ಶ್ರಾದ್ಧ ಮಾಡೋಕೆ ಸಮಯ ಇಲ್ವಾ? ಪೂರ್ವಜರ ಆಶೀರ್ವಾದ ಪಡೆಯಲು ಈ ಒಂದು ಸರಳ ದಾರಿ ಅನುಸರಿಸಿ!

ಹಿಂದೂ ಧರ್ಮದಲ್ಲಿ ಪಿತೃಪಕ್ಷದ ಹದಿನಾರು ದಿನಗಳನ್ನು ಪೂರ್ವಜರ ಸ್ಮರಣೆಗೆ ಅತ್ಯಂತ ಪವಿತ್ರವೆಂದು ಪರಿಗಣಿಸಲಾಗುತ್ತದೆ. ಈ ಸಮಯದಲ್ಲಿ ನಮ್ಮ ಪಿತೃ ದೇವತೆಗಳು ಭೂಮಿಗೆ ಆಗಮಿಸಿ, ತಮ್ಮ ವಂಶಸ್ಥರಿಂದ ಅರ್ಪಿಸಲ್ಪಡುವ ಅನ್ನ ಮತ್ತು ಜಲವನ್ನು ಸ್ವೀಕರಿಸಿ ಆಶೀರ್ವದಿಸುತ್ತಾರೆ ಎಂಬುದು ಧಾರ್ಮಿಕ ನಂಬಿಕೆ. ಪಿತೃಗಳನ್ನು ಪ್ರಸನ್ನಗೊಳಿಸಲು ಮಾಡುವ ವಿವಿಧ ಆಚರಣೆಗಳಲ್ಲಿ, ಗರುಡ ಪುರಾಣದಲ್ಲಿ ತಿಳಿಸಲಾದ ಸರಳ ಹಾಗೂ ಶಕ್ತಿಶಾಲಿ ನಿಯಮವೆಂದರೆ ಮನೆಯ ಮುಖ್ಯ ದ್ವಾರಕ್ಕೆ ನೀರನ್ನು ಸಿಂಪಡಿಸುವುದು.

ಪೂರ್ವಜರ ಆತ್ಮಕ್ಕೆ ತೃಪ್ತಿ ಮತ್ತು ಶಾಂತಿ:

ಗರುಡ ಪುರಾಣದ ಮೂರನೇ ಅಧ್ಯಾಯದ ಪ್ರಕಾರ, ಮನೆಯಲ್ಲಿ ನೀರನ್ನು ಶೇಖರಿಸಿಡುವ ಸ್ಥಳವು (ನೀರಿನ ಮಡಕೆ ಅಥವಾ ಪಾತ್ರೆ ಇರುವ ಜಾಗ) ಪಿತೃಗಳ ವಾಸಸ್ಥಾನವೆಂದು ಪರಿಗಣಿಸಲಾಗುತ್ತದೆ. ಈ ಸ್ಥಳದಿಂದ ನೀರನ್ನು ತೆಗೆದುಕೊಂಡು ಪ್ರತಿದಿನ ಬೆಳಿಗ್ಗೆ ಮುಖ್ಯ ದ್ವಾರದ ಮೇಲೆ ಸಿಂಪಡಿಸುವುದರಿಂದ ಅದು ನೇರವಾಗಿ ಪಿತೃಗಳಿಗೆ ತಲುಪುತ್ತದೆ. ಒಂದು ವೇಳೆ ಯಾವುದೇ ಕಾರಣದಿಂದ ಶ್ರಾದ್ಧ ಅಥವಾ ತರ್ಪಣ ಮಾಡಲು ಸಾಧ್ಯವಾಗದಿದ್ದರೂ, ಈ ನೀರು ಪ್ರೋಕ್ಷಣೆ ಮಾಡುವುದರಿಂದ ಪೂರ್ವಜರ ಆತ್ಮ ತೃಪ್ತಿಗೊಂಡು ಅವರ ಆಶೀರ್ವಾದ ಸಿಗುತ್ತದೆ.

ನಕಾರಾತ್ಮಕ ಶಕ್ತಿಯ ನಿವಾರಣೆ ಮತ್ತು ರಕ್ಷಣೆ:

ಮನೆಯ ಮುಖ್ಯ ದ್ವಾರವು ಎಲ್ಲಾ ರೀತಿಯ ಶಕ್ತಿಗಳ ಪ್ರವೇಶ ದ್ವಾರವಾಗಿರುತ್ತದೆ. ಪಿತೃಪಕ್ಷದ ಅವಧಿಯಲ್ಲಿ ಪ್ರತಿದಿನ ಬೆಳಿಗ್ಗೆ ಎದ್ದ ತಕ್ಷಣ ಮುಖ್ಯ ಬಾಗಿಲಿನ ಮೇಲೆ ನೀರು ಸಿಂಪಡಿಸುವುದರಿಂದ ಮನೆಯಲ್ಲಿರುವ ದುಷ್ಟ ಶಕ್ತಿಗಳು ಮತ್ತು ನಕಾರಾತ್ಮಕ ವಾತಾವರಣ (Negative energy) ದೂರವಾಗುತ್ತದೆ. ನೀರು ಪ್ರೋಕ್ಷಣೆ ಮಾಡುವುದು ಮನೆಗೆ ಒಂದು ರಕ್ಷಣಾತ್ಮಕ ಕವಚದಂತೆ ಕೆಲಸ ಮಾಡಿ, ಯಾವುದೇ ಕೆಟ್ಟ ಶಕ್ತಿಗಳು ಮನೆಯೊಳಗೆ ಪ್ರವೇಶಿಸದಂತೆ ತಡೆಯುತ್ತದೆ.

ಇದನ್ನೂ ಓದಿ: ಮನೆಯಲ್ಲಿ ಬೆಳ್ಳಿಯ ಗಣೇಶ ಮೂರ್ತಿ ಇಡುವುದು ಶುಭವೇ? ವಾಸ್ತು ಶಾಸ್ತ್ರ ಹೇಳುವುದೇನು?

ಮನೆಯಲ್ಲಿ ಶುಭಪ್ರದ ವಾತಾವರಣ ಮತ್ತು ಸಮೃದ್ಧಿ:

ಪಿತೃಪಕ್ಷದಲ್ಲಿ ಮಾತ್ರವಲ್ಲದೆ, ದಿನನಿತ್ಯ ಬೆಳಿಗ್ಗೆ ಹೊಸ್ತಿಲಿಗೆ ನೀರು ಪ್ರೋಕ್ಷಣೆ ಮಾಡುವುದು ಅತ್ಯಂತ ಶುಭ ಸಂಕೇತವಾಗಿದೆ. ಇದರಿಂದ ಗೃಹದಲ್ಲಿ ಧನಾತ್ಮಕ ಶಕ್ತಿ (Positive energy) ಹೆಚ್ಚುತ್ತದೆ. ಪಿತೃ ದೇವತೆಗಳು ತೃಪ್ತರಾಗಿ ಆಶೀರ್ವದಿಸುವುದರಿಂದ ಕುಟುಂಬದಲ್ಲಿರುವ ಕ್ಲೇಶಗಳು ನಿವಾರಣೆಯಾಗಿ, ಶಾಂತಿ, ನೆಮ್ಮದಿ ಹಾಗೂ ಆರ್ಥಿಕ ಅಭಿವೃದ್ಧಿ ನೆಲೆಸುತ್ತದೆ.

ನೀರು ಸಿಂಪಡಿಸುವ ಸರಿಯಾದ ವಿಧಾನ:

ಈ ಆಚರಣೆಯನ್ನು ಮಾಡಲು ಪ್ರತಿದಿನ ಬೆಳಿಗ್ಗೆ ಎದ್ದ ತಕ್ಷಣ, ಮನೆಯ ಕುಡಿಯುವ ನೀರಿನ ಮಡಕೆ ಅಥವಾ ತಾಮ್ರದ ಚೊಂಬಿನಿಂದ ನೀರನ್ನು ತೆಗೆದುಕೊಳ್ಳಬೇಕು. ನಂತರ ಮನೆಯ ಮುಖ್ಯ ಬಾಗಿಲನ್ನು ತೆರೆದು ಹೊಸ್ತಿಲು ಮತ್ತು ಪ್ರವೇಶದ್ವಾರಕ್ಕೆ ನೀರನ್ನು ಸಿಂಪಡಿಸಿ, ಮನಸ್ಸಿನಲ್ಲಿಯೇ ಪಿತೃ ದೇವತೆಗಳನ್ನು ಸ್ಮರಿಸಿ ಆಶೀರ್ವಾದ ಕೋರಬೇಕು. ಈ ಸರಳ ಪರಿಹಾರವನ್ನು ಅನುಸರಿಸುವುದರಿಂದ ಪಿತೃ ದೋಷಗಳು ಶಮನಗೊಂಡು ಕುಟುಂಬಕ್ಕೆ ಮಂಗಳುಂಟಾಗುತ್ತದೆ ಎಂದು ನಂಬಲಾಗಿದೆ.

ಅಧ್ಯಾತ್ಮಕ್ಕೆ ಸಂಬಂಧಿಸಿದ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ