Kerala Assembly Elections 2021: ಕೇರಳದ ಮಹಿಳಾ ಕಾಲೇಜು ವಿದ್ಯಾರ್ಥಿಗಳಿಗೆ ಜಪಾನ್ನ ಸಮರ ಕಲೆ ಕಲಿಸಿದ ರಾಹುಲ್ ಗಾಂಧಿ
Rahul Gandhi teaches Aikido: ನೀವು ಕಡಿಮೆ ಶಕ್ತಿಶಾಲಿಗಳು ಎಂದು ಸಮಾಜ ನಿಮ್ಮಲ್ಲಿ ಹೇಳುತ್ತದೆ. ಅದನ್ನು ಕೇಳಬೇಡಿ ಎಂದು ಹೇಳಿದ ರಾಹುಲ್ ಗಾಂಧಿ, ನಿಮ್ಮ ಶಕ್ತಿಯನ್ನು ದುರುಪಯೋಗಪಡಿಸಿಕೊಳ್ಳಬೇಡಿ ಎಂದು ವಿದ್ಯರ್ಥಿಗಳಿಗೆ ಸಲಹೆ ನೀಡಿದ್ದಾರೆ
Updated on:Mar 23, 2021 | 1:43 PM
ಕೊಚ್ಚಿ: ಕೇರಳ ವಿಧಾನಸಭೆ ಚುನಾವಣೆಗೆ ಯುಡಿಎಫ್ ಪರ ಪ್ರಚಾರ ನಡೆಸುತ್ತಿರುವ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಸೋಮವಾರ ಕೊಚ್ಚಿಯ ಸಂತ ತೆರೆಸಾ ಮಹಿಳಾ ಕಾಲೇಜಿಗೆ ಭೇಟಿ ನೀಡಿ ಅಲ್ಲಿನ ವಿದ್ಯಾರ್ಥಿಗಳಿಗೆ ಜಪಾನ್ ನ ಸಮರ ಕಲೆ ಕಲಿಸಿದ್ದಾರೆ. ಕಾಲೇಜಿನ ವಿದ್ಯಾರ್ಥಿನಿಯೊಬ್ಬರು ನಮಗೆ ಸ್ವಯಂ ರಕ್ಷಣೆ ವಿಧಾನಗಳನ್ನು ಹೇಳಿಕೊಡುತ್ತೀರಾ ಎಂದು ಕೇಳಿದಾಗ ರಾಹುಲ್ ಜಪಾನ್ ಸಮರ ಕಲೆ ‘ಐಕಿಡೊ’ ಹೇಳಿಕೊಟ್ಟಿದ್ದಾರೆ. ಸ್ವಯಂ ರಕ್ಷಣೆಗೆ ಐಕಿಡೊ ಯಾವ ರೀತಿ ಸಹಾಯ ಮಾಡುತ್ತದೆ ಎಂಬುದನ್ನು ತೋರಿಸಿಕೊಟ್ಟ ರಾಹುಲ್, ಇದು ಜೀವನದ ಸೂತ್ರ. ನಿಮ್ಮೊಳಗೆ ಅಪಾರ ಶಕ್ತಿ ಇದೆ, ಅದನ್ನು ನೀವು ಸರಿಯಾದ ರೀತಿಯಲ್ಲಿ ಬಳಸಬೇಕು. ನೀವು ಅದನ್ನು ಸರಿಯಾದ ರೀತಿಯಲ್ಲಿ ಬಳಸದೇ ಇದ್ದರೆ ನೀವು ದುರ್ಬಲರಾಗುತ್ತೀರಿ, ನೀವು ಗೊಂದಲಗೊಳಗಾಗುತ್ತೀರಿ, ನಿಮ್ಮ ಶಕ್ತಿ ವ್ಯರ್ಥವಾಗುತ್ತದೆ. ನೀವು ಪರಿಸ್ಥಿತಿಯನ್ನು ಅರ್ಥ ಮಾಡಿಕೊಂಡು, ನೀವು ಸರಿಯಾದ ಸ್ಥಾನದಲ್ಲಿದ್ದರೆ ನಿಮ್ಮನ್ನು ಯಾರಿಗೂ ಅಲುಗಾಡಿಸಲು ಸಾಧ್ಯವಿಲ್ಲ ಎಂದಿದ್ದಾರೆ.
ಮಹಿಳೆಯರು ಪುರುಷರಿಗಿಂತ ಹೆಚ್ಚು ಶಕ್ತಿಶಾಲಿಗಳಾಗಿರುತ್ತಾರೆ, ಆದರೆ ಅವರ ಶಕ್ತಿ ಯಾವ ರೀತಿ ಕಾರ್ಯ ನಿರ್ವಹಿಸುತ್ತದೆ ಎಂಬುದನ್ನು ಅರ್ಥ ಮಾಡಿಕೊಳ್ಳದ ಕಾರಣ ಅವರು ಮೋಸ ಹೋಗುತ್ತಿರುತ್ತಾರೆ ಎಂದಿದ್ದಾರೆ ರಾಹುಲ್.
ಸಮಾಜ ನಿಮ್ಮನ್ನು ತಳ್ಳುತ್ತದೆ. ಭಾರತದಲ್ಲಿನ ಸಮಾಜ ನಿಮ್ಮ ಜತೆ ಕೆಟ್ಟದಾಗಿ ವರ್ತಿಸುತ್ತದೆ. ಪ್ರತಿ ದಿನ ನಿಮ್ಮನ್ನು ಸಮಾಜ ಅವಮಾನಿಸುತ್ತದೆ. ನೀವು ಏನು ಮಾಡಬೇಕು ಎಂದು ಬಯಸುತ್ತಿರೋ ಅದನ್ನು ಮಾಡಲು ಸಮಾಜ ಬಿಡುವುದಿಲ್ಲ. ಹಾಗಾಗಿ ನೀವು ನಿಮ್ಮೊಳಗೆ ಗಟ್ಟಿಯಾಗಬೇಕಿದೆ. ನಿಮ್ಮನ್ನು ಸಮಾಜ ಯಾವ ರೀತಿ ತಳ್ಳುತ್ತಿದೆ ಎಂಬುದನ್ನು ನೀವು ಅರ್ಥ ಮಾಡಿಕೊಳ್ಳಬೇಕಿದೆ. ನಿಮಗೆ ನೋವುಂಟು ಮಾಡುವ ಶಕ್ತಿಯ ಬಗ್ಗೆ ಅರಿಯಿರಿ, ಆಮೇಲೆ ನಿಮ್ಮ ನಿಲುವನ್ನು ಸರಿಯಾಗಿ ಬಳಸಿಕೊಳ್ಳಿ ಎಂದು ಹೇಳಿದ್ದಾರೆ. ಪುರುಷ ಮತ್ತು ಮಹಿಳೆಯರು ಸರಿಸಮಾನರು ಎಂದು ವಿದ್ಯಾರ್ಥಿನಿಯೊಬ್ಬರು ಹೇಳಿದಾಗ ಇದನ್ನು ನಾನು ಒಪ್ಪಲಾರೆ ಎಂದಿದ್ದಾರೆ ರಾಹುಲ್.
ನೀವು ಕಡಿಮೆ ಶಕ್ತಿಶಾಲಿಗಳು ಎಂದು ಸಮಾಜ ನಿಮ್ಮಲ್ಲಿ ಹೇಳುತ್ತದೆ. ಅದನ್ನು ಕೇಳಬೇಡಿ ಎಂದು ಹೇಳಿದ ರಾಹುಲ್, ನಿಮ್ಮ ಶಕ್ತಿಯನ್ನು ದುರುಪಯೋಗಪಡಿಸಿಕೊಳ್ಳಬೇಡಿ ಎಂದು ಸಲಹೆ ನೀಡಿದ್ದಾರೆ. ನೀವು ಹೆಚ್ಚು ಶಕ್ತಿಶಾಲಿಗಳು ಎಂದು ನಿಮಗೆ ಅರಿವಾದ ಕೂಡಲೇ ಅದನ್ನು ದುರ್ಬಳಕೆ ಮಾಡುವ ಪ್ರವೃತ್ತಿಯೂ ಬರುತ್ತದೆ. ಆದರೆ ಯಾವತ್ತೂ ನಿಮ್ಮ ಶಕ್ತಿಯನ್ನು ದುರ್ಬಳಕೆ ಮಾಡಿಕೊಳ್ಳಬೇಡಿ ಎಂದು ರಾಹುಲ್ ಹೇಳಿದ್ದಾರೆ.
Mr. @RahulGandhi teaching aikido techniques to the students of St. Theresa college, cochin. pic.twitter.com/J3t6fC4BJP
— Elizabeth (@Elizatweetz) March 22, 2021
ವಿದ್ಯಾರ್ಥಿಗಳೊಂದಿಗೆ ನಡೆದ ಸಂವಾದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡಿದ ರಾಹುಲ್, ‘ದೇಶದ ಆರ್ಥಿಕತೆ ಕುಸಿಯಲು ಕೇಂದ್ರ ಸರ್ಕಾರದ ದುರಾಡಳಿತವೇ ಕಾರಣ’ ಎಂದು ದೂರಿದರು. ಆಡಳಿತ ನಿರ್ವಹಣೆಯಲ್ಲಿ ದೊಡ್ಡಮಟ್ಟದ ತಪ್ಪುಗಳು ಆಗಿರುವುದರಿಂದ ಆರ್ಥಿಕ ಸಮಸ್ಯೆಗಳು ಇನ್ನಷ್ಟು ದಿನ ಮುಂದುವರಿಯಲಿದೆ. ಜನರ ಕೈಗೆ ಹಣ ಸಿಗುವಂತೆ ಮಾಡಿದರೆ ಮಾತ್ರ ಈ ಸಂಕಷ್ಟದಿಂದ ನಾವು ಹೊರಬರಲು ಸಾಧ್ಯ. ಆದರೆ ಸರ್ಕಾರ ಈ ಬಗ್ಗೆ ಯಾರ ಸಲಹೆಗಳನ್ನೂ ಕಿವಿಮೇಲೆ ಹಾಕಿಕೊಳ್ಳುತ್ತಿಲ್ಲ. ಉತ್ಪಾದನೆ ಹೆಚ್ಚಿಸಿ ಎಂದೇ ಹೇಳುತ್ತಿದೆ’ ಎಂದು ವಿಶ್ಲೇಷಿಸಿದರು.
Women in India have to get strength from inside. For that to happen you must understand the way that you are being pushed, understand the forces that are hurting you, and then position yourself properly.: Shri @RahulGandhi#SwagathamRahulGandhi pic.twitter.com/UqvD7tCtUf
— Congress (@INCIndia) March 22, 2021
‘ಆರ್ಥಿಕತೆಗೆ ಪುನಶ್ಚೇತನ ನೀಡಲು ಬಳಕೆ ಹೆಚ್ಚಿಸುವುದು ಉತ್ತಮ ದಾರಿ. ಆದರೆ ಅದು ಸಾಧ್ಯವಾಗಲು ಜನರ ಕೈಗೆ ಹಣ ಸಿಗಬೇಕು. ಕೈಲಿ ಹಣ ಇದ್ದರೆ ಜನರು ವಸ್ತುಗಳನ್ನು ಖರೀದಿಸಲು, ಬಳಸಲು ಆರಂಭಿಸುತ್ತಾರೆ. ಆರ್ಥಿಕತೆಯ ಚಕ್ರ ತಿರುಗುತ್ತದೆ’ ಎಂದು ಪ್ರಶ್ನೆಯೊಂದಕ್ಕೆ ಉತ್ತರಿಸುವಾಗ ತಿಳಿಸಿದರು. ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾತೈಲ ಧಾರಣೆ ಕುಸಿದರೂ ಭಾರತದಲ್ಲಿ ತೈಲೋತ್ಪನ್ನಗಳ ಬೆಲೆ ಹೆಚ್ಚಾಗುತ್ತಿದೆ. ನೋಟು ಅಮಾನ್ಯೀಕರಣ, ಜಿಎಸ್ಟಿ ಕಾರಣದಿಂದ ಆರ್ಥಿಕತೆಗೆ ಸಾಕಷ್ಟು ಹಾನಿಯಾಗಿದೆ. ಕೋವಿಡ್ ಪಿಡುಗು ಶುರುವಾಗುವ ಮೊದಲೇ ಭಾರತದ ಆರ್ಥಿಕತೆ ಸಂಕಷ್ಟದಲ್ಲಿತ್ತು, ಕೋವಿಡ್-19 ಬಂದ ನಂತರ ಆರ್ಥಿಕತೆ ಸಂಪೂರ್ಣ ಕುಸಿಯಿತು ಎಂದು ಹೇಳಿದರು.
ಇದನ್ನೂ ಓದಿ: ಆಡಳಿತ ನಡೆಸಲು ದುಡ್ಡಿಲ್ಲದ ಸರ್ಕಾರ ಜನರ ಕಿಸೆಯಿಂದ ಹಣ ಕಿತ್ತುಕೊಳ್ಳುತ್ತಿದೆ: ಕೇಂದ್ರದ ವಿರುದ್ಧ ರಾಹುಲ್ ಗಾಂಧಿ ಟೀಕೆ
ಸಿಕ್ಸ್ ಪ್ಯಾಕ್ನಲ್ಲಿ ಮಿಂಚಿದ ರಾಹುಲ್ ಗಾಂಧಿ; ಫಿಟ್ನೆಸ್ ಟಿಪ್ಸ್ ಕೇಳಿದ ಸೆಲೆಬ್ರಿಟಿಗಳು
Published On - 1:39 pm, Tue, 23 March 21
