ಸೌತ್ ಆಫ್ರಿಕಾ ಟಿ20 ಲೀಗ್ನತ್ತ ಮುಖ ಮಾಡಿದ 13 ಭಾರತೀಯರು
SA20 2026: ಸೌತ್ ಆಫ್ರಿಕಾ ಟಿ20 ಲೀಗ್ನ 4ನೇ ಸೀಸನ್ ಜನವರಿ 1, 2026 ರಿಂದ ಶುರುವಾಗಲಿದೆ. ಜೋಹಾನ್ಸ್ ಬರ್ಗ್ನ ವಾಂಡರರ್ಸ್ ಸ್ಟೇಡಿಯಂನಲ್ಲಿ ನಡೆಯಲಿರುವ ಈ ಪಂದ್ಯದಲ್ಲಿ ಡರ್ಬನ್ ಸೂಪರ್ ಜೈಂಟ್ಸ್ ಹಾಗೂ ಜೋಹಾನ್ಸ್ ಬರ್ಗ್ ಸೂಪರ್ ಕಿಂಗ್ಸ್ ತಂಡಗಳು ಮುಖಾಮುಖಿಯಾಗಲಿದೆ. ಈ ಟೂರ್ನಿಗಾಗಿ ಮುಂದಿನ ತಿಂಗಳು ಆಟಗಾರರ ಹರಾಜು ಪ್ರಕ್ರಿಯೆ ನಡೆಯಲಿದ್ದು, ಇದಕ್ಕಾಗಿ 13 ಭಾರತೀಯ ಕ್ರಿಕೆಟಿಗರು ಹೆಸರು ನೋಂದಾಯಿಸಿಕೊಂಡಿದ್ದಾರೆ.
ಸೌತ್ ಆಫ್ರಿಕಾ ಟಿ20 ಲೀಗ್ (SA20) ಆಟಗಾರರ ಹರಾಜಿಗೆ ಡೇಟ್ ಫಿಕ್ಸ್ ಆಗಿದೆ. ಸೆಪ್ಟೆಂಬರ್ 9 ರಂದು ನಡೆಯಲಿರುವ ಹರಾಜಿಗಾಗಿ 13 ಭಾರತೀಯರು ಹೆಸರು ನೋಂದಾಯಿಸಿಕೊಂಡಿದ್ದಾರೆ. ಈ ಹಿಂದೆ ಐಪಿಎಲ್ನಲ್ಲಿ ಕಾಣಿಸಿಕೊಂಡಿದ್ದ ಟೀಮ್ ಇಂಡಿಯಾ ಆಟಗಾರರಾದ ಪಿಯೂಷ್ ಚಾವ್ಲಾ, ಸಿದ್ಧಾರ್ಥ್ ಕೌಲ್ ಮತ್ತು ಅಂಕಿತ್ ರಾಜ್ಪೂತ್ ಕೂಡ ಈ ಪಟ್ಟಿಯಲ್ಲಿರುವುದು ವಿಶೇಷ.
ಅಂದರೆ ಭಾರತೀಯ ಕ್ರಿಕೆಟ್ಗೆ ವಿದಾಯ ಹೇಳಿರುವ 13 ಆಟಗಾರರು ಇದೀಗ ಸೌತ್ ಆಫ್ರಿಕಾ ಟಿ20 ಲೀಗ್ನಲ್ಲಿ ಅದೃಷ್ಟ ಪರೀಕ್ಷಿಸಲು ಮುಂದಾಗಿದ್ದಾರೆ. ಹೀಗಾಗಿ ಇನ್ಮುಂದೆ ಈ ಆಟಗಾರರು ಐಪಿಎಲ್ನಲ್ಲಿ ಅಥವಾ ರಾಜ್ಯ ತಂಡದ ಪರ ಕಣಕ್ಕಿಳಿಯಲು ಸಾಧ್ಯವಾಗುವುದಿಲ್ಲ. ಅದರಂತೆ ಸೌತ್ ಆಫ್ರಿಕಾ ಟಿ20 ಲೀಗ್ ಹರಾಜಿಗೆ ಹೆಸರು ನೋಂದಾಯಿಸಿಕೊಂಡಿರುವ ಆಟಗಾರರ ಪಟ್ಟಿ ಈ ಕೆಳಗಿನಂತಿದೆ…
- ಪಿಯೂಷ್ ಚಾವ್ಲಾ (ಉತ್ತರ ಪ್ರದೇಶ್)
- ಸಿದ್ಧಾರ್ಥ್ ಕೌಲ್ (ಪಂಜಾಬ್)
- ಅಂಕಿತ್ ರಜಪೂತ್ (ಉತ್ತರ ಪ್ರದೇಶ್)
- ನಿಖಿಲ್ ಜಗ (ರಾಜಸ್ಥಾನ್)
- ಮೊಹಮ್ಮದ್ ಫೈದ್ (ರಾಜ್ಯವನ್ನು ಉಲ್ಲೇಖಿಸಲಾಗಿಲ್ಲ)
- ಕೆ.ಎಸ್. ನವೀನ್ (ತಮಿಳುನಾಡು)
- ಅನ್ಸಾರಿ ಮರೂಫ್ (ರಾಜ್ಯವನ್ನು ಉಲ್ಲೇಖಿಸಲಾಗಿಲ್ಲ)
- ಮಹೇಶ್ ಅಹಿರ್ (ಗುಜರಾತ್)
- ಸರುಲ್ ಕನ್ವರ್ (ಪಂಜಾಬ್)
- ಅನುರೀತ್ ಸಿಂಗ್ ಕಥುರಿಯಾ (ದೆಹಲಿ)
- ಇಮ್ರಾನ್ ಖಾನ್ (ಉತ್ತರ ಪ್ರದೇಶ್)
- ವೆಂಕಟೇಶ್ ಗಾಳಿಪೆಲ್ಲಿ (ರಾಜ್ಯ ಉಲ್ಲೇಖಿಸಲಾಗಿಲ್ಲ)
- ಅತುಲ್ ಯಾದವ್ (ಉತ್ತರ ಪ್ರದೇಶ್)
ಈ 13 ಆಟಗಾರರಲ್ಲಿ ಪಿಯೂಷ್ ಚಾವ್ಲಾ ಈ ಹಿಂದೆ ಕೊಲ್ಕತ್ತಾ ನೈಟ್ ರೈಡರ್ಸ್, ಮುಂಬೈ ಇಂಡಿಯನ್ಸ್ ತಂಡಗಳ ಪರ ಕಣಕ್ಕಿಳಿದಿದ್ದರು. ಹಾಗೆಯೇ ಸಿದ್ಧಾರ್ಥ್ ಕೌಲ್ ಕೆಕೆಆರ್ ಹಾಗೂ ಆರ್ಸಿಬಿ ತಂಡಗಳಲ್ಲಿ ಕಾಣಿಸಿಕೊಂಡಿದ್ದರು. ಇನ್ನು ಅಂಕಿತ್ ರಜಪೂತ್ ರಾಜಸ್ಥಾನ್ ರಾಯಲ್ಸ್ ತಂಡದ ಪರ ಕಣಕ್ಕಿಳಿದಿದ್ದರು.