Harmanpreet Kaur: ಭಾರತ ದೇಶ ನಾನು ಅಳುವುದನ್ನು ನೋಡಲು ಬಯಸಲ್ಲ, ಅದಕ್ಕೆ ಸನ್ಗ್ಲಾಸ್ ಹಾಕಿದ್ದೇನೆ: ಹರ್ಮನ್ ಭಾವುಕ ನುಡಿ
India Women vs Australia Women, T20 World Cup: ಐಸಿಸಿ ಮಹಿಳಾ ಟಿ20 ವಿಶ್ವಕಪ್ 2023ರ ಸೆಮಿ ಫೈನಲ್ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಭಾರತ ಮಹಿಳಾ ತಂಡ ಸೋಲು ಕಂಡಿತು. ಪಂದ್ಯ ಮುಗಿದ ಬಳಿಕ ಮಾತನಾಡಿದ ನಾಯಕಿ ಹರ್ಮನ್ಪ್ರೀತ್ ಕೌರ್ ಏನು ಹೇಳಿದರು ನೋಡಿ.
Updated on:Feb 24, 2023 | 8:04 AM
ಐಸಿಸಿ ಮಹಿಳಾ ಟಿ20 ವಿಶ್ವಕಪ್ನಲ್ಲಿ (ICC Womens T20 World Cup) ಚೊಚ್ಚಲ ಬಾರಿಗೆ ಕಪ್ ಎತ್ತಿ ಹಿಡಿಯುವ ಭಾರತೀಯ ವನಿತೆಯರ ಕನಸು ಈ ಬಾರಿ ಕೂಡ ನನಸಾಗಲಿಲ್ಲ. ಈ ಹಿಂದೆ ಎರಡು ಬಾರಿ ಫೈನಲ್ ತಲುಪಿದ್ದ ಟೀಮ್ ಇಂಡಿಯಾ ಈ ಬಾರಿ ಸೆಮಿ ಫೈನಲ್ನಲ್ಲಿ ನಿರ್ಗಮಿಸಿತು. ಆಸ್ಟ್ರೇಲಿಯಾ ಮಹಿಳೆಯರ ವಿರುದ್ಧ ಸೋಲಿನ ಕೆಟ್ಟ ದಾಖಲೆ ಹೊಂದಿರುವ ಭಾರತ ಮತ್ತದೆ ತಪ್ಪು ಎಸಗಿ ನಿರಾಸೆ ಮೂಡಿಸಿತು. ನಾಯಕಿ ಹರ್ಮನ್ಪ್ರೀತ್ ಕೌರ್ (Harmanpreet Kaur) ಹಾಗೂ ಜೆಮಿಮಾ ರೋಡ್ರಿಗಸ್ (Jemimah Rodrigues) ಹೋರಾಟಕ್ಕೆ ಫಲ ಸಿಗಲಿಲ್ಲ. ಕೊನೆಯ ಓವರ್ ವರೆಗೂ ತುದಿಗಾಲಿನಲ್ಲಿ ನಿಲ್ಲಿಸಿದ್ದ ಪಂದ್ಯದಲ್ಲಿ ಕಾಂಗರೂ ಪಡೆ 5 ರನ್ಗಳ ರೋಚಕ ಜಯ ಸಾಧಿಸಿ ಫೈನಲ್ಗೆ ಪ್ರವೇಶ ಪಡೆದಿದೆ. ಪಂದ್ಯ ಮುಗಿದ ಬಳಿಕ ಪೋಸ್ಟ್ ಮ್ಯಾಚ್ ಪ್ರೆಸೆಂಟೇಷನ್ ವೇಳೆ ನಾಯಕಿ ಹರ್ಮನ್ಪ್ರೀತ್ ಭಾವುಕರಾದ ಘಟನೆ ಕೂಡ ನಡೆಯಿತು.
ಸಾಮಾನ್ಯವಾಗಿ ಪಂದ್ಯ ಮುಗಿದ ಬಳಿಕ ಉಭಯ ತಂಡಗಳ ಕ್ಯಾಪ್ಟನ್ ಅನ್ನು ಕರೆಸಿ ಮಾತನಾಡಿಸುವುದು ವಾಡಿಕೆ. ಅದರಂತೆ ಭಾರತದ ನಾಯಕಿ ಹರ್ಮನ್ಪ್ರೀತ್ ಕೌರ್ ಮಾತನಾಡಲು ಬಂದಾಗ ಸನ್ಗ್ಲಾಸ್ ಹಾಕಿದ್ದರು. ಇದಕ್ಕೆ ಅವರು ನೀಡಿದ ಕಾರಣ ಭಾರತೀಯರನ್ನು ಮತ್ತಷ್ಟು ಭಾವುಕರನ್ನಾಗಿ ಮಾಡಿತು. ”ನನ್ನ ದೇಶ ನಾನು ಅಳುವುದನ್ನು ನೋಡಲು ಬಯಸುವುದಿಲ್ಲ, ಅದಕ್ಕಾಗಿ ಸನ್ಗ್ಲಾಸ್ ಧರಿಸಿದ್ದೇನೆ. ನಾವು ಮಾಡಿದ ತಪ್ಪುಗಳನ್ನು ತಿದ್ದಿ ಇನ್ನಷ್ಟು ಬಲಿಷ್ಠವಾಗಿ ಬರುತ್ತೇವೆ. ನಮ್ಮ ದೇಶ ಪುನಃ ಈರೀತಿ ನಿರಾಸೆ ಅನುಭವಿಸುವಂತೆ ಮಾಡುವುದಿಲ್ಲ, ಇದು ನಾನು ನೀಡುತ್ತಿರುವ ಭರವಸೆ,” ಎಂದು ಹರ್ಮನ್ ಹೇಳಿದ್ದಾರೆ.
ಮಾತು ಮುಂದುವರೆಸಿದ ಅವರು, ”ಇದು ನಮ್ಮ ದುರದೃಷ್ಟಕರ ಎಂದು ಹೇಳಬಹುದು. ನಾನು ಮತ್ತು ಜೆಮಿಮಾ ಸಾಕಷ್ಟು ಪ್ರಯತ್ನ ಪಟ್ಟು ಮೂಮೆಂಟಮ್ ಅನ್ನು ತಂದಿದ್ದೆವು. ಆದರೆ, ಇಷ್ಟಾಗಿಯು ನಾವು ಸೋಲು ಕಂಡಿದ್ದೇವೆ ಎಂಬುದನ್ನು ನಂಬಲು ಸಾಧ್ಯವಾಗುತ್ತಿಲ್ಲ. ನಾನು ರನ್ ಔಟ್ ಆದ ರೀತಿ, ಅದಕ್ಕಿಂತ ದುರದೃಷ್ಟಕರವಾಗಿರಲು ಸಾಧ್ಯವಿಲ್ಲ. ಒಂದು ಪಂದ್ಯಕ್ಕಾಗಿ ಶ್ರಮ ವಹಿಸುವುದು ಮುಖ್ಯ. ಕೊನೆಯ ಎಸೆತದ ವರೆಗೂ ಹೋರಾಡುವ ಬಗ್ಗೆ ನಾವು ಮಾತನಾಡಿಕೊಂಡಿದ್ದೆವು. ಫಲಿತಾಂಶ ನಮ್ಮ ಕಡೆ ಆಗಲಿಲ್ಲ ನಿಜ. ಆದರೆ, ನಾವು ಈ ಟೂರ್ನಮೆಂಟ್ನಲ್ಲಿ ಆಡಿದ ರೀತಿ ಖುಷಿ ತಂದಿದೆ.”
”ನಾವು ಆರಂಭದಲ್ಲಿ ಕೆಲವು ವಿಕೆಟ್ಗಳನ್ನು ಕಳೆದುಕೊಂಡರೂ ನಮ್ಮ ಬ್ಯಾಟಿಂಗ್ ಸರದಿ ದೊಡ್ಡದಿದೆ. ಜೆಮಿಮಾ ಅವರಿಗೆ ಇಂದು ಕ್ರೆಡಿಟ್ ನೀಡಬೇಕು. ಕಷ್ಟದ ಸಂದರ್ಭದಲ್ಲಿ ನೆರವಾಗಿದ್ದಾರೆ. ಈರೀತಿಯ ಆಟವನ್ನು ನೋಡಲು ಖುಷಿ ಆಗುತ್ತದೆ. ನಾವು ಇಂದು ನಮ್ಮ ನೈಜ್ಯ ಆಟ ಆಡಲಿಲ್ಲ ಎಂದೆನಿಸುತ್ತದೆ. ಆದರೂ ಸೆಮಿ ಫೈನಲ್ ವರೆಗೂ ತಲುಪಿದೆವು. ಕೆಲ ಸುಲಭ ಕ್ಯಾಚ್ಗಳನ್ನು ಬಿಟ್ಟುಕೊಟ್ಟಿದ್ದೇವೆ. ನಾವು ಗೆಲ್ಲಬೇಕು ಎಂದಾದಾಗ ಇವುಗಳ ಪಡೆದುಕೊಳ್ಳಬೇಕು. ಮಿಸ್ ಫೀಲ್ಡ್ ಕೂಡ ನಮ್ಮಿಂದಾಗಿದೆ. ಈ ಎಲ್ಲ ತಪ್ಪುಗಳು ಮರುಕಳಿಸದಂತೆ ಸರಿ ಪಡಿಸಿ ಮುಂದು ಸಾಗುತ್ತೇವೆ,” ಎಂದು ಹರ್ಮನ್ಪ್ರೀತ್ ಕೌರ್ ಹೇಳಿದ್ದಾರೆ.
ಈ ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ಗೆ ಇಳಿದ ಆಸ್ಟ್ರೇಲಿಯಾ ಪರ ಓಪನರ್ಗಳಾದ ಬೆತ್ ಮೂನಿ (54) ಮತ್ತು ಅಲಿಸ್ಸಾ ಹೀಲಿ (25) ಭರ್ಜರಿ ಆರಂಭ ಒದಗಿಸಿದರು. ನಾಯಕಿ ಮೆಗ್ ಲ್ಯಾನಿಂಗ್ (49) ಕೂಡ ಸ್ಫೋಟಕ ಬ್ಯಾಟಿಂಗ್ ನಡೆಸಿ ತಂಡಕ್ಕೆ ಉಪಯುಕ್ತ ಕಾಣಿಕೆ ನೀಡಿದರು. ಆಶ್ಲೀಗ್ ಗಾರ್ಡ್ನರ್ ಕೇವಲ 18 ಎಸೆತಗಳಲ್ಲಿ 31 ರನ್ ಕಲೆಹಾಕಿದರುಆಸ್ಟ್ರೇಲಿಯಾ 20 ಓವರ್ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 172 ರನ್ ಗಳಿಸಿತು. ಟಾರ್ಗೆಟ್ ಬೆನ್ನಟ್ಟಿದ ಭಾರತಕ್ಕೆ ಉತ್ತಮ ಆರಂಭ ಸಿಗಲಿಲ್ಲ. ಮೂರನೇ ವಿಕೆಟ್ಗೆ ಹರ್ಮನ್ (54) ಹಾಗೂ ಜೆಮಿಮಾ (43) ಜೊತೆಯಾಗಿ ಗೆಲುವಿಗೆ ಹೋರಾಡಿದರು. ಆದರೆ, ಭಾರತ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 167 ರನ್ ಗಳಿಸಲಷ್ಟೇ ಶಕ್ತವಾಗಿ ಸೋಲು ಕಂಡಿತು.
ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
Published On - 8:04 am, Fri, 24 February 23
