CWG 2022: ಲಾನ್ ಬಾಲ್‌ನಲ್ಲಿ ಬೆಳ್ಳಿ ಪದಕ ಗೆದ್ದ ಭಾರತದ ಪುರುಷರ ತಂಡ

ಲಾನ್ ಬಾಲ್ ಫೈನಲ್​ನಲ್ಲಿ ಭಾರತ ಪುರುಷರ ತಂಡ ಸೋಲನ್ನು ಎದುರಿಸಬೇಕಾಯಿತು. ಪುರುಷರ ವಿಭಾಗದ ಫೈನಲ್‌ನಲ್ಲಿ ಉತ್ತರ ಐರ್ಲೆಂಡ್ 18-5 ರಿಂದ ಭಾರತವನ್ನು ಸೋಲಿಸಿತು. ಇದರೊಂದಿಗೆ ಭಾರತಕ್ಕೆ ಬೆಳ್ಳಿ ಪದಕ ಒಲಿಯಿತು. ಈ ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲಿ ಪುರುಷರ ತಂಡದ ಮೊದಲ ಪದಕ ಇದಾಗಿದೆ. ಈ ಹಿಂದೆ ಕಾಮನ್‌ವೆಲ್ತ್ ಕ್ರೀಡಾಕೂಟದಲ್ಲಿ (Commonwealth Games) ಭಾರತ ಪುರುಷರ ತಂಡ ಈ ಕ್ರೀಡೆಯಲ್ಲಿ ಪದಕ ಗೆದ್ದಿರಲಿಲ್ಲ. ಭಾರತದ ಸುನಿಲ್ ಬಹದ್ದೂರ್, ನವನೀತ್ ಸಿಂಗ್, ಚಂದ್ರಕುಮಾರ್ ಸಿಂಗ್ ಮತ್ತು ದಿನೇಶ್ ಕುಮಾರ್ ಅವರ ಕ್ವಾರ್ಟೆಟ್ ಚಿನ್ನದ ಪದಕ ಗೆಲ್ಲಲು ಶತಪ್ರಯತ್ನ ಮಾಡಿದರೂ ಅವರ ಪ್ರಯತ್ನ ವಿಫಲವಾಗಿ ಭಾರತ ಬೆಳ್ಳಿ ಪದಕಕ್ಕೆ ತೃಪ್ತಿಪಡಬೇಕಾಯಿತು.

ಉತ್ತರ ಐರ್ಲೆಂಡ್‌ಗೆ ಐತಿಹಾಸಿಕ ಕ್ಷಣ

ಉತ್ತರ ಐರ್ಲೆಂಡ್ 1998 ರ ಕಾಮನ್‌ವೆಲ್ತ್ ಕ್ರೀಡಾಕೂಟದಲ್ಲಿ ಲಾನ್ ಬಾಲ್‌ನಲ್ಲಿ ಕೊನೆಯ ಚಿನ್ನದ ಪದಕವನ್ನು ಗೆದ್ದುಕೊಂಡಿತು. ಭಾರತ ತಂಡ ಸೆಮಿಫೈನಲ್‌ನಲ್ಲಿ ಆತಿಥೇಯ ಇಂಗ್ಲೆಂಡ್ ಅನ್ನು 13-12 ಅಂತರದಿಂದ ಸೋಲಿಸಿ ಕನಿಷ್ಠ ಬೆಳ್ಳಿ ಪದಕವನ್ನು ಖಚಿತಪಡಿಸಿತ್ತು. ಮಂಗಳವಾರ ನಡೆದ ಕ್ರೀಡಾಕೂಟದಲ್ಲಿ ಮಹಿಳಾ ಕ್ವಾರ್ಟೆಟ್ ಭಾರತಕ್ಕೆ ಐತಿಹಾಸಿಕ ಚಿನ್ನದ ಪದಕವನ್ನು ಗೆದ್ದುಕೊಟ್ಟಿತ್ತು.

ರಾಣಿ ಎಲಿಜಬೆತ್ ದೇಶಕ್ಕೆ ಹೋಗುವ ಮೂಲಕ ಭಾರತವು ಆಂಗ್ಲರ ನೆಚ್ಚಿನ ಕ್ರೀಡೆಯಲ್ಲಿ ಪ್ರಾಬಲ್ಯ ಸಾಧಿಸಿದೆ. ದೇಶದ ಮಹಿಳೆಯರ ತಂಡ ಈ ವರ್ಷದ ಕಾಮನ್‌ವೆಲ್ತ್ ಕ್ರೀಡಾಕೂಟದಲ್ಲಿ ಹೆಚ್ಚಿನ ದೇಶವಾಸಿಗಳಿಗೆ ತಿಳಿದಿಲ್ಲದ ಲಾನ್ ಬಾಲ್ ಆಟದಲ್ಲಿ ಸ್ಪರ್ಧಿಸಿದವು. ಮಹಿಳೆಯರ ಐತಿಹಾಸಿಕ ಚಿನ್ನದ ಪದಕದ ನಂತರ, ಈ ಬಾರಿ ಪುರುಷರ ತಂಡ ಅದ್ಭುತ ಸಾಧನೆ ಮಾಡಿದೆ. ನಿನ್ನೆ ನಡೆದ ಸೆಮಿಫೈನಲ್ ನಲ್ಲಿ ಇಂಗ್ಲೆಂಡ್ ತಂಡವನ್ನು ಮಣಿಸಿ ಪದಕ ಭದ್ರಪಡಿಸಿಕೊಂಡಿತ್ತು. ಇಂದು, ಶನಿವಾರದಂದು ಸುನಿಲ್-ನವನೈತ್ ಅವರ ಚಿನ್ನದ ಪದಕಕ್ಕೆ ಉತ್ತರ ಐರ್ಲೆಂಡ್ ಕಂಟಕವಾಗಿತ್ತು. ಆ ಕಂಟಕವನ್ನು ತೆರವುಗೊಳಿಸಲು ಸಾಧ್ಯವಾಗದಿದ್ದರೂ ಭಾರತ ಬೆಳ್ಳಿ ಪದಕ ಗೆದ್ದುಕೊಂಡಿತು. ಭಾರತ ತಂಡ ಫೈನಲ್‌ನಲ್ಲಿ 5-18 ಅಂತರದಿಂದ ಸೋತಿತ್ತು.

ಗ್ರೂಪ್ ಹಂತದಲ್ಲಿ ಇಂಗ್ಲೆಂಡ್ ವಿರುದ್ಧ 11-20 ರಿಂದ ಸೋತ ನಂತರ ಪುರುಷರ ಲಾನ್ ಬಾಲ್ ಫೋರ್ ತಂಡವು ಈ ವರ್ಷದ ಕಾಮನ್‌ವೆಲ್ತ್‌ನಲ್ಲಿ ತನ್ನ ಅಭಿಯಾನವನ್ನು ಪ್ರಾರಂಭಿಸಿತು. ನಂತರ ಫಿಜಿ, ಕುಕ್ ದ್ವೀಪಗಳ ವಿರುದ್ಧ ಬ್ಯಾಕ್-ಟು-ಬ್ಯಾಕ್ ಗೆಲುವುಗಳೊಂದಿಗೆ ಕ್ವಾರ್ಟರ್ ಫೈನಲ್ ತಲುಪಿತು. ಅಲ್ಲಿಂದ ಹಿಂತಿರುಗಿ ನೋಡಲೇ ಇಲ್ಲ. ಕ್ವಾರ್ಟರ್-ಫೈನಲ್‌ನಲ್ಲಿ ಕೆನಡಾವನ್ನು 14-12 ರಿಂದ ಸೋಲಿಸಿದ ನಂತರ, ಭಾರತ ಸೆಮಿ-ಫೈನಲ್‌ನಲ್ಲಿ ಇಂಗ್ಲೆಂಡ್ ಅನ್ನು 13-12 ರಿಂದ ಸೋಲಿಸುವ ಮೂಲಕ ಗುಂಪು ಹಂತದಲ್ಲಿ ತಮ್ಮ ಸೋಲಿಗೆ ಸೇಡು ತೀರಿಸಿಕೊಂಡಿತು.