ಪ್ರವೇಶ ನಿರಾಕರಿಸಿದ್ದಕ್ಕೆ ತಿರುಪತಿ ಏರ್ಪೋರ್ಟ್ಗೆ ನೀರು ಪೂರೈಕೆ ಸ್ಥಗಿತಗೊಳಿಸಿದ ಆಂಧ್ರ ಶಾಸಕನ ಪುತ್ರ?!-ಆರೋಪಕ್ಕಿಲ್ಲ ಪ್ರತಿಕ್ರಿಯೆ
ವೈಎಸ್ಆರ್ಸಿಪಿ ಮುಖಂಡರು ರೇಣಿಗುಂಟಾ ಏರ್ಪೋರ್ಟ್ ಅಧಿಕಾರಿಗಳ ವಿರುದ್ಧ ಕಿಡಿಕಾರುತ್ತಿದ್ದಾರೆ. ವಿಮಾನ ನಿಲ್ದಾಣದ ಅಧಿಕಾರಿಗಳು ತುಂಬ ಅಹಂಕಾರದಿಂದ ವರ್ತಿಸುತ್ತಿದ್ದಾರೆ. ಯಾವುದೇ ಶಿಷ್ಟಾಚಾರಗಳನ್ನೂ ಪಾಲನೆ ಮಾಡುತ್ತಿಲ್ಲ ಎಂದಿದ್ದಾರೆ.
Updated on: Jan 13, 2022 | 1:01 PM
ತಿರುಪತಿ ಏರ್ಪೋರ್ಟ್ನೊಳಗೆ ಹೋಗಲು ತಮಗೆ ಅಲ್ಲಿನ ಸಿಬ್ಬಂದಿ ಅವಕಾಶ ಕೊಡಲಿಲ್ಲ ಎಂಬ ಕಾರಣಕ್ಕೆ ಶಾಸಕನ ಪುತ್ರನೊಬ್ಬ ವಿಭಿನ್ನ ರೀತಿಯಲ್ಲಿ ಸೇಡುತೀರಿಸಿಕೊಂಡ ಆರೋಪ ಕೇಳಿಬಂದಿದೆ. ಆಂಧ್ರಪ್ರದೇಶದ ಶಾಸಕ ಬಿ.ಕರುಣಾಕರ್ ರೆಡ್ಡಿ ಪುತ್ರ ಅಭಿನಯ್ ರೆಡ್ಡಿ ತಿರುಪತಿಯ ಡೆಪ್ಯೂಟಿ ಮೇಯರ್. ಇವರು ಹಾಗೂ ತಿರುಪತಿ ಏರ್ಪೋರ್ಟ್ ಮ್ಯಾನೇಜರ್ ಸುನಿಲ್ ನಡುವೆ ವಾಗ್ವಾದ ನಡೆದಿತ್ತು. ಅದರ ಮರುದಿನ ತಿರುಪತಿ ಏರ್ಪೋರ್ಟ್ ಮತ್ತು ಅಲ್ಲಿನ ಸಿಬ್ಬಂದಿಯ ವಸತಿ ಗೃಹಗಳಿಗೆ ನೀರು ಪೂರೈಕೆ ಸ್ಥಗಿತಗೊಂಡಿದೆ ಎಂದು ಇಂಡಿಯಾ ಟುಡೆ ವರದಿ ಮಾಡಿದೆ. ತನ್ನನ್ನು ಏರ್ಪೋರ್ಟ್ನೊಳಗೆ ಬಿಡಲಿಲ್ಲ ಎಂಬ ಕಾರಣಕ್ಕೆ ನೀರು ಪೂರೈಕೆಯನ್ನು ಅಭಿನಯ್ ರೆಡ್ಡಿಯೇ ಕಡಿತಗೊಳಿಸಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ. ಆದರೆ ಈ ಬಗ್ಗೆ ಅಧಿಕೃತವಾಗಿ ಯಾರದ್ದೇ ಹೇಳಿಕೆಯೂ ಲಭ್ಯವಾಗಿಲ್ಲ ಎಂದು ಇಂಡಿಯಾ ಟುಡೆ ವರದಿಯಲ್ಲಿ ಉಲ್ಲೇಖಿಸಿದೆ.
ತಿರುಪತಿಯ ರೇಣಿಗುಂಟಾ ವಿಮಾನ ನಿಲ್ದಾಣವನ್ನು ಭಾರತದ ಏರ್ಪೋರ್ಟ್ ಪ್ರಾಧಿಕಾರ ನಿರ್ವಹಿಸುತ್ತಿದೆ. ಅಭಿನಯ್ ರೆಡ್ಡಿ ಆಂಧ್ರಪ್ರದೇಶದ ಸಚಿವ ಬೋತ್ಸಾ ಸತ್ಯನಾರಾಯಣರ್ರನ್ನು ಸ್ವಾಗತಿಸಲು ವಿಮಾನ ನಿಲ್ದಾಣಕ್ಕೆ ಹೋಗಿದ್ದರು. ತಿರುಪತಿಯಲ್ಲಿ ನಡೆಯುತ್ತಿದ್ದ ರಾಷ್ಟ್ರೀಯಮಟ್ಟದ ಕಬಡ್ಡಿ ಪಂದ್ಯಾವಳಿಯ ಸಮಾರೋಪ ಸಮಾರಂಭಕ್ಕೆ ಈ ಸಚಿವರು ಬಂದಿದ್ದರು. ಸಚಿವರೊಟ್ಟಿಗೆ ತಿರುಪಲ ತಿರುಪತಿ ದೇವಸ್ಥಾನಂ (TTD)ಯ ಅಧ್ಯಕ್ಷ ವೈ.ವಿ.ಸುಬ್ಬಾ ರೆಡ್ಡಿ ಕೂಡ ಇದ್ದರು. ಇವರಿಬ್ಬರನ್ನೂ ಸ್ವಾಗತಿಸಿ, ಕರೆದುಕೊಂಡು ಬರಲು ಅಭಿನಯ್ ರೆಡ್ಡಿ, ತನ್ನ ಸಹಾಯಕರೊಂದಿಗೆ ಅಲ್ಲಿಗೆ ತೆರಳಿದ್ದರು.
ಆದರೆ ವಿಮಾನ ನಿಲ್ದಾಣ ಪ್ರಾಧಿಕಾರದ ಮ್ಯಾನೇಜರ್ ಸುನೀಲ್, ಅಭಿನಯ್ ಮತ್ತು ಅವರ ಸಹಾಯಕರಿಗೆ ಪ್ರವೇಶ ನಿರಾಕರಿಸಿದ್ದಾರೆ. ಇದರಿಂದಾಗಿ ಅಲ್ಲಿ ಜಗಳವೂ ನಡೆಯಿತು. ಅಭಿನಯ್ ರೆಡ್ಡಿ ಮತ್ತು ಏರ್ಪೋರ್ಟ್ ಅಧಿಕಾರಿಗಳ ಮಧ್ಯೆ ವಾಗ್ವಾದ ನಡೆದ ಕೆಲವೇ ಹೊತ್ತಲ್ಲಿ, ಏರ್ಪೋರ್ಟ್ ಮತ್ತು ಅಲ್ಲಿನ ಸಿಬ್ಬಂದಿ ವಾಸವಾಗಿರುವ ವಸತಿ ಗೃಹಕ್ಕೆ ನೀರಿನ ಪೂರೈಕೆ ಸ್ಥಗಿತಗೊಂಡಿದೆ. ಇದಕ್ಕೆ ಅಭಿನಯ್ ರೆಡ್ಡಿಯೇ ಕಾರಣ ಎಂದು ಅಲ್ಲಿನವರು ಆರೋಪಿಸಿದ್ದಾರೆ. ಆದರೆ ಮುನ್ಸಿಪಲ್ ಆಡಳಿತ ಇದನ್ನು ನಿರಾಕರಿಸಿದ್ದು, ನೀರಿನ ಪೈಪ್ಲೈನ್ ಬ್ಲಾಕ್ ಆಗಿದ್ದರಿಂದ ನೀರು ಪೂರೈಕೆ ಸ್ಥಗಿತಗೊಂಡಿದೆ ಎಂದು ಹೇಳಿದೆ.
ಇನ್ನೊಂದೆಡೆ ವೈಎಸ್ಆರ್ಸಿಪಿ ಮುಖಂಡರು ರೇಣಿಗುಂಟಾ ಏರ್ಪೋರ್ಟ್ ಅಧಿಕಾರಿಗಳ ವಿರುದ್ಧ ಕಿಡಿಕಾರುತ್ತಿದ್ದಾರೆ. ವಿಮಾನ ನಿಲ್ದಾಣದ ಅಧಿಕಾರಿಗಳು ತುಂಬ ಅಹಂಕಾರದಿಂದ ವರ್ತಿಸುತ್ತಿದ್ದಾರೆ. ಯಾವುದೇ ಶಿಷ್ಟಾಚಾರಗಳನ್ನೂ ಪಾಲನೆ ಮಾಡುತ್ತಿಲ್ಲ ಎಂದಿದ್ದಾರೆ. ಇದೇ ವೇಳೆ ಟ್ವೀಟ್ ಮಾಡಿರುವ ಆಂಧ್ರ ಪ್ರತಿಪಕ್ಷ ನಾಯಕ ತೆಲುಗು ದೇಸಂ ಪಾರ್ಟಿ (TDP) ಪ್ರಧಾನ ಕಾರ್ಯದರ್ಶಿ ನರ ಲೋಕೇಶ್, ವಿಮಾನ ನಿಲ್ದಾಣ ಹಾಗೂ ಸಿಬ್ಬಂದಿ ವಸತಿ ಗೃಹಗಳಿಗೆ ನೀರು ಪೂರೈಕೆ ಸ್ಥಗಿತಗೊಳಿಸಿರುವುದು ವೈಎಸ್ ಆರ್ ಸಿಪಿಯ ಅರಾಜಕ ಆಡಳಿತವನ್ನು ಎತ್ತಿ ತೋರಿಸುತ್ತದೆ ಎಂದು ಹೇಳಿದ್ದಾರೆ. ಆದರೆ ಸದ್ಯ ಏರ್ಪೋರ್ಟ್ ಅಧಿಕಾರಿಗಳಾಗಲಿ, ಮುನ್ಸಿಪಲ್ ಆಡಳಿತದ ಅಧಿಕಾರಿಗಳಾಗಲೀ ಮೌನವಾಗಿದ್ದಾರೆ.
