ಓಲಾ ಎಲೆಕ್ಟ್ರಿಕ್ ತನ್ನ S1 ಎಲೆಕ್ಟ್ರಿಕ್ ಸ್ಕೂಟರ್ ಖರೀದಿಸಲು ಬಯಸುವ ಗ್ರಾಹಕರಿಗೆ ಸಾಲ ನೀಡಲು ಪ್ರಮುಖ ಬ್ಯಾಂಕ್ಗಳು ಮತ್ತು ಹಣಕಾಸು ಸಂಸ್ಥೆಗಳೊಂದಿಗೆ ಸಹಯೋಗ ಮಾಡಿಕೊಂಡಿದೆ. ಓಲಾ ಎಲೆಕ್ಟ್ರಿಕ್ ಸ್ಕೂಟರ್ ಸೆಪ್ಟೆಂಬರ್ 8ರಿಂದ ಖರೀದಿಗೆ ಲಭ್ಯ ಇರುತ್ತದೆ. ಕಂಪೆನಿಯು ಓಲಾ S1 ಎಲೆಕ್ಟ್ರಿಕ್ ಸ್ಕೂಟರ್ ಅನ್ನು ಎರಡು ವೇರಿಯಂಟ್ನಲ್ಲಿ ಬಿಡುಗಡೆ ಮಾಡಿದೆ- S1 ಮತ್ತು S1 Pro - ಇವುಗಳ ಬೆಲೆ ಕ್ರಮವಾಗಿ ರೂ. 99,999 ಮತ್ತು ರೂ. 1,29,999 (FAME II ಸಬ್ಸಿಡಿ ಮತ್ತು ರಾಜ್ಯ ಸಬ್ಸಿಡಿಗಳನ್ನು ಹೊರತುಪಡಿಸಿ ಎಕ್ಸ್ ಶೋರೂಂ ಬೆಲೆಗಳು). ಅಕ್ಟೋಬರ್‌ನಲ್ಲಿ ವಿತರಣೆ ಆರಂಭಿಸುವುದಾಗಿ ಓಲಾ ಎಲೆಕ್ಟ್ರಿಕ್ ಹೇಳಿದೆ. "ನಾವು ಎಲ್ಲ ಪ್ರಮುಖ ಬ್ಯಾಂಕ್ಗಳು ಮತ್ತು (ಹಣಕಾಸು) ಸಂಸ್ಥೆಗಳೊಂದಿಗೆ ಒಪ್ಪಂದ ಮಾಡಿಕೊಂಡಿದ್ದೇವೆ... ಅವುಗಳಲ್ಲಿ ಹೆಚ್ಚಿನವು ಸೆಪ್ಟೆಂಬರ್ 8 ರಿಂದ ಆರಂಭವಾಗುತ್ತವೆ ಮತ್ತು ಇತರವು ಶೀಘ್ರದಲ್ಲೇ ಲೈವ್ ಆಗುತ್ತವೆ," ಎಂದು ಓಲಾ ಎಲೆಕ್ಟ್ರಿಕ್ ಮುಖ್ಯ ಮಾರ್ಕೆಟಿಂಗ್ ಅಧಿಕಾರಿ ವರುಣ್ ದುಬೆ ಪಿಟಿಐ ಸುದ್ದಿ ಸಂಸ್ಥೆಗೆ ತಿಳಿಸಿದ್ದಾರೆ.
1 / 5
ಬ್ಯಾಂಕ್ ಆಫ್ ಬರೋಡಾ, ಆಕ್ಸಿಸ್ ಬ್ಯಾಂಕ್, ಎಚ್ಡಿಎಫ್ಸಿ ಬ್ಯಾಂಕ್, ಐಸಿಐಸಿಐ ಬ್ಯಾಂಕ್, ಐಡಿಎಫ್ಸಿ ಫಸ್ಟ್ ಬ್ಯಾಂಕ್, ಇಂಡಸ್ಇಂಡ್ ಬ್ಯಾಂಕ್, ಎಯು ಸ್ಮಾಲ್ ಫೈನಾನ್ಸ್ ಬ್ಯಾಂಕ್, ಜನ ಸ್ಮಾಲ್ ಫೈನಾನ್ಸ್ ಬ್ಯಾಂಕ್, ಕೊಟಕ್ ಮಹೀಂದ್ರಾ ಪ್ರೈಮ್, ಟಾಟಾ ಕ್ಯಾಪಿಟಲ್ ಮತ್ತು ಯೆಸ್ ಬ್ಯಾಂಕ್ ಸೇರಿದಂತೆ ಹಲವು ಬ್ಯಾಂಕ್ಗಳು ಮತ್ತು ಹಣಕಾಸು ಸಂಸ್ಥೆಗಳೊಂದಿಗೆ ಓಲಾ ಎಲೆಕ್ಟ್ರಿಕ್ ಒಪ್ಪಂದ ಮಾಡಿಕೊಂಡಿದೆ. ಸಹಯೋಗದ ನಂತರ ದುಬೆ ಮಾತನಾಡಿ, ಓಲಾ ಸ್ಕೂಟರ್‌ಗೆ ಹಣಕಾಸು ಆಯ್ಕೆ ಮಾಡಲು ಇಚ್ಛಿಸುವ ಗ್ರಾಹಕರಿಗೆ ಆಯ್ಕೆಯನ್ನು ಒದಗಿಸಲಾಗುವುದು. ಸಂಪೂರ್ಣ ಖರೀದಿ ಪ್ರಕ್ರಿಯೆಯು ಆನ್‌ಲೈನ್‌ನಲ್ಲಿರುತ್ತದೆ, ಇದು "ಅತ್ಯಂತ ಸುಲಲಿತವಾಗಿರುತ್ತದೆ" ಎಂದು ಹೇಳಿದ್ದಾರೆ. "ಗ್ರಾಹಕರಿಗೆ ದೊರೆಯಲಿರುವ ಸಾಲದ ಅನುಮೋದನೆ ಮೊತ್ತ, ಅವರು ಏನು ಮಾಡಬೇಕೆಂಬುದರ ಬಗ್ಗೆ ಎಲ್ಲಾ ವಿವರಗಳನ್ನು ಸಹ ಪಡೆಯಲು ಸಾಧ್ಯವಾಗುತ್ತದೆ. ಅಲ್ಲದೆ, ನಾವು ಅತ್ಯಂತ ಆಕರ್ಷಕವಾದ ಹಣಕಾಸು ಆಯ್ಕೆಗಳನ್ನು ಪಡೆದುಕೊಂಡಿದ್ದೇವೆ, S1ಗೆ EMI ಕೇವಲ 2,999 ರೂಪಾಯಿಯಿಂದ ಪ್ರಾರಂಭವಾಗುತ್ತದೆ," ಎಂದು ಹೇಳಿದ್ದಾರೆ.
2 / 5
ವಾಹನವನ್ನು ಕಾಯ್ದಿರಿಸಿದ ನಿರೀಕ್ಷಿತ ಖರೀದಿದಾರರು ಸೆಪ್ಟೆಂಬರ್ 8ರಿಂದ ಉಳಿದ ಮೊತ್ತವನ್ನು ಪಾವತಿಸುವ ಮೂಲಕ ಖರೀದಿಸಲು ಮತ್ತು ವಾಹನದ ವೇರಿಯಂಟ್ ಮತ್ತು ಬಣ್ಣದ ಆಯ್ಕೆಗಳನ್ನು ಅಂತಿಮಗೊಳಿಸಬಹುದು ಎಂದು ದುಬೆ ಹೇಳಿದ್ದಾರೆ. "ಆ ನಂತರ ನಾವು ಅಕ್ಟೋಬರ್‌ನಿಂದ ಅವರಿಗೆ ವಿತರಣೆಯನ್ನು ಆರಂಭಿಸುತ್ತೇವೆ. ನಾವು ಹೋಮ್ ಡೆಲಿವರಿ ಮಾಡುತ್ತೇವೆ ಮತ್ತು ನಾವು ನಿಜದ ಅರ್ಥದಲ್ಲಿಯೂ ಸ್ಕೂಟರ್‌ಗಳನ್ನು ಮನೆಬಾಗಿಲಿಗೆ ಕೊಂಡೊಯ್ಯುತ್ತೇವೆ," ಎಂದು ದುಬೆ ಸುದ್ದಿ ಸಂಸ್ಥೆಗೆ ತಿಳಿಸಿದ್ದಾರೆ. ಜನರು ಪ್ರೀ-ಬುಕಿಂಗ್‌ಗಳನ್ನು ಖರೀದಿಯನ್ನಾಗಿ ಪರಿವರ್ತಿಸುತ್ತಿರುವುದರಿಂದ ಓಲಾ ಎಲೆಕ್ಟ್ರಿಕ್ನಿಂದ ತನ್ನ ಗ್ರಾಹಕರಿಗೆ "ಅವರು ಎಲ್ಲಿ ಸರದಿಯಲ್ಲಿದ್ದಾರೆ ಅಥವಾ ಎಷ್ಟು ಜನರು ಖರೀದಿಸಿದ್ದಾರೆ ಎಂಬುದನ್ನು ಆಧರಿಸಿ ಕಾಯುವ ಅವಧಿಯ ಬಗ್ಗೆ ಅಪ್ಡೇಟ್ ಮಾಡುತ್ತೇವೆ" ಎಂದು ಅವರು ಹೇಳಿದ್ದಾರೆ.
3 / 5
ನಿರಂತರ ಸೆಮಿಕಂಡಕ್ಟರ್ ಕೊರತೆಯು ಕಂಪೆನಿಯ ಓಲಾ ಸ್ಕೂಟರ್‌ನ ಬೇಡಿಕೆಯನ್ನು ಪೂರೈಸುವ ಸಾಮರ್ಥ್ಯವನ್ನು ಕುಂಠಿತಗೊಳಿಸುವ ಸಾಧ್ಯತೆಗಳ ಬಗ್ಗೆ ದುಬೆ ಹೇಳಿದ್ದು, "ಇದು ಖಂಡಿತವಾಗಿಯೂ ಅಭಿವೃದ್ಧಿಗೊಳ್ಳುತ್ತಿರುವ ಪರಿಸ್ಥಿತಿ. ಪ್ರಸ್ತುತ ನಾವು ವಿವಿಧ ನಿರ್ಬಂಧಗಳ ಪೈಕಿ ಈ ಅಂಶವನ್ನು ಸಹ ನೀಡಿದ್ದೇವೆ," ಎಂದು ಹೇಳಿದ್ದಾರೆ. ಓಲಾ ಎಲೆಕ್ಟ್ರಿಕ್ನಿಂದ ತನ್ನ ಎಲೆಕ್ಟ್ರಿಕ್ ಸ್ಕೂಟರ್‌ಗಳಿಗಾಗಿ ಜುಲೈನಲ್ಲಿ ರೂ. 499ಕ್ಕೆ ಪ್ರೀ ಬುಕಿಂಗ್‌ ಆರಂಭವಾಯಿತು. ಕೇವಲ 24 ಗಂಟೆಗಳಲ್ಲಿ 1 ಲಕ್ಷ ಆರ್ಡರ್ಗಳನ್ನು ಪಡೆಯಿತು. ಕಂಪೆನಿಯು ಇದುವರೆಗೆ ಎಷ್ಟು ಆರ್ಡರ್ಗಳನ್ನು ಸ್ವೀಕರಿಸಿದೆ ಎಂಬುದನ್ನು ಬಹಿರಂಗಪಡಿಸಿಲ್ಲ.
4 / 5
ಕಂಪೆನಿಯು ತನ್ನ ಮೊದಲ ಎಲೆಕ್ಟ್ರಿಕ್ ಸ್ಕೂಟರ್ ಓಲಾ S1 ಅನ್ನು ಆಗಸ್ಟ್ 15ರಂದು ಬಹು ನಿರೀಕ್ಷೆಯೊಂದಿಗೆ ಬಿಡುಗಡೆ ಮಾಡಿತು. ಸ್ಕೂಟರ್ ಅನ್ನು 8.5 KW ಮೋಟಾರ್ ಮತ್ತು 3.97 kWh ಬ್ಯಾಟರಿ ಪ್ಯಾಕ್‌ನೊಂದಿಗೆ 10 ಬಣ್ಣಗಳಲ್ಲಿ ಬಿಡುಗಡೆ ಮಾಡಲಾಗಿದೆ. ಇದನ್ನು ದೇಶೀಯವಾಗಿಯೇ ಅಭಿವೃದ್ಧಿಪಡಿಸಲಾಗಿದೆ. ಓಲಾ ತಮಿಳುನಾಡಿನಲ್ಲಿ ಮೆಗಾ ಫ್ಯಾಕ್ಟರಿಯನ್ನು ಸ್ಥಾಪಿಸುತ್ತಿದೆ. ಉತ್ಪಾದನಾ ಸೌಲಭ್ಯವು 500 ಎಕರೆಗಳಲ್ಲಿ ವ್ಯಾಪಿಸಲಿದೆ. ಇದು ವಿಶ್ವದ ಅತಿದೊಡ್ಡ ಸ್ಕೂಟರ್ ತಯಾರಿಸುವ ಕಾರ್ಖಾನೆಯಾಗಿದೆ. ಕಂಪೆನಿಯು ಆರಂಭದಲ್ಲಿ 10 ಲಕ್ಷ ವಾರ್ಷಿಕ ಉತ್ಪಾದನಾ ಸಾಮರ್ಥ್ಯದೊಂದಿಗೆ ಆರಂಭಿಸಿ, ನಂತರ ಮೊದಲ ಹಂತದಲ್ಲಿ ಮಾರುಕಟ್ಟೆ ಬೇಡಿಕೆಗೆ ಅನುಗುಣವಾಗಿ ಅದನ್ನು 20 ಲಕ್ಷಕ್ಕೆ ಏರಿಸುವುದಾಗಿ ಹೇಳಿದೆ. ಓಲಾ ಘಟಕ ಪೂರ್ಣಗೊಂಡಾಗ ಒಂದು ಕೋಟಿ ಯೂನಿಟ್‌ಗಳ ವಾರ್ಷಿಕ ಉತ್ಪಾದನೆ ಸಾಮರ್ಥ್ಯವನ್ನು ಹೊಂದಿರುತ್ತದೆ ಎಂದು ಹೇಳಿಕೊಂಡಿದೆ "ಇದು ಪ್ರಪಂಚದ ಒಟ್ಟು ದ್ವಿಚಕ್ರ ವಾಹನ ಉತ್ಪಾದನೆಯ ಶೇಕಡಾ 15ರಷ್ಟಾಗುತ್ತದೆ".
