ತಮಿಳುನಾಡು ನಗರ ಸ್ಥಳೀಯ ಸಂಸ್ಥೆ ಚುನಾವಣಾ ಫಲಿತಾಂಶ ಮುಂದಿನ ವಿಧಾನಸಭೆ ಚುನಾವಣೆಗೆ ತಾಲೀಮು ಎಂದ ಸಿಟಿ ರವಿ
ನಾವು ರಾಜ್ಯದಲ್ಲಿ ಮೈತ್ರಿ ಇಲ್ಲದೆ ಚುನಾವಣೆ ಎದುರಿಸುತ್ತಿರುವುದು ಇದೇ ಮೊದಲು. ಫಲಿತಾಂಶದ ಬಗ್ಗೆ ನಮಗೆ ಸಂತೋಷವಾಗಿದ್ದರೂ, ರಾಜ್ಯದಲ್ಲಿ ಸರಿಯಾದ ವಿಸ್ತರಣೆಯನ್ನು ಮಾಡುವ ಮೊದಲು ನಾವು ಅದನ್ನು ಪೂರ್ವಾಭ್ಯಾಸ ಎಂದು ಕರೆಯುತ್ತೇವೆ.
Updated on:Feb 23, 2022 | 11:17 AM
ಚೆನ್ನೈ: ತಮಿಳುನಾಡು ನಗರ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ(Tamil Nadu Urban Civic Poll) ಬಿಜೆಪಿ (BJP) ಅತ್ಯುತ್ತಮ ಪ್ರದರ್ಶನ ನೀಡಿದ್ದು ದಕ್ಷಿಣ ರಾಜ್ಯದಲ್ಲಿ ಇದು ಇನ್ನೂ ದೃಢವಾದ ರಾಜಕೀಯ ನೆಲೆಯನ್ನು ಕಂಡುಕೊಳ್ಳದ ಮುಂದಿನ ವಿಧಾನಸಭಾ ಚುನಾವಣೆಯ ತಾಲೀಮು ಎಂದು ಪರಿಗಣಿಸಲಾಗಿದೆ. ಮಂಗಳವಾರ ಫಲಿತಾಂಶ ಪ್ರಕಟವಾದ ನಂತರ ಬಿಜೆಪಿಯ ತಮಿಳುನಾಡು ಉಸ್ತುವಾರಿ ಮತ್ತು ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸಿ.ಟಿ.ರವಿ (CT Ravi )ಈ ಅಭಿಪ್ರಾಯವನ್ನು ಪ್ರತಿಧ್ವನಿಸಿದರು. ನಾವು ರಾಜ್ಯದಲ್ಲಿ ಮೈತ್ರಿ ಇಲ್ಲದೆ ಚುನಾವಣೆ ಎದುರಿಸುತ್ತಿರುವುದು ಇದೇ ಮೊದಲು. ಫಲಿತಾಂಶದ ಬಗ್ಗೆ ನಮಗೆ ಸಂತೋಷವಾಗಿದ್ದರೂ, ರಾಜ್ಯದಲ್ಲಿ ಸರಿಯಾದ ವಿಸ್ತರಣೆಯನ್ನು ಮಾಡುವ ಮೊದಲು ನಾವು ಅದನ್ನು ಪೂರ್ವಾಭ್ಯಾಸ ಎಂದು ಕರೆಯುತ್ತೇವೆ. ಇದು ಖಂಡಿತವಾಗಿಯೂ ನಮಗೆ ಹೆಚ್ಚಿನ ವಿಶ್ವಾಸವನ್ನು ನೀಡಿದೆ ಮತ್ತು ರಾಜ್ಯದ ಮತದಾರರೊಂದಿಗೆ ತೊಡಗಿಸಿಕೊಳ್ಳಲು ನಮ್ಮ ಕೇಡರ್ ಅಭ್ಯಾಸವನ್ನು ನೀಡಿದೆ ಎಂದು ನ್ಯೂಸ್ 18 ಜತೆ ಮಾತನಾಡಿದ ಸಿ.ಟಿ ರವಿ ಹೇಳಿದ್ದಾರೆ. ರಾಜ್ಯದಲ್ಲಿ ಹಿಂದಿನ ಎಲ್ಲಾ ಚುನಾವಣೆಗಳಲ್ಲಿ ಬಿಜೆಪಿ ಎಐಎಡಿಎಂಕೆ ಜೊತೆ ಮೈತ್ರಿ ಮಾಡಿಕೊಂಡಿತ್ತು. ಪಕ್ಷ ಇನ್ನೂ ಬಹಳ ದೂರ ಸಾಗಬೇಕಿದೆ ಎಂದು ರವಿ ಹೇಳಿದರು. ಕಳೆದ ಚುನಾವಣೆಯಲ್ಲಿ ಪಾಲಿಕೆಯಲ್ಲಿ ನಾಲ್ಕು ಸ್ಥಾನ ಪಡೆದಿದ್ದ ಬಿಜೆಪಿ ಈ ಬಾರಿ 22 ಸ್ಥಾನ ಗಳಿಸಿತ್ತು. ಪುರಸಭೆಯಲ್ಲಿ ಕಳೆದ ಬಾರಿ 37 ಸ್ಥಾನ ಪಡೆದಿದ್ದು, ಈಗ 56ಕ್ಕೆ ಸುಧಾರಿಸಿದೆ. ಪಟ್ಟಣ ಪಂಚಾಯಿತಿಯಲ್ಲಿ ಹಿಂದಿನ ಚುನಾವಣೆಯಲ್ಲಿ ಬಿಜೆಪಿ 185 ಸ್ಥಾನ ಗಳಿಸಿದ್ದು ಈ ಬಾರಿ 230 ಕ್ಕೆ ಏರಿಸಿದೆ.
ಪ್ರಧಾನಿ ನರೇಂದ್ರ ಮೋದಿ ಅವರ ದೂರದೃಷ್ಟಿ ಮತ್ತು ಕೇಂದ್ರ ಯೋಜನೆಗಳ ಪ್ರಯೋಜನಗಳಿಂದಾಗಿ ಭಾರತೀಯ ಜನತಾ ಪಕ್ಷವು ತಮಿಳುನಾಡಿನಲ್ಲಿ ಮೂರನೇ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದೆ ಎಂದು ತಮಿಳುನಾಡು ಬಿಜೆಪಿ ಮುಖ್ಯಸ್ಥ ಕೆ. ಅಣ್ಣಾಮಲೈ ಹೇಳಿದ್ದಾರೆ. ಸಿಟಿ ರವಿ ಕೂಡಾ ಇದನ್ನೇ ಪುನರುಚ್ಚರಿಸಿದ್ದಾರೆ.ಸಂಖ್ಯಾಬಲದಲ್ಲಿ ಕಾಂಗ್ರೆಸ್ ಹೆಚ್ಚು ಸೀಟು ಹೊಂದಿದೆ ಆದರೆ ಅದು ರಾಜ್ಯದ ಆಡಳಿತಾರೂಢ ಡಿಎಂಕೆ ಜೊತೆ ಮೈತ್ರಿಯಲ್ಲಿದೆ ಎಂದು ಬಿಜೆಪಿ ಹೇಳಿದೆ.
ಕಳೆದ ಬಾರಿ ಶೇ.2.5ರ ಆಸುಪಾಸಿನಲ್ಲಿದ್ದ ಮತಗಳಿಕೆ ಈ ಬಾರಿ ದ್ವಿಗುಣಗೊಂಡಿದೆ. ನಾವು ನಿರೀಕ್ಷಿಸುತ್ತಿದ್ದೇವೆ: ಅಂತಿಮ ಅಂಕಿಅಂಶಗಳು ಇನ್ನೂ ಬರಬೇಕಾಗಿರುವುದರಿಂದ ಶೇಕಡಾ 5.5 ಕ್ಕಿಂತ ಹೆಚ್ಚು” ಎಂದು ಅಣ್ಣಾಮಲೈ ಹೇಳಿದರು. ನಾವು ಪಿಎಂಕೆ, ಕಮ್ಯುನಿಸ್ಟರು, ಸೀಮಾನ್ ಪಕ್ಷ, ಕಮಲ್ ಹಾಸನ್ ಪಕ್ಷ ಮತ್ತು ಇತರರನ್ನು ಹಿಂದಿಕ್ಕಿದ್ದೇವೆ. ಅವರು ತಾಂತ್ರಿಕವಾಗಿ ಇದುವರೆಗೆ ನಮಗಿಂತ ಮುಂದಿದ್ದರು ಎಂದು ಅಣ್ಣಾಮಲೈ ಹೇಳಿದ್ದಾರೆ.
Published On - 11:08 am, Wed, 23 February 22
