವನ್ನು ಗಮನದಲ್ಲಿಸಿರಿಕೊಂಡು ವಿಶ್ಲೇಷಿಸಿದರೆ, ಭಾಗ್ಯಲಕ್ಷ್ಮಿ ದೇಗುಲವನ್ನು ಚುನಾವಣಾ ವೇದಿಕೆಯಾಗಿಸಿಕೊಂಡ ಬಿಜೆಪಿಯ ಪ್ರಯತ್ನ ಮತ್ತು ಹೈದರಾಬಾದ್ ಹೆಸರನ್ನು ಭಾಗ್ಯನಗರವಾಗಿ ಮರು ನಾಮಕರಣ ಮಾಡುವ ಬಿಜೆಪಿ ನಾಯಕರ ಭರವಸೆಯ ಹಿಂದೆ 2023ರ ತೆಲಂಗಾಣ ವಿಧಾನಸಭೆ ಚುನಾವಣೆಯ ಕಾರ್ಯತಂತ್ರ ನಿಚ್ಚಳವಾಗಿರುವಂತೆ ಕಾಣಿಸುತ್ತದೆ.
హైదరాబాద్ పర్యటన సందర్భంగా భాగ్యలక్ష్మి అమ్మవారి ఆలయాన్ని సందర్శించుకొని,అమ్మ ఆశీస్సులు అందుకున్నాను.
తెలంగాణ ప్రజల శ్రేయస్సు కోసం అమ్మవారిని ప్రత్యేకంగా ప్రార్థించాను.
భాగ్యలక్ష్మి అమ్మవారు,దేశ ప్రజలందరికీ కూడా ఆయురారోగ్యాలను, సుఖసంతోషాలను ప్రసాదిస్తుందని నమ్ముతున్నాను. pic.twitter.com/RV94j56rTa
— Amit Shah (@AmitShah) November 29, 2020
ಇನ್ನಷ್ಟು… ಹೈದರಾಬಾದ್ಗೆ ನವಾಬ ನಿಜಾಮರ ಡೈನಾಸ್ಟಿ ಸಾಕು, ಬಿಜೆಪಿಯ ಡೆಮಾಕ್ರಸಿ ಬೇಕು: ಅಮಿತ್ ಶಾ ಹೈದರಾಬಾದ್ನ ಪುನರುತ್ಥಾನ ಬಿಜೆಪಿಯಿಂದ ಮಾತ್ರ ಸಾಧ್ಯ: ಅಮಿತ್ ಶಾ ಹೈದರಾಬಾದ್ ಪಾಲಿಕೆ ಚುನಾವಣೆ: ಸಚಿವ ಸುಧಾಕರ್ ಉಸ್ತುವಾರಿಯಲ್ಲಿ ರೆಡಿಯಾಯ್ತು ರಣತಂತ್ರ ಹೈದರಾಬಾದ್ಗೆ ಇವತ್ತು ಗೆದ್ದರೆ ಮಾತ್ರ ಮುಂದೆ ಸಾಗುವ ಅವಕಾಶ ಸಿಗಬಹುದು
Published On - 2:35 pm, Mon, 30 November 20
