ಕೀಪಿಂಗ್ ಕಮಾಲ್: ವಿಶ್ವಕಪ್​ನಲ್ಲಿ ಕೆಎಲ್ ರಾಹುಲ್ ವಿಶೇಷ ದಾಖಲೆ

ಏಕದಿನ ವಿಶ್ವಕಪ್​ನ ಫೈನಲ್​ ಪಂದ್ಯಕ್ಕಾಗಿ ವೇದಿಕೆ ಸಿದ್ಧವಾಗಿದೆ. ಭಾನುವಾರ ಅಹಮದಾಬಾದ್​ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆಯಲಿರುವ ಫೈನಲ್ ಫೈಟ್​ನಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ (India vs Australia) ತಂಡಗಳು ಮುಖಾಮುಖಿಯಾಗಲಿದೆ. ವಿಶೇಷ ಎಂದರೆ ಈ ಪಂದ್ಯದಲ್ಲಿ ವಿಶೇಷ ದಾಖಲೆ ಬರೆಯುವ ಅತ್ಯುತ್ತಮ ಅವಕಾಶ ಕೆಎಲ್ ರಾಹುಲ್ (KL Rahul)​ ಮುಂದಿದೆ. ಆದರೆ ಈ ಬಾರಿ ಬ್ಯಾಟಿಂಗ್​ನಿಂದ ಅಲ್ಲ, ಬದಲಾಗಿ ವಿಕೆಟ್ ಕೀಪಿಂಗ್ ಮೂಲಕ ಎಂಬುದು ವಿಶೇಷ.

ಅಂದರೆ ಈ ಬಾರಿಯ ವಿಶ್ವಕಪ್​ನ 10 ಪಂದ್ಯಗಳಿಂದ ಕೆಎಲ್ ರಾಹುಲ್ 15 ಕ್ಯಾಚ್​ಗಳನ್ನು ಹಿಡಿದಿದ್ದಾರೆ. ಹಾಗೆಯೇ ಒಂದು ಸ್ಟಂಪಿಂಗ್ ಮಾಡಿದ್ದಾರೆ. ಈ ಮೂಲಕ 2015 ರ ಏಕದಿನ ವಿಶ್ವಕಪ್​ನಲ್ಲಿ 15 ಕ್ಯಾಚ್​ಗಳನ್ನು ಹಿಡಿದು ದಾಖಲೆ ಬರೆದಿದ್ದ ಧೋನಿಯ ರೆಕಾರ್ಡ್​ ಅನ್ನು ಕೆಎಲ್ ರಾಹುಲ್ ಮುರಿದಿದ್ದಾರೆ.

ಅಷ್ಟೇ ಅಲ್ಲದೆ ಏಕದಿನ ವಿಶ್ವಕಪ್​ನಲ್ಲಿ ವಿಕೆಟ್ ಹಿಂದೆ ಒಟ್ಟು 16 ಬಲಿ ಪಡೆದಿದ್ದ ರಾಹುಲ್ ದ್ರಾವಿಡ್ ಅವರ ದಾಖಲೆಯನ್ನೂ ಕೂಡ ಸರಿಗಟ್ಟಿದ್ದಾರೆ. 2003 ರ ವಿಶ್ವಕಪ್​ನಲ್ಲಿ ದ್ರಾವಿಡ್ 15 ಕ್ಯಾಚ್​+1 ಸ್ಟಂಪಿಂಗ್ ಮೂಲಕ ಮಿಂಚಿದ್ದರು. ಈ ಮೂಲಕ ವಿಶ್ವಕಪ್​ ಆವೃತ್ತಿಯಲ್ಲಿ ಅತೀ ಹೆಚ್ಚು ಯಶಸ್ಸು ಪಡೆದ ಭಾರತೀಯ ವಿಕೆಟ್ ಕೀಪರ್ ಎಂಬ ದಾಖಲೆ ನಿರ್ಮಿಸಿದ್ದರು.

ಇದೀಗ ಟೀಮ್ ಇಂಡಿಯಾ ಕೋಚ್ ರಾಹುಲ್ ದ್ರಾವಿಡ್ ಅವರ ದಾಖಲೆಯನ್ನು ಕೆಎಲ್ ರಾಹುಲ್ ಸರಿಗಟ್ಟಿದ್ದಾರೆ. ಒಂದು ವೇಳೆ ಫೈನಲ್​ ಪಂದ್ಯದಲ್ಲಿ 1 ಕ್ಯಾಚ್ ಅಥವಾ 1 ಸ್ಟಂಪಿಂಗ್ ಮಾಡಿದರೆ, ಏಕದಿನ ವಿಶ್ವಕಪ್​ ಆವೃತ್ತಿಯೊಂದರ ಅತ್ಯಂತ ಯಶಸ್ವಿ ವಿಕೆಟ್ ಕೀಪರ್​ ದಾಖಲೆ ಕೆಎಲ್ ರಾಹುಲ್ ಪಾಲಾಗಲಿದೆ.

ಇನ್ನು ಈ ಬಾರಿಯ ವಿಶ್ವಕಪ್​ನಲ್ಲಿ ಟೀಮ್ ಇಂಡಿಯಾ ಪರ 5ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸುತ್ತಿರುವ ಕೆಎಲ್ ರಾಹುಲ್ 9 ಇನಿಂಗ್ಸ್​ಗಳಿಂದ 386 ರನ್ ಕಲೆಹಾಕಿದ್ದಾರೆ. ಈ ಮೂಲಕ ಬ್ಯಾಟಿಂಗ್ ಹಾಗೂ ವಿಕೆಟ್ ಕೀಪಿಂಗ್ ಜೊತೆಗೆ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸುತ್ತಿದ್ದಾರೆ.

ಈ ಬಾರಿಯ ವಿಶ್ವಕಪ್​ನ ಅತ್ಯಂತ ಯಶಸ್ವಿ ವಿಕೆಟ್ ಕೀಪರ್​ಗಳು:

• 20 – ಕ್ವಿಂಟನ್ ಡಿ ಕಾಕ್ (19 ಕ್ಯಾಚ್‌ಗಳು, 1 ಸ್ಟಂಪಿಂಗ್)
• 16 – ಕೆಎಲ್ ರಾಹುಲ್ (15 ಕ್ಯಾಚ್, 1 ಸ್ಟಂಪಿಂಗ್)
• 15 – ಸ್ಕಾಟ್ ಎಡ್ವರ್ಡ್ಸ್ (13 ಕ್ಯಾಚ್, 2 ಸ್ಟಂಪಿಂಗ್)
• 11 – ಜೋಸ್ ಬಟ್ಲರ್ (9 ಕ್ಯಾಚ್, 1 ಸ್ಟಂಪಿಂಗ್)
• 11 – ಜೋಶ್ ಇಂಗ್ಲಿಸ್ (9 ಕ್ಯಾಚ್, 2 ಸ್ಟಂಪಿಂಗ್).

ಇದನ್ನೂ ಓದಿ: Virat Kohli: ಸಚಿನ್ ಅವರ 3 ವಿಶ್ವ ದಾಖಲೆ ಮುರಿದ ಕಿಂಗ್ ಕೊಹ್ಲಿ

ವಿಶ್ವಕಪ್​ ಆವೃತ್ತಿಯೊಂದರಲ್ಲಿ ಭಾರತೀಯ ವಿಕೆಟ್​ ಕೀಪರ್​ಗಳ ಸಾಧನೆ:

• 16 – ರಾಹುಲ್ ದ್ರಾವಿಡ್ ( 2003 ರಲ್ಲಿ 15 ಕ್ಯಾಚ್‌ಗಳು, 1 ಸ್ಟಂಪಿಂಗ್)
• 16 – ಕೆಎಲ್ ರಾಹುಲ್ ( 2023 ರಲ್ಲಿ 15 ಕ್ಯಾಚ್‌ಗಳು, 1 ಸ್ಟಂಪಿಂಗ್)
• 15 – ಎಂಎಸ್ ಧೋನಿ ( 2015 ರಲ್ಲಿ 15 ಕ್ಯಾಚ್‌ಗಳು)