ETPL: ಮ್ಯಾಕ್ಸ್ವೆಲ್ ಸಿಡಿಲಬ್ಬರ; ಸೋಲಿನ ಆರಂಭ ಪಡೆದ ದ್ರಾವಿಡ್ ತಂಡ
European T20 League: ಇಟಿಪಿಎಲ್ನ ಮೊದಲ ಪಂದ್ಯದಲ್ಲಿ ರಾಹುಲ್ ದ್ರಾವಿಡ್ ಮಾಲೀಕತ್ವದ ಡಬ್ಲಿನ್ ಗಾರ್ಡಿಯನ್ಸ್ ತಂಡ ಬೆಲ್ಫಾಸ್ಟ್ ವುಲ್ವ್ಸ್ ವಿರುದ್ಧ 52 ರನ್ಗಳ ಆಘಾತಕಾರಿ ಸೋಲು ಅನುಭವಿಸಿದೆ. ಬೆಲ್ಫಾಸ್ಟ್ ವುಲ್ವ್ಸ್ 184 ರನ್ ಕಲೆಹಾಕಿದರೆ, ಡಬ್ಲಿನ್ ಗಾರ್ಡಿಯನ್ಸ್ 132 ರನ್ ಗಳಿಸಲಷ್ಟೇ ಶಕ್ತವಾಯಿತು. ಮಾರ್ಕ್ ಚಾಪ್ಮನ್ ಮತ್ತು ಗ್ಲೆನ್ ಮ್ಯಾಕ್ಸ್ವೆಲ್ ಅರ್ಧಶತಕ ಗಳಿಸಿ ತಂಡಕ್ಕೆ ನೆರವಾದರು.
ಇಟಿಪಿಎಲ್ ಅಥವಾ ಯುರೋಪಿಯನ್ ಟಿ20 ಲೀಗ್ನ (European T20 League) ಮೊದಲ ಸೀಸನ್ ಆಗಸ್ಟ್ 26 ರಿಂದ ಅದ್ಧೂರಿಯಾಗಿ ಆರಂಭವಾಗಿದೆ. ಈ ಲೀಗ್ನ ಎರಡನೇ ದಿನವಾದ ಇಂದು ಕನ್ನಡಿಗ ರಾಹುಲ್ ದ್ರಾವಿಡ್ ಮಾಲೀಕತ್ವದ ಡಬ್ಲಿನ್ ಗಾರ್ಡಿಯನ್ಸ್ (Dublin Guardians) ತಂಡ ತನ್ನ ಮೊದಲ ಪಂದ್ಯವನ್ನಾಡಲು ಕಣಕ್ಕಿಳಿದಿತ್ತು. ಅದರಂತೆ ತನ್ನ ಮೊದಲ ಪಂದ್ಯದಲ್ಲಿ ಬೆಲ್ಫಾಸ್ಟ್ ವುಲ್ವ್ಸ್ ತಂಡವನ್ನು ಎದುರಿಸಿದ ಡಬ್ಲಿನ್ ಗಾರ್ಡಿಯನ್ಸ್ ತಂಡಕ್ಕೆ 52 ರನ್ಗಳ ಆಘಾತಕ್ಕಾರಿ ಸೋಲು ಎದುರಾಯಿತು. ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಬೆಲ್ಫಾಸ್ಟ್ ವುಲ್ವ್ಸ್ ತಂಡ ಇಬ್ಬರು ಆಟಗಾರರ ಅರ್ಧಶತಕದ ನೆರವಿನಿಂದ 184 ರನ್ ಕಲೆಹಾಕಿತು. ಈ ಗುರಿ ಬೆನ್ನಟ್ಟಿದ ಡಬ್ಲಿನ್ ಗಾರ್ಡಿಯನ್ಸ್ ಪರ ಯಾವ ಆಟಗಾರನಿಗೂ ಹೇಳಿಕೊಳ್ಳುವಂತಹ ಇನ್ನಿಂಗ್ಸ್ ಆಡಲು ಸಾಧ್ಯವಾಗಲಿಲ್ಲ. ಹೀಗಾಗಿ ಡಬ್ಲಿನ್ ತಂಡ 132 ರನ್ ಕಲೆಹಾಕಲಷ್ಟೇ ಶಕ್ತವಾಗಿ ಭಾರಿ ಅಂತರದ ಸೋಲು ಅನುಭವಿಸಿತು.
ಬೆಲ್ಫಾಸ್ಟ್ ತಂಡಕ್ಕೆ ಉತ್ತಮ ಆರಂಭ
ಮೊದಲು ಬ್ಯಾಟಿಂಗ್ ಆರಂಭಿಸಿದ ಬೆಲ್ಫಾಸ್ಟ್ ವುಲ್ವ್ಸ್ ತಂಡಕ್ಕೆ ಆರಂಭಿಕ ಪಾಲ್ ಸ್ಟಿರ್ಲಿಂಗ್ 31 ರನ್ಗಳ ಸ್ಫೋಟಕ ಇನ್ನಿಂಗ್ಸ್ ಮೂಲಕ ಉತ್ತಮ ಆರಂಭವನ್ನು ಒದಗಿಸಿಕೊಟ್ಟರು. ಆದರೆ ಮಧ್ಯಮ ಕ್ರಮಾಂಕದ ಬ್ಯಾಟರ್ಗಳಿಂದ ಉತ್ತಮ ಪ್ರದರ್ಶನ ಮೂಡಿಬರಲಿಲ್ಲ. ಆದಾಗ್ಯೂ ಐದನೇ ಕ್ರಮಾಂಕದಲ್ಲಿ ಬಂದ ಮಾರ್ಕ್ ಚಾಪ್ಮನ್ 33 ಎಸೆತಗಳಲ್ಲಿ 6 ಬೌಂಡರಿ ಹಾಗೂ 2 ಸಿಕ್ಸರ್ಗಳ ಸಹಿತ 54 ರನ್ಗಳ ಇನ್ನಿಂಗ್ಸ್ ಆಡಿದರೆ, 6ನೇ ಕ್ರಮಾಂಕದಲ್ಲಿ ಬಂದ ಅನುಭವಿ ಗ್ಲೆನ್ ಮ್ಯಾಕ್ಸ್ವೆಲ್ ಮೈದಾನ ತುಂಬ ಬೌಂಡರಿಗಳ ಮಳೆಗರೆದರು.
60 ರನ್ ಬಾರಿಸಿದ ಮ್ಯಾಕ್ಸ್ವೆಲ್
ಮ್ಯಾಕ್ಸ್ವೆಲ್ 38 ಎಸೆತಗಳಲ್ಲಿ 2 ಬೌಂಡರಿ ಹಾಗೂ 4 ಸಿಕ್ಸರ್ಗಳ ಸಹಿತ 60 ರನ್ಗಳ ಇನ್ನಿಂಗ್ಸ್ ಆಡಿದರು. ಇವರಿಬ್ಬರ ಆಟದಿಂದಾಗಿ ಬೆಲ್ಫಾಸ್ಟ್ ವುಲ್ವ್ಸ್ ತಂಡ 20 ಓವರ್ಗಳಲ್ಲಿ 7 ವಿಕೆಟ್ಗಳನ್ನು ಕಳೆದುಕೊಂಡು 184 ರನ್ ಕಲೆಹಾಕಿತು. ಇತ್ತ ಡಬ್ಲಿನ್ ಗಾರ್ಡಿಯನ್ಸ್ ಪರ ಕ್ರಿಸ್ ವುಡ್ 3 ವಿಕೆಟ್ಗಳನ್ನು ಪಡೆದರೆ, ಜೋಶುವಾ ಲಿಟಲ್ 2 ವಿಕೆಟ್ ಪಡೆದರು. ನಾಯಕ ಅಶ್ವಿನ್ ಕೂಡ 1 ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾದರು.
132 ರನ್ ಬಾರಿಸಲಷ್ಟೇ ಶಕ್ತವಾಯಿತು
184 ರನ್ಗಳ ಬೃಹತ್ ಗುರಿ ಬೆನ್ನಟ್ಟಿದ ಡಬ್ಲಿನ್ ಗಾರ್ಡಿಯನ್ಸ್ ತಂಡಕ್ಕೆ ಕಳಪೆ ಆರಂಭ ಸಿಕ್ಕಿತು. ಆರಂಭಿಕ ಹ್ಯಾರಿ ಟೆಕ್ಟರ್ ಸೊನ್ನೆಗೆ ವಿಕೆಟ್ ಒಪ್ಪಿಸಿದರೆ, ಮುಹಮ್ಮದ್ ವಸೀಮ್ ಇನ್ನಿಂಗ್ಸ್ 9 ರನ್ಗಳಿಗೆ ಅಂತ್ಯವಾಯಿತು. ಸಂಜಯ್ ಕೃಷ್ಣಮೂರ್ತಿ 13 ರನ್ ಬಾರಿಸಿ ಔಟಾದರೆ, ಡ್ಯಾರಿಲ್ ಮಿಚೆಲ್ ಮತ್ತು ವಿಜಯ್ ಶಂಕರ್ ತಲಾ 3 ರನ್ ಬಾರಿಸುವಷ್ಟರಲ್ಲಿ ಸುಸ್ತಾದರು. ತಂಡದ ಪರ ಜಾರ್ಜ್ ಡಾಕ್ರೆಲ್ ಅತ್ಯಧಿಕ 35 ರನ್ಗಳ ಇನ್ನಿಂಗ್ಸ್ ಆಡಿದರೆ, ಕ್ರಿಸ್ ವುಡ್ 25 ರನ್ಗಳ ಕಾಣಿಕೆ ನೀಡಿದರು. ನಾಯಕ ಅಶ್ವಿನ್ 15 ರನ್ ಬಾರಿಸಲಷ್ಟೇ ಶಕ್ತರಾದರು. ಅಂತಿಮವಾಗಿ ಡಬ್ಲಿನ್ ಗಾರ್ಡಿಯನ್ಸ್ ತಂಡ 20 ಓವರ್ಗಳಲ್ಲಿ 9 ವಿಕೆಟ್ ಕಳೆದುಕೊಂಡು 132 ರನ್ ಬಾರಿಸಿ ಸೋಲೊಪ್ಪಿಕೊಂಡಿತು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 9:51 pm, Thu, 27 August 26