Shocking News: ಹೆಂಡತಿ ಮಟನ್ ಕರಿ ಮಾಡದಿದ್ದಕ್ಕೆ 6 ಬಾರಿ ಪೊಲೀಸರಿಗೆ ಫೋನ್ ಮಾಡಿ ಕಾಟ ಕೊಟ್ಟ ಗಂಡ!
ತೆಲಂಗಾಣದ ವ್ಯಕ್ತಿಯೊಬ್ಬ ತನ್ನ ಹೆಂಡತಿ ತನಗೆ ಮಟನ್ ಕರಿ ಮಾಡಿಕೊಟ್ಟಿಲ್ಲ ಎಂಬ ಕಾರಣಕ್ಕೆ ಆಕೆಯ ಮೇಲೆ ದೂರು ನೀಡಲು 6 ಬಾರಿ 100 ನಂಬರ್ಗೆ (ಪೊಲೀಸ್ ಕಂಟ್ರೋಲ್ ರೂಂ) ಕರೆ ಮಾಡಿದ್ದಾನೆ.
ನಲ್ಗೊಂಡ: ನಾನ್ವೆಜ್ ಪ್ರಿಯರಿಗೆ ವಾರದಲ್ಲಿ ಮೂರ್ನಾಲ್ಕು ದಿನವಾದರೂ ನಾನ್ವೆಜ್ ಊಟ ಮಾಡದಿದ್ದರೆ ಸಮಾಧಾನವೇ ಆಗುವುದಿಲ್ಲ. ಕುರಿಯ ಮಾಂಸದಿಂದ ತಯಾರಿಸಲಾಗುವ ಮಟನ್ ಕರಿ (Mutton Curry), ಮಟನ್ ಕಬಾಬ್ ಮುಂತಾದ ಅಡುಗೆಗಳನ್ನು ಮೆಚ್ಚದಿರುವ ನಾನ್ವೆಜ್ ಪ್ರಿಯರೇ ಇಲ್ಲ ಎನ್ನಬಹುದು. ಆದರೆ, ಇದೇ ಮಟನ್ ಕಾರಣಕ್ಕೆ ಇದೀಗ ವ್ಯಕ್ತಿಯೊಬ್ಬ ಜೈಲು ಸೇರಿದ್ದಾನೆ. ಅಷ್ಟಕ್ಕೂ ಆತ ಮಾಡಿದ ತಪ್ಪಾದರೂ ಏನು? ಇಲ್ಲಿದೆ ಕುತೂಹಲಕಾರಿ ಸಂಗತಿ. ತೆಲಂಗಾಣದ ವ್ಯಕ್ತಿಯೊಬ್ಬ ತನ್ನ ಹೆಂಡತಿ ತನಗೆ ಮಟನ್ ಕರಿ ಮಾಡಿಕೊಟ್ಟಿಲ್ಲ ಎಂಬ ಕಾರಣಕ್ಕೆ ಆಕೆಯ ಮೇಲೆ ದೂರು ನೀಡಲು 6 ಬಾರಿ 100 ನಂಬರ್ಗೆ (ಪೊಲೀಸ್ ಸಹಾಯವಾಣಿ) ಕರೆ ಮಾಡಿದ್ದಾನೆ. ಅನಗತ್ಯವಾಗಿ ಕ್ಷುಲ್ಲಕ ಕಾರಣಕ್ಕೆ ಪೊಲೀಸರಿಗೆ ಕರೆ ಮಾಡಿ, ತೊಂದರೆ ಕೊಟ್ಟ ಆ ವ್ಯಕ್ತಿಯನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ವರದಿಗಳ ಪ್ರಕಾರ, ನವೀನ್ ಎಂಬ ವ್ಯಕ್ತಿ ತನ್ನ ಹೆಂಡತಿ ತನಗೆ ಮಟನ್ ಕರಿ ಮಾಡಿಕೊಟ್ಟಿಲ್ಲ ಎಂಬ ಕಾರಣಕ್ಕೆ ಅವಳೊಂದಿಗೆ ಜಗಳವಾಡಿದ್ದಾನೆ. ಇದರಿಂದ ಹೆಂಡತಿ ಮೇಲೆ ಕೋಪಗೊಂಡ ಆತ ತನ್ನ ಫೋನ್ ಎತ್ತಿಕೊಂಡು 100ಗೆ ಡಯಲ್ ಮಾಡಿದ್ದಾನೆ. ಪೊಲೀಸರು ಫೋನ್ ಎತ್ತಿ ಏನೆಂದು ಕೇಳಿದಾಗ ತನ್ನ ಹೆಂಡತಿ ತನಗೆ ಬೇಕಾದ ಅಡುಗೆ ಮಾಡಿಕೊಡುತ್ತಿಲ್ಲ ಎಂದು ತನ್ನ ಹೆಂಡತಿಯ ವಿರುದ್ಧ ದೂರಿದ್ದಾನೆ ಎಂದು ತೆಲಂಗಾಣ ಟುಡೇ ವರದಿ ಮಾಡಿದೆ.
ಆರೋಪಿ ನವೀನ್
ಆತನ ಕರೆ ಸ್ವೀಕರಿಸಿದ ಪೊಲೀಸ್ ನಿಯಂತ್ರಣ ಕೊಠಡಿ ನಿರ್ವಾಹಕರು ಆತ ತಮಾಷೆಗಾಗಿ ಈ ರೀತಿ ಕರೆ ಮಾಡಿದ್ದಾನೆ ಎಂದು ಸುಮ್ಮನಾಗಿದ್ದಾರೆ. ಆದರೆ, ಮತ್ತೆ 5 ಬಾರಿ ಇದೇ ವಿಷಯಕ್ಕೆ ಆತ ಫೋನ್ ಮಾಡಿದ್ದರಿಂದ ಕೋಪಗೊಂಡ ಪೊಲೀಸರು ಆತನಿಗೆ ಬುದ್ಧಿ ಕಲಿಸಲು ನಿರ್ಧರಿಸಿದ್ದಾರೆ. ಆತನನ್ನು ವಶಕ್ಕೆ ಪಡೆದ ಪೊಲೀಸರು ಭಾರತೀಯ ದಂಡ ಸಂಹಿತೆಯ (IPC) ಸೆಕ್ಷನ್ 290 ಮತ್ತು 510ರ ಅಡಿಯಲ್ಲಿ ಕೇಸ್ ದಾಖಲಿಸಿದ್ದಾರೆ. ಕುಡಿದ ಮತ್ತಿನಲ್ಲಿ ಹೆಂಡತಿಯ ಮೇಲೆ ದೂರು ನೀಡಲು ಪೊಲೀಸ್ ಕಂಟ್ರೋಲ್ ರೂಂ ನಂಬರ್ಗೆ ಫೋನ್ ಮಾಡಿ ತೊಂದರೆ ಕೊಟ್ಟಿದ್ದಕ್ಕೆ ಆತನ ವಿರುದ್ಧ ಕೇಸ್ ದಾಖಲಿಸಲಾಗಿದೆ.
ಪೊಲೀಸರ ಪ್ರಕಾರ, ನವೀನ್ ಶುಕ್ರವಾರ ರಾತ್ರಿ ಮದ್ಯದ ಅಮಲಿನಲ್ಲಿ ಮನೆಗೆ ಮರಳಿದ್ದ. ತನಗಾಗಿ ಮಟನ್ ಕರಿ ಮಾಡಲು ಆತ ತನ್ನ ಹೆಂಡತಿಗೆ ಆದೇಶಿಸಿದ್ದ. ಅವಳು ಅದಕ್ಕೆ ಒಪ್ಪದಿದ್ದಾಗ ಪೊಲೀಸರಿಗೆ ದೂರು ನೀಡಲು 100 (ಪೊಲೀಸ್ ಕಂಟ್ರೋಲ್ ರೂಂ) ಡಯಲ್ ಮಾಡಿದನು. ಈ ಘಟನೆಯ ನಂತರ ಸಂಕಷ್ಟದಲ್ಲಿರುವ ಮತ್ತು ತುರ್ತು ಸಂದರ್ಭಗಳಲ್ಲಿ ಜನರಿಗೆ ಸಹಾಯ ಮಾಡುವ ಉದ್ದೇಶದಿಂದ ಇರುವ 100 ಅನ್ನು ದುರುಪಯೋಗಪಡಿಸಿಕೊಳ್ಳದಂತೆ ಪೊಲೀಸರು ಜನರಿಗೆ ಎಚ್ಚರಿಕೆ ನೀಡಿದ್ದಾರೆ.
ಇದನ್ನೂ ಓದಿ: ‘ಮೀನು..ಮಟನ್ಗಿಂತ ಜಾಸ್ತಿ ಗೋಮಾಂಸವನ್ನೇ ತಿನ್ನಿ’-ವಿವಾದಾತ್ಮಕ ಹೇಳಿಕೆ ನೀಡಿ, ಟೀಕೆಗೆ ಗುರಿಯಾದ ಬಿಜೆಪಿ ಸಚಿವ
ಮದುವೆಯನ್ನೇ ಮುರಿದ ಮಟನ್; ಮನೆಗೆ ಹೋಗುವ ಮೊದಲು ಬೇರೆ ಯುವತಿಗೆ ತಾಳಿ ಕಟ್ಟಿ, ಕರೆದುಕೊಂಡು ಹೋದ ವರ
Published On - 2:17 pm, Tue, 22 March 22
