Record Win: ಒಂದೇ ದಿನಾಂಕದಂದು 2 ತಂಡಗಳ ದಾಖಲೆಯ ಜಯ; ಹೀಗೊಂದು ಕಾಕತಾಳೀಯ
Record Win: ಜನವರಿ 15 ರಂದು ಕಾಕತಾಳೀಯವೆಂಬಂತೆ ಭಾರತದ ಮಹಿಳಾ ಮತ್ತು ಪುರುಷರ ಕ್ರಿಕೆಟ್ ತಂಡಗಳು ಏಕದಿನ ಪಂದ್ಯಗಳಲ್ಲಿ ಅತಿ ದೊಡ್ಡ ಗೆಲುವು ಸಾಧಿಸಿ ಇತಿಹಾಸ ನಿರ್ಮಿಸಿವೆ. ಮಹಿಳಾ ತಂಡವು ಐರ್ಲೆಂಡ್ ವಿರುದ್ಧ 304 ರನ್ಗಳ ಅಂತರದಿಂದ ಗೆದ್ದರೆ, ಪುರುಷರ ತಂಡವು ಎರಡು ವರ್ಷಗಳ ಹಿಂದೆ ಇದೇ ದಿನ ಶ್ರೀಲಂಕಾವನ್ನು 317 ರನ್ಗಳಿಂದ ಸೋಲಿಸಿತ್ತು.
Updated on: Jan 15, 2025 | 7:46 PM
ಭಾರತ ಕ್ರಿಕೆಟ್ಗೆ ಜನವರಿ 15 ಬಹಳ ವಿಶೇಷ ದಿನ ಎಂಬುದು ಮತ್ತೊಮ್ಮೆ ಸಾಭೀತಾಗಿದೆ. ಈ ದಿನದಂದು, ಭಾರತೀಯ ಪುರುಷರ ತಂಡ ಮತ್ತು ಮಹಿಳಾ ತಂಡ ಏಕದಿನ ಕ್ರಿಕೆಟ್ನಲ್ಲಿ ಅತಿ ದೊಡ್ಡ ಗೆಲುವು ದಾಖಲಿಸಿದ ದಾಖಲೆಗಳನ್ನು ಮಾಡಿದೆ. ವಾಸ್ತವವಾಗಿ, ಭಾರತ ಮಹಿಳಾ ತಂಡ ಮತ್ತು ಐರ್ಲೆಂಡ್ ವಿರುದ್ಧದ 3 ಪಂದ್ಯಗಳ ಏಕದಿನ ಸರಣಿಯ ಕೊನೆಯ ಪಂದ್ಯ ಇಂದು (ಜನವರಿ 15) ರಾಜ್ಕೋಟ್ನ ಸೌರಾಷ್ಟ್ರ ಕ್ರಿಕೆಟ್ ಅಸೋಸಿಯೇಷನ್ ಸ್ಟೇಡಿಯಂನಲ್ಲಿ ನಡೆಯಿತು. ಈ ಪಂದ್ಯದಲ್ಲಿ ಭಾರತ ಮಹಿಳಾ ತಂಡ ಹಲವು ದಾಖಲೆಗಳನ್ನು ಸೃಷ್ಟಿಸಿತ್ತು. ಪ್ರಾಸಂಗಿಕವಾಗಿ ಎರಡು ವರ್ಷಗಳ ಹಿಂದೆ ಇದೇ ದಿನಾಂಕದಂದು ಭಾರತೀಯ ಪುರುಷರ ತಂಡ ಕೂಡ ಏಕದಿನ ಕ್ರಿಕೆಟ್ನಲ್ಲಿ ಅಪರೂಪದ ದಾಖಲೆ ನಿರ್ಮಿಸಿತ್ತು.
ಒಂದೇ ದಿನಾಂಕದಂದು ಇತಿಹಾಸ ಸೃಷ್ಟಿ
ವಾಸ್ತವವಾಗಿ, ಇಂದು ನಡೆದ ಪಂದ್ಯದಲ್ಲಿ ಭಾರತೀಯ ಮಹಿಳಾ ತಂಡವು ಐರ್ಲೆಂಡ್ ತಂಡವನ್ನು 304 ರನ್ಗಳ ಅಂತರದಿಂದ ಸೋಲಿಸಿತು. ಇದು ಏಕದಿನ ಕ್ರಿಕೆಟ್ ಇತಿಹಾಸದಲ್ಲಿ ಭಾರತ ಮಹಿಳಾ ತಂಡದ ಅತಿ ದೊಡ್ಡ ಗೆಲುವಾಗಿದೆ. ಇತ್ತ ಎರಡು ವರ್ಷಗಳ ಹಿಂದೆ ಇದೇ ದಿನ ಅಂದರೆ ಜನವರಿ 15 ರಂದು, ಭಾರತ ಪುರುಷರ ತಂಡವು ಕೂಡ ಏಕದಿನ ಕ್ರಿಕೆಟ್ ಇತಿಹಾಸದಲ್ಲಿ ದೊಡ್ಡ ಗೆಲುವು ಸಾಧಿಸಿತ್ತು. ಆಗ ಟೀಂ ಇಂಡಿಯಾ ಶ್ರೀಲಂಕಾವನ್ನು 317 ರನ್ಗಳ ಅಂತರದಿಂದ ಸೋಲಿಸಿತ್ತು. ಇದು ಪುರುಷರ ಏಕದಿನ ಕ್ರಿಕೆಟ್ನ ಇತಿಹಾಸದಲ್ಲಿಯೇ ಅತಿ ದೊಡ್ಡ ಗೆಲುವಾಗಿದೆ. ಅಂದರೆ ಎರಡೂ ಭಾರತ ತಂಡಗಳು ಒಂದೇ ದಿನದಲ್ಲಿ ತಮ್ಮ ಅತಿ ದೊಡ್ಡ ಏಕದಿನ ಗೆಲುವನ್ನು ಸಾಧಿಸಿವೆ.
ಭಾರತ ಮಹಿಳಾ ತಂಡ ಗರಿಷ್ಠ ಸ್ಕೋರ್
ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಭಾರತ ಮಹಿಳಾ ತಂಡವು 50 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 435 ರನ್ ಗಳಿಸಿತು. ಈ ಮೂಲಕ ಏಕದಿನ ಕ್ರಿಕೆಟ್ನಲ್ಲಿ 400 ರನ್ಗಳನ್ನು ದಾಟಿದ ಮೊದಲ ಏಷ್ಯನ್ ತಂಡ ಎಂಬ ದಾಖಲೆಯನ್ನು ತನ್ನ ಖಾತೆಗೆ ಹಾಕಿಕೊಂಡಿದೆ.
ಸ್ಮೃತಿ ಮಂಧಾನ ವೇಗದ ಶತಕ
ಈ ಪಂದ್ಯದಲ್ಲಿ ಟೀಂ ಇಂಡಿಯಾ ನಾಯಕಿ ಸ್ಮೃತಿ ಮಂಧಾನ 80 ಎಸೆತಗಳಲ್ಲಿ 12 ಬೌಂಡರಿ ಮತ್ತು 7 ಸಿಕ್ಸರ್ಗಳ ನೆರವಿನಿಂದ 135 ರನ್ ಗಳಿಸಿದರು. ಅಲ್ಲದೆ ಕೇವಲ 70 ಎಸೆತಗಳಲ್ಲಿ ಶತಕ ಪೂರೈಸಿದ ಸ್ಮೃತಿ ಮಂಧಾನ ಭಾರತದ ಪರ ಏಕದಿನದಲ್ಲಿ ಅತಿ ವೇಗದ ಶತಕ ಬಾರಿಸಿದ ದಾಖಲೆ ಬರೆದರು.
ಪ್ರತೀಕಾ ರಾವಲ್ ದಾಖಲೆಯ ಶತಕ
ಈ ಪಂದ್ಯದಲ್ಲಿ ಸ್ಮೃತಿ ಮಾತ್ರವಲ್ಲದೆ ಪ್ರತೀಕಾ ರಾವಲ್ ಕೂಡ 129 ಎಸೆತಗಳಲ್ಲಿ 20 ಬೌಂಡರಿ ಹಾಗೂ 1 ಸಿಕ್ಸರ್ ಸಹಾಯದಿಂದ 154 ರನ್ ಗಳಿಸಿದರು. ಈ ಮೂಲಕ ಭಾರತ ಪರ ಏಕದಿನ ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ಇನ್ನಿಂಗ್ಸ್ ಆಡಿದ ಮೂರನೇ ಬ್ಯಾಟರ್ ಎನಿಸಿಕೊಂಡರು. ಈ ಪಟ್ಟಿಯಲ್ಲಿ ದೀಪ್ತಿ ಶರ್ಮಾ (188) ಮತ್ತು ಹರ್ಮನ್ಪ್ರೀತ್ (171*) ಅವರಿಗಿಂತ ಮುಂದಿದ್ದಾರೆ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
