Video: ಮುಂಬೈ ಏರ್​​ಪೋರ್ಟ್​​ನಲ್ಲಿ ಭರ್ಜರಿ ಜನದಟ್ಟಣೆ; ವಿಮಾನ ಹಾರಾಟದಲ್ಲಿ ಅಸ್ತವ್ಯಸ್ತ, ಪ್ರಯಾಣಿಕರ ಆಕ್ರೋಶ

ಇಂದು ಬೆಳಗ್ಗೆ ಮುಂಬೈ ವಿಮಾನ ನಿಲ್ದಾಣ (Mumbai International Airport)  ಪ್ರಯಾಣಿಕರಿಂದ ತುಂಬಿ ಹೋಗಿತ್ತು. ಇಡೀ ವಿಮಾನನಿಲ್ದಾಣದಲ್ಲಿ ಎಲ್ಲ ಕಡೆಗೂ ಪ್ರಯಾಣಿಕರು ನಿಂತಿರುವ ದೃಶ್ಯದ ವಿಡಿಯೋ, ಫೋಟೋಗಳು ಇಂಟರ್​ನೆಟ್​​ನಲ್ಲಿ ವೈರಲ್ ಆಗುತ್ತಿವೆ. ಸಿಐಎಸ್​ಎಫ್​ ಸೆಕ್ಯೂರಿಟಿ ಗೇಟ್​​ ಬಳಿ ಜನರ ಉದ್ದನೆಯ ಕ್ಯೂ ಇದ್ದು, ಅವರೆಲ್ಲ ತಮ್ಮ ಬೋರ್ಡಿಂಗ್​ ಗೇಟ್​​ ಬಳಿ ಹೋಗಲು ತುಂಬ ಕಷ್ಟಪಡುತ್ತಿದ್ದರು. ಒಟ್ಟಾರೆ ಇಂದು ಬೆಳಗ್ಗೆ ಮುಂಬೈ ಏರ್​ಪೋರ್ಟ್​​ ಅವ್ಯವಸ್ಥೆಗಳ ಆಗರವಾಗಿ ಬಹುತೇಕ ಎಲ್ಲ ದೇಶೀಯ ವಿಮಾನಗಳೂ ವಿಳಂಬವಾಗಿವೆ. ಇದು ಹಬ್ಬದ ಸೀಸನ್ ಮತ್ತು ವೀಕೆಂಡ್​​ ಆಗಿರುವುದರಿಂದ ಏರ್​ಪೋರ್ಟ್​​ನಲ್ಲಿ ಇಷ್ಟು ದೊಡ್ಡ ಸಂಖ್ಯೆಯಲ್ಲಿ ಪ್ರಯಾಣಿಕರು ತುಂಬಿದ್ದರು ಎಂದು ಅಧಿಕಾರಿಗಳು ಹೇಳಿದ್ದಾರೆ.  

ಒಂದೆಡೆ ವಿಮಾನಗಳು ವಿಳಂವಾದರೆ, ಇನ್ನೂ ಕೆಲವು ಪ್ರಯಾಣಿಕರಿಗೆ ಬೋರ್ಡಿಂಗ್​ ಗೇಟ್​ಗೆ ಸರಿಯಾದ ಸಮಯಕ್ಕೆ ಹೋಗಲು ಸಾಧ್ಯವಾಗದೆ ತಾವು ಹೋಗಬೇಕಿದ್ದ ವಿಮಾನವನ್ನು ತಪ್ಪಿಸಿಕೊಂಡು ಪರದಾಡಿದ್ದಾರೆ. ಇದು ಗಲಾಟೆಗೂ ಕಾರಣವಾಗಿದೆ. ಕೆಲವರು ಏರ್​ಪೋರ್ಟ್​ ಅಧಿಕಾರಿಗಳು, ಸಿಬ್ಬಂದಿ ಬಳಿ ಜಗಳವನ್ನೂ ಮಾಡಿದ್ದಾರೆ. ಅವರನ್ನು ನಿಯಂತ್ರಿಸಲು ತುಂಬ ಸಿಬ್ಬಂದಿ ತುಂಬ ಕಷ್ಟಪಟ್ಟಿದ್ದಾರೆ.

ಬೆಳಗ್ಗೆ 6ಗಂಟೆಗೂ ಮೊದಲು ಹೊರಡಬೇಕಿದ್ದ ದೇಶೀಯ ವಿಮಾನಗಳು ಮಾತ್ರ ಸರಿಯಾದ ಸಮಯಕ್ಕೆ ಟೇಕ್​ ಆಫ್​ ಆಗಿವೆ. ಅದರಲ್ಲಿ ಹೈದರಾಬಾದ್​, ಗೋವಾ, ನಾಗ್ಪುರಕ್ಕೆ ಪ್ರಯಾಣಿಸಬೇಕಿದ್ದ ಏರ್​ ಇಂಡಿಯಾ ವಿಮಾನಗಳು, ಕೊಚ್ಚಿಗೆ ಹೋಗಬೇಕಿದ್ದ ಸ್ಪೈಸ್​ಜೆಟ್​ ಮತ್ತು ಕೋಲ್ಕತ್ತ, ಉದಯ್​ಪುರಕ್ಕೆ ತೆರಳಬೇಕಿದ್ದ ಇಂಡಿಗೋಗಳಷ್ಟೇ ಸರಿಯಾದ ಸಮಯಕ್ಕೆ ಟೇಕ್​ ಆಫ್​ ಆಗಿದ್ದು ಬಿಟ್ಟರೆ, 6ಗಂಟೆ ನಂತರ ಇದ್ದ ಎಲ್ಲ ವಿಮಾನಗಳೂ ವಿಳಂಬವಾಗಿಯೇ ಹೊರಟಿವೆ. ಕೆಲವು 20-30 ನಿಮಿಷ ತಡವಾಗಿದ್ದರೆ, ಇನ್ನೂ ಕೆಲವು ವಿಮಾನಗಳು ಒಂದು ತಾಸುಗಳ ಕಾಲ ತಡವಾಗಿ ಹೊರಟಿವೆ.

ಸೋಷಿಯಲ್​ ಮೀಡಿಯಾದಲ್ಲಿ ಅಸಮಾಧಾನ ತೋಡಿಕೊಂಡ ಜನರು
ಈ ಮಧ್ಯೆ ಮುಂಬೈ ಏರ್​​ಪೋರ್ಟ್​​ನ ಗಲಾಟೆ, ಉದ್ದನೆಯ ಕ್ಯೂನಲ್ಲಿ ಸಿಲುಕಿ ಬೆಂಡಾದ ಪ್ರಯಾಣಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಒಂದೆಡೆ ಚೆಕ್ಕಿಂಗ್​ ಪ್ರಕ್ರಿಯೆ ಬೇಗಬೇಗ ಮುಗಿಯುತ್ತಿಲ್ಲ. ಚೆಕ್ಕಿಂಗ್​ ಮುಗಿದರೂ ವಿಮಾನ ಹೊರಡಲು ವಿಳಂಬವಾಗುತ್ತಿದೆ. ಹಲವರ ಕೂಗಾಟ ಎಲ್ಲ ಸೇರಿ ತುಂಬ ಕಿರಿಕಿರಿಯಾಯಿತು ಎಂದು ಸೋಷಿಯಲ್​ ಮೀಡಿಯಾಗಳ ಮೂಲಕ ಅನೇಕರು ಹೇಳಿಕೊಂಡಿದ್ದಾರೆ. ಒಂದಷ್ಟು ಮಂದಿ ಜನಂಗುಳಿಯ ವಿಡಿಯೋ, ಫೋಟೋವನ್ನೂ ಶೇರ್​ ಮಾಡಿಕೊಂಡಿದ್ದಾರೆ. ಏರ್​​ಪೋರ್ಟ್​​ನಲ್ಲಿ ಇಷ್ಟರ ಮಟ್ಟಿಗೆ ಅವ್ಯವಸ್ಥೆಯುಂಟಾಗಿ, ನನ್ನಂತ ಹಲವು ಪ್ರಯಾಣಿಕರು ವಿಮಾನ ಮಿಸ್​ ಮಾಡಿಕೊಂಡಿದ್ದರೂ ಅಲ್ಲಿನ ಅಧಿಕಾರಿಗಳು ಯಾವುದೇ ಕ್ರಮ ಕೈಗೊಂಡಿಲ್ಲ. ಜನರನ್ನು ನಿಯಂತ್ರಿಸಲೂ ಪ್ರಯತ್ನ ಪಟ್ಟಿಲ್ಲ ಎಂದು ನೆಟ್ಟಿಗರೊಬ್ಬರು ಟ್ವೀಟ್​ ಮಾಡಿ, ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ವಿಮಾನ ನಿಲ್ದಾಣದ ಪ್ರತಿಕ್ರಿಯೆ
ಮುಂಬೈ ಏರ್​ಪೋರ್ಟ್ ಕೂಡ ಜನದಟ್ಟಣೆಯ ಬಗ್ಗೆ ಇಂದು ಬೆಳಗ್ಗೆ 11 ಗಂಟೆ ಹೊತ್ತಿಗೆ ಪ್ರತಿಕ್ರಿಯೆ ನೀಡಿದೆ. ಇದೀಗ ಹಬ್ಬದ ಸೀಸನ್​ ಶುರುವಾಗಿದೆ. ಅದರೊಂದಿಗೆ ವೀಕೆಂಡ್​ ಬೇರೆ ಬಂದಿದೆ. ಹಾಗಾಗಿಯೇ ಛತ್ರಪತಿ ಶಿವಾಜಿ ಮಹಾರಾಜ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಈ ಪರಿ ಜನದಟ್ಟಣೆ ಉಂಟಾಯಿತು. ಇದು ಬರಿ ನಮ್ಮಲ್ಲಷ್ಟೇ ಅಲ್ಲ, ದೇಶದ ಬೇರೆ ನಗರಗಳ ವಿಮಾನ ನಿಲ್ದಾಣದಲ್ಲೂ ಇದೇ ಪರಿಸ್ಥಿತಿ ಉಂಟಾಗಿತ್ತು.  ಹಾಗಂತ ಪ್ರಯಾಣಿಕರ ಭದ್ರತೆ, ಸುರಕ್ಷತೆ ಬಗ್ಗೆ ನಿರ್ಲಕ್ಷ್ಯ ವಹಿಸಿಲ್ಲ. ಆದ್ಯತೆಯ ಮೇರೆಗೆ ಎಲ್ಲ ರೀತಿಯ ಕ್ರಮಗಳನ್ನೂ ಕೈಗೊಳ್ಳಲಾಗಿದೆ. ಈ ವಿಚಾರದಲ್ಲಿ ಎಂದಿಗೂ ರಾಜಿ ಆಗುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ.

ಇದನ್ನೂ ಓದಿ: ಆನ್​ಲೈನ್ ಗೇಮ್ ಬ್ಯಾನ್: ಅನ್ನಪೂರ್ಣೇಶ್ವರಿ ನಗರದಲ್ಲಿ ಡ್ರೀಮ್ 11 ಆನ್ಲೈನ್ ಗೇಮ್ ಆ್ಯಪ್ ವಿರುದ್ಧ ಎಫ್ಐಆರ್

ಪಾಂಡವಪುರ ಶಾಸಕ ಸಿ.ಎಸ್.ಪುಟ್ಟರಾಜು ಮನೆ ಮೇಲೆ ಕಲ್ಲುತೂರಾಟ; ಮನೆ ಕಿಟಕಿ ಗಾಜು, 8 ಕಾರುಗಳ ಗಾಜು ಪುಡಿಪುಡಿ