ಬಸವನಗುಡಿಯ ದೊಡ್ಡಗಣಪತಿ ದೇವಾಲಯಲ್ಲಿ ಸೆ. 21ರಂದು 108 ಬಗೆಯ 108 ವಸ್ತುಗಳ 11,664 ಪದಾರ್ಥಗಳ ನೈವೇದ್ಯ

ಬೆಂಗಳೂರು: ಬಸವನಗುಡಿಯಲ್ಲಿ ಇರುವ ದೊಡ್ಡ ಗಣಪತಿ ದೇವಾಲಯದಲ್ಲಿ ಸೆಪ್ಟೆಂಬರ್ 21ನೇ ತಾರೀಕಿನ ಮಂಗಳವಾರದಂದು ವಿಶೇಷ ಕಾರ್ಯಕ್ರಮವನ್ನು ಆಯೋಜಿಸಲಾಗಿದೆ. 108 ಬಗೆಯ ಪದಾರ್ಥಗಳನ್ನು 108 ಸಂಖ್ಯೆಯಲ್ಲಿ ದೊಡ್ಡ ಗಣಪತಿ ದೇಗುಲದಲ್ಲಿ ನೈವೇದ್ಯಕ್ಕೆ ಇಡಲಾಗುತ್ತದೆ. ಅಂದರೆ 108X108 ಅಂದರೆ 11,664 ಸಂಖ್ಯೆಯಲ್ಲಿ ಪದಾರ್ಥಗಳು ಇರುತ್ತವೆ. ಕೊರೊನಾ ನಿರ್ಮೂಲನೆ ಆಗಲಿ ಮತ್ತು ಜಾಗತಿಕ ಶಾಂತಿ ನೆಲೆಸಲಿ ಎಂಬ ಕಾರಣಕ್ಕೆ ಈ ಕಾರ್ಯಕ್ರಮವನ್ನು ಆಯೋಜಿಸಲಾಗುತ್ತಿದೆ. ಮಂಗಳವಾರದಂದು ಸಂಜೆ 6 ಗಂಟೆಗೆ ಈ ಕಾರ್ಯಕ್ರಮ ನಡೆಯಲಿದೆ. ವಿಶಿಷ್ಟವಾದ ಈ ಕಾರ್ಯಕ್ರಮದ ಆಯೋಜನೆಯಲ್ಲಿ ಮುಂಚೂಣಿಯಲ್ಲಿ ಇರುವವರು ಕೆ.ವಿ.ರಾಮಚಂದ್ರ ಮತ್ತು ಕೆ.ವಿ.ಅಶ್ವತ್ಥನಾರಾಯಣ. ಇವರಿಬ್ಬರೂ ಅಣ್ಣ- ತಮ್ಮಂದಿರು. ಚಾಮರಾಜಪೇಟೆಯಲ್ಲಿ ಕನ್ನಡ ತಿಂಡಿಕೇಂದ್ರ ಎಂಬುದನ್ನು ನಡೆಸುತ್ತಾರೆ.

ಈ ಕಾರ್ಯಕ್ರಮದ ಉದ್ದೇಶ ಹಾಗೂ ಇದರಲ್ಲಿ ಕೆಲಸ ಮಾಡುತ್ತಿರುವವರು ಯಾರು ಎಂದು ವಿಚಾರಿಸುವ ಸಲುವಾಗಿ ಟಿವಿ9 ಕನ್ನಡ ಡಿಜಿಟಲ್​ನಿಂದ ಕೆ.ವಿ.ರಾಮಚಂದ್ರ ಅವರನ್ನು ಮಾತನಾಡಿಸಲಾಯಿತು. ಈ ಕಾರ್ಯಕ್ರಮಕ್ಕೆ ನಮ್ಮ ಸ್ನೇಹಿತರೆಲ್ಲರ ಕೊಡುಗೆ, ಶ್ರಮ ಇದೆ. ಮುಂದೆ ನಾವು ನಿಂತಿದ್ದೇವೆ, ಅಷ್ಟೇ. ಕೊರೊನಾ ನಿರ್ಮೂಲನೆ ಆಗಬೇಕು ಹಾಗೂ ಜಗತ್ತಿನಲ್ಲಿ ಶಾಂತಿ ನೆಲೆಸಬೇಕು ಎಂಬುದು ಆ ಗಣಪತಿಯಲ್ಲಿ ನಮ್ಮ ಪ್ರಾರ್ಥನೆ. ಅದಕ್ಕಾಗಿ ಈ ಕಾರ್ಯಕ್ರಮವನ್ನು ಆಯೋಜಿಸಿದ್ದೇವೆ. 11, 21, 108 ಹೀಗೆ ಸಂಖ್ಯೆಗೆ ವಿಶೇಷ ಮಹತ್ವ ಇದೆ. ನಾವು 108ರ ಸಂಖ್ಯೆಯನ್ನು ಆರಿಸಿಕೊಂಡಿದ್ದೇವೆ. ಅದನ್ನು ಹೊರತುಪಡಿಸಿದರೆ ಬೇರೇನೂ ಇಲ್ಲ. ಅದು ಆ ಗಣಪತಿಯ ಪ್ರೇರಣೆ ಎಂದು ರಾಮಚಂದ್ರ ಹೇಳಿದರು.

ಕೊರೊನಾ ಸಂದರ್ಭದಲ್ಲಿ ಉಚಿತವಾಗಿ ಆಹಾರ ವಿತರಣೆಯಂಥ ಕಾರ್ಯಕ್ರಮ ಆಯೋಜಿಸಿದ್ದ ರಾಮಚಂದ್ರ- ಅಶ್ವತ್ಥನಾರಾಯಣ ಸೋದರರು ವರ್ಷವಿಡೀ ಒಂದಿಲ್ಲೊಂದು ಸಮಾಜಮುಖಿ ಆದಂಥ ಕಾರ್ಯಕ್ರಮಗಳಲ್ಲಿ ತೊಡಗಿಕೊಳ್ಳುತ್ತಾರೆ. ಅಂಗಾಂಗ ದಾನದ ಕುರಿತು ಜಾಗೃತಿ ಮೂಡಿಸಲು ಶ್ರಮಿಸುತ್ತಿರುವ ರಾಮಚಂದ್ರ ಅವರಿಗೆ ಗೌರವ ಡಾಕ್ಟರೇಟ್ ಸಹ ಬಂದಿದೆ. ಪ್ರತಿ ವರ್ಷ ಕನ್ನಡ ರಾಜ್ಯೋತ್ಸವವನ್ನು ವಿಶಿಷ್ಟವಾಗಿ ಆಚರಿಸುತ್ತಾ ಬರುತ್ತಿರುವ ಅವರು, ತಮ್ಮ ತಿಂಡಿ ಕೇಂದ್ರದಲ್ಲೂ ಕನ್ನಡದ ವಾತಾವರಣ ಉಳಿಸಿಕೊಂಡಿದ್ದಾರೆ.

ಇದನ್ನೂ ಓದಿ: Ganesha Chaturti Special: ಇಡಗುಂಜಿ ಬಾಲ ಗಣಪತಿಯ ಆರಾಧನೆ ಮಹತ್ವ ನಿಮಗೆಷ್ಟು ಗೊತ್ತು?

(Special Prayer At Dodda Ganapati Temple On September 21st For Global Peace And Eradication Of Corona )