Narendra Modi: ಸಮಾವೇಶಗಳಿಂದಷ್ಟೇ ಹವಾಮಾನ ಬದಲಾವಣೆ ವಿರುದ್ಧ ಹೋರಾಟ ಅಸಾಧ್ಯ, ಸಾಮೂಹಿಕ ಶ್ರಮ ಅಗತ್ಯ; ಪ್ರಧಾನಿ ಮೋದಿ

ನವದೆಹಲಿ: ಕೇವಲ ಸಮಾವೇಶಗಳಿಂದಷ್ಟೇ ಹವಾಮಾನ ಬದಲಾವಣೆ (Climate change) ವಿರುದ್ಧ ಹೋರಾಟ ಅಸಾಧ್ಯ. ಅದಕ್ಕಾಗಿ ಸಾಮೂಹಿಕ ಶ್ರಮ ಅಗತ್ಯ ಎಂದು ಪ್ರಧಾನಿ ನರೇಂದ್ರ ಮೋದಿ (Narendra Modi) ಪ್ರತಿಪಾದಿಸಿದರು. ಅಂತಾರಾಷ್ಟ್ರೀಯ ಹಣಕಾಸು ನಿಧಿ (IMF) ಮತ್ತು ವಿಶ್ವಬ್ಯಾಂಕ್ (World Bank) ಆಯೋಜಿಸಿದ ಸಮಾವೇಶ ಉದ್ದೇಶಿಸಿ ವಿಡಿಯೋ ಕಾನ್ಫರೆನ್ಸ್ ಮೂಲಕ ಮಾತನಾಡಿದ ಅವರು, ಹವಾಮಾನ ಬದಲಾವಣೆ ವಿರುದ್ಧದ ಚರ್ಚೆ ಡಿಸ್ಕಷನ್ ಟೇಬಲ್​ನಿಂದ ಡಿನ್ನರ್​ ಟೇಬಲ್​ಗೆ ವರ್ಗವಾಗಲಿ (ಒಂದು ಪರಿಕಲ್ಪನೆಯು ಸಮಾವೇಶದ ವೇದಿಕೆಯಿಂದ ಮನೆ ಮನೆಯ ಊಟದ ಟೇಬಲ್​ ವರೆಗೆ ತಲುಪಬೇಕು ಎಂಬರ್ಥದಲ್ಲಿ). ಆಗ ಅದು ಸಾಮೂಹಿಕ ಚಳವಳಿಯಾಗಬಲ್ಲದು ಎಂದು ಅಭಿಪ್ರಾಯಪಟ್ಟರು. ಹವಾಮಾನ ಬದಲಾವಣೆಯ ವಿರುದ್ಧದ ಹೋರಾಟದಲ್ಲಿ ಜನರ ಭಾಗವಹಿಸುವಿಕೆ ಮತ್ತು ಸಾಮೂಹಿಕ ಪ್ರಯತ್ನ ಅತೀ ಅಗತ್ಯ ಎಂದು ಅವರು ಹೇಳಿದರು.

ದೈನಂದಿನ ಜೀವನದಲ್ಲಿ ಮಾಡುವ ಸಣ್ಣಪುಟ್ಟ ಕೆಲಸಗಳೂ ಮಹತ್ವದ್ದು ಎಂಬ ಬಗ್ಗೆ ಜನರು ಜಾಗೃತರಾದಾಗ ಪರಿಸರದ ಮೇಲೆ ಸಕಾರಾತ್ಮಕ ಪರಿಣಾಮ ಬೀರಬಲ್ಲದು ಎಂದು ಮೋದಿ ಹೇಳಿದರು.

My remarks at the @WorldBank programme on ‘Making it Personal: How Behavioral Change Can Tackle Climate Change’. https://t.co/D7sWj3Huz2

— Narendra Modi (@narendramodi) April 15, 2023

ಜಗತ್ತಿನಾದ್ಯಂದ ಜನರು ಹವಾಮಾನ ಬದಲಾವಣೆಯ ಬಗ್ಗೆ ಕೇಳಿರುತ್ತಾರೆ. ಅನೇಕರು ಈ ಬಗ್ಗೆ ಆತಂಕಕ್ಕೆ ಒಳಗಾಗುತ್ತಾರೆ. ಯಾಕೆಂದರೆ ತಾವು ಏನು ಮಾಡಬಹುದು ಎಂಬುದು ಅವರಿಗೆ ತಿಳಿದಿರುವುದಿಲ್ಲ. ಅವರ ಪಾತ್ರ ಏನು ಎಂಬುದನ್ನು ಸ್ಪಷ್ಟಪಡಿಸುವ ಕೆಲಸವನ್ನು ಸರ್ಕಾರಗಳು, ಜಾಗತಿಕ ಸಂಸ್ಥೆಗಳು ಮಾಡಬೇಕಿದೆ. ತಾವು ಕೂಡ ಕೊಡುಗೆ ನೀಡಬಹುದು ಎಂಬುದು ಜನರಿಗೆ ಅರಿವಾದಾಗ ಅವರ ಆತಂಕ ನಿವಾರಣೆಯಾಗಲಿದೆ ಎಂದು ಪ್ರಧಾನಿ ಹೇಳಿದರು.

ಇದನ್ನೂ ಓದಿ: ಸರ್ಕಾರಗಳು ಬದಲಾಗಿವೆ, ಆಡಳಿತಗಾರರು ಬಂದರು, ಹೋದರು ಭಾರತ ಮಾತ್ರ ದೃಢವಾಗಿ ಉಳಿದಿದೆ: ಪ್ರಧಾನಿ ಮೋದಿ

ವಿಶ್ವಸಂಸ್ಥೆಯ ಪ್ರಧಾನ ಕಾರ್ಯದರ್ಶಿ ಕಳೆದ ವರ್ಷ ಆರಂಭಿಸಿದ್ದ ‘ಮಿಷನ್ ಲೈಫ್ Mission Life’ ಅಭಿಯಾನದ ಬಗ್ಗೆ ಉಲ್ಲೇಖಿಸಿದ ಮೋದಿ, ಹವಾಮಾನ ಬದಲಾವಣೆ ವಿರುದ್ಧದ ಹೋರಾಟವನ್ನು ಪ್ರಜಾಸತ್ತಾತ್ಮಕಗೊಳಿಸುವ ನಿಟ್ಟಿನಲ್ಲಿ ‘ಮಿಷನ್ ಲೈಫ್’ ಅಭಿಯಾನ ಆರಂಭಿಸಲಾಗಿತ್ತು ಎಂದು ಉಲ್ಲೇಖಿಸಿದರು.

ಪರಿಸರದ ಮೇಲೆ ಸಕಾರಾತ್ಮಕ ಪರಿಣಾಮವನ್ನು ಉಂಟುಮಾಡುವುದಕ್ಕಾಗಿ ಭಾರತ ಕೈಗೊಂಡಿರುವ ಪ್ರಯತ್ನಗಳನ್ನು ಶ್ಲಾಘಿಸಿದ ಪ್ರಧಾನಿ ಮೋದಿ, ಕಳೆದ ಕೆಲವು ವರ್ಷಗಳಲ್ಲಿ ಜನರೇ ಸ್ವಯಂಪ್ರೇರಣೆಯಿಂದ ಕೈಗೊಂಡ ಕ್ರಮಗಳಿಂದಾಗಿ ಭಾರತದ ಅನೇಕ ಭಾಗಗಳಲ್ಲಿ ಲಿಂಗ ಅನುಪಾತದಲ್ಲಿ ಸುಧಾರಣೆಯಾಗಿದೆ ಎಂದರು. ನದಿ ತೀರಗಳಲ್ಲಾಗಲಿ, ಕಡಲತೀರಗಳಲ್ಲಾಗಲಿ, ರಸ್ತೆಗಳಲ್ಲಾಗಲಿ ಬೃಹತ್‌ ಸ್ವಚ್ಛತಾ ಅಭಿಯಾನವನ್ನು ಹಮ್ಮಿಕೊಂಡವರು ಜನರೇ. ಸಾರ್ವಜನಿಕ ಸ್ಥಳಗಳು ಕಸದಿಂದ ಮುಕ್ತವಾಗಿರುವುದನ್ನು ಜನರೇ ಖಾತರಿಪಡಿಸುತ್ತಿದ್ದಾರೆ ಎಂದು ಮೋದಿ ಹೇಳಿದರು. ಎಲ್​ಇಡಿ ಬಲ್ಬ್ ಅಭಿಯಾನ ಯಶಸ್ವಿಗೊಳಿಸಿದವರೂ ಜನರೇ ಎಂದು ಮೋದಿ ಹೇಳಿದರು.

ಭಾರತದಲ್ಲಿ ರೈತರು ಸುಮಾರು 7,00,000 ಹೆಕ್ಟೇರ್ ಕೃಷಿಭೂಮಿ ವ್ಯಾಪ್ತಿಯಲ್ಲಿ ಸೂಕ್ಷ್ಮ ನೀರಾವರಿ ಅನುಸರಿಸುತ್ತಿದ್ದಾರೆ ಎಂಬ ಅಂಶದ ಬಗ್ಗೆಯೂ ಪ್ರಧಾನಿ ವಿಶ್ವ ಸಮುದಾಯದ ಗಮನಸೆಳೆದರು.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ