Dhvajastambha: ದೇವಸ್ಥಾನಗಳಲ್ಲಿ ಧ್ವಜಸ್ತಂಭವನ್ನು ಸ್ಪರ್ಶಿಸುವ ಮೊದಲು ಈ ನಿಯಮ ತಿಳಿದುಕೊಳ್ಳಿ

ದೇವಸ್ಥಾನಗಳಲ್ಲಿ ಧ್ವಜಸ್ತಂಭಕ್ಕೆ ಹೆಚ್ಚಿನ ಮಹತ್ವವನ್ನು ಏಕೆ ನೀಡಲಾಗುತ್ತದೆ ಎಂಬುದಕ್ಕೆ ಖ್ಯಾತ ಜ್ಯೋತಿಷಿ ಮತ್ತು ವಾಸ್ತು ಶಾಸ್ತ್ರಜ್ಞರಾದ ಡಾ. ಬಸವರಾಜ್ ಗುರೂಜಿಯವರು ತಮ್ಮ ನಿತ್ಯ ಭಕ್ತಿ ಕಾರ್ಯಕ್ರಮದಲ್ಲಿ ಮಾಹಿತಿ ನೀಡಿದ್ದಾರೆ. ಗುರೂಜಿಯವರು ಹೇಳುವಂತೆ, ದೇವಸ್ಥಾನಗಳು ಕೇವಲ ಇಟ್ಟಿಗೆ ಮತ್ತು ಕಲ್ಲುಗಳಿಂದ ಕಟ್ಟಿದ ರಚನೆಗಳಲ್ಲ. ಅವು ಮನುಷ್ಯನ ಮನಸ್ಸಿಗೆ ತೃಪ್ತಿ ನೀಡುವ, ಭಗವಂತನಿಗೆ ಗೌರವವನ್ನು ಅರ್ಪಿಸುವ ಮತ್ತು ನಮ್ಮ ಕಷ್ಟಗಳನ್ನು ನಿವೇದಿಸಿಕೊಳ್ಳುವ ಕೇಂದ್ರಗಳಾಗಿವೆ. ಯಾವುದೇ ರೀತಿಯ ದೇವಸ್ಥಾನವಿರಲಿ, ಅಲ್ಲಿ ಸಲ್ಲಿಸುವ ನಮಸ್ಕಾರಗಳು ನೇರವಾಗಿ ಭಗವಂತ ನಾರಾಯಣನನ್ನು ತಲುಪುತ್ತವೆ ಎಂದು “ಆಕಾಶಾತ್ ಪತಿತಂ ತೋಯಂ ಯಥಾಗಚ್ಛತಿ ಸಾಗರಂ, ಸರ್ವದೇವ ನಮಸ್ಕಾರಃ ಕೇಶವಂ ಪ್ರತಿಗಚ್ಛತಿ” ಎಂಬ ಶ್ಲೋಕ ಹೇಳುತ್ತದೆ. ಈ ಪವಿತ್ರ ಸ್ಥಳಗಳಲ್ಲಿ, ವಿಶೇಷವಾಗಿ ಹಿಂದೂ ಸನಾತನ ಸಂಸ್ಕೃತಿಯ ದೇವಾಲಯಗಳಲ್ಲಿ, ಧ್ವಜಸ್ತಂಭಕ್ಕೆ ಬಹಳ ಮಹತ್ವವಿದೆ.

ದೇವರ ದರ್ಶನ, ಅರ್ಚನೆ, ಸಂಕಲ್ಪ ಮತ್ತು ಪ್ರಾರ್ಥನೆಗಳ ಜೊತೆಗೆ, ದೇವಾಲಯದ ಸುತ್ತ ಪ್ರದಕ್ಷಿಣೆ ಹಾಕುವುದು ರೂಢಿಯಲ್ಲಿದೆ. ಆದರೆ, ಇವೆಲ್ಲದರ ದ್ವಿಫಲ ಧ್ವಜಸ್ತಂಭದ ಬಳಿ ದೊರೆಯುತ್ತದೆ ಎಂದು ಹೇಳಲಾಗುತ್ತದೆ. ಧ್ವಜಸ್ತಂಭಕ್ಕೆ ಗೌರವಾರ್ಪಣೆ ಸಲ್ಲಿಸಿ, ಭಗವಂತನು ಆ ಸ್ತಂಭದಲ್ಲಿ ಇದ್ದಾನೆ ಎಂಬ ಭಾವನೆಯೊಂದಿಗೆ ನಮಸ್ಕರಿಸಿದರೆ ಶುಭವಾಗುತ್ತದೆ. ದಕ್ಷಿಣ ಭಾರತದ ದೇವಾಲಯಗಳಲ್ಲಿ ಧ್ವಜಸ್ತಂಭಗಳಿಗೆ ಹೆಚ್ಚಿನ ಪ್ರಾಶಸ್ತ್ಯವನ್ನು ನೀಡಲಾಗುತ್ತದೆ.

ವಿಡಿಯೋ ಇಲ್ಲಿದೆ ನೋಡಿ:

ಧ್ವಜಸ್ತಂಭಕ್ಕೆ ಇಷ್ಟೊಂದು ಮಹತ್ವವೇಕೆ? ಇದಕ್ಕೆ ಪ್ರಮುಖ ಕಾರಣವೆಂದರೆ ಗರ್ಭಗುಡಿಯಲ್ಲಿರುವ ದೇವರ, ಅಂದರೆ ಆ ಕ್ಷೇತ್ರದ ಕ್ಷೇತ್ರಜ್ಞನ ನೇರ ದೃಷ್ಟಿ ಪ್ರಥಮವಾಗಿ ಧ್ವಜಸ್ತಂಭದ ಮೇಲೆ ಬೀಳುತ್ತದೆ. ಯಾವುದೇ ದೇವಾಲಯವಿರಲಿ, ದೇವರ ಮೊದಲ ನೋಟ ಧ್ವಜಸ್ತಂಭದ ಮೇಲೆಯೇ ಇರುತ್ತದೆ. ಅಷ್ಟೇ ಅಲ್ಲದೆ, ಆಕಾಶದಿಂದ ಬರುವ ಪ್ರಥಮ ಸೂರ್ಯಕಿರಣಗಳು ಸಹ ಆ ಧ್ವಜಸ್ತಂಭವನ್ನು ಹೀರಿಕೊಳ್ಳುತ್ತವೆ. ಈ ಪ್ರಥಮ ಸೂರ್ಯಕಿರಣಗಳನ್ನು “ಆರುಷಿ” ಎಂದು ಕರೆಯಲಾಗುತ್ತದೆ. ಕೃತಯುಗ, ತ್ರೇತಾಯುಗ, ದ್ವಾಪರಯುಗ ಮತ್ತು ಕಲಿಯುಗ ಹೀಗೆ ಎಲ್ಲಾ ಯುಗಗಳಲ್ಲಿಯೂ ಹಳೆಯ ದೇವಾಲಯಗಳನ್ನು ನೋಡಿದಾಗ ಧ್ವಜಸ್ತಂಭದ ಮೂಲಕವೇ ಭಗವಂತನನ್ನು ಸಮೀಪಿಸುವ ಸಂಪ್ರದಾಯವಿತ್ತು. ಉದಾಹರಣೆಗೆ, ತಿರುಪತಿಯಲ್ಲಿ ಕೂಡ ಧ್ವಜಸ್ತಂಭದ ಮುಖಾಂತರವೇ ದೇವರ ಬಳಿ ಹೋಗಬೇಕಾಗುತ್ತದೆ.

ಇಂದು ದೇವಾಲಯಕ್ಕೆ ಭೇಟಿ ನೀಡುವ ಪ್ರತಿಯೊಬ್ಬರೂ ಧ್ವಜಸ್ತಂಭವನ್ನು ಮುಟ್ಟಿ ನಮಸ್ಕರಿಸುವ ಭಾಗ್ಯವನ್ನು ಪಡೆದರೆ ಅತ್ಯಂತ ಒಳ್ಳೆಯ ಯೋಗ ದೊರೆಯುತ್ತದೆ. ಇದಕ್ಕೆ ಕಾರಣ, ಭಗವಂತನ ಪರಿಪೂರ್ಣ ಅಂಶ ಆ ಧ್ವಜಸ್ತಂಭದಲ್ಲಿರುತ್ತದೆ. ನಾವು ವಿಗ್ರಹವನ್ನು ಮುಟ್ಟಲು ಸಾಧ್ಯವಿಲ್ಲ, ಗರ್ಭಗುಡಿಯೊಳಗೆ ಹೋಗಲು ಸಹ ಸಾಧ್ಯವಿಲ್ಲ. ಆದರೆ ಗರ್ಭಗುಡಿಯಿಂದ ಹೊರಹೊಮ್ಮುವ ಶಕ್ತಿ ಅಲೆಗಳು (ಲಹರಿಗಳು) ಧ್ವಜಸ್ತಂಭದ ಸುತ್ತಲೂ ವೈ-ಫೈ ತರಹ ಕಾರ್ಯನಿರ್ವಹಿಸುತ್ತವೆ. ಹಾಗಾಗಿ, ಧ್ವಜಸ್ತಂಭದ ಮೂಲಕವೇ ನಾವು ದೈವಿಕ ಶಕ್ತಿಯನ್ನು ಸಂಪರ್ಕಿಸಬಹುದು. ಧ್ವಜಸ್ತಂಭವನ್ನು ಸ್ಪರ್ಶಿಸುವುದು “ಸ್ಪರ್ಶನಂ ಪಾಪನಾಶನಂ” (ಸ್ಪರ್ಶಿಸುವುದರಿಂದ ಪಾಪಗಳು ನಾಶವಾಗುತ್ತವೆ) ಮತ್ತು “ದರ್ಶನಂ ಮೋಕ್ಷ” (ದರ್ಶನದಿಂದ ಮೋಕ್ಷ) ಎಂಬ ನಂಬಿಕೆಯನ್ನು ಪ್ರತಿಬಿಂಬಿಸುತ್ತದೆ.

ಇದನ್ನೂ ಓದಿ: ಓಡುತ್ತಿರುವ ಏಳು ಕುದುರೆಗಳ ಫೋಟೋ ಮನೆಯಲ್ಲಿ ಇಡುವುದು ಶುಭವೇ? ವಾಸ್ತು ತಜ್ಞರ ಸಲಹೆ ಇಲ್ಲಿದೆ

ಆದರೆ, ಧ್ವಜಸ್ತಂಭವನ್ನು ಸ್ಪರ್ಶಿಸುವಾಗ ಕೆಲವು ನಿಯಮಗಳನ್ನು ಪಾಲಿಸಬೇಕು. ಕೆಲವು ಕಡೆ ನಿಯಮ ನಿಬಂಧನೆಗಳಿರುತ್ತವೆ ಮತ್ತು ಕೆಲವರು ಧ್ವಜಸ್ತಂಭವನ್ನು ಮುಟ್ಟಲು ಬಿಡುವುದಿಲ್ಲ. ವಸ್ತುಗಳನ್ನು ಧ್ವಜಸ್ತಂಭದ ಮೇಲೆ ಇಡುವುದು ಅಥವಾ ತಲೆ ಇಟ್ಟು ನಮಸ್ಕರಿಸುವಂತಹ ಕೃತ್ಯಗಳಿಂದ ದೂರವಿರಬೇಕು. ಅಲ್ಲಿ ಸ್ವಚ್ಛತೆಯನ್ನು ಕಾಪಾಡಿಕೊಳ್ಳುವುದು ಅತಿ ಮುಖ್ಯ. ಧ್ವಜಸ್ತಂಭದ ನೇರವಾಗಿ ಭಗವಂತನ ಕೃಪೆ ಮತ್ತು ಆಶೀರ್ವಾದವಿರುತ್ತದೆ. ನಿಮ್ಮ ಸಂಕಲ್ಪಗಳು ಮತ್ತು ಮನಸ್ಸಿನ ಆಸೆಗಳನ್ನು ಈಡೇರಿಸಿಕೊಳ್ಳಲು, ಸುತ್ತಮುತ್ತಲಿನ ವಸ್ತುಗಳ ಕಡೆಗೆ ಗಮನ ಹರಿಸದೆ ಏಕಾಗ್ರ ಚಿತ್ತದಿಂದ ಧ್ವಜಸ್ತಂಭದ ಆದಿ (ಕೆಳಗಿನ ಭಾಗ) ಮತ್ತು ಅಂತ್ಯ (ಮೇಲಿನ ಭಾಗ) ಎರಡನ್ನೂ ದರ್ಶನ ಮಾಡಿ ಪ್ರಾರ್ಥಿಸಬೇಕು. ಹೀಗೆ ಮಾಡಿದರೆ, ಕ್ಷೇತ್ರಜ್ಞನ ಪರಿಪೂರ್ಣ ಆಶೀರ್ವಾದ ಲಭಿಸುತ್ತದೆ. ಇದು ನಿಮ್ಮಲ್ಲಿರುವ ದುಷ್ಟ ಶಕ್ತಿಗಳನ್ನು ಶೇ. 50 ರಷ್ಟು ಹೊರಹಾಕಿ, ದೈವ ಶಕ್ತಿ ಮತ್ತು ಭಗವಂತನ ಕೃಪೆಗೆ ಪಾತ್ರರಾಗಲು ಸಹಾಯ ಮಾಡುತ್ತದೆ ಎಂದು ಗುರೂಜಿ ವಿವರಿಸಿದ್ದಾರೆ.

ಮತ್ತಷ್ಟು ಆಧ್ಯಾತ್ಮಿಕ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ