ಗುಂಡು ಗುರುತು: ಬುಲೆಟ್​ ಮೇಲೆ QR ಕೋಡ್​ ನಮೂದಿಸಲು ಖಾಕಿ ಸೂಪರ್​ ಐಡಿಯಾ!

ಭೋಪಾಲ್​: ಕರ್ನಾಟಕ ರಾಜ್ಯದಲ್ಲಿ ಅಪರಾಧಗಳ ಇತಿಹಾಸದಲ್ಲೇ ಅತ್ಯಂತ ಕ್ಲಿಷ್ಟಕರ ಹಾಗು ರೋಚಕ ಪ್ರಕರಣಗಳಲ್ಲಿ ಒಂದೆಂದರೆ ಅದು ಪತ್ರಕರ್ತೆ ಗೌರಿ ಲಂಕೇಶ್​ ಹತ್ಯೆ ಪ್ರಕರಣ ಎಂದು ಹೇಳಿದರು ಅದು ತಪ್ಪಾಗಲಾರದು. 2017ರ ಸೆಪ್ಟಂಬರ್ 5ರಂದು ಸಂಜೆ ವೇಳೆ ತಮ್ಮ ನಿವಾಸದ ಬಳಿಯಿದ್ದ ಪತ್ರಕರ್ತೆಯನ್ನು ಅಪರಿಚಿತ ಹಂತಕರು ಪಿಸ್ತೂಲ್​ನಿಂದ ಗುಂಡಿಕ್ಕಿ ಕೊಲೆಗೈದಿದ್ದರು. ಗೌರಿ ಲಂಕೇಶ್​ರ ಮೃತದೇಹದಲ್ಲಿದ್ದ ಗುಂಡು ಮತ್ತು ಅವರ ನಿವಾಸದ ಸುತ್ತಮುತ್ತಲಿನ ಪ್ರದೇಶದ ಸಿಸಿಟಿವಿ ದೃಶ್ಯಾವಳು ಬಿಟ್ಟರೇ ಬೇಱವ ಸುಳಿವು ಖಾಕಿ ಪಡೆಗೆ ಸಿಕ್ಕಿರಲಿಲ್ಲ.

ಸರಿಸುಮಾರು 2 ವರ್ಷಗಳ ಸತತ ತನಿಖೆಯ ಬಳಿಕ ಬಳಿಕ SIT ಅಧಿಕಾರಿಗಳಿಗೆ ಹಂತಕರ ಜಾಡನ್ನು ಪತ್ತೆಹಚ್ಚಲು ಸಾಧ್ಯವಾಗಿತ್ತು. ಆದರೆ, ಒಂದು ವೇಳೆ ಪತ್ರಕರ್ತೆ ಗೌರಿ ಲಂಕೇಶ್​ರ ದೇಹವನ್ನು ಹೊಕ್ಕ ಗುಂಡಿನ ಮೇಲೆ ಯಾವುದೇ ಗುರುತು ಅಥವಾ ಐಡೆಂಟಿಫಿಕೇಷನ್​ ಸಾಧನಗಳಿದಿದ್ದರೆ ತನಿಖಾಧಿಕಾರಿಗಳ ಕೆಲಸ ಮತ್ತಷ್ಟು ಸುಲಭವಾಗುತ್ತಿತ್ತು.

ಇದೀಗ, ಮಧ್ಯಪ್ರದೇಶದ ಖಾಕಿ ಪಡೆ ಅಂಥದ್ದೇ ಯೋಚನೆಗೆ ಮುಂದಾಗಿದೆ. ರಾಜ್ಯದಲ್ಲಿ ಹೆಚ್ಚುತ್ತಿರುವ ಹಿಂಸಾಚಾರ ಮತ್ತು ಅಪರಾಧ ಪ್ರಕರಣಗಳನ್ನು ತಡೆಗಟ್ಟಲು ಮಧ್ಯಪ್ರದೇಶದ ಭಿಂಡ್​ ಪೊಲೀಸರು ಪ್ರತಿ ಗುಂಡು ಅಥವಾ ಬುಲೆಟ್​ನ ಮೇಲೆ QR ಕೋಡ್​ ನಮೂದಿಸಲು ಮುಂದಾಗಿದೆ. ಇದರಿಂದ, ಭಿಂಡ್​ನಲ್ಲಿ ಎಲ್ಲೇ ಅಪರಾಧ ಚಟುವಟಿಕೆಗಳಲ್ಲಿ ಬಂದೂಕು ಬಳಸಿದರೂ ಅದರಿಂದ ಫೈರ್​ ಆದ ಗುಂಡಿನ ಮೇಲಿರುವ QR ಕೋಡ್​ ಮುಖಾಂತರ ಅಪರಾಧಿಗಳನ್ನು ಪತ್ತೆ ಹಚ್ಚಲು ಸಹಕಾರಿಯಾಗಲಿದೆ ಎಂದು ಪೊಲೀಸ್​ ಮೂಲಗಳು ತಿಳಿಸಿವೆ.

ಇದಲ್ಲದೆ, ರಾಜ್ಯದಲ್ಲಿ ಕೆಲ ದಿನಗಳಲ್ಲಿ ಉಪಚುನಾವಣೆ ನಡೆಯಲಿದ್ದು ಈ ವೇಳೆ ಗನ್​ ಬಳಕೆಯನ್ನು ಕಂಡುಹಿಡಿಯಲು ನೆರವಾಗಲಿದೆ. ಭಿಂಡ್​ನಲ್ಲಿ ಕಳೆದ 5 ವರ್ಷಗಳಲ್ಲಿ ಬಂದೂಕುಗಳನ್ನು ಬಳಸಿ ಸುಮಾರು 150 ಕೊಲೆ ಪ್ರಕರಣಗಳು ದಾಖಲಾಗಿದ್ದು, ಪೊಲೀಸರ ಈ ನೂತನ ಯೋಜನೆ ಅಪರಾಧಿಗಳನ್ನು ಮಟ್ಟಹಾಕಲು ಸಹಾಯ ಮಾಡಲಿದೆ.

Published On - 5:56 pm, Sat, 17 October 20