Onam 2021: ಓಣಂ ಹಬ್ಬಕ್ಕೆ ಭರ್ಜರಿ ಗಿಫ್ಟ್; ಕೇರಳದ ಸರ್ಕಾರಿ ನೌಕರರಿಗೆ 311 ಕೋಟಿ ರೂ. ಬೋನಸ್

ತಿರುವನಂತಪುರಂ: ಕೇರಳದಲ್ಲಿ ಇಂದಿನಿಂದ 10 ದಿನಗಳ ಕಾಲ ಓಣಂ ಹಬ್ಬ (Onam Festival) ನಡೆಯಲಿದೆ. ಕೊರೊನಾ (Coronavirus) ಕರಿ ಛಾಯೆಯ ನಡುವೆಯೂ ಕೇರಳಿಗರು ತಮ್ಮ ಮನೆಗಳಲ್ಲಿ ವಿಜೃಂಭಣೆಯಿಂದಲೇ ಹಬ್ಬವನ್ನು ಆಚರಿಸುತ್ತಿದ್ದಾರೆ. ಕೊರೊನಾದಿಂದ ಕಳೆದೊಂದು ವರ್ಷದಿಂದ ಅದೆಷ್ಟೋ ಜನರು ಕೆಲಸವಿಲ್ಲದೆ ನಿರುದ್ಯೋಗಿಗಳಾಗಿದ್ದಾರೆ, ಲಕ್ಷಾಂತರ ಜನರು ಆರ್ಥಿಕ ಸಂಕಷ್ಟ ಎದುರಿಸುತ್ತಿದ್ದಾರೆ. ಕೈಯಲ್ಲಿ ದುಡ್ಡಿಲ್ಲದೆ ಹಲವಾರು ಜನರು ಆತ್ಮಹತ್ಯೆಯನ್ನೂ ಮಾಡಿಕೊಂಡಿದ್ದಾರೆ. ಇದರ ಮಧ್ಯೆ ಕೇರಳ ಸರ್ಕಾರ ಓಣಂ ಹಬ್ಬದ ಪ್ರಯುಕ್ತ 5.2 ಲಕ್ಷ ಸರ್ಕಾರಿ ಉದ್ಯೋಗಿಗಳಿಗೆ ಬೋನಸ್ ಘೋಷಿಸಿದೆ. 4 ತಿಂಗಳ ಹಿಂದಷ್ಟೇ ಕೇರಳ ಸರ್ಕಾರ ಸರ್ಕಾರಿ ಉದ್ಯೋಗಿಗಳಿಗೆ ವೇತನ ಜಾಸ್ತಿ ಮಾಡಿತ್ತು. ಈಗಾಗಲೇ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿರುವ ಕೇರಳ ಸರ್ಕಾರ (Kerala Government) ಇದೀಗ ಮತ್ತೆ 5.2 ಲಕ್ಷ ಸರ್ಕಾರಿ ಉದ್ಯೋಗಿಗಳಿಗೆ ಬರೋಬ್ಬರಿ 311 ಕೋಟಿ ರೂ. ಹಣವನ್ನು ಬೋನಸ್​ ಆಗಿ ನೀಡುತ್ತಿರುವುದು ಅಚ್ಚರಿ ಮೂಡಿಸಿದೆ.

ಕೇರಳದ ವಿಧಾನಸಭಾ ಚುನಾವಣೆಗೂ ಮುನ್ನ ಏಪ್ರಿಲ್ ತಿಂಗಳಲ್ಲಿ ಕೇರಳದ ಸರ್ಕಾರಿ ಉದ್ಯೋಗಿಗಳಿಗೆ ವೇತನ ಜಾಸ್ತಿ ಮಾಡಲಾಗಿತ್ತು. ಇದಕ್ಕಾಗಿ 4,850 ಕೋಟಿ ರೂ. ಹಣವನ್ನು ಸರ್ಕಾರ ಮೀಸಲಿಟ್ಟಿತ್ತು. ಇದೀಗ ಮತ್ತೆ ಕೇರಳದ ಸರ್ಕಾರಿ ಉದ್ಯೋಗಿಗಳಿಗೆ ಬಂಪರ್ ಉಡುಗೊರೆ ಸಿಕ್ಕಿದ್ದು, ಓಣಂ ಹಬ್ಬದ ಬೋನಸ್ ಕೂಡ ಸಿಕ್ಕಿದೆ. ಇನ್ನೊಂದೆಡೆ ಖಾಸಗಿ ವಲಯದಲ್ಲಿ ಕೊರೊನಾದಿಂದ ಕೆಲಸ ಕಳೆದುಕೊಂಡು ಅದೆಷ್ಟೋ ಕುಟುಂಬಗಳು ಬೀದಿಗೆ ಬಂದಿವೆ. ಎಷ್ಟೋ ಉದ್ಯೋಗಿಗಳು ಐದಾರು ತಿಂಗಳಿನಿಂದ ಸಂಬಳವಿಲ್ಲದೆ ದುಡಿಯುತ್ತಿದ್ದಾರೆ. ಕಳೆದ 7 ವಾರಗಳಿಂದ ಕೇರಳದಲ್ಲಿ 2 ಜನರು ಕೆಲಸ ಕಳೆದುಕೊಂಡು ಆರ್ಥಿಕ ಸಂಕಷ್ಟದಿಂದ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಆ ಖಾಸಗಿ ನೌಕರರ ಕುಟುಂಬಕ್ಕೆ ಕೇರಳ ಸರ್ಕಾರ ಇದುವರೆಗೂ ಯಾವ ಸಹಾಯಹಸ್ತವನ್ನೂ ಚಾಚಿಲ್ಲ. ಸಂಕಷ್ಟದಲ್ಲಿರುವ ಖಾಸಗಿ ಸಂಸ್ಥೆಗಳಿಗೆ ನೆರವು ನೀಡಲು ಸರ್ಕಾರ ಇನ್ನೂ ಮುಂದಾಗಿಲ್ಲ ಎಂಬುದು ಗಮನಿಸಲೇಬೇಕಾದ ಸಂಗತಿ.

ಕೇರಳದ 5.2 ಲಕ್ಷ ಸರ್ಕಾರಿ ಉದ್ಯೋಗಿಗಳ ಪೈಕಿ ಸುಮಾರು 1 ಲಕ್ಷ ಜನರಿಗೆ ಓಣಂ ಹಬ್ಬದ ಬೋನಸ್ ಆಗಿ 4,000 ರೂ. ಸಿಗಲಿದೆ. ಉಳಿದವರಿಗೆ 2,750 ರೂ. ಸಿಗಲಿದೆ. ಇಷ್ಟೇ ಅಲ್ಲದೆ ಸರ್ಕಾರಿ ಉದ್ಯೋಗದಿಂದ ನಿವೃತ್ತರಾಗಿರುವ 5.3 ಲಕ್ಷ ಜನರಿಗೆ ಓಣಂ ಹಬ್ಬದ ಪ್ರಯುಕ್ತ 1,000 ರೂ. ನೀಡಲಾಗುತ್ತಿದೆ. ಹಾಗೇ, ಓಣಂ ಹಬ್ಬಕ್ಕಾಗಿ ಎಲ್ಲ ಸರ್ಕಾರಿ ಉದ್ಯೋಗಿಗಳೂ 15,00 ರೂ.ವರೆಗೆ ಅಡ್ವಾನ್ಸ್​ ವೇತನವನ್ನು ಪಡೆಯಬಹುದು ಎಂದು ಸೂಚಿಸಲಾಗಿದೆ. ಈ ಹಣವನ್ನು ಮುಂದಿನ 5 ತಿಂಗಳ ವೇತನದಲ್ಲಿ ಹಂತ-ಹಂತವಾಗಿ ಕಡಿತಗೊಳಿಸಲಾಗುತ್ತದೆ.

ಇದನ್ನೂ ಓದಿ: Onam 2021: ಕೇರಳದಲ್ಲಿ ಇಂದಿನಿಂದ ಓಣಂ ಸಂಭ್ರಮ; ಈ ಹಬ್ಬದಂದು ಭೂಮಿಗೆ ಬರುತ್ತಾನೆ ಬಲಿ ಚಕ್ರವರ್ತಿ!

Coronavirus ಕೇರಳದಲ್ಲಿ 18,607 ಹೊಸ ಕೊವಿಡ್ ಪ್ರಕರಣ ಪತ್ತೆ, 93 ಸಾವು

(Onam 2021 Kerala Government Announces Special Bonus of 311 Crore Rs for Government Employees)