ಹೊಸ ಇತಿಹಾಸ… ಒಂದೇ ತಂಡದಲ್ಲಿ ಮೂವರು ಸಹೋದರರು..!

ನಮೀಬಿಯಾ-ಝಿಂಬಾಬ್ವೆ ಜಂಟಿಯಾಗಿ ಆಯೋಜಿಸಲಿರುವ ಅಂಡರ್-19 ಏಕದಿನ ವಿಶ್ವಕಪ್​ಗಾಗಿ ಒಂದೊಂದೇ ತಂಡಗಳನ್ನು ಘೋಷಿಸಲಾಗುತ್ತಿದೆ. ಈಗಾಗಲೇ ಆಸ್ಟ್ರೇಲಿಯಾ ಬಲಿಷ್ಠ ಪಡೆಯನ್ನು ಹೆಸರಿಸಿದ್ದು, ಈ ತಂಡದಲ್ಲಿ ಭಾರತೀಯ ಮೂಲದ ಇಬ್ಬರು ಕಾಣಿಸಿಕೊಂಡು ಸುದ್ದಿಯಾಗಿದ್ದರು. ಇದೀಗ ಜಪಾನ್ ಪ್ರಕಟಿಸಿರುವ ತಂಡದಲ್ಲಿ ಮೂವರು ಸಹೋದರರು ಕಾಣಿಸಿಕೊಂಡಿದ್ದಾರೆ.

ಅಂಡರ್-19 ಕ್ರಿಕೆಟ್ ಇತಿಹಾಸದಲ್ಲಿ ಒಂದೇ ತಂಡದಲ್ಲಿ ಮೂವರು ಸ್ಥಾನ ಪಡೆದಿರುವುದು ಇದೇ ಮೊದಲು. ಈ ಮೂವರು ಜೊತೆಯಾಗಿ ಕಣಕ್ಕಿಳಿದರೆ ಮತ್ತೊಂದು ಇತಿಹಾಸ ನಿರ್ಮಾಣವಾಗಲಿದೆ. ಏಕೆಂದರೆ ಅಂಡರ್-19 ವಿಶ್ವಕಪ್​ನಲ್ಲಿ ಮೂವರು ಜೊತೆಯಾಗಿ ಕಣಕ್ಕಿಳಿದ ಚರಿತ್ರೆ ಇಲ್ಲ.

51 ವರ್ಷಗಳ ನಂತರ ಸಹೋದರರ ಸವಾಲ್:

ಕ್ರಿಕೆಟ್ ಇತಿಹಾಸದಲ್ಲಿ ಮೂವರು ಸಹೋದರರು ವಿಶ್ವಕಪ್ ತಂಡಕ್ಕೆ ಆಯ್ಕೆಯಾಗಿರುವುದು ಇದು ಎರಡನೇ ಬಾರಿ. ಇದಕ್ಕೂ ಮುನ್ನ ನ್ಯೂಝಿಲೆಂಡ್​ನ ಮೂವರು ಸಹೋದರರನ್ನು ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆದಿದ್ದರು.

1975 ರ ನ್ಯೂಝಿಲೆಂಡ್​ ಏಕದಿನ ವಿಶ್ವಕಪ್‌ ತಂಡದಲ್ಲಿ, ರಿಚರ್ಡ್ ಹ್ಯಾಡ್ಲೀ, ಬ್ಯಾರಿ ಹ್ಯಾಡ್ಲೀ ಮತ್ತು ಡೇಲ್ ಹ್ಯಾಡ್ಲೀ ಕಾಣಿಸಿಕೊಂಡಿದ್ದರು. ಇದೀಗ ಬರೋಬ್ಬರಿ 51 ವರ್ಷಗಳ ಬಳಿಕ ಮೂವರು ಸಹೋದರರು ಒಂದೇ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ.

ಅದರಂತೆ 2026 ರಲ್ಲಿ ನಡೆಯಲಿರುವ ಏಕದಿನ ವಿಶ್ವಕಪ್​​ನಲ್ಲಿ ಜಪಾನ್ ಪರ ಮಾಂಟ್ಗೊಮೆರಿ ಹರಾ ಹಿಂಝ್, ಗೇಬ್ರಿಯಲ್ ಹರಾ ಹಿಂಝ್ ಮತ್ತು ಚಾರ್ಲ್ಸ್ ಹರಾ ಹಿಂಝ್ ಜೊತೆಯಾಗಿ ಕಾಣಿಸಿಕೊಳ್ಳಲಿದ್ದಾರೆ. ಈ ಮೂಲಕ ಹೈಂಜ್ ಸಹೋದರರು ಹೊಸ ಇತಿಹಾಸ ಬರೆಯಲು ತುದಿಗಾಲಲ್ಲಿ ನಿಂತಿದ್ದಾರೆ.

ಜಪಾನ್ ಅಂಡರ್-19 ಏಕದಿನ ವಿಶ್ವಕಪ್ ತಂಡ: ಕಝುಮಾ ಕಟೊ-ಸ್ಟಾಫರ್ಡ್ (ನಾಯಕ), ಚಾರ್ಲ್ಸ್ ಹರಾ-ಹಿಂಝ್, ಗೇಬ್ರಿಯಲ್ ಹರಾ-ಹಿಂಝ್, ಮಾಂಟ್ಗೊಮೆರಿ ಹರಾ-ಹಿಂಝ್, ಕೈಸಿ ಕೊಬಯಾಶಿ-ಡಾಗೆಟ್, ತಿಮೋತಿ ಮೂರ್, ಸ್ಕೈಲರ್ ನಕಾಯಾಮಾ-ಕುಕ್, ರ್ಯುಕಿ ಓಜೆಕಿ, ನಿಹಾರ್ ಪರ್ಮಾರ್, ನಿಖಿಲ್ ಪೋಲ್, ಚಿಹಾಯ ಸಿಕಿನಿ, ಹುಗೊ ತನಿ ಕೆಲ್ಲಿ, ಸಂದೇವ್ ಆರ್ಯನ್,  ಕೈ ವಾಲ್, ಟೇಲರ್ ವಾ.

ಇದನ್ನೂ ಓದಿ: IPL 2026: ಮೊದಲು ಹರಾಜಾಗಲಿರುವ 6 ಆಟಗಾರರು ಇವರೇ..!

 A  ಗ್ರೂಪ್​ನಲ್ಲಿ ಜಪಾನ್:

2026 ರ ಅಂಡರ್-19 ವಿಶ್ವಕಪ್‌ಗಾಗಿ ಜಪಾನ್ ತಂಡವು ಗ್ರೂಪ್ ಎ ನಲ್ಲಿ ಸ್ಥಾನ ಪಡೆದಿದೆ. ಈ ಗುಂಪಿನಲ್ಲಿರುವ ಇತರ ಮೂರು ತಂಡಗಳೆಂದರೆ ಆಸ್ಟ್ರೇಲಿಯಾ, ಶ್ರೀಲಂಕಾ ಮತ್ತು ಐರ್ಲೆಂಡ್.  ತಂಡವು ಜನವರಿ 5 ರಂದು ಆಫ್ರಿಕಾಕ್ಕೆ ತೆರಳಲಿದ್ದು, ಅಲ್ಲಿ ಜನವರಿ 10 ರಂದು ತಾಂಜಾನಿಯಾ ವಿರುದ್ಧ ಅಭ್ಯಾಸ ಪಂದ್ಯವನ್ನು ಆಡಲಿದೆ. ಜನವರಿ 12 ರಂದು ತಮ್ಮ ಎರಡನೇ ಅಭ್ಯಾಸ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ತಂಡವನ್ನು ಎದುರಿಸಲಿದೆ.