ಗಡಿ ಸಂಘರ್ಷವಿದ್ದರೂ 2020ರಲ್ಲಿಯೂ ಚೀನಾದಿಂದಲೇ ಭಾರತ ಅತಿಹೆಚ್ಚು ಆಮದು

ಭಾರತ- ಚೀನಾ ಮಧ್ಯೆ 2020ನೇ ಇಸವಿಯಲ್ಲಿ ಬಹುತೇಕ ಉದ್ವಿಗ್ನ ವಾತಾವರಣವೇ ಇತ್ತು. ವಾಸ್ತವ ನಿಯಂತ್ರಣ ರೇಖೆ (Line of Actual Control – LAC) ಬಳಿ ಹಾಗೂ ಗಲ್ವಾನ್ ಕಣಿವೆಯಲ್ಲಿ ಉದ್ಭವಿಸಿದ ಸನ್ನಿವೇಶದ ಪರಿಣಾಮ ಇದಾಗಿತ್ತು. ಆದರೂ 2020ರ ಜನವರಿಯಿಂದ ಡಿಸೆಂಬರ್ ಮಧ್ಯೆ ಭಾರತವು ವಸ್ತುಗಳನ್ನು ಆಮದು ಮಾಡಿಕೊಂಡ ದೇಶಗಳ ಪಟ್ಟಿಯ ಟಾಪ್​ನಲ್ಲಿ ಚೀನಾವೇ ಇದೆ. 2020ರಲ್ಲಿ 58.71 ಬಿಲಿಯನ್ ಅಮೆರಿಕನ್ ಡಾಲರ್ ಮೌಲ್ಯದ ವಸ್ತುಗಳು ಚೀನಾದಿಂದ ಆಮದಾಗಿದೆ ಎಂದು ವಾಣಿಜ್ಯ ಮತ್ತು ಕೈಗಾರಿಕೆ ಖಾತೆ ರಾಜ್ಯ ಸಚಿವರಾದ ಹರ್​ದೀಪ್ ಸಿಂಗ್ ಪುರಿ ಲೋಕಸಭೆಗೆ ಬುಧವಾರ ಮಾಹಿತಿ ನೀಡಿದ್ದಾರೆ. ತೃಣಮೂಲ ಕಾಂಗ್ರೆಸ್ ಸಂಸದರಾದ ಮಾಲಾ ರಾಯ್ ಅವರ ಪ್ರಶ್ನೆಗೆ ಸಚಿವರು ಈ ಉತ್ತರ ನೀಡಿದ್ದಾರೆ.

ಸಚಿವರು ಈ ಬಗ್ಗೆ ನೀಡಿರುವ ಲಿಖಿತ ಉತ್ತರದಲ್ಲಿ, ಚೀನಾ, ಅಮೆರಿಕ, ಯುಎಇ, ಸೌದಿ ಅರೇಬಿಯಾ ಹಾಗೂ ಇರಾಕ್ ಈ ಐದು ದೇಶಗಳು ಭಾರತಕ್ಕೆ ಆಮದು ಮಾಡಿರುವ ಪಟ್ಟಿಯಲ್ಲಿ ಮೊದಲ ಐದು ಸ್ಥಾನದಲ್ಲಿವೆ ಎಂದಿದ್ದಾರೆ. ಚೀನಾದಿಂದ 58.71 ಬಿಲಿಯನ್ ಅಮೆರಿಕನ್ ಡಾಲರ್, ಅಮೆರಿಕದಿಂದ 26.89 ಬಿಲಿಯನ್ ಅಮೆರಿಕನ್ ಡಾಲರ್, ಯುನೈಟೆಡ್ ಅರಬ್ ಎಮಿರೇಟ್ಸ್​ನಿಂದ 23.96 ಬಿಲಿಯನ್ ಯುಎಸ್​​ಡಿ, ಸೌದಿ ಅರೇಬಿಯಾದಿಂದ 17.73 ಬಿಲಿಯನ್ ಡಾಲರ್ ಹಾಗೂ ಇರಾಕ್​ನಿಂದ 16.26 ಬಿಲಿಯನ್ ಅಮೆರಿಕನ್ ಡಾಲರ್ ಮೌಲ್ಯದ ವಸ್ತುಗಳನ್ನು 2020ರ ಜನವರಿಯಿಂದ ಡಿಸೆಂಬರ್ ಮಧ್ಯೆ ಆಮದು ಮಾಡಿಕೊಳ್ಳಲಾಗಿದೆ ಎಂದು ಮಾಹಿತಿ ನೀಡಿದ್ದಾರೆ.

ಭಾರತವು ಒಟ್ಟು 371.98 ಬಿಲಿಯನ್ ಯುಎಸ್​ಡಿಯಷ್ಟು ಆಮದು ಮಾಡಿಕೊಂಡಿದ್ದು, ಆ ಪೈಕಿ ಶೇಕಡಾ 38.59ರಷ್ಟು ಮೌಲ್ಯದ್ದು, ಅಂದರೆ 143.55 ಬಿಲಿಯನ್ ಯುಎಸ್​ಡಿ ಮೌಲ್ಯದ ವಸ್ತುಗಳ ಆಮದು ಐದು ದೇಶಗಳಿಂದ ಆಗಿದೆ. ದೇಶೀಯ ಉತ್ಪಾದನೆ ಮತ್ತು ಪೂರೈಕೆ ಮಧ್ಯದ ವ್ಯತ್ಯಾಸವನ್ನು ಭರ್ತಿ ಮಾಡಲು ಹಾಗೂ ವಿವಿಧ ವಸ್ತುಗಳಿಗೆ ಗ್ರಾಹಕರ ಬೇಡಿಕೆ ಮತ್ತು ಆದ್ಯತೆಯ ಕಾರಣಕ್ಕೆ ಆಮದು ಮಾಡಿಕೊಳ್ಳಲಾಗಿದೆ. ಟೆಲಿಕಾಂ ಸಾಧನಗಳು, ಕಂಪ್ಯೂಟರ್ ಹಾರ್ಡ್​ವೇರ್ ಮತ್ತು ಪೆರಿಫರಲ್​ಗಳು, ಗೊಬ್ಬರ, ಎಲೆಕ್ಟ್ರಾನಿಕ್ ಬಿಡಿ ಭಾಗಗಳು ಮತ್ತು ಸಾಧನ, ಪ್ರಾಜೆಕ್ಟ್ ವಸ್ತುಗಳು, ಸಾವಯವ ರಾಸಾಯನಿಕಗಳು, ಗ್ರಾಹಕ ಎಲೆಕ್ಟ್ರಾನಿಕ್ಸ್, ಎಲೆಕ್ಟ್ರಿಕಲ್ ಮಶೀನರಿಗಳು ಮುಂತಾದವು ಆಮದು ಮಾಡಿಕೊಳ್ಳಲಾಗಿದೆ ಎಂದು ಸಚಿವರು ತಿಳಿಸಿದ್ದಾರೆ.

ಇದನ್ನೂ ಓದಿ: Jack Ma: ಜಾಕ್ ಮಾಗೆ ಸೇರಿದ ಉದ್ಯಮಗಳ ಕತ್ತು ಹಿಸುಕುತ್ತಿದೆ ಚೀನಾದ ಕಮ್ಯುನಿಸ್ಟ್ ಸರ್ಕಾರ