ಸಮೀಕ್ಷೆಗಳೆಲ್ಲ ಮಹಾಘಟಬಂಧನ್ ಗೆಲ್ಲಬಹುದೆಂದು ಹೇಳುತ್ತಿವೆ | Exit Polls predict Grand Alliance coming to power in Bihar

ವಿವಿಧ ಚ್ಯಾನೆಲ್​ಗಳು ಮತ್ತು ಸಂಸ್ಥೆಗಳು ನಡೆಸಿರುವ ಬಿಹಾರ ವಿಧಾನಸಭಾ ಚುನಾವಣೋತ್ತರ ಮತದಾನ ಸಮೀಕ್ಷೆಗಳ ಪ್ರಕಾರ ಬಿಹಾರದಲ್ಲಿ ಬದಲಾವಣೆಯ ಗಾಳಿ ಬೀಸುವ ಲಕ್ಷಣಗಳು ಗೋಚರಿಸುತ್ತಿವೆ. ಎಲ್ಲ ಸಮೀಕ್ಷೆಗಳು ಮಹಾಘಟಬಂಧನ್​ಗೆ ಹೆಚ್ಚು ಸ್ಥಾನಗಳು ಸಿಗಲಿವೆಯೆಂದು ಹೇಳುತ್ತಿವೆ.

ಟಿವಿ9 ಭರತ್​ವರ್ಷ್‌ ನಡೆಸಿರುವ ಸಮೀಕ್ಷೆ ಅನ್ವಯ ಮಹಾಘಟಬಂಧನ್‌ 115-125 ಕ್ಷೇತ್ರಗಳಲ್ಲಿ ಗೆಲ್ಲುವ ಸಾಧ್ಯತೆಯಿದ್ದರೆ ಎನ್​ಡಿಎ 110-120 ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸಬಹುದು. ಎಲ್​ಜೆಪಿ 3 ರಿಂದ 5 ಕ್ಷೇತ್ರಗಳಲ್ಲಿ ಮತ್ತು ಪಕ್ಷೇತರರು 10-15 ಸೀಟುಗಳನ್ನು ಗೆಲ್ಲಬಹುದೆಂದು ಭರತ್​ವರ್ಷ್‌ ಸಮೀಕ್ಷೆ ಹೇಳುತ್ತದೆ.

ಸಿ-ವೋಟರ್ ಸಮೀಕ್ಷೆ ಸಹ ಮಹಾಘಟಬಂಧನ್​ಗೆ ಹೆಚ್ಚಿನ ಸ್ಥಾನ ಸಿಗಲಿವೆಯೆಂದು ಹೇಳಿದೆ. ಇದು ನಡೆಸಿರುವ ಸಮೀಕ್ಷೆ ಪ್ರಕಾರ ಎನ್​ಡಿಎ 116 ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸುವ ಸಾಧ್ಯತೆಯಿದ್ದರೆ, ಮಹಾಘಟಬಂಧನ್ 120 ಕ್ಷೇತ್ರಗಳಲ್ಲಿ ಗೆಲ್ಲಬಹುದಾಗಿದೆ. ರಾಮ್ ವಿಲಾಸ್ ಪಾಸ್ವಾನ್ ಅವರ ಪುತ್ರ ಚಿರಾಗ್ ಪಾಸ್ವಾನ್ ಆವರ ಎಲ್​ಜೆಪಿ 1 ಕ್ಷೇತ್ರದಲ್ಲಿ ಮಾತ್ರ ಜಯ ಸಾಧಿಸಲಿದೆಯೆಂದು ಅದು ಭವಿಷ್ಯ ನುಡಿದಿದೆ. ಹಾಗೆಯೇ 6 ಕ್ಷೇತ್ರಗಳಲ್ಲಿ ಪಕ್ಷೇತರ ಅಭ್ಯರ್ಥಿಗಳು ಗೆಲುವು ಸಾಧಿಸಬಹುದೆಂದು ಸಿ-ವೋಟರ್ ಸಮೀಕ್ಷೆ ಹೇಳುತ್ತದೆ.

ಜನ್​ ಕಿ ಬಾತ್ ನಡೆಸಿರುವ ಸಮೀಕ್ಷೆಯ ಪ್ರಕಾರ​ ಮಹಾಘಟಬಂಧನ್‌ಗೆ ಹೆಚ್ಚು ಸ್ಥಾನ ಲಭ್ಯವಾಗಲಿವೆ. ಅದಕ್ಕೆ 118-138 ಕ್ಷೇತ್ರಗಳಲ್ಲಿ ಗೆಲ್ಲುವ ಅವಕಾಶಗಳಿದ್ದರೆ ಬಿಜೆಪಿ, ಜೆಡಿ (ಯು) ಪಕ್ಷಗಳನ್ನೊಳಗೊಂಡ ಎನ್​ಡಿಎಗೆ 91-117 ಕ್ಷೇತ್ರಗಳಲ್ಲಿ ಗೆಲುವು ದಕ್ಕುವ ಸಾಧ್ಯತೆಯಿದೆ. ಎಲ್​ಜೆಪಿ 5 ರಿಂದ 8 ಕ್ಷೇತ್ರಗಳಲ್ಲಿ ಮಾತ್ರ ಗೆಲುವು ಸಾಧಿಸುವ ಸಾಧ್ಯತೆಯಿದ್ದರೆ ಪಕ್ಷೇತರ ಅಭ್ಯರ್ಥಿಗಳು 3-6 ಸೀಟುಗಳನ್ನು ಕಬಳಿಸಬಹುದೆಂದು ಜನ್​ ಕಿ ಬಾತ್ ನಡೆಸಿರುವ ಸಮೀಕ್ಷೆ ಹೇಳುತ್ತದೆ.

ಟೈಮ್ಸ್​​ ನೌ ಚ್ಯಾನೆಲ್ ಸಿ ವೋಟರ್ ಸಹಯೋಗದೊಂದಿಗೆ ನಡೆಸಿರುವ ಸಮೀಕ್ಷೆಯ ಪ್ರಕಾರವೂ ಮಹಾಘಟಬಂಧನ್ ಹೆಚ್ಚು ಸ್ಥಾನಗಳನ್ನು ಗೆಲ್ಲಲಿದೆ. ಮಹಾಘಟಬಂಧನ್​ 120 ಕ್ಷೇತ್ರಗಳನ್ನು ತನ್ನದಾಗಿಸಿಕೊಳ್ಳುವ ಸಾಧ್ಯತೆಯಿದ್ದರೆ ಎನ್​ಡಿಎ 116 ಕ್ಷೇತ್ರಗಳಲ್ಲಿ ಗೆಲುವು ಲಭ್ಯವಾಗಬಹುದೆಂದು ಸಮೀಕ್ಷೆ ಹೇಳುತ್ತದೆ. ಎಲ್​ಜೆಪಿ 6 ಕ್ಷೇತ್ರಗಳಲ್ಲಿ ಮತ್ತು 1 ಕ್ಷೇತ್ರದಲ್ಲಿ ಪಕ್ಷೇತರ ಅಭ್ಯರ್ಥಿ ಗೆಲ್ಲುವ ಸಾಧ್ಯತೆಯಿದೆ.

ಹಾಗೆಯೇ, ಎಬಿಪಿ ವಾಹಿನಿ ನಡೆಸಿರುವ ಸಮೀಕ್ಷೆಯ ಪ್ರಕಾರ ಮಹಾಘಟಬಂಧನ್‌ಗೆ 108-131 ಕ್ಷೇತ್ರಗಳಲ್ಲಿ ಜಯ ಲಭಿಸುವ ಸಾಧ್ಯತೆಯಿದೆ ಮತ್ತು ಎನ್​ಡಿಎಗೆ 104-128 ಕ್ಷೇತ್ರಗಳಲ್ಲಿ ಗೆಲುವು ದಕ್ಕಬಹುದು. ಎಲ್​ಜೆಪಿ 1-3 ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸುವ ಸಾಧ್ಯತೆಯಿದೆ ಮತ್ತು ಪಕ್ಷೇತರ ಅಭ್ಯರ್ಥಿಗಳು 4-8 ಕ್ಷೇತ್ರಗಳಲ್ಲಿ ಜಯಭೇರಿ ಬಾರಿಸಬಹುದೆಂದು ಈ ಸಮೀಕ್ಷೆ ಹೇಳುತ್ತದೆ.

ಕೊನೆಯದಾಗಿ, ಪೋಲ್ ಆಫ್​ ಪೋಲ್ಸ್‌ ಸಮೀಕ್ಷೆಯಂತೆಯೂ ಮಹಾಘಟಬಂಧನ್‌ಗೆ ಹೆಚ್ಚು ಸ್ಥಾನಗಳು ಲಭಿಸಲಿದೆ. ಇದರ ಪ್ರಕಾರ ಮಹಾಘಟಬಂಧನ್​ 123 ಸೀಟುಗಳು ಸಿಗಲಿವೆ ಮತ್ತು ಎನ್​ಡಿಎಗೆ 112 ಕ್ಷೇತ್ರಗಳಲ್ಲಿ ಜಯ ದಕ್ಕಲಿದೆ. ಎಲ್​ಜೆಪಿ 4 ಕ್ಷೇತ್ರಗಳಲ್ಲಿ ಗೆಲುವು ಸಾಧಿಸುವ ಸಾಧ್ಯತೆಯಿದೆ ಮತ್ತು 4 ಕ್ಷೇತ್ರಗಳು ಪಕ್ಷೇತರ ಅಭ್ಯರ್ಥಿಗಳ ಪಾಲಾಗಲಿವೆಯೆಂದು ಪೋಲ್ ಆಫ್​ ಪೋಲ್ಸ್‌ ಸಮೀಕ್ಷೆ ಹೇಳುತ್ತದೆ.