CWG 2022: ಬಾಕ್ಸಿಂಗ್​ನಲ್ಲಿ ಗೋಲ್ಡನ್ ಪಂಚ್; 51 ಕೆಜಿ ವಿಭಾಗದಲ್ಲಿ ಚಿನ್ನ ಗೆದ್ದ ನಿಖತ್ ಜರೀನ್

ಬಾಕ್ಸಿಂಗ್​ನಲ್ಲಿ ಭಾರತಕ್ಕೆ ಮತ್ತೊಂದು ಯಶಸ್ಸು ಸಿಕ್ಕಿದೆ. ದೇಶದ ಮಹಿಳಾ ಬಾಕ್ಸರ್ ಮತ್ತು ವಿಶ್ವ ಚಾಂಪಿಯನ್ ನಿಖತ್ ಜರೀನ್ (Nikhat Zareen) ಭಾನುವಾರ ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲಿ (Commonwealth Games) ಚಿನ್ನದ ಪದಕ ಗೆದ್ದಿದ್ದಾರೆ. ನಿಖತ್ 51 ಕೆಜಿ ತೂಕ ವಿಭಾಗದ ಫೈನಲ್‌ನಲ್ಲಿ ಉತ್ತರ ಐರ್ಲೆಂಡ್‌ನ ಕ್ಯಾರಿ ಮೆಕ್‌ನಾಲ್ ಅವರನ್ನು 5-0 ಅಂತರದಿಂದ ಸೋಲಿಸಿ ಚಿನ್ನದ ಪದಕ ಗೆದ್ದರು. ಆರಂಭದಲ್ಲಿ ಎದುರಾಳಿಯಿಂದ ಅಂತರ ಕಾಯ್ದುಕೊಂಡ ನಿಖತ್, ಅವಕಾಶ ಸಿಕ್ಕ ತಕ್ಷಣ ಅದನ್ನು ಸದುಪಯೋಗ ಪಡಿಸಿಕೊಂಡರು. ಮೆಕ್‌ನಾಲ್‌ನ ಅವರು ಎತ್ತರದಲ್ಲಿ ನಿಖತ್‌ಗಿಂತ ಕಡಿಮೆ ಇರುವುದರಿಂದ ನಿಖತ್ ಇದರ ಲಾಭ ಪಡೆದರು. ನಿಖತ್ ತಾಳ್ಮೆಯ ಆಟ ಪ್ರದರ್ಶಿಸಿ ಮೊದಲ ಸುತ್ತಿನ ಮಧ್ಯದಲ್ಲಿ ಎರಡೂ ಕಡೆಯಿಂದ ದಾಳಿ ಮಾಡಿ ಉತ್ತಮ ಪಂಚ್‌ಗಳನ್ನು ಮಾಡಿದರು. ಆದರೂ ಇಬ್ಬರೂ ಆಟಗಾರರು ಉತ್ತಮವಾಗಿ ಆಡಿದರು. ಆದರೆ ಐವರು ರೆಫರಿಗಳು ನಿಖತ್ ಅವರ ಪರವಾಗಿ ತೀರ್ಪು ನೀಡಿದರು.

ಎರಡನೇ ಸುತ್ತಿನಲ್ಲಿ ಅರ್ಧದಷ್ಟು ಪಂದ್ಯ ಮುಗಿದಿತ್ತು

ನಿಖತ್ ಎರಡನೇ ಸುತ್ತಿನಲ್ಲಿ ಎಚ್ಚರಿಕೆಯಿಂದ ಪ್ರಾರಂಭಿಸಿದರು, ಆದರೆ ಮೆಕ್‌ನಾಲ್ ಆಕ್ರಮಣಕಾರಿ ತಂತ್ರವನ್ನು ಅಳವಡಿಸಿಕೊಂಡರು. ಆದಾಗ್ಯೂ, ನಿಖತ್ ಸ್ವಲ್ಪ ರಕ್ಷಣಾತ್ಮಕವಾಗಿ ಆಡಿದ್ದರಿಂದ ಮೆಕ್‌ನಾಲ್‌ನ ಪ್ರಯತ್ನಗಳನ್ನು ವಿಫಲಗೊಳಿಸಲು ಸಾಧ್ಯವಾಯಿತು. ಮೆಕ್‌ನಾಲ್ ಹೆಚ್ಚು ಆಕ್ರಮಣಕಾರಿಯಾಗಿದ್ದರಿಂದ ಅವರು ಸ್ವಲ್ಪ ಸಮಯದ ನಂತರ ಸ್ವಲ್ಪ ದಣಿದವರಂತೆ ಕಾಣುತ್ತಿದ್ದರು. ಎರಡನೇ ಸುತ್ತಿನಲ್ಲೂ ಐವರು ರೆಫರಿಗಳು ನಿಖತ್ ಪರವಾಗಿ ತೀರ್ಪು ನೀಡಿದರು. ಇಲ್ಲಿಂದ ನಿಖತ್ ಪಾಲಿಗೆ ಚಿನ್ನ ಬರಲಿದೆ ಎಂಬುದು ಬಹುತೇಕ ನಿರ್ಧಾರವಾಗಿತ್ತು.

ಮೂರನೇ ಸುತ್ತು ಹೀಗಿತ್ತು

ಮೂರನೇ ಸುತ್ತಿನಲ್ಲೂ ನಿಖತ್ ತಮ್ಮ ಪ್ರಾಬಲ್ಯ ಮೆರೆದರು. ಅವರು ಮೆಕ್‌ನಾಲ್‌ನವರ ಅತಿಯಾದ ಆಕ್ರಮಣಶೀಲತೆಯ ಲಾಭವನ್ನು ಪಡೆದರು. ಆದರೆ ನಿಖತ್ ತಮ್ಮ ರಕ್ಷಣಾತ್ಮಕ ಕೌಶಲ್ಯವನ್ನು ಅತ್ಯಂತ ಎಚ್ಚರಿಕೆಯಿಂದ ಬಳಸಿದರು. ನಿಖತ್ ಜಾಣತನದಿಂದ ಎದುರಾಳಿ ಪ್ರಯತ್ನಗಳನ್ನು ಅರ್ಥ ಮಾಡಿಕೊಂಡು ಎದುರಾಳಿಯನ್ನು ಹತ್ತಿರಕ್ಕೆ ಬರಮಾಡಿಕೊಂಡು ದಾಳಿ ಮಾಡುವ ತಂತ್ರವನ್ನು ಅಳವಡಿಸಿಕೊಂಡರು.

ದಿನದ ಮೂರನೇ ಚಿನ್ನದ ಪದಕ

ಭಾನುವಾರ ನಡೆದ ಬಾಕ್ಸಿಂಗ್‌ನಲ್ಲಿ ನಿಖತ್ ಭಾರತಕ್ಕೆ ಮೂರನೇ ಚಿನ್ನದ ಪದಕಗಳನ್ನು ತಂದುಕೊಟ್ಟಿದ್ದಾರೆ. ಇದಕ್ಕೂ ಮುನ್ನ ಭಾರತದ ದಿಗ್ಗಜ ಬಾಕ್ಸರ್ ಅಮಿತ್ ಪಂಗಲ್ 51 ಕೆಜಿ ತೂಕ ವಿಭಾಗದಲ್ಲಿ ಚಿನ್ನ ಗೆದ್ದಿದ್ದರು. ಅವರಿಗೂ ಮೊದಲು, ಮಹಿಳೆಯರ ಕನಿಷ್ಠ ತೂಕ (45-48 ಕೆಜಿ) ವಿಭಾಗದ ಫೈನಲ್‌ನಲ್ಲಿ ನೀತು ವಿಶ್ವ ಚಾಂಪಿಯನ್‌ಶಿಪ್ 2019 ರ ಕಂಚಿನ ಪದಕ ವಿಜೇತ ರೆಸ್ಜಾಟನ್ ಡೆಮಿ ಜೇಡ್ ಅವರನ್ನು 5-0 ರಿಂದ ಸರ್ವಾನುಮತದ ನಿರ್ಧಾರದಲ್ಲಿ ಸೋಲಿಸಿದ್ದರು. ಭಾರತ ಎಲ್ಲಾ ಮೂರು ಪದಕಗಳನ್ನು 5-0 ಅಂತರದಿಂದ ಗೆದ್ದುಕೊಂಡಿದೆ.