ಹಿಂದೂಗಳ ಏಕತೆ ಭದ್ರತೆಯನ್ನು ಖಾತ್ರಿಪಡಿಸುತ್ತೆ, ನೇಪಾಳದಂತಹ ಕ್ರಾಂತಿ ಬದಲಾವಣೆ ತರುವುದಿಲ್ಲ: ಮೋಹನ್ ಭಾಗವತ್

ನವದೆಹಲಿ, ಅಕ್ಟೋಬರ್ 02: ಹಿಂದೂಗಳ ಏಕತೆ ಭದ್ರತೆಯನ್ನು ಖಾತ್ರಿಪಡಿಸುತ್ತದೆ, ನೇಪಾಳದಂತಹ ಕ್ರಾಂತಿ ಯಾವುದೇ ಬದಲಾವಣೆ ತರುವುದಿಲ್ಲ ಎಂದು ಆರ್​​ಎಸ್​​ಎಸ್​ ಸರಸಂಘ ಚಾಲಕ ಮೋಹನ್ ಭಾಗವತ್(Mohan Bhagwat) ಹೇಳಿದ್ದಾರೆ. ಪಹಲ್ಗಾಮ್ ದಾಳಿಯಲ್ಲಿ ಭಯೋತ್ಪಾದಕರು ಹಿಂದೂಗಳನ್ನು ಅವರ ಧರ್ಮವನ್ನು ಕೇಳಿ ನಂತರ ಕೊಂದರು. ನಮ್ಮ ಸರ್ಕಾರ ಮತ್ತು ಸೈನ್ಯವು ಸರಿಯಾಗಿ ಪ್ರತಿಕ್ರಿಯಿಸಿತು, ಈ ಘಟನೆಯ ನಂತರವೇ ನಮಗೆ ಸ್ನೇಹಿತ ಮತ್ತು ಶತ್ರು ಯಾರೆಂದು ತಿಳಿಯಿತು ಎಂದರು.

ನೇಪಾಳ, ಶ್ರೀಲಂಕಾ ಮತ್ತು ಬಾಂಗ್ಲಾದೇಶದಲ್ಲಿ ನಡೆದ ಪ್ರತಿಭಟನೆ, ಹಿಂಸಾಚಾರದ ಬಗ್ಗೆ ಮಾತನಾಡಿರುವ ಅವರು, ಈ ಅಶಾಂತಿಯುತ ಚಳವಳಿಗಳು ಅಲ್ಲಿನ ಜನರ ಹಿತಾಸಕ್ತಿಗಳನ್ನು ಪೂರೈಸುವುದಿಲ್ಲ, ಬದಲಾಗಿ ಬಾಹ್ಯ ಶಕ್ತಿಗಳ ಉದ್ದೇಶಗಳನ್ನು ಪೂರೈಸುತ್ತಿವೆ ಎಂದು ಹೇಳಿದರು.

ಪಹಲ್ಗಾಮ್ ಘಟನೆಯು ನಮಗೆ ಕಲಿಸಿದ್ದು, ನಾವು ಎಲ್ಲರ ಬಗ್ಗೆಯೂ ಸ್ನೇಹಪರ ಭಾವನೆಗಳನ್ನು ಹೊಂದಿದ್ದೇವೆ , ಆದರೆ ನಾವು ಹೆಚ್ಚು ಜಾಗರೂಕರಾಗಿರಬೇಕು ಮತ್ತು ನಮ್ಮನ್ನು ನಾವು ರಕ್ಷಿಸಿಕೊಳ್ಳುವ ಸಾಮರ್ಥ್ಯವನ್ನು ಹೊಂದಿರಬೇಕು.

ಅಮೆರಿಕ ಅಳವಡಿಸಿಕೊಂಡಿರುವ ಹೊಸ ಸುಂಕ ನೀತಿಯು ಬಹುತೇಕ ಎಲ್ಲರ ಮೇಲೆ ಪರಿಣಾಮ ಬೀರುತ್ತಿದೆ. ಆದ್ದರಿಂದ, ನಾವು ಜಾಗತಿಕವಾಗಿ ಸಂಬಂಧಗಳನ್ನು ನಿರ್ಮಿಸಬೇಕಾಗಿದೆ. ನಾವು ಸ್ವಾವಲಂಬಿಗಳಾಗಬೇಕು, ಅದನ್ನು ಕಡ್ಡಾಯವಾಗಿ ಮಾಡಬಾರದು, ಬದಲಾಗಿ ಬದುಕುವ ಮಾರ್ಗವನ್ನಾಗಿ ಕಂಡುಕೊಳ್ಳಬೇಕು. ಜಗತ್ತು ಅಶಾಂತಿ ಮತ್ತು ಪ್ರಕ್ಷುಬ್ಧತೆಯನ್ನು ಅನುಭವಿಸುತ್ತಿದೆ.

ಮತ್ತಷ್ಟು ಓದಿ: ಎಪ್ಪತ್ತೈದು ವರ್ಷಕ್ಕೆ ನಿವೃತ್ತಿ ಕಡ್ಡಾಯವಲ್ಲ, ಮೋದಿ ನಿವೃತ್ತಿ ಚರ್ಚೆಗೆ ತೆರೆ ಎಳೆದ ಮೋಹನ್ ಭಾಗವತ್

ಮತ್ತು ಇದರ ನಡುವೆ, ಜಗತ್ತು ಭಾರತದತ್ತ ಭರವಸೆಯಿಂದ ನೋಡುತ್ತಿದೆ. ಭಾರತವು ಪರಿಹಾರವನ್ನು ಕಂಡುಕೊಳ್ಳಬೇಕೆಂದು, ಭಾರತವು ಮಾರ್ಗದರ್ಶನ ನೀಡಬೇಕೆಂದು ಬಯಸುತ್ತಿವೆ. ಅಮೆರಿಕ ಜಾರಿಗೆ ತಂದಿರುವ ಹೊಸ ಸುಂಕ ನೀತಿಯನ್ನು ಅವರ ಹಿತಾಸಕ್ತಿಗಳನ್ನು ಗಮನದಲ್ಲಿಟ್ಟುಕೊಂಡು ವಿನ್ಯಾಸಗೊಳಿಸಲಾಗಿದೆ. ಆದರೆ ಪ್ರತಿಯೊಬ್ಬರೂ ಇದರಿಂದ ಪ್ರಭಾವಿತರಾಗಿದ್ದಾರೆ. ಜಗತ್ತು ಪರಸ್ಪರ ಅವಲಂಬನೆಯೊಂದಿಗೆ ಕಾರ್ಯನಿರ್ವಹಿಸುತ್ತದೆ. ಯಾವುದೇ ದೇಶವು ಪ್ರತ್ಯೇಕವಾಗಿರಲು ಸಾಧ್ಯವಿಲ್ಲ.

ಮಾನವರು ದೈಹಿಕವಾಗಿ ಅಭಿವೃದ್ಧಿ ಹೊಂದುತ್ತಾರೆ, ಆದರೆ ನೈತಿಕವಾಗಿ ಅಲ್ಲ, ಅಭಿವೃದ್ಧಿ ಎಲ್ಲರಿಗೂ ಅತ್ಯಗತ್ಯ. ಹಿಂದೂ ಧರ್ಮ ಎಂದಿಗೂ ರಾಜ್ಯವನ್ನು ಅವಲಂಬಿಸಿಲ್ಲ. ಹಿಂದೂ ಧರ್ಮವು ಒಂದು ರಾಷ್ಟ್ರ. ನಮ್ಮದು ಹಿಂದೂ ರಾಷ್ಟ್ರ. ಇದನ್ನು ಜಾತಿ, ಮತ ಅಥವಾ ಸಮುದಾಯದ ಆಧಾರದ ಮೇಲೆ ವಿಭಜಿಸಲು ಸಾಧ್ಯವಿಲ್ಲ. ಹಿಂದೂಗಳ ಏಕತೆ ಭದ್ರತೆಯ ಖಾತರಿಯಾಗಿದೆ.

ಬದಲಾವಣೆ ಪ್ರಜಾಪ್ರಭುತ್ವದ ವಿಧಾನಗಳ ಮೂಲಕ ಮಾತ್ರ ಬರುತ್ತದೆ. ಜಗತ್ತು ಪರಸ್ಪರ ಅವಲಂಬನೆಯ ಮೇಲೆ ಬದುಕುತ್ತದೆ, ಆದರೆ ನಾವು ಸ್ವಾವಲಂಬಿಗಳಾಗಬೇಕು ಮತ್ತು ಜಾಗತಿಕ ಜೀವನದ ಏಕತೆಯನ್ನು ಗಮನದಲ್ಲಿಟ್ಟುಕೊಂಡು, ನಮ್ಮ ಸ್ವಂತ ಇಚ್ಛೆಯಿಂದ ಬದುಕಬೇಕು, ಈ ಪರಸ್ಪರ ಅವಲಂಬನೆಯನ್ನು    ಶಾಶ್ವತವಾಗಲು ಬಿಡಬಾರದು ಎಂದರು.

ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ 

Published On - 12:45 pm, Thu, 2 October 25