ಹಿಂದಿ ಅರ್ಥವಾಗದಿರೋರು ಎದ್ದು ಹೋಗಬಹುದು -ಅಧಿಕಾರಿಯ ಮಾತಿಗೆ ಭುಗಿಲೆದ್ದ ಆಕ್ರೋಶ

ದೆಹಲಿ: ಕೇಂದ್ರ ಸರ್ಕಾರದ ಆಯುಷ್ ಸಚಿವಾಲಯ ಆಯೋಜಿಸಿದ್ದ ಆನ್​ಲೈನ್​ ತರಬೇತಿ ವಿಚಾರ ಸಂಕಿರಣ ಇದೀಗ ವಿವಾದದ ಸುಳಿಯಲ್ಲಿ ಸಿಲುಕಿದೆ. ಆಗಸ್ಟ್​ 18ರಿಂದ 21ರವರೆಗೆ ರಾಷ್ಟ್ರಮಟ್ಟದಲ್ಲಿ ಆಯೋಜಿಸಿಲಾಗಿದ್ದ ಆನ್​​ಲೈನ್​ ಸಂಕಿರಣವು ಮತ್ತೊಂದು ಭಾಷಾ ಸಮರಕ್ಕೆ ಅಣಿಮಾಡಿಕೊಟ್ಟಿದೆ. ಹೌದು, ಆಯುಷ್ ಸಚಿವಾಲಯ ರಾಷ್ಟ್ರಮಟ್ಟದಲ್ಲಿ ಆಯೋಜಿಸಿದ್ದ ಆನ್​ಲೈನ್​ ತರಬೇತಿ ಸಂಕಿರಣದಲ್ಲಿ ಸುಮಾರು 350ಕ್ಕು ಹೆಚ್ಚು ಜನ ಪಾಲ್ಗೊಂಡಿದ್ದರು. ಯೋಗ ತರಬೇತಿ ಕುರಿತು ಆಯೋಜಿಸಲಾಗಿದ್ದ ಈ ಆನ್​ಲೈನ್​ ಸಂಕಿರಣದಲ್ಲಿ ತಮಿಳುನಾಡಿನ ಸುಮಾರು 37 ವೈದ್ಯರು ಸಹ ಭಾಗಿಯಿದ್ದರು. ಈ ವೈದ್ಯರು ಹೇಳುವ ಪ್ರಕಾರ ಸಂಕಿರಣದಲ್ಲಿ ನಡೆದ ಬಹಳಷ್ಟು ತರಬೇತಿ ಕ್ಲಾಸ್​ಗಳನ್ನು ಬಹುಪಾಲು ಹಿಂದಿಯಲ್ಲೇ ನಡೆಸಲಾಯಿತು. ವೈದ್ಯರಿಗೆ ಹಿಂದಿ ಅರ್ಥವಾಗದ ಕಾರಣ ಕ್ಲಾಸ್​ಗಳನ್ನು ಇಂಗ್ಲಿಷ್​ನಲ್ಲಿ ನಡೆಸಲು ಮನವಿ ಮಾಡಿದರೂ ಅದಕ್ಕೆ ಯಾರೂ ಸ್ಪಂದಿಸಲಿಲ್ಲ ಎಂದು ತಿಳಿದುಬಂದಿದೆ.

ಈ ನಡುವೆ ಸಂಕಿರಣದ ಅಂತಿಮ ದಿನದಂದು ಆಯುಷ್ ಸಚಿವಾಲಯದ ಕಾರ್ಯದರ್ಶಿಗಳಾದ ವೈದ್ಯ ರಾಜೇಶ್​ ಕೊಟೇಚಾರವರು ತಮ್ಮ ಭಾಷಣವನ್ನು ಹಿಂದಿಯಲ್ಲಿ ಮಾಡಲು ಪ್ರಾರಂಭಿಸಿದ್ದರಂತೆ. ಇದಕ್ಕೆ ತಮಿಳುನಾಡಿನ ವೈದ್ಯರು ದಯವಿಟ್ಟು ಇಂಗ್ಲಿಷ್​ನಲ್ಲಿ ಮಾತನಾಡಿ ಎಂದು ಮನವಿ ಮಾಡಿಕೊಂಡಿದ್ದಾರೆ. ಈ ವೇಳೆ ಕೊಟೇಚಾರವರು ನನಗೆ ಸಮರ್ಪಕವಾಗಿ ಇಂಗ್ಲಿಷ್ ಮಾತನಾಡಲು ಬರುವುದಿಲ್ಲ. ಹಾಗಾಗಿ, ನಾನು ಹಿಂದಿಯಲ್ಲಿ ಮಾತನಾಡುತ್ತೇನೆ. ಹಿಂದಿ ಅರ್ಥವಾಗದೆ ಇರುವವರು ಸೆಷನ್​ ಬಿಟ್ಟು ಹೋಗಬಹುದು ಎಂದು ಹೇಳಿದ್ದಾರಂತೆ.

ಕಾರ್ಯದರ್ಶಿ ಕೊಟೇಚಾರ ಮಾತಿಗೆ ಇದೀಗ ಎಲ್ಲೆಡೆ ಆಕ್ರೋಶ ವ್ಯಕ್ತವಾಗಿದೆ. DMK ಸಂಸದೆ ಕನಿಮೋಳಿ ಮತ್ತು ಕಾಂಗ್ರೆಸ್​ ಸಂಸದ ಹಾಗೂ ಮಾಜಿ ಕೇಂದ್ರ ಸಚಿವ P ಚಿದಂಬರಂ ಪುತ್ರ ಕಾರ್ತಿ ಚಿದಂಬರಂ ಸಹ ಇದನ್ನು ಖಂಡಿಸಿದ್ದಾರೆ. ಸಂಸದೆ ಕನಿಮೋಳಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ತನಿಖೆ ನಡೆಸಲು ಆಗ್ರಹಿಸಿ ಸಹ ಕೇಂದ್ರ ಆಯುಷ್​ ಸಚಿವ ಶ್ರೀಪಾದ್ ನಾಯಕ್​ರಿಗೆ ಪತ್ರ ಬರೆದಿದ್ದಾರೆ.

My letter to the Honorable Union Minister @shripadynaik on the reported hindi imposition.#StopHindiImposition pic.twitter.com/Wzlib2f9fl

— Kanimozhi (கனிமொழி) (@KanimozhiDMK) August 22, 2020