ಕೊರೊನಾ ಕಾಲದಲ್ಲೂ ಡಬಲ್​ ಸಂಬಳ: ಇದು ಹೇಗೆ ಸಾಧ್ಯ?

ಲಕ್ನೋ: ಕೊರೊನಾ ಕಾಲದಲ್ಲಿ ಕೆಲಸ ಕಳೆದುಕೊಂಡು ಬೀದಿಗೆ ಬಂದವರ ಸಂಖ್ಯೆಯೇ ಹೆಚ್ಚು. ಅಂಥದ್ರಲ್ಲಿ, ಒಂದೇ ಕಂಪನಿಯಿಂದ ಸತತ ಒಂದು ವರ್ಷದ ಕಾಲ ಡಬಲ್ ಸಂಬಳ ಪಡೆದ ಐನಾತಿ ನೌಕರನನ್ನು ಉತ್ತರ ಪ್ರದೇಶದ ಗ್ರೇಟರ್​ ನೋಯ್ಡಾ ಪೊಲೀಸರು ಬಂಧಿಸಿದ್ದಾರೆ. ಅರೇ ಇದು ಹೇಗೆ ಸಾಧ್ಯ ಅಂತೀರಾ? ಇಲ್ಲಿದೆ ನೋಡಿ.

ಅಂದ ಹಾಗೆ, 25 ವರ್ಷದ ಆರೋಪಿ ಈ ಹಿಂದೆ ಗುತ್ತಿಗೆದಾರನೊಬ್ಬನ ಮುಖಾಂತರ ಎರಡು ವರ್ಷಗಳ ಹಿಂದೆ ಗ್ರೇಟರ್​ ನೋಯ್ಡಾದ ಕಂಪನಿಯಲ್ಲಿ ಉದ್ಯೋಗ ಗಿಟ್ಟಿಸಿಕೊಂಡಿದ್ದನಂತೆ. ಬಳಿಕ ನಕಲಿ ದಾಖಲೆಗಳನ್ನು ಸೃಷ್ಟಿಸಿ ಮತ್ತೊಬ್ಬ ಗುತ್ತಿಗೆದಾರನ ಮೂಲಕ ಅದೇ ಕಂಪನಿಗೆ ನೌಕರಿಗೆ ಸೇರಿರುವ ಹಾಗೆ ಬಿಂಬಿಸಿದ್ದಾನೆ.

ಇದೇ ಐಡಿಯಾ ಬಳಸಿ ಆತ ಒಂದು ವರ್ಷದಿಂದ ಡಬಲ್​ ಸಂಬಳ ಪಡೆದು ಮಜಾ ಮಾಡುತ್ತಿದ್ದ ಎಂದು ತಿಳಿದುಬಂದಿದೆ. ಅಚ್ಚರಿಯ ಸಂಗತಿಯೆಂದರೆ, ಆತ ತನ್ನ ಎರಡೂ ಹುದ್ದೆಗಳಿಗೆ ಬಯೋಮೆಟ್ರಿಕ್​ ಹಾಜರಾತಿ ಸಹ ನೀಡುತ್ತಿದ್ದ ಎಂದು ಕಂಪನಿಯ HR ವಿಭಾಗವು ಮಾಹಿತಿ ನೀಡಿದೆ. ಇನ್ನು ಪ್ರಕರಣ ಬೆಳಕಿಗೆ ಬರುತ್ತಿದ್ದಂತೆ ಎಚ್ಚೆತ್ತುಕೊಂಡ ಕಂಪನಿಯು ಪೊಲೀಸರಿಗೆ ದೂರು ನೀಡಿದೆ. ಕಂಪನಿ ನೀಡಿದ ದೂರಿನನ್ವಯ ನೌಕರನನ್ನು ಬಂಧಿಸಿದ್ದಾರೆ.

Published On - 4:15 pm, Mon, 19 October 20