Farmers Protest: ರೈತ ಸಾವಿನ ಬಗ್ಗೆ ಸಚಿವ ಜೆ.ಪಿ. ದಲಾಲ್ ಹೇಳಿಕೆ; ಪ್ರತಿಕೃತಿ ದಹಿಸಿ ಚಳುವಳಿಗಾರರ ಆಕ್ರೋಶ
Farmers Protest: ಜೆ.ಪಿ. ದಲಾಲ್ ನೀಡಿರುವ ಈ ಹೇಳಿಕೆ ವಿರುದ್ಧ ಹರ್ಯಾಣದಲ್ಲಿ ಜನಾಕ್ರೋಶ ಹೆಚ್ಚಿದೆ. ರಾಜ್ಯ ಹೆದ್ದಾರಿಯ ಟೋಲ್ ಗೇಟ್ ಬಳಿ ಪ್ರತಿಭಟನೆ ನಡೆಸುತ್ತಿರುವ ರೈತರು ದಲಾಲ್ ಪ್ರತಿಕೃತಿಯನ್ನು ದಹಿಸಿದ್ದಾರೆ.
Updated on:Apr 06, 2022 | 7:59 PM
ಚಂಡೀಗಢ: ಕೇಂದ್ರ ಸರ್ಕಾರದ ಕೃಷಿ ಕಾಯ್ದೆಗಳ ವಿರುದ್ಧದ ಹೋರಾಟದಲ್ಲಿ ಮೃತಪಟ್ಟ ರೈತರ ಬಗ್ಗೆ ಬೇಜಾವ್ದಾಬರಿ ಹೇಳಿಕೆ ನೀಡಿರುವ, ರಾಜ್ಯ ಕೃಷಿ ಮತ್ತು ರೈತ ಕಲ್ಯಾಣ ಸಚಿವ ಜೆ.ಪಿ. ದಲಾಲ್ ವಿರುದ್ಧ ಹರ್ಯಾಣದ ವಿವಿಧೆಡೆಗಳಲ್ಲಿ ಪ್ರತಿಭಟನೆ ವ್ಯಕ್ತವಾಗಿದೆ. ದಲಾಲ್ ಪ್ರತಿಕೃತಿಯನ್ನು ದಹಿಸುವ ಮೂಲಕ ಪ್ರತಿಭಟನಾಕಾರರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದ ವೀಡಿಯೋ ಒಂದರಲ್ಲಿ, ರೈತ ಚಳುವಳಿಯಲ್ಲಿ ಭಾಗಿಯಾಗಿ ಮೃತಪಟ್ಟ ರೈತರು ಮನೆಯಲ್ಲೇ ಉಳಿದಿದ್ದರೂ ಸಾವನ್ನಪ್ಪುತ್ತಿದ್ದರು ಎಂದು ಹೇಳಿದ್ದರು. ಕೃಷಿ ಕಾಯ್ದೆ ವಿರುದ್ಧದ ಹೋರಾಟದಲ್ಲಿ ಸುಮಾರು 200 ರೈತರು ಮೃತಪಟ್ಟಿರುವ ಬಗ್ಗೆ ಮಾಧ್ಯಮವೊಂದು ಕೇಳಿದ್ದ ಪ್ರಶ್ನೆಗೆ ದಲಾಲ್ ಹೀಗೆ ಉತ್ತರಿಸಿದ್ದರು.
‘ಒಂದರಿಂದ ಎರಡು ಲಕ್ಷ ಮಂದಿ ರೈತರಲ್ಲಿ, ಆರು ತಿಂಗಳ ಅವಧಿಯಲ್ಲಿ 200 ಜನರು ಸಾಯುವುದಿಲ್ಲವೇ? ಹೋರಾಟದಲ್ಲಿ ಪಾಲ್ಗೊಂಡು ಮೃತರಾದವರು ಮನೆಯಲ್ಲಿದ್ದರೂ ಮರಣ ಹೊಂದುತ್ತಿದ್ದರು’ ಎಂದು ದಲಾಲ್ ಮಾತನಾಡಿದ್ದರು. ಈ ಹೇಳಿಕೆ ನೀಡಿದ ಬಳಿಕ ದಲಾಲ್, ‘ನನ್ನ ಮಾತುಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ತಿರುಚಲಾಗಿದೆ. ಅಪಾರ್ಥ ಕಲ್ಪಿಸಲಾಗಿದೆ. ಅದರಿಂದ ಯಾರಿಗಾದರೂ ನೋವಾಗಿದ್ದರೆ, ನಾನು ಕ್ಷಮೆಯಾಚಿಸುತ್ತೇನೆ. ರೈತರಿಗಾಗಿ ಕೆಲಸ ಮಾಡುವುದನ್ನು ನಾನು ಮುಂದುವರಿಸುತ್ತೇನೆ. ಯಾರಾದರೂ ಸಾವನ್ನಪ್ಪುವುದು ನೋವಿನ ಸಂಗತಿ’ ಎಂದು ಸ್ಪಷ್ಟೀಕರಣ ನೀಡಿದ್ದರು.
ಜೆ.ಪಿ. ದಲಾಲ್ ನೀಡಿರುವ ಈ ಹೇಳಿಕೆ ವಿರುದ್ಧ ಹರ್ಯಾಣದಲ್ಲಿ ಜನಾಕ್ರೋಶ ಹೆಚ್ಚಿದೆ. ರಾಜ್ಯ ಹೆದ್ದಾರಿಯ ಟೋಲ್ ಗೇಟ್ ಬಳಿ ಪ್ರತಿಭಟನೆ ನಡೆಸುತ್ತಿರುವ ರೈತರು ದಲಾಲ್ ಪ್ರತಿಕೃತಿಯನ್ನು ದಹಿಸಿದ್ದಾರೆ. ಆಲ್ ಇಂಡಿಯಾ ಕಿಸಾನ್ ಸಭಾ (AIKS) ಹರ್ಯಾಣ ವಿಭಾಗ ಕಾರ್ಯದರ್ಶಿ, ದಯಾನಂದ್ ಪೂನಿಯಾ ದಲಾಲ್ ಹೇಳಿಕೆಯನ್ನು ಖಂಡಿಸಿದ್ದಾರೆ. ಜೆ.ಪಿ. ದಲಾಲ್ ಪ್ರತಿಭಟನಾ ನಿರತ ರೈತರ ಸಾವನ್ನು ಗೇಲಿ ಮಾಡಿದ್ದಾರೆ. ರೈತರ ಹೋರಾಟವನ್ನು ಅವಮಾನ ಮಾಡಲು ಕೂಡ ಪ್ರಯತ್ನಿಸಿದ್ದಾರೆ ಎಂದು ಪೂನಿಯಾ ತಿಳಿಸಿದ್ದಾರೆ. ಹರ್ಯಾಣ ಭಿವಾನಿ ಜಿಲ್ಲೆಯ ವಿವಿಧ ಗ್ರಾಮಗಳಲ್ಲಿ ರೈತ ಸಚಿವರ ಪ್ರತಿಕೃತಿ ದಹಿಸಿರುವ ಕುರಿತು ದಯಾನಂದ್ ಪೂನಿಯಾ ಹೇಳಿಕೆ ನೀಡಿದ್ದಾರೆ.
ಇದನ್ನೂ ಓದಿ: Farmers Protest: ರೈತ ಹೋರಾಟ ಸಂಘಟನೆಗೆ ಹರ್ಯಾಣದಲ್ಲಿ ‘ಮಹಾಪಂಚಾಯತ್’; ಸಹಸ್ರಾರು ರೈತರು ಭಾಗಿ
ರೈತರ ಹೋರಾಟ ಆರಂಭವಾದ ಬಳಿಕ, ಒಂದಿಲ್ಲೊಂದು ರೀತಿಯಲ್ಲಿ ಜೆ.ಪಿ. ದಲಾಲ್ ರೈತ ವಿರೋಧಕ್ಕೆ ಗುರಿಯಾಗುತ್ತಿದ್ದಾರೆ. ವಿವಾದಾತ್ಮಕ ಹೇಳಿಕೆಗಳ ಮೂಲಕ ರೈತ ಸಮುದಾಯದ ಆಕ್ರೋಶ ಎದುರಿಸುತ್ತಿದ್ದಾರೆ.
ಕೇಂದ್ರ ಸರ್ಕಾರದ ನೂತನ ಕೃಷಿ ತಿದ್ದುಪಡಿನ ಕಾಯ್ದೆಗಳ ವಿರುದ್ಧ ನಡೆಯುತ್ತಿರುವ ರೈತರ ಹೋರಾಟವು 80 ದಿನಗಳನ್ನು ದಾಟಿ ಸಾಗುತ್ತಿದೆ. ಹೊಸ ಕೃಷಿ ಕಾನೂನುಗಳು ಬಂಡವಾಳಶಾಹಿಗಳಿಗೆ ಅನುಕೂಲಕರ, ರೈತರಿಗಲ್ಲ ಎಂದು ರೈತರು ಆರೋಪಿಸುತ್ತಿದ್ದಾರೆ. ಹೊಸ ಕೃಷಿ ಕಾಯ್ದೆಗಳನ್ನು ಅಳವಡಿಸುವುದರಿಂದ ಕನಿಷ್ಠ ಬೆಂಬಲ ಬೆಲೆಗೆ (MSP) ಯಾವುದೇ ಕುತ್ತು ಉಂಟಾಗುವುದಿಲ್ಲ. ಮಂಡಿ ವ್ಯವಸ್ಥೆಗೂ ತೊಡಕಿಲ್ಲ. ಈ ವಿಷಯವಾಗಿ ಹರ್ಯಾಣದಲ್ಲಿ ಪ್ರತಿಭಟನೆ ನಡೆಸುವುದು ಅನಾವಶ್ಯಕ ಎಂದು ಜೆ.ಪಿ. ದಲಾಲ್ ಅಭಿಪ್ರಾಯಪಟ್ಟಿದ್ದರು.
ಇದನ್ನೂ ಓದಿ: Farmers Protest: ದೇಶವ್ಯಾಪಿ ರೈತ ಹೋರಾಟ, 40 ಲಕ್ಷ ಟ್ರ್ಯಾಕ್ಟರ್ಗಳ ಚಳುವಳಿ: ರಾಕೇಶ್ ಟಿಕಾಯತ್
Published On - 2:56 pm, Mon, 15 February 21
