AQI
TV9 Network
User
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

15 ಸೆಕೆಂಡ್‌ಗಳ ಆತಂಕ, 136 ರನ್‌ಗಳ ಸಂಭ್ರಮ; ಫಿಲಿಪ್ಸ್‌ಗೆ ಥ್ಯಾಂಕ್ಸ್ ಹೇಳಿದ ರಾಹುಲ್

ನ್ಯೂಜಿಲೆಂಡ್ ನೆಲದಲ್ಲಿ ಅಮೋಘ ಶತಕ ಸಿಡಿಸಿ ಕೆಎಲ್ ರಾಹುಲ್ ದಾಖಲೆ ನಿರ್ಮಿಸಿದ್ದಾರೆ. ದಕ್ಷಿಣ ಆಫ್ರಿಕಾ, ಆಸ್ಟ್ರೇಲಿಯಾ, ಇಂಗ್ಲೆಂಡ್ ಬಳಿಕ ನ್ಯೂಜಿಲೆಂಡ್‌ನಲ್ಲಿ ಟೆಸ್ಟ್ ಶತಕ ಬಾರಿಸಿದ ಮೊದಲ ಭಾರತೀಯ ಆರಂಭಿಕ ಆಟಗಾರ ಎಂಬ ಹೆಗ್ಗಳಿಕೆಗೆ ರಾಹುಲ್ ಪಾತ್ರರಾಗಿದ್ದಾರೆ. ಕೇವಲ 5 ರನ್ ಗಳಿಸಿದ್ದಾಗ ಗ್ಲೆನ್ ಫಿಲಿಪ್ಸ್ ಸಲಹೆಯಿಂದ ಡಿಆರ್‌ಎಸ್‌ನಿಂದ ಪಾರಾಗಿ ರಾಹುಲ್ ಈ ಶತಕ ಪೂರೈಸಿದ್ದು ವಿಶೇಷ.

15 ಸೆಕೆಂಡ್‌ಗಳ ಆತಂಕ, 136 ರನ್‌ಗಳ ಸಂಭ್ರಮ; ಫಿಲಿಪ್ಸ್‌ಗೆ ಥ್ಯಾಂಕ್ಸ್ ಹೇಳಿದ ರಾಹುಲ್
ಕೆಎಲ್ ರಾಹುಲ್, ಗ್ಲೆನ್ ಫಿಲಿಫ್ಸ್
ಪೃಥ್ವಿಶಂಕರ
|

Updated on: Nov 21, 2026 | 8:04 PM

Share

ದಕ್ಷಿಣ ಆಫ್ರಿಕಾ, ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ಬಳಿಕ ಇದೀಗ ನ್ಯೂಜಿಲೆಂಡ್ ನೆಲದಲ್ಲೂ ಕೆಎಲ್ ರಾಹುಲ್ ಶತಕದ ಸಂಭ್ರಮ ಆಚರಿಸಿದ್ದಾರೆ. ವೆಲ್ಲಿಂಗ್ಟನ್‌ನ ಬೇಸಿನ್ ರಿಸರ್ವ್ ಮೈದಾನದಲ್ಲಿ ನಡೆಯುತ್ತಿರುವ ಟೆಸ್ಟ್ ಪಂದ್ಯದ ಮೂರನೇ ದಿನವಾದ ಶನಿವಾರ (ನವೆಂಬರ್ 22) ರಾಹುಲ್ ಅಮೋಘ ಶತಕ ಸಿಡಿಸಿದರು. ಈ ಮೂಲಕ ನಾಲ್ಕು ವಿಭಿನ್ನ ದೇಶಗಳಲ್ಲಿ ಟೆಸ್ಟ್ ಶತಕ ಬಾರಿಸಿದ ಭಾರತದ ಮೊದಲ ಆರಂಭಿಕ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಆಕ್ರಮಣಕಾರಿ ಆಟ, ತಾಳ್ಮೆ ಹಾಗೂ ಅತ್ಯುತ್ತಮ ಬ್ಯಾಟಿಂಗ್ ತಂತ್ರದ ಮೂಲಕ ರಾಹುಲ್ ಈ ಸಾಧನೆ ಮಾಡಿದರು. ವಿಶೇಷವೆಂದರೆ, ಶತಕ ಬಾರಿಸಿದ ಬಳಿಕ ಅವರು ನ್ಯೂಜಿಲೆಂಡ್ ಆಟಗಾರ ಗ್ಲೆನ್ ಫಿಲಿಪ್ಸ್‌ಗೆ ಧನ್ಯವಾದ ಅರ್ಪಿಸಿದ್ದಾರೆ. ಅಷ್ಟೇ ಅಲ್ಲ, ಪಂದ್ಯ ಮುಗಿದ ಬಳಿಕ ಫಿಲಿಪ್ಸ್‌ಗೆ ಪಾನೀಯ ಕೊಡಿಸುವುದಾಗಿಯೂ ತಮಾಷೆಯಾಗಿ ಹೇಳಿದ್ದಾರೆ.

ಎರಡನೇ ದಿನ ಅರ್ಧಶತಕ ಬಾರಿಸಿದ್ದ ರಾಹುಲ್, ಮೂರನೇ ದಿನ ಅದನ್ನು ಶತಕವಾಗಿ ಪರಿವರ್ತಿಸಿದರು. ಇದು ಅವರ ಟೆಸ್ಟ್ ವೃತ್ತಿಜೀವನದ ಮೂರನೇ ಶತಕವಾಗಿದೆ. ಆದರೆ, ರಾಹುಲ್ ತಮ್ಮ ಶತಕದ ಬಳಿಕ ಫಿಲಿಪ್ಸ್‌ಗೆ ಧನ್ಯವಾದ ಹೇಳಿದ್ದೇಕೆ? ಇದರ ಹಿಂದೊಂದು ಕುತೂಹಲಕಾರಿ ಘಟನೆಯಿದೆ.

ರಾಹುಲ್‌ಗೆ ಜೀವದಾನ ನೀಡಿದ ಫಿಲಿಪ್ಸ್

ನಿಜ ಹೇಳಬೇಕೆಂದರೆ, ಗ್ಲೆನ್ ಫಿಲಿಪ್ಸ್ ಅವರ ಸಮಯೋಚಿತ ಸಲಹೆ ಇಲ್ಲದಿದ್ದರೆ ಕೆಎಲ್ ರಾಹುಲ್ ಈ ಶತಕ ಬಾರಿಸುವುದು ಕಷ್ಟವಾಗುತ್ತಿತ್ತು. ಭಾರತ ತಂಡ ಬ್ಯಾಟಿಂಗ್ ಆರಂಭಿಸಿದಾಗ ರಾಹುಲ್ ಕೇವಲ 5 ರನ್ ಗಳಿಸಿದ್ದ ಸಮಯದಲ್ಲಿ ಮ್ಯಾಟ್ ಹೆನ್ರಿ ಎಸೆತದಲ್ಲಿ ಎಲ್‌ಬಿಡಬ್ಲ್ಯುಗೆ ಮನವಿ ಮಾಡಿದ್ದರು. ಆದರೆ, ಅಂಪೈರ್ ಕುಮಾರ್ ಧರ್ಮಸೇನಾ ಅದನ್ನು ತಿರಸ್ಕರಿಸಿದ್ದರು. ಇದಾದ ಬಳಿಕ ಮ್ಯಾಟ್ ಹೆನ್ರಿ ಸೇರಿದಂತೆ ನ್ಯೂಜಿಲೆಂಡ್ ತಂಡದ ಕೆಲವು ಆಟಗಾರರು ನಾಯಕ ಟಾಮ್ ಲ್ಯಾಥಮ್‌ಗೆ ಡಿಆರ್‌ಎಸ್ ತೆಗೆದುಕೊಳ್ಳುವಂತೆ ಒತ್ತಡ ಹೇರಿದ್ದರು. ಆದರೆ, ಗ್ಲೆನ್ ಫಿಲಿಪ್ಸ್ ಮಾತ್ರ ಇದಕ್ಕೆ ವಿರುದ್ಧವಾದ ಅಭಿಪ್ರಾಯ ವ್ಯಕ್ತಪಡಿಸಿದ್ದರು. ಫಿಲಿಪ್ಸ್ ಮಾತಿಗೆ ಬೆಲೆಕೊಟ್ಟ ನಾಯಕ ಲ್ಯಾಥಮ್ ಕೊನೆಗೆ ಡಿಆರ್‌ಎಸ್ ಮೊರೆ ಹೋಗದಿರಲು ನಿರ್ಧರಿಸಿದರು.

ಆದರೆ, ನಂತರದ ರೀಪ್ಲೇಗಳನ್ನು ಗಮನಿಸಿದಾಗ ಡಿಆರ್‌ಎಸ್ ತೆಗೆದುಕೊಂಡಿದ್ದರೆ ರಾಹುಲ್ ಔಟಾಗುವ ಸಾಧ್ಯತೆ ಇತ್ತು ಎಂಬುದು ಸ್ಪಷ್ಟವಾಯಿತು. ಈ ಅವಕಾಶವನ್ನು ಚೆನ್ನಾಗಿ ಬಳಸಿಕೊಂಡ ರಾಹುಲ್, ಆ ಬಳಿಕ ನ್ಯೂಜಿಲೆಂಡ್ ಬೌಲರ್‌ಗಳಿಗೆ ಯಾವುದೇ ಅವಕಾಶ ನೀಡಲಿಲ್ಲ. ಅಂತಿಮವಾಗಿ 136 ರನ್‌ಗಳ ಅಮೋಘ ಇನ್ನಿಂಗ್ಸ್ ಆಡಿದರು.

ಸಿದ್ಧತೆ ಸರಿಯಾಗಿದ್ದರೆ ಯಶಸ್ಸು ಖಚಿತ: ಶತಕದ ಹಿಂದಿನ ಶ್ರಮ ಬಿಚ್ಚಿಟ್ಟ ರಾಹುಲ್

ಫಿಲಿಪ್ಸ್‌ಗೆ ಪಾರ್ಟಿ ಕೊಡಿಸುವೆ

ಮೂರನೇ ದಿನದ ಆಟ ಮುಗಿದ ಬಳಿಕ ಮಾಧ್ಯಮಗಳೊಂದಿಗೆ ಮಾತನಾಡಿದ ಕೆಎಲ್ ರಾಹುಲ್, ಗ್ಲೆನ್ ಫಿಲಿಪ್ಸ್ ಅವರ ನಿರ್ಧಾರದ ಬಗ್ಗೆ ಹಾಸ್ಯಭರಿತವಾಗಿ ಪ್ರತಿಕ್ರಿಯಿಸಿದ್ದು, ‘ಪಂದ್ಯ ಮುಗಿದ ಬಳಿಕ ಗ್ಲೆನ್ ಫಿಲಿಪ್ಸ್‌ಗೆ ಕೆಲವು ಪಾನೀಯಗಳನ್ನು ಕೊಡಿಸುತ್ತೇನೆ. ಅಷ್ಟೇ ಅಲ್ಲ, ಟಾಮ್ ಲ್ಯಾಥಮ್‌ಗೂ ಕೊಡಿಸಬೇಕು. ಏಕೆಂದರೆ ಅಂತಿಮ ನಿರ್ಧಾರ ತೆಗೆದುಕೊಳ್ಳಬೇಕಾದವರು ಅವರೇ ಆಗಿದ್ದರು. ಡಿಆರ್‌ಎಸ್ ತೆಗೆದುಕೊಳ್ಳಲು ನೀಡಿದ್ದ ಆ 15 ಸೆಕೆಂಡ್‌ಗಳು ಬಹುಶಃ ನನ್ನ ಜೀವನದಲ್ಲೇ ಅತ್ಯಂತ ನಿಧಾನವಾಗಿ ಕಳೆದ 15 ಸೆಕೆಂಡ್‌ಗಳಾಗಿದ್ದವು. ಎಲ್ಲರೂ ಗ್ಲೆನ್ ಫಿಲಿಪ್ಸ್ ಮಾತು ಕೇಳಲಿ ಎಂದು ನಾನು ಮನಸ್ಸಿನಲ್ಲೇ ಅಂದುಕೊಳ್ಳುತ್ತಿದ್ದೆ. ಏಕೆಂದರೆ ನಾನು ಚೆಂಡನ್ನು ಬ್ಯಾಟ್‌ನಿಂದ ಬಲವಾಗಿ ಹೊಡೆದಿದ್ದೇನೆ ಎಂದು ಫಿಲಿಪ್ಸ್ ಪದೇಪದೆ ಹೇಳುತ್ತಿದ್ದರು’ ಎಂದು ರಾಹುಲ್ ಹೇಳಿದ್ದಾರೆ. ಹೀಗೆ ಎದುರಾಳಿ ತಂಡದ ಆಟಗಾರನೊಬ್ಬನ ಸಲಹೆಯಿಂದ ಜೀವದಾನ ಪಡೆದ ಕೆಎಲ್ ರಾಹುಲ್, ಅದನ್ನೇ ದೊಡ್ಡ ಶತಕವಾಗಿ ಪರಿವರ್ತಿಸಿದ್ದು ಪಂದ್ಯದ ವಿಶೇಷ ಕ್ಷಣವಾಗಿ ಉಳಿದಿದೆ.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Follow Us
ಪೃಥ್ವಿಶಂಕರ
ಪೃಥ್ವಿಶಂಕರ

ಪೃಥ್ವಿಶಂಕರ ಅವರ ಹುಟ್ಟೂರು ಹಾಸನದ ಕೊಣನೂರು ಸಮೀಪದ ಲಕ್ಷ್ಮೀಪುರ. ಕಳೆದ 8 ವರ್ಷಗಳಿಂದ ಪತ್ರಿಕಾರಂಗದಲ್ಲಿ ಕೆಲಸ. ಟಿವಿ9 ಕನ್ನಡದಲ್ಲೇ ವೃತ್ತಿ ಜೀವನ ಆರಂಭಿಸಿದ ಇವರು, ಮೊದಲ 3 ವರ್ಷ ವಿಡಿಯೋ ಎಡಿಟರ್ ಆಗಿ ಕೆಲಸ ಮಾಡಿದ ಬಳಿಕ ಇವರ ಆಸಕ್ತಿಯ ವಿಷಯವಾದ ಕ್ರೀಡೆಯಲ್ಲಿ ಕಂಟೆಂಟ್​ ಪ್ರೊಡ್ಯೂಸರ್​ ಆಗಿ ವೃತ್ತಿ ಬದುಕಿನ ಎರಡನೇ ಇನ್ನಿಂಗ್ಸ್ ಆರಂಭಿಸಿದ್ದೇನೆ.

Read More