ಕೇರಳದಲ್ಲಿ ಮಂಕಿಪಾಕ್ಸ್ ರೋಗ ಪತ್ತೆಗೆ ಪರೀಕ್ಷೆ ಆರಂಭ: ಆರೋಗ್ಯ ಸಚಿವೆ ವೀಣಾ ಜಾರ್ಜ್

ತಿರುವನಂತಪುರಂ: ಕೇರಳದಲ್ಲಿ ಮಂಕಿಪಾಕ್ಸ್ (Monkeypox) ರೋಗ ಪತ್ತೆಗೆ ಎನ್ಐವಿ ಆಲಪ್ಪುಳದಲ್ಲಿ (NIV Alapuzha) ಪರೀಕ್ಷೆ ಆರಂಭಿಸಲಾಗಿದೆ ಎಂದು ಕೇಂದ್ರ ಆರೋಗ್ಯ ಸಚಿವೆ ವೀಣಾ ಜಾರ್ಜ್ (Veena George) ಮಂಗಳವಾರ ಹೇಳಿದ್ದಾರೆ. ರೋಗ ಪತ್ತೆ ಮಾಡಲು ಎನ್ಐವಿ ಆಲಪ್ಪುಳದಲ್ಲಿ ಪರೀಕ್ಷೆ ಆರಂಭವಾಗಿದೆ. ಪುಣೆಯಿಂದ ಆಲಪ್ಪುಳಕ್ಕೆ ಕಿಟ್ ತರಲಾಗಿದೆ. ಜಿಲ್ಲೆಗಳಿಂದ ಮಾದರಿಗಳನ್ನು ಆಲಪ್ಪುಳಕ್ಕೆ ಕಳುಹಿಸಿಕೊಡಲಾಗಿದೆ. ಹೊಸತೊಂದು ಕಾಯಿಲೆ ರಾಜ್ಯದಲ್ಲಿ ಪತ್ತೆಯಾಗಿದೆ. ಎಲ್ಲ ಮುಂಜಾಗ್ರತಾ ಕ್ರಮಗಳನ್ನು ವಹಿಸಿಕೊಂಡು ಪರೀಕ್ಷೆ ನಡೆಸಲಾಗುವುದು. ಕೇರಳದಲ್ಲೇ ರೋಗ ಪತ್ತೆ ಪರೀಕ್ಷೆ ನಡೆಸುವುದರಿಂದ ಫಲಿತಾಂಶವೂ ಬೇಗನೆ ಸಿಗುತ್ತದೆ ಎಂದು ವೀಣಾ ಜಾರ್ಜ್ ಹೇಳಿದ್ದಾರೆ. ಜುಲೈ 18ರಂದು ಕೇರಳದ ಕಣ್ಣೂರ್ ಜಿಲ್ಲೆಯಲ್ಲಿ ಎರಡನೇ ಪ್ರಕರಣ ಪತ್ತೆಯಾಗಿದೆ. 31ರ ಹರೆಯದ ವ್ಯಕ್ತಿಯಲ್ಲಿ ಈ ರೋಗ ಪತ್ತೆಯಾಗಿದ್ದು ಅವರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಜುಲೈ 14ರಂದು ಯುಎಇಯಿಂದ ಕೇರಳಕ್ಕೆ ಬಂದ ವ್ಯಕ್ತಿಯೊಬ್ಬರಲ್ಲಿ ಈ ರೋಗ ಪತ್ತೆಯಾಗಿತ್ತು. ಅವರನ್ನು ತಿರುವನಂತರಪುರ ವೈದ್ಯಕೀಯ ಕಾಲೇಜಿನಲ್ಲಿ ದಾಖಲಿಸಲಾಗಿತ್ತು.

ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ ಮಂಕಿಪಾಕ್ಸ್ ವೈರಲ್ ಜೂನೋಟಿಕ್ ಸೋಂಕು ಆಗಿದ್ದು ಇದು ಮಂಕಿಪಾಕ್ಸ್ ವೈರಸ್ ನಿಂದ ಹರಡುತ್ತದೆ. ಇದು ಮನುಷ್ಯರ ನಡುವಿನ ಸಂಪರ್ಕದಿಂದ ಹರಡುತ್ತದೆ. ಕೇಂದ್ರ ಆರೋಗ್ಯ ಸಚಿವಾಲಯವು ಈಗಾಗಲೇ ಬಹುಶಿಸ್ತೀಯ ಕೇಂದ್ರೀಯ ಅಧಿಕಾರಿಗಳ ತಂಡವನ್ನು ನಿಯೋಜಿಸಿದೆ.  ಸೋಂಕಿತ  ವ್ಯಕ್ತಿಗಳೊಂದಿದೆ ನಿಕಟ ಸಂಪರ್ಕದಲ್ಲಿರುವವರ ಮೇಲೆ ನಿಗಾ ಇರಿಸಲಾಗಿದೆ ಎಂದು ಸಚಿವರು ಹೇಳಿದ್ದಾರೆ.

ಮಂಕಿಪಾಕ್ಸ್ ರೋಗದ ನಿರ್ವಹಣೆಗಾಗಿ ಕೇಂದ್ರ ಆರೋಗ್ಯ ಸಚಿವಾಲಯ ಶುಕ್ರವಾರ ಹೊಸ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಿದೆ. ಸತ್ತ ಅಥವಾ ಕಾಡು ಪ್ರಾಣಿಗಳ ಸಂಪರ್ಕವನ್ನು ತಪ್ಪಿಸಬೇಕು ಎಂದು ಸಚಿವಾಯ ಹೇಳಿದೆ. ಆತಂಕ ಪಡುವ ಅಗತ್ಯಲಿಲ್ಲ. ಎಲ್ಲ ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಹೊಸ ಮಾರ್ಗಸೂಚಿ ನೀಡಲಾಗಿದೆ ಎಂದು ಅಧಿಕಾರಿಯೊಬ್ಬರು ಹೇಳಿರುವುದಾಗಿ ಎಎನ್ಐ ವರದಿ ಮಾಡಿದೆ.