ರಜೆ ಮೇಲೆ ಮನೆಗೆ ಮರಳುತ್ತಿದ್ದ ಯೋಧನ ಬರ್ಬರ ಹತ್ಯೆ: ಮಿಜೋರಾಂನಲ್ಲಿ ರಸ್ತೆ ರಂಪಾಟಕ್ಕೆ ಅಸ್ಸಾಂ ರೆಜಿಮೆಂಟ್ ಸೈನಿಕ ಬಲಿ

ಮಿಜೋರಾಂ, ಸೆಪ್ಟೆಂಬರ್ 23: ಗಡಿ ಕಾಯುತ್ತಿದ್ದ ಯೋಧರೊಬ್ಬರು ರಜೆಯ ಮೇಲೆ ತನ್ನ ಕುಟುಂಬವನ್ನು ನೋಡಲು ಹುಟ್ಟೂರಿಗೆ ಮರಳುತ್ತಿದ್ದ ಸಂದರ್ಭದಲ್ಲೇ ಕ್ಷುಲ್ಲಕ ರಸ್ತೆ ವಿವಾದಕ್ಕಾಗಿ ದುಷ್ಕರ್ಮಿಗಳ ಗುಂಪೊಂದು ಆತನನ್ನು ಬರ್ಬರವಾಗಿ ಥಳಿಸಿ ಹತ್ಯೆ ಮಾಡಿರುವ ಆಘಾತಕಾರಿ ಘಟನೆ ಮಿಜೋರಾಂನ ಕೋಲಾಸಿಬ್ ಜಿಲ್ಲೆಯಲ್ಲಿ ನಡೆದಿದೆ. ಮೃತ ಯೋಧನನ್ನು ಭಾರತೀಯ ಸೇನೆಯ ಅಸ್ಸಾಂ ರೆಜಿಮೆಂಟ್‌ನಲ್ಲಿ ಸೇವೆ ಸಲ್ಲಿಸುತ್ತಿದ್ದ ಜಕಾರಿಯಾ ಲಾಲ್‌ಹ್ರಿಯತ್ಲುವಾಂಗಾ (29) ಎಂದು ಗುರುತಿಸಲಾಗಿದೆ.

ಘಟನೆ ನಡೆದಿದ್ದು ಹೇಗೆ?

ಜಮ್ಮು ಮತ್ತು ಕಾಶ್ಮೀರದ ಶ್ರೀನಗರದಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ಜಕಾರಿಯಾ, ರಜೆ ಪಡೆದು ಸೆಪ್ಟೆಂಬರ್ 20 ರಂದು ಲೆಂಗ್‌ಪುಯಿ ವಿಮಾನ ನಿಲ್ದಾಣಕ್ಕೆ ಬಂದಿಳಿದಿದ್ದರು. ಅಲ್ಲಿಂದ ತಮ್ಮ ಸ್ನೇಹಿತ ಜಾನ್ ಲಾಲ್ತನ್‌ಪುಯಾ ಅವರೊಂದಿಗೆ ಟ್ರಕ್‌ನಲ್ಲಿ ನ್ಯೂ ಬುಯಿಲಮ್‌ನಲ್ಲಿರುವ ತಮ್ಮ ಗ್ರಾಮಕ್ಕೆ ತೆರಳುತ್ತಿದ್ದರು. ರಾಷ್ಟ್ರೀಯ ಹೆದ್ದಾರಿ-306 ರಲ್ಲಿ ಬುವಾಲ್ಪುಯಿ ಮತ್ತು ಥಿಂಗ್ಡಾಲ್ ನಡುವೆ ಕಳಪೆ ರಸ್ತೆಯ ಕಾರಣದಿಂದಾಗಿ ಎದುರಿಗೆ ತಪ್ಪಾದ ಬದಿಯಲ್ಲಿ (Wrong Side) ಬರುತ್ತಿದ್ದ ಮತ್ತೊಂದು ಟ್ರಕ್ ಚಾಲಕನೊಂದಿಗೆ ಜಾನ್ ಮಾತುಕತೆ ನಡೆಸುತ್ತಿದ್ದಾಗ, ಅದೇ ಮಾರ್ಗದಲ್ಲಿ ಪಿಕಪ್ ವಾಹನದಲ್ಲಿ ಬಂದ ಕೌನ್ಪುಯಿ ಪಟ್ಟಣದ ಸ್ಥಳೀಯ ಹಾಕಿ ತಂಡದ ಸುಮಾರು 20 ಯುವಕರು ಜಗಳಕ್ಕಿಳಿದಿದ್ದಾರೆ.

ಪಿಕ್ನಿಕ್ ಮುಗಿಸಿ ಮದ್ಯದ ಮತ್ತಿನಲ್ಲಿದ್ದ ಯುವಕರ ಗುಂಪು ಜಾನ್‌ನನ್ನು ವಾಹನದಿಂದ ಹೊರಗೆಳೆದು ಮನಬಂದಂತೆ ಥಳಿಸಲು ಆರಂಭಿಸಿತು. ಇದನ್ನು ಕಂಡು ಸ್ನೇಹಿತನನ್ನು ರಕ್ಷಿಸಲು ಮಧ್ಯಪ್ರವೇಶಿಸಿದ ಯೋಧ ಜಕಾರಿಯಾ ಮೇಲೂ ಆ ಪುಂಡರ ಗುಂಪು ಮಾರಣಾಂತಿಕ ಹಲ್ಲೆ ನಡೆಸಿತು. ಗಂಭೀರ ಗಾಯಗೊಂಡ ಜಕಾರಿಯಾ ಸ್ಥಳದಲ್ಲೇ ಪ್ರಾಣಬಿಟ್ಟರೆ, ಅವರ ಸ್ನೇಹಿತರಾದ ಜಾನ್ ಮತ್ತು ಲಾಲ್ಚಾವಿಲಿಯಾನ ಗಾಯಗೊಂಡಿದ್ದಾರೆ.

ಅಮ್ಮನಿಗೆ ಕರೆ ಮಾಡಿದ ಕೆಲವೇ ಕ್ಷಣಗಳಲ್ಲಿ ದುರಂತ:

ಘಟನೆ ನಡೆಯುವ ಕೆಲವೇ ಕ್ಷಣಗಳ ಮುನ್ನ ಜಕಾರಿಯಾ ತಮ್ಮ ತಾಯಿಗೆ ಕರೆ ಮಾಡಿ, ರಸ್ತೆ ಸರಿ ಇಲ್ಲದ ಕಾರಣ ಸಂಜೆ 6.30ರ ಸುಮಾರಿಗೆ ಮನೆ ತಲುಪುವುದಾಗಿ ಹೇಳಿದ್ದರು. “ದೇಶವನ್ನು ಕಾಯಲು ದೂರದ ಗಡಿಯಲ್ಲಿದ್ದ ಮಗ, ಕುಟುಂಬದವರ ಜೊತೆ ಕಾಲ ಕಳೆಯಲು ಬರುವಾಗ ದುಷ್ಕರ್ಮಿಗಳ ಕೈಯಲ್ಲಿ ಹೀಗೆ ಪ್ರಾಣ ಕಳೆದುಕೊಳ್ಳುತ್ತಾನೆ ಎಂದು ನಾವು ಊಹಿಸಿರಲಿಲ್ಲ. ಇಡೀ ಕುಟುಂಬ ಆತನ ಗಳಿಕೆಯನ್ನೇ ನಂಬಿತ್ತು, ಆತನಿಗೆ ನ್ಯಾಯ ಸಿಗಬೇಕು ಮತ್ತು ಕೊಲೆಗಾರರಿಗೆ ಕಠಿಣ ಶಿಕ್ಷೆಯಾಗಬೇಕು” ಎಂದು ತಾಯಿ ಲಾಲ್ತಜೋವಿ ಕಣ್ಣೀರಿಟ್ಟಿದ್ದಾರೆ. 80 ವರ್ಷದ ವೃದ್ಧ ತಂದೆ ಮತ್ತು ತಾಯಿಯನ್ನು ಪೋಷಿಸುತ್ತಿದ್ದ ಜಕಾರಿಯಾ, ಮನೆ ನಿರ್ಮಾಣಕ್ಕಾಗಿ ಸಾಲವನ್ನೂ ಮಾಡಿದ್ದರು.

ಮತ್ತಷ್ಟು ಓದಿ: ಯುದ್ಧ ನಿಲ್ಲಿಸಲು ಪುಟಿನ್ ರೆಡಿ, ಆದರೆ ನಾಯಕರ ವೈಯಕ್ತಿಕ ದ್ವೇಷವೇ ಅಡ್ಡಿ: ಟ್ರಂಪ್ ಸ್ಫೋಟಕ ಹೇಳಿಕೆ

ಪೊಲೀಸ್ ಕ್ರಮ ಮತ್ತು ತನಿಖೆ

ಘಟನೆಗೆ ಸಂಬಂಧಿಸಿದಂತೆ ತ್ವರಿತ ಕಾರ್ಯಾಚರಣೆ ನಡೆಸಿದ ಮಿಜೋರಾಂ ಪೊಲೀಸರು ಇಬ್ಬರು ಅಪ್ರಾಪ್ತ ಬಾಲಕರು ಸೇರಿದಂತೆ ಒಟ್ಟು ಎಂಟು ಮಂದಿ ಆರೋಪಿಗಳನ್ನು ಬಂಧಿಸಿದ್ದಾರೆ. ಘಟನಾ ಸ್ಥಳದಲ್ಲಿ ಪರಾರಿಯಾಗಿರುವ ಇತರ ಆರೋಪಿಗಳ ಪತ್ತೆಗಾಗಿ ಪೊಲೀಸರು ತೀವ್ರ ಶೋಧ ನಡೆಸುತ್ತಿದ್ದಾರೆ.

ರಾಷ್ಟ್ರೀಯ ಹೆದ್ದಾರಿ-306 ರ ದುಸ್ಥಿತಿ: ಅಸ್ಸಾಂ ಮತ್ತು ಮಿಜೋರಾಂ ಅನ್ನು ಸಂಪರ್ಕಿಸುವ ಪ್ರಮುಖ ಜೀವನಾಡಿಯಾಗಿರುವ ಎನ್‌ಹೆಚ್-306 ರಸ್ತೆ ತೀವ್ರವಾಗಿ ಹದಗೆಟ್ಟಿದ್ದು, ವಾಹನ ಸವಾರರು ಗುಂಡಿಗಳನ್ನು ತಪ್ಪಿಸಲು ಆಗಾಗ ವಿರುದ್ಧ ದಿಕ್ಕಿನಲ್ಲಿ ವಾಹನ ಚಲಾಯಿಸುವುದರಿಂದ ಈ ಭಾಗದಲ್ಲಿ ಸಂಚಾರ ವಿವಾದಗಳು ಮತ್ತು ಅಪಘಾತಗಳು ನಿರಂತರವಾಗಿ ವರದಿಯಾಗುತ್ತಿವೆ.

ಸ್ಥಳೀಯ ಸಂಘಟನೆಗಳ ಆಕ್ರೋಶ: ಯೋಧನ ಮೇಲೆ ನಡೆದ ಅಮಾನುಷ ಹಲ್ಲೆಯನ್ನು ಯಂಗ್ ಮಿಜೋ ಅಸೋಸಿಯೇಷನ್ (YMA) ಮತ್ತು ಸ್ಥಳೀಯ ಕ್ರೀಡಾ ಸಂಘಟನೆಗಳು ತೀವ್ರವಾಗಿ ಖಂಡಿಸಿದ್ದು, ತಪ್ಪಿತಸ್ಥರಿಗೆ ಕಠಿಣ ಶಿಕ್ಷೆ ವಿಧಿಸಬೇಕೆಂದು ಹಾಗೂ ಹೆದ್ದಾರಿಗಳಲ್ಲಿ ಕಾನೂನುಬಾಹಿರ ಚಟುವಟಿಕೆಗಳಿಗೆ ಕಡಿವಾಣ ಹಾಕಬೇಕೆಂದು ಆಗ್ರಹಿಸಿವೆ.

ಸೇನಾ ಗೌರವ: ಅಸ್ಸಾಂ ರೆಜಿಮೆಂಟ್‌ನಲ್ಲಿ 2017 ರಿಂದ ದೇಶ ಸೇವೆ ಸಲ್ಲಿಸುತ್ತಿದ್ದ ಯೋಧನ ಪಾರ್ಥಿವ ಶರೀರವನ್ನು ಮರಣೋತ್ತರ ಪರೀಕ್ಷೆಯ ನಂತರ ಕುಟುಂಬಕ್ಕೆ ಹಸ್ತಾಂತರಿಸಲಾಗಿದ್ದು, ಸಕಲ ಸೇನಾ ಗೌರವಗಳೊಂದಿಗೆ ಅಂತಿಮ ಸಂಸ್ಕಾರ ನೆರವೇರಿಸಲು ಸಿದ್ಧತೆ ಕೈಗೊಳ್ಳಲಾಗಿದೆ.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ