ಓಪನರ್ ಹಸೀಬ್ ಹಮೀದ್ ಶತಕ ಬಾರಿಸಿದರೂ ಎರಡನೇ ದಿನದಾಟದಲ್ಲಿ ಭಾರತೀಯ ಬೌಲರ್​ಗಳದ್ದೇ ಮೇಲುಗೈ

ಚೆಸ್ಟರ್​-ಲೀ-ಸ್ಟ್ರೀಟ್:  ಹಸೀಬ್ ಹಮೀದ್ ನಿಮಗೆ ನೆನಪಿದೆಯಾ? 2016-17ರಲ್ಲಿ ಇಂಗ್ಲೆಂಡ್​ ಪ್ರವಾಸ ಬಂದಾಗ ಕೇವಲ 19 ವರ್ಷದವರಾಗಿದ್ದ ಪಾಕಿಸ್ತಾನ ಮೂಲದ ಆಂಗ್ಲ ಆಟಗಾರ ಹಮೀದ್, ರಾಜ್​ಕೋಟ್​ನ ಸೌರಾಷ್ಟ್ರ ಕ್ರಿಕೆಟ್ ಅಸೋಸಿಯೇಷನ್ ಮೈದಾನಲ್ಲಿ ನಡೆದ ಸರಣಿಯ ಮೊದಲ ಟೆಸ್ಟ್​ ಪಂದ್ಯದಲ್ಲಿ ಪಾದಾರ್ಪಣೆ ಮಾಡುವ ಮೂಲಕ, ಇಂಗ್ಲೆಂಡ್​ ಪರ ಅತಿ ಕಡಿಮೆ ವಯಸ್ಸಿನಲ್ಲಿ ಟೆಸ್ಟ್ ಕ್ರಿಕೆಟ್ ಕಾಲಿಟ್ಟ ಆರಂಭ ಆಟಗಾರ ಎನಿಸಿಕೊಂಡರು. ಈ ಟೆಸ್ಟ್​ನ ಎರಡನೇ ಇನ್ನಿಂಗ್ಸ್​ನಲ್ಲಿ ಅವರು ಅರ್ಧ ಶತಕ ಬಾರಿಸಿ ತಮ್ಮ ಪ್ರತಿಭೆಯ ಪರಿಚಯ ನೀಡಿದ್ದರು. ಮೊಹಾಲಿಯಲ್ಲಿ ನಡೆದ ಮೂರನೇ ಟೆಸ್ಟ್​ನಲ್ಲಿ ಬೆರಳಿಗೆ ಗಾಯವಾಗಿದ್ದರೂ ದಿಟ್ಟತನದಿಂದ ಬ್ಯಾಟ್​ ಮಾಡಿ ಅರ್ಧ ಶತಕ ಗಳಿಸಿದ್ದು ಪ್ರೇಕ್ಷಕರ ಮತ್ತು ಕಾಮೆಂಟೇಟರ್​ಗಳ ಮೆಚ್ಚುಗೆಗೆ ಪಾತ್ರವಾಗಿತ್ತು. ಈ ಪಂದ್ಯದ ನಂತರ ಹಮೀದ್ ಸ್ವದೇಶಕ್ಕೆ ಮರಳಿ ಬೆರಳಿನ ಶಸ್ತ್ರಚಿಕಿತ್ಸೆಗೊಳಗಾಗಿದ್ದರು. ಆದರೆ ದುರದೃಷ್ಟವಶಾತ್ ಇಂಗ್ಲೆಂಡ್ ಮತ್ತು ವೇಲ್ಸ್ ಕ್ರಿಕೆಟ್ (ಈ ಸಿ ಬಿ) ಮಂಡಳಿಯು ಅವರನ್ನು ಪುನಃ ರಾಷ್ಟ್ರೀಯ ತಂಡಕ್ಕೆ ಆರಿಸಲೇ ಇಲ್ಲ. ಆದರೆ ಭಾರತ ವಿರುದ್ಧ ನಡೆಯಲಿರುವ ಟೆಸ್ಟ್​ ಸರಣಿಯ ಮೊದಲೆರಡು ಪಂದ್ಯಗಳಿಗೆ ಈಸಿಬಿ ಬುಧವಾರ 17-ಸದಸ್ಯರ ತಂಡವನ್ನು ಪ್ರಕಟಿಸಿದ್ದು ಅದರಲ್ಲಿ ಹಮೀದ್ ಹೆಸರಿದೆ.

ಹಮೀದ್ ಕುರಿತು ಇಷ್ಟೆಲ್ಲ ಚರ್ಚಿಸಲು ಕಾರಣವಿದೆ. ಭಾರತದ ವಿರುದ್ಧ ಚೆಸ್ಟರ್​-ಲೀ ಸ್ಟ್ರೀಟ್ ಮೈದಾನದಲ್ಲಿ ನಡೆಯುತ್ತಿರುವ ಮೂರು ದಿನಗಳ ಪಂದ್ಯದಲ್ಲಿ ಎರಡನೇ ದಿನವಾಗಿದ್ದ ಬುಧವಾರದಂದು ಕೌಂಟಿ ಸೆಲೆಕ್ಟ್ ಇಲೆವೆನ್ ತಂಡದ ಪರ ಆರಂಭ ಆಟಗಾರನಾಗಿ ಆಡಿದ ಹಮೀದ್ ಆಕರ್ಷಕ ಶತಕ ಬಾರಿಸಿ ರಾಷ್ಟ್ರೀಯ ತಂಡಕ್ಕೆ ತಾವು ವಾಪಸ್ಸಾಗಿರುವುದನ್ನು ಸಂಭ್ರಮಿಸಿದರು. ಭಾರತದ ಬೌಲರ್​ಗಳನ್ನು ಸಮರ್ಥವಾಗಿ ಎದುರಿಸಿ ಆಡಿದ ಹಮೀದ್ 246 ಎಸೆತಗಳಲ್ಲಿ 112 ರನ್ ಬಾರಿಸಿದರು. ತಮ್ಮ ಇನ್ನಿಂಗ್ಸ್​ನಲ್ಲಿ ಅವರು 13 ಬಾರಿ ಚೆಂಡನ್ನು ಬೌಂಡರಿ ಗೆರೆ ದಾಟಿಸಿದರು.

ಅವರನ್ನು ಬಿಟ್ಟರೆ ಕೌಂಟಿ ಇಲೆವೆನ್ ತಂಡದ ಬೇರೆ ಯಾವುದೇ ಆಟಗಾರ ಭಾರತೀಯ ದಾಳಿಯನ್ನು ವಿಶ್ವಾಸದಿಂದ ಎದುರಿಸಲಿಲ್ಲ. ಲಿಯಾಮ್ ಪ್ಯಾಟರ್ಸನ್ 33 ರನ್ ಗಳಿಸಿದರೆ, ಲಿಂಡನ್ ಜೇಮ್ಸ್ 27 ರನ್​ಗಳ ಕಾಣಿಕೆ ನೀಡಿದರು. ದಿನದಾಟ ಕೊನೆಗೊಂಡಾಗ ಕೌಂಟಿ ತಂಡದ ಸ್ಕೋರ್ 220/9 ಆಗಿತ್ತು.

ಭಾರತದ ಪರ ಉಮೇಶ್ ಯಾದವ್ 22ರನ್​ಗೆ 3 ವಿಕೆಟ್ ಪಡೆದು ಅತಿ ಯಶಸ್ವೀ ಬೌಲರ್ ಎನಿಸಿಕೊಂಡರು. ಮೊಹಮ್ಮದ್ ಸಿರಾಜ್​ಗೆ 2 ವಿಕೆಟ್​ ದಕ್ಕಿದರೆ, ಮತ್ತೊಬ್ಬ ವೇಗಿ ಶಾರ್ದುಲ್ ಠಾಕೂರ್ ಮತ್ತು ಸ್ಪಿನ್ನರ್​ಗಳಾಗಿರುವ ರವೀಂದ್ರ ಜಡೇಜಾ ಮತ್ತು ಅಕ್ಸರ್ ಪಟೇಲ್ ತಲಾ ಒಂದೊಂದು ವಿಕೆಟ್​ ಪಡೆದರು. ನಾಲೆ ಪಂದ್ಯದ ಮೂರನೇ ಹಾಗೂ ಕೊನೆ ದಿನವಾಗಿದೆ.

ಇದನ್ನೂ ಓದಿ: IND vs ENG: ಭಾರತ ವಿರುದ್ಧದ ಮೊದಲೆರಡು ಟೆಸ್ಟ್​ ಪಂದ್ಯಗಳಿಗೆ ಬಲಿಷ್ಠ ಇಂಗ್ಲೆಂಡ್ ತಂಡ ಪ್ರಕಟ