‘ನಕ್ಸಲಿಸಂ ಅಂತ್ಯಗೊಂಡಿದ್ದರೂ ಧಿಮಾಗಿ ನಕ್ಸಲರ ಬಗ್ಗೆ ಎಚ್ಚರಿಕೆಯಿಂದಿರಬೇಕು’; ರಾಷ್ಟ್ರೀಯ ಏಕತಾ ದಿನದಂದು ಪ್ರಧಾನಿ ಮೋದಿ ವಾಗ್ದಾಳಿ
ಗುಜರಾತ್ನ ಏಕತಾ ನಗರದ ಪರೇಡ್ ಮೈದಾನದಲ್ಲಿ ಇಂದು ನಡೆದ ರಾಷ್ಟ್ರೀಯ ಏಕತಾ ದಿನಾಚರಣೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಭಾಗವಹಿಸಿದ್ದರು. ಈ ಸಂದರ್ಭದಲ್ಲಿ ಅವರು ವಿರೋಧ ಪಕ್ಷದ ಮೇಲೆ ತೀವ್ರ ವಾಗ್ದಾಳಿ ನಡೆಸಿದರು. ಪ್ರಜಾಪ್ರಭುತ್ವದಲ್ಲಿ, ಸರ್ಕಾರದ ನೀತಿಗಳನ್ನು ವಿರೋಧಿಸುವುದು ವಿರೋಧ ಪಕ್ಷದ ಜವಾಬ್ದಾರಿಯಾಗಿದೆ. ಆದರೆ, ವಿರೋಧ ಪಕ್ಷವು ತನ್ನ ಕರ್ತವ್ಯವನ್ನು ಬಿಟ್ಟು ಎಲ್ಲದಕ್ಕೂ ದಿಗ್ಬಂಧನ ಹಾಕುತ್ತಿರುವುದು ನಮ್ಮ ದುರಾದೃಷ್ಟ ಎಂದು ಮೋದಿ ಅಸಮಾಧಾನ ಹೊರಹಾಕಿದ್ದಾರೆ. ಭಾರತದ ಯಾವುದೇ ಜಿಲ್ಲೆಯೂ ಈಗ ನಕ್ಸಲ್ ಪೀಡಿತವಾಗಿ ಉಳಿದಿಲ್ಲ. ನಕ್ಸಲಿಸಂನ ಬೆನ್ನೆಲುಬು ಮುರಿದಿದೆ ಎಂದ ಪ್ರಧಾನಿ ಮೋದಿ ವೈಚಾರಿಕ ನಕ್ಸಲಿಸಂ ಬಗ್ಗೆ ಜನರು ಎಚ್ಚರಿಕೆಯಿಂರಿಬೇಕು ಎಂದು ಕರೆನೀಡಿದ್ದಾರೆ.
ಏಕತಾ ನಗರ, ಅಕ್ಟೋಬರ್ 31: ಭಾರತವು ನಕ್ಸಲಿಸಂನ ಬೆನ್ನೆಲುಬನ್ನು ಅತ್ಯಂತ ಪರಿಣಾಮಕಾರಿಯಾಗಿ ಮುರಿದಿದೆ ಎಂದು ಪ್ರಧಾನಮಂತ್ರಿ ನರೇಂದ್ರ ಮೋದಿ ಘೋಷಿಸಿದ್ದಾರೆ. 2015ರಲ್ಲಿ ದೇಶದ ಸುಮಾರು 126 ಜಿಲ್ಲೆಗಳು ನಕ್ಸಲ್ ಪೀಡಿತವಾಗಿದ್ದವು, ಆದರೆ 2026ರ ಮಾರ್ಚ್ ವೇಳೆಗೆ ಭಾರತದ ಯಾವುದೇ ಒಂದು ಜಿಲ್ಲೆಯೂ ನಕ್ಸಲ್ ಪೀಡಿತವಾಗಿ ಉಳಿದಿಲ್ಲ ಎಂದು ಪ್ರಧಾನಿ ಮೋದಿ ಹೇಳಿದ್ದಾರೆ. ಗುಜರಾತ್ನ ಏಕತಾ ನಗರದಲ್ಲಿ ರಾಷ್ಟ್ರೀಯ ಏಕತಾ ದಿನದ ಸಂದರ್ಭದಲ್ಲಿ ಮಾತನಾಡಿದ ಪ್ರಧಾನಿ ಮೋದಿ, “ನಕ್ಸಲಿಸಂ ಅಂತ್ಯವಾದರೂ ಧಿಮಾಗಿ ನಕ್ಸಲಿಸಂ ಯಾವತ್ತಿದ್ದರೂ ದೇಶದ ಅಭಿವೃದ್ಧಿಗೆ ಕಂಟಕ” ಎಂದು ಅಸಮಾಧಾನ ಹೊರಹಾಕಿದ್ದಾರೆ.
“ದೇಶಕ್ಕೆ ‘ವೈಚಾರಿಕ ನಕ್ಸಲಿಸಂ’ (ಧಿಮಾಗಿ ನಕ್ಸಲಿಸಂ) ಇಂದಿಗೂ ದೊಡ್ಡ ಬೆದರಿಕೆಯಾಗಿದೆ ಎಂದು ಪ್ರಧಾನಿ ಮೋದಿ ಎಚ್ಚರಿಸಿದ್ದಾರೆ. “ಸಾಮಾಜಿಕ ಜಾಲತಾಣಗಳ ಮೂಲಕ ಹರಡಲಾಗುವ ಆಧಾರರಹಿತ ವದಂತಿಗಳ ಕುರಿತು ನಾಗರಿಕರು ಸದಾ ಜಾಗರೂಕರಾಗಿರಬೇಕು. ಭಾರತದ ಏಕತೆ, ಅಖಂಡತೆ ಮತ್ತು ಜಾಗತಿಕ ಮಟ್ಟದಲ್ಲಿ ದೇಶದ ಕೀರ್ತಿಯನ್ನು ಎತ್ತಿಹಿಡಿಯಲು ಎಲ್ಲರೂ ಒಗ್ಗಟ್ಟಿನಿಂದ ಶ್ರಮಿಸಬೇಕು” ಎಂದು ಮನವಿ ಮಾಡಿದ್ದಾರೆ.
ಇದನ್ನೂ ಓದಿ: ಗುಜರಾತ್‌ನಲ್ಲಿ 400 ಕೋಟಿಗೂ ಅಧಿಕ ವೆಚ್ಚದ ಅಭಿವೃದ್ಧಿ ಯೋಜನೆಗಳಿಗೆ ಪ್ರಧಾನಿ ಮೋದಿ ಚಾಲನೆ
“ಒಂದು ಕಾಲದಲ್ಲಿ ಹಿಂಸಾಚಾರ ಮತ್ತು ಸಂಘರ್ಷಕ್ಕೆ ಈಡಾಗಿದ್ದ ಪ್ರದೇಶಗಳು ಈಗ ವೇಗದ ಅಭಿವೃದ್ಧಿಗೆ ಸಾಕ್ಷಿಯಾಗುತ್ತಿವೆ. ಉತ್ತಮ ರಸ್ತೆಗಳು, ಮೊಬೈಲ್ ಸಂಪರ್ಕ, ಶಿಕ್ಷಣ ಮತ್ತು ಆರೋಗ್ಯ ಸೌಲಭ್ಯಗಳು ಸುಧಾರಿಸುತ್ತಿದ್ದು, ಸ್ಥಳೀಯ ಯುವಕರಿಗೆ ಹೊಸ ಹೊಸ ಉದ್ಯೋಗ ಹಾಗೂ ಪ್ರಗತಿಯ ಅವಕಾಶಗಳು ಸೃಷ್ಟಿಯಾಗುತ್ತಿವೆ” ಎಂದು ಮೋದಿ ಹೇಳಿದ್ದಾರೆ.
ವಿಪಕ್ಷಗಳ ವಿರುದ್ಧ ಟೀಕೆ:
“ದೇಶದ ವಿಪಕ್ಷಗಳು ತಮ್ಮ ಸಾಂವಿಧಾನಿಕ ಕರ್ತವ್ಯವನ್ನು ಸಂಪೂರ್ಣವಾಗಿ ಮರೆತು ಅಭಿವೃದ್ಧಿ ವಿರೋಧಿ ತಡೆಗೋಡೆಗಳಾಗಿ ಮಾರ್ಪಟ್ಟಿವೆ. ಹತಾಶೆ ಮತ್ತು ನಿರಾಶೆಗೆ ಒಳಗಾಗಿರುವ ವಿಪಕ್ಷಗಳು ದೇಶದ ಪ್ರಗತಿಯ ಹಾದಿಯಲ್ಲಿ ನಿರಂತರವಾಗಿ ಅಡೆತಡೆಗಳನ್ನು ಸೃಷ್ಟಿಸುತ್ತಿವೆ. ಇದು ಆರೋಗ್ಯಕರ ವಿರೋಧ ಪಕ್ಷದ ಲಕ್ಷಣವಲ್ಲ, ಬದಲಿಗೆ ಕೇವಲ ಅಭಿವೃದ್ಧಿಗೆ ಅಡ್ಡಿಪಡಿಸುವ ನಡವಳಿಕೆಯಾಗಿದೆ. ಸಂವಿಧಾನದ ಘನತೆ ಮತ್ತು ಮಿತಿಗಳನ್ನು ಗಾಳಿಗೆ ತೂರುವುದನ್ನೇ ಅವರು ತಮ್ಮ ಮುಖ್ಯ ರಾಜಕೀಯ ಸಿದ್ಧಾಂತವನ್ನಾಗಿ ಮಾಡಿಕೊಂಡಿದ್ದಾರೆ” ಎಂದು ಪ್ರಧಾನಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ದೇಶ ಒಡೆಯುವ ಸಂಚು:
“ಭಾರತ ಮಾತೆಯ ಮಕ್ಕಳ ನಡುವೆ ವಿಭಜನೆ ಮೂಡಿಸಿ, ಕಾದಾಟ ಸೃಷ್ಟಿಸಲು ನಿರಂತರವಾಗಿ ಭೀಕರ ಸಂಚುಗಳನ್ನು ಹೆಣೆಯಲಾಗುತ್ತಿದೆ. ಕಳೆದ ದಶಕಕ್ಕೂ ಹೆಚ್ಚು ಕಾಲ ಅನುಭವಿಸಿದ ನಿರಂತರ ಸೋಲು ಹಾಗೂ ಹತಾಶೆಯಿಂದಾಗಿ ಈ ಶಕ್ತಿಗಳು ಈಗ ಬಹಿರಂಗವಾಗಿ ದೇಶದ ವಿರುದ್ಧ ನಿಂತಿವೆ. ವಿದೇಶಗಳಲ್ಲಿ ಯಾರು ಯಾರನ್ನು ರಹಸ್ಯವಾಗಿ ಭೇಟಿಯಾಗುತ್ತಿದ್ದಾರೆ? ಭಾರತ ವಿರೋಧಿ ಶಕ್ತಿಗಳು ಯಾರಿಗೆ ಬೆಂಬಲ ನೀಡುತ್ತಿವೆ? ಭಾರತದ ಶತ್ರುಗಳ ಭಾಷೆಯನ್ನು ಮಾತನಾಡುತ್ತಿರುವವರು ಯಾರು? ಈ ಎಲ್ಲಾ ಕುತಂತ್ರಗಳ ಸ್ವರೂಪವನ್ನು ದೇಶದ ಜನರು ಸ್ಪಷ್ಟವಾಗಿ ಗುರುತಿಸಬೇಕು. ಈ ದೇಶದ್ರೋಹಿ ತಂತ್ರಗಳನ್ನು ನಾವೆಲ್ಲರೂ ಒಗ್ಗಟ್ಟಿನಿಂದ ಎದುರಿಸಬೇಕಾಗಿದೆ” ಎಂದು ಪ್ರಧಾನಿ ಮೋದಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: ‘ಸರ್ದಾರ್ ಪಟೇಲರ ಮತಗಳನ್ನು ಕದ್ದು ನೆಹರೂ ಪ್ರಧಾನಿಯಾದರು’; ಕಾಂಗ್ರೆಸ್‌ ವಿರುದ್ಧ ಬಿಜೆಪಿ ವಾಗ್ದಾಳಿ
ಸರ್ದಾರ್ ಪಟೇಲ್ ಸ್ಮರಿಸಿದ ಮೋದಿ:
ಭಾರತದ ಉಕ್ಕಿನ ಮನುಷ್ಯ ಸರ್ದಾರ್ ವಲ್ಲಭಭಾಯಿ ಪಟೇಲ್ ಅವರ ಚಾರಿತ್ರಿಕ ಕೊಡುಗೆಗಳನ್ನು ಇದೇ ವೇಳೆ ಮೋದಿ ಸ್ಮರಿಸಿದರು. ಸರ್ದಾರ್ ಪಟೇಲರು ಕೇವಲ ಭಾರತದ ಭೌಗೋಳಿಕ ಗಡಿಗಳನ್ನು ಒಂದಾಗಿಸಲಿಲ್ಲ, ಬದಲಿಗೆ ಇಡೀ ದೇಶವನ್ನು ಭಾವನಾತ್ಮಕ ಏಕತೆಯ ಸೂತ್ರದಲ್ಲಿ ಬಂಧಿಸಿದರು ಎಂದು ಪ್ರಧಾನಿ ಹೇಳಿದರು. “ಸರ್ದಾರ್ ಪಟೇಲರು ಗುಜರಾತ್ನ ಐತಿಹಾಸಿಕ ಸೋಮನಾಥ ಮಂದಿರದ ಪುನರ್ನಿರ್ಮಾಣ ಕಾರ್ಯಕ್ಕೆ ಚಾಲನೆ ನೀಡುವ ಮೂಲಕ ದೇಶದ ಸಾಂಸ್ಕೃತಿಕ ಪುನರುತ್ಥಾನಕ್ಕೆ ಭದ್ರ ಬುನಾದಿ ಹಾಕಿದರು. ಆ ಐತಿಹಾಸಿಕ ಕಾರ್ಯಕ್ಕೆ ಈ ವರ್ಷ 75 ವರ್ಷಗಳು ಪೂರ್ಣಗೊಳ್ಳುತ್ತಿರುವುದು ನಮ್ಮೆಲ್ಲರ ಸೌಭಾಗ್ಯ.” ಎಂದು ಮೋದಿ ಹೇಳಿದ್ದಾರೆ.
“ನೂರಾರು ವರ್ಷಗಳ ಕಾಲ ಅನೇಕ ಆಕ್ರಮಣಕಾರರು ಮತ್ತು ಕ್ರೂರ ಆಡಳಿತಗಾರರು ದಾಳಿ ಮಾಡಿದರೂ, ಸೋಮನಾಥ ದೇವಾಲಯದ ಧ್ವಜವು ಸಾವಿರ ವರ್ಷಗಳಿಂದ ಸಂಪೂರ್ಣ ಆತ್ಮಗೌರವದಿಂದ ಬಾನಾಡಿಯಾಗಿ ಹಾರಾಡುತ್ತಿದೆ. ಅದೇ ಸ್ವದೇಶಿ ಸ್ವಾಭಿಮಾನದ ಸ್ಪೂರ್ತಿಯಿಂದ ಇಂದು ದೇಶದಾದ್ಯಂತ ‘ಸೋಮನಾಥ ಸ್ವಾಭಿಮಾನ ಪರ್ವ’ವನ್ನು ಭಕ್ತಿಯಿಂದ ಆಚರಿಸಲಾಗುತ್ತಿದೆ” ಎಂದು ಪ್ರಧಾನಿ ಸ್ಮರಿಸಿದರು.
ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ