MS Dhoni: ಇದು ಹಳೆಯ ಧೋನಿ ಇನ್ನಿಂಗ್ಸ್! ಕೊನೆಯ 4 ಎಸೆತಗಳಲ್ಲಿ 16 ರನ್ ಚಚ್ಚಿ ತಂಡ ಗೆಲ್ಲಿಸಿದ MSD- ವಿಡಿಯೋ ಇಲ್ಲಿದೆ
IPL 2022 | CSK vs MI: ಎಂಎಸ್ ಧೋನಿ ಮತ್ತೊಮ್ಮೆ ಫಿನಿಶರ್ ಪಾತ್ರವನ್ನು ನಿರ್ವಹಿಸಿ, ಗೆಲ್ಲೇಬೇಕಾಗಿದ್ದ ಪಂದ್ಯದಲ್ಲಿ ತಂಡವನ್ನು ಜಯದ ದಡ ಸೇರಿಸಿದ್ದಾರೆ. ಸಿಎಸ್ಕೆ ಮಾಜಿ ನಾಯಕನ ಭರ್ಜರಿ ಇನ್ನಿಂಗ್ಸ್ ಮತ್ತೊಮ್ಮೆ ಕ್ರಿಕೆಟ್ ಪ್ರಿಯರ ಮನಗೆದ್ದಿದೆ.
ವಿಶ್ವ ಕಂಡ ಅತ್ಯುತ್ತಮ ಫಿನಿಶರ್ಗಳಲ್ಲಿ ಒಬ್ಬರು ಎಂದು ಖ್ಯಾತರಾಗಿರುವ ಧೋನಿಗೆ (MS Dhoni) ಈಗ 40 ವರ್ಷ. ಕಳೆದ ಐಪಿಎಲ್ ಸಂದರ್ಭದಲ್ಲಿ ಅವರಲ್ಲಿ ಇನ್ನೆಷ್ಟು ಬ್ಯಾಟಿಂಗ್ ಉಳಿದಿದೆ ಎಂಬುದು ದೊಡ್ಡ ಚರ್ಚೆಯಾಗಿತ್ತು. ಧೋನಿಗೆ ಐಪಿಎಲ್ನಿಂದಲೂ ನಿವೃತ್ತಿ ಹೊಂದುವಂತೆ ಹಲವರು ಕಾಲೆಳೆದಿದ್ದರು. ಆದರೆ ಈ ಐಪಿಎಲ್ನ ಆರಂಭಿಕ ಪಂದ್ಯದಲ್ಲೇ ದಂಡವನ್ನು ಕುಸಿತದಿಂದ ಕಾಪಾಡಿದ್ದ ಧೋನಿ ಕಮ್ಬ್ಯಾಕ್ ಸೂಚನೆ ನೀಡಿದ್ದರು. ಇದೀಗ ಮತ್ತೊಮ್ಮೆ ಫಿನಿಶರ್ ಪಾತ್ರವನ್ನು ನಿರ್ವಹಿಸಿ, ಗೆಲ್ಲೇಬೇಕಾಗಿದ್ದ ಪಂದ್ಯದಲ್ಲಿ ತಂಡವನ್ನು ಜಯದ ದಡ ಸೇರಿಸಿದ್ದಾರೆ. ಗುರುವಾರ ನವಿ ಮುಂಬೈನ ಡಿವೈ ಪಾಟೀಲ್ ಕ್ರೀಡಾಂಗಣದಲ್ಲಿ ನಡೆದ ಐಪಿಎಲ್ 2022ರ (IPL 2022) ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ (CSK) ಹಾಗೂ ಮುಂಬೈ ಇಂಡಿಯನ್ಸ್ (MI) ತಂಡಗಳು ಮುಖಾಮುಖಿಯಾಗಿದ್ದವು. ಟಾಸ್ ಸೋತು ಮೊದಲುಬ್ಯಾಟ್ ಮಾಡಿದ ಮುಂಬೈ ಮುಕೇಶ್ ಚೌಧರಿ ದಾಳಿಗೆ ತತ್ತರಿಸಿತು. ಒಟ್ಟಾರೆ ತಂಡವು 7 ವಿಕೆಟ್ ನಷ್ಟಕ್ಕೆ 155 ರನ್ಗಳ ಸಾಧಾರಣ ಮೊತ್ತ ಪೇರಿಸಿತು.
ಬ್ಯಾಟಿಂಗ್ ಆರಂಭಿಸಿದ ಚೆನ್ನೈ ತಂಡದ ಆರಂಭವೂ ಉತ್ತಮವಾಗಿರಲಿಲ್ಲ. ರುತುರಾಜ್ ಗಾಯಕ್ವಾಡ್ ಸೊನ್ನೆ ಸುತ್ತಿದರೆ, ಉಳಿದ ಬ್ಯಾಟರ್ಗಳು ದೊಡ್ಡ ಜತೆಯಾಟ ನೀಡಲಿಲ್ಲ. ರಾಬಿನ್ ಉತ್ತಪ್ಪ 25 ಎಸೆತಗಳಲ್ಲಿ 30 ರನ್ ಗಳಿಸಿದರೆ, ಉತ್ತಮ ಆಟವಾಡಿದ ಅಂಬಾಟಿ ರಾಯುಡು 35 ಎಸೆತಗಳಲ್ಲಿ 40 ರನ್ ಗಳಿಸಿದರು. ಜಡೇಜಾ ಈ ಪಂದ್ಯದಲ್ಲೂ ಸದ್ದು ಮಾಡಲಿಲ್ಲ. ಕೊನೆಯ 18 ಎಸೆತಗಳಲ್ಲಿ ಚೆನ್ನೈಗೆ ಗೆಲ್ಲಲು 42 ರನ್ಗಳ ಅವಶ್ಯಕತೆ ಇತ್ತು. ಆದರೆ ತಂಡದಲ್ಲಿದ್ದ ಬ್ಯಾಟರ್ಗಳ ಫಾರ್ಮ್ ನೋಡಿ, ಚೆನ್ನೈನಿಂದ ಪಂದ್ಯ ಕೈತಪ್ಪಿತು ಎಂದೇ ಎಲ್ಲರೂ ಭಾವಿಸಿದ್ದರು. ಆದರೆ ಎಲ್ಲರ ಯೋಚನೆಯನ್ನು ಮತ್ತೆ ತಲೆಕೆಳಗಾಗಿಸಿದ್ದು ಎಂಎಸ್ ಧೋನಿ!
ಧೋನಿ- ಪ್ರಿಟೋರಿಸ್ ಬ್ಯಾಟಿಂಗ್; ಪಂದ್ಯ ಗೆಲ್ಲಿಸಿದ ಎಂಎಸ್:
ನಿರ್ಣಾಯಕವಾಗಿದ್ದ 18ನೇ ಓವರ್ನಲ್ಲಿ ಪ್ರಿಟೋರಿಸ್ ಒಂದು ಸಿಕ್ಸ್ ಬಾರಿಸಿದರೆ, ಧೋನಿ ಒಂದು ಬೌಂಡರಿ ಹೊಡೆದರು. ಒಟ್ಟಾರೆ ಆ ಓವರ್ನಲ್ಲಿ 14 ರನ್ಗಳನ್ನು ತಂಡ ಗಳಿಸಿತು. ಪಂದ್ಯ ಗೆಲ್ಲಲು ಇನ್ನೂ 29 ರನ್ಗಳ ಅವಶ್ಯಕತೆ ಇತ್ತು. 19ನೇ ಓವರ್ನಲ್ಲಿ ಎರಡು ಫೋರ್ ಬಾರಿಸಿದ ಪ್ರಿಟೋರಿಸ್ 11 ರನ್ ಗಳಿಸಿದರು. ಕೊನೆಯ ಓವರ್ನಲ್ಲಿ 6 ಎಸೆತಗಳಲ್ಲಿ 17 ರನ್ಗಳು ಬೇಕಿತ್ತು. ಆದರೆ ವಿಶ್ವದ ಬೆಸ್ಟ್ ಫಿನಿಶರ್ ನಾನ್ ಸ್ಟ್ರೈಕರ್ ಎಂಡ್ನಲ್ಲಿದ್ದರು.
ನಾಟಕೀಯವಾಗಿದ್ದ 20ನೇ ಓವರ್:
ಅಂತಿಮ ಓವರ್ನಲ್ಲಿ ಚೆನ್ನೈಗೆ ಗೆಲ್ಲಲು ಬರೋಬ್ಬರಿ 17 ರನ್ಗಳು ಬೇಕಿತ್ತು. ಕ್ರೀಸ್ನಲ್ಲಿದ್ದುದು ಪ್ರಿಟೋರಿಸ್. ಮೊದಲ ಎಸೆತದಲ್ಲೇ ಜಯದೇವ್ ಉನಾದ್ಕತ್ ಎಸೆತದಲ್ಲಿ ಪ್ರಿಟೋರಿಸ್ ಎಲ್ಬಿಡಬ್ಲ್ಯೂ ಆದರು. ಮುಂಬೈ ಇದಕ್ಕೆ ರಿವ್ಯೂ ಸಹಾಯ ಪಡೆಯಿತು. ನಂತರ ಕ್ರೀಸ್ಗೆ ಬಂದ ಬ್ರಾವೋ ಸಿಂಗಲ್ ತೆಗೆದರು. ಆಗ ಧೋನಿ ಸ್ಟ್ರೈಕ್ಗೆ ಬಂದರು. 4 ಎಸೆತಗಳಲ್ಲಿ 16 ರನ್ಗಳ ಅವಶ್ಯಕತೆ ಇತ್ತು. ಎಲ್ಲರೂ ಮತ್ತೊಮ್ಮೆ ಹಳೆಯ ಧೋನಿಯ ನಿರೀಕ್ಷೆಯಲ್ಲಿದ್ದರು. ಎಂಎಸ್ ಆ ನಿರೀಕ್ಷೆಯನ್ನು ಹುಸಿಗೊಳಿಸಲಿಲ್ಲ.
19ನೇ ಓವರ್ನ 3ನೇ ಎಸೆತವನ್ನು ಸಿಕ್ಸರ್ಗೆ ಅಟ್ಟಿದ ಧೋನಿ, ಮುಂದಿನ ಎಸೆತವನ್ನು ಬೌಂಡರಿಗೆ ಕಳಿಸಿದರು. 5ನೇ ಎಸೆತದಲ್ಲಿ 2 ರನ್ಗಳಿಸಲಷ್ಟೇ ಸಾಧ್ಯವಾಯಿತು. ಕೊನೆಯ ಎಸೆತದಲ್ಲಿ ಗೆಲ್ಲಲು ಬೌಂಡರಿ ಗಳಿಸಲೇಬೇಕಿತ್ತು. ಲೋ ಫುಲ್ಟಾಸ್ ಬಾಲ್ ಹಾಕಿದ ಉನದ್ಕತ್ ಎಸೆತವನ್ನು ಧೋನಿ ಬೌಂಡರಿ ಸಿಡಿಸಿ ತಂಡವನ್ನು ಜಯದ ದಡ ಸೇರಿಸಿದರು.
ಕೊನೆಯ ಓವರ್ನಲ್ಲಿ ಧೋನಿ ಭರ್ಜರಿ ಬ್ಯಾಟಿಂಗ್ ಹೇಗಿತ್ತು? ಇಲ್ಲಿದೆ ನೋಡಿ
Once a finisher always a finisher
Not finished #mahi #MSDhoni? #MSDhoni #MIvsCSK #IPL2022 pic.twitter.com/zgnhYvU4J3— Ruhi ❤️ (@Ruhi018) April 21, 2022
ICYMI – Final over finesse: An MS Dhoni masterclass seals it for #CSK.
?️?️https://t.co/FqFcIT5eQH #TATAIPL #MIvCSK
— IndianPremierLeague (@IPL) April 21, 2022
ಈ ಪಂದ್ಯದ ಮೂಲಕ ಮುಂಬೈ ಇದುವರೆಗೆ ಆಡಿದ ಎಲ್ಲಾ 7 ಪಂದ್ಯಗಳನ್ನೂ ಸೋತಿದೆ. ಪಂದ್ಯಾವಳಿಯ ಮೊದಲ ಏಳು ಪಂದ್ಯಗಳನ್ನು ಸೋತು ಟೂರ್ನಿಯಿಂದ ಹೊರಬಿದ್ದ ಮೊದಲ ತಂಡವಾಗಿದೆ ಮುಂಬೈ ಇಂಡಿಯನ್ಸ್. ಈ ನಡುವೆ 7 ಪಂದ್ಯಗಳಿಂದ 2 ಜಯ ಗಳಿಸಿರುವ ಚೆನ್ನೈ, ಮುಂದಿನ ಪಂದ್ಯಗಳತ್ತ ಗಮನಹರಿಸಿದೆ.
ಇದನ್ನೂ ಓದಿ: IPL 2022: ಸೊನ್ನೆ ಸುತ್ತುವ ಮೂಲಕ ಕೆಟ್ಟ ದಾಖಲೆ ಬರೆದ ರೋಹಿತ್ ಶರ್ಮಾ
MI vs CSK Highlights, IPL 2022: ಕೊನೆಯ ಎಸೆತದಲ್ಲಿ ಪಂದ್ಯ ಗೆಲ್ಲಿಸಿದ ಧೋನಿ; ಮುಂಬೈಗೆ ಸತತ 7ನೇ ಸೋಲು
Published On - 7:52 am, Fri, 22 April 22