ಇಂದಿನಿಂದ ಗುಜರಾತ್ನಲ್ಲಿ ಎಬಿಪಿ ಸಭೆ ಪ್ರಾರಂಭ; ಆರ್ಎಸ್ಎಸ್ ಶಾಖೆ ವಿಸ್ತರಣೆ, ಇನ್ನಿತರ ವಿಚಾರಗಳ ಸಮಗ್ರ ಚರ್ಚೆ
ದೇಶದಲ್ಲಿ ಸುಮಾರು 59 ಸಾವಿರ ಮಂಡಲಗಳಿವೆ. ಪ್ರತಿ ಮಂಡಲದಲ್ಲೂ 10-12 ಹಳ್ಳಿಗಳು ಇವೆ. ಎಲ್ಲ ಮಂಡಲಗಳಲ್ಲೂ ಶಾಖೆಯನ್ನು ವಿಸ್ತರಿಸುವ ಪ್ರಯತ್ನದಲ್ಲಿ ಆರ್ಎಸ್ಎಸ್ ತೊಡಗಿದೆ ಎಂದು ಮನಮೋಹನ್ ವೈದ್ಯ ಇಂದು ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.
Updated on:Mar 11, 2022 | 1:53 PM
ರಾಷ್ಟ್ರೀಯ ಸ್ವಯಂ ಸೇವಕ ಸಂಘ (RSS)ದ ಉನ್ನತ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಸಂಸ್ಥೆ ಅಖಿಲ ಭಾರತೀಯ ಪ್ರತಿನಿಧಿ ಸಭಾ (ABP) ಇಂದಿನಿಂದ ಮೂರು ದಿನಗಳ ಸಭೆ ನಡೆಸಲಿದ್ದು, ಈ ಸಭೆ ಗುಜರಾತ್ನ ಅಹ್ಮದಾಬಾದ್ನ ಪಿರಾನಾ ಗ್ರಾಮದಲ್ಲಿ ನಡೆಯಲಿದೆ. ಸಂಘಟನೆಯ ವಿಸ್ತರಣೆ ಸೇರಿ ಇನ್ನೂ ಅನೇಕ ವಿಷಯಗಳ ಬಗ್ಗೆ ಸಭೆಯಲ್ಲಿ ಚರ್ಚೆ ನಡೆಯಲಿದ್ದು, ಆರ್ಎಸ್ಎಸ್ ಮುಖ್ಯಸ್ಥ ಮೋಹನ್ ಭಾಗವತ್, ಸರಕಾರ್ಯವಾಹ ದತ್ತಾತ್ರೇಯ ಹೊಸಬಾಳೆ ಸೇರಿ ಸುಮಾರು 1200 ಪದಾಧಿಕಾರಿಗಳು ಪಾಲ್ಗೊಳ್ಳಲಿದ್ದಾರೆ (ಇದು ಸಾರ್ವಜನಿಕ ಸಭೆಯಲ್ಲ, ಕೇವಲ ಆರ್ಎಸ್ಎಸ್ ಪದಾಧಿಕಾರಿಗಳು, ಮುಖಂಡರಿಗಷ್ಟೇ ಅವಕಾಶ ಇರಲಿದೆ.)
ಈ ಬಗ್ಗೆ ಇಂದು ಸುದ್ದಿಗೋಷ್ಠಿ ನಡೆಸಿದ ಆರ್ಎಸ್ಎಸ್ನ ಸಹ ಸರಕಾರ್ಯವಾಹ (ಜಂಟಿ ಪ್ರಧಾನ ಕಾರ್ಯದರ್ಶಿ) ಮನಮೋಹನ್ ವೈದ್ಯ, ಆರ್ಎಸ್ಎಸ್ ಸದ್ಯ ದೇಶಾದ್ಯಂತ ದಿನವೂ 60 ಸಾವಿರ ಶಾಖೆಗಳನ್ನು ನಡೆಸುತ್ತಿದೆ. ಕೊವಿಡ್ ಕಾರಣದಿಂದ ಕೆಲ ಕಾಲ ಶಾಖೆಗಳು ಸ್ಥಗಿತಗೊಂಡಿದ್ದರೂ, ಇದೀಗ ಶೇ.97.5ರಷ್ಟು ಶಾಖೆಗಳು ಮತ್ತೆ ಪ್ರಾರಂಭಗೊಂಡಿವೆ. ಈ ಶಾಖೆಗಲ್ಲಿ ಶೇ.61ರಷ್ಟು ಶಾಲಾ-ಕಾಲೇಜುಗಳ ವಿದ್ಯಾರ್ಥಿಗಳೇ ಇದ್ದಾರೆ. ಆರ್ಎಸ್ಎಸ್ ಬಗ್ಗೆ ಯುವಕರು ತೋರಿಸುತ್ತಿರುವ ಆಸಕ್ತಿಯನ್ನು ಇದು ತೋರಿಸುತ್ತದೆ. ದೇಶದ ಒಟ್ಟಾರೆ ನಗರಗಳ ಸಂಖ್ಯೆಯಲ್ಲಿ ಶೇ.94ರಷ್ಟು ನಗರಗಳಲ್ಲಿ ಆರ್ಎಸ್ಎಸ್ ಶಾಖೆ ಇದೆ. ಇದು ನಮ್ಮ ಸಂಘದ ವಿಸ್ತರಣಾ ಬಲವನ್ನು ತೋರಿಸುತ್ತದೆ ಎಂದು ಹೇಳಿದ್ದಾರೆ.
ದೇಶದಲ್ಲಿ ಸುಮಾರು 59 ಸಾವಿರ ಮಂಡಲಗಳಿವೆ. ಪ್ರತಿ ಮಂಡಲದಲ್ಲೂ 10-12 ಹಳ್ಳಿಗಳು ಇವೆ. ಎಲ್ಲ ಮಂಡಲಗಳಲ್ಲೂ ಶಾಖೆಯನ್ನು ವಿಸ್ತರಿಸುವ ಪ್ರಯತ್ನದಲ್ಲಿ ಆರ್ಎಸ್ಎಸ್ ತೊಡಗಿದೆ. ಕೊರೊನಾ ವೈರಸ್ ಕಾರಣದಿಂದ ನಮ್ಮ ಸಂಘಟನೆ ವಿಸ್ತರಣೆಗೆ ತಡೆಯಾಗಿತ್ತು. ಆದರೆ ಈಗ ಮತ್ತೆ ಕಾರ್ಯಗತಗೊಳಿಸುತ್ತಿದ್ದು, ಇನ್ನೆರಡು ವರ್ಷಗಳಲ್ಲಿ ಬಹುತೇಕ ಮಂಡಲಗಳಲ್ಲಿ ಆರ್ಎಸ್ಎಸ್ ಶಾಖೆ ವಿಸ್ತರಣೆ ಮಾಡುವುದು ನಮ್ಮ ಮಹದುದ್ದೇಶ ಎಂದೂ ಮನಮೋಹನ್ ವೈದ್ಯ ಮಾಹಿತಿ ನೀಡಿದ್ದಾರೆ.
ಈ ಶಾಖೆಗಳ ಮೂಲಕವಷ್ಟೇ ಅಲ್ಲ, ಅನೇಕ ಜನರು ನಮ್ಮ ಆರ್ಎಸ್ಎಸ್ ಸೇರಿ (Join RSS) ಎಂಬ ಅಭಿಯಾನದ ಮೂಲಕವೇ ಸಂಘಕ್ಕೆ ಸೇರ್ಪಡೆಗೊಳ್ಳಲು ಆಸಕ್ತಿ ತೋರುತ್ತಿದ್ದಾರೆ. ಈ ಅಭಿಯಾನವನ್ನು ನಮ್ಮ ಸಂಘದ ವೆಬ್ಸೈಟ್ನಲ್ಲಿ ನಡೆಸಲಾಗುತ್ತಿದೆ. ಆರ್ಎಸ್ಎಸ್ನ್ನು ತಳದಿಂದಲೇ ವಿಸ್ತರಿಸುವ ಬಗ್ಗೆ, ಶಾಖೆ ವಿಸ್ತರಣೆ ಕುರಿತಾಗಿ ಈ ಮೂರು ದಿನಗಳ ಸಮಾವೇಶದಲ್ಲಿ ಸಮಗ್ರವಾಗಿ ಚರ್ಚಿಸಲಾಗುತ್ತದೆ. ಈ ಮೂಲಕ ಯೋಜನೆ ರೂಪಿಸಲಾಗುತ್ತದೆ. ಇದರೊಂದಿಗೆ ಸಮಾಜದಲ್ಲಿ ಸಾಮರಸ್ಯ ಮೂಡಿಸುವ ಮತ್ತು ನೈಸರ್ಗಿಕ ಕೃಷಿ ಉತ್ತೇಜನ ವಿಚಾರಗಳೂ ಚರ್ಚೆಯಾಗಲಿವೆ ಎಂದು ಹೇಳಿದ್ದಾರೆ. 2017ರಿಂದ 2021ರವರೆಗೆ ಸುಮಾರು 1ರಿಂದ 1.25 ಲಕ್ಷ ಜನರು ಆರ್ಎಸ್ಎಸ್ ಸೇರಲು ಆಸಕ್ತಿ ತೋರಿಸಿದ್ದಾರೆ. ದೇಶದ ಕೇಂದ್ರ ಭಾಗದಿಂದ ಮತ್ತು ಪಶ್ಚಿಮ ಬಂಗಾಳದಿಂದ ಅನೇಕ ಮನವಿಗಳು ಬಂದಿದ್ದವೂ ಎಂದೂ ಮನಮೋಹನ್ ವೈದ್ಯ ತಿಳಿಸಿದ್ದಾರೆ.
Published On - 1:52 pm, Fri, 11 March 22
