IPL 2025: ‘ಅನ್ಫಿಟ್ ಎಂದು ಬಿಡಿ’; ಮಯಾಂಕ್ನನ್ನು ಐಪಿಎಲ್ನಿಂದ ಹೊರಗಿಡಲು ಲಕ್ನೋ ಕುತಂತ್ರ
Lucknow Super Giants' Controversial Request: ಲಕ್ನೋ ಸೂಪರ್ ಜೈಂಟ್ಸ್ ತಂಡದ ಮೂವರು ಪ್ರಮುಖ ವೇಗಿಗಳು ಗಾಯದಿಂದ ಬಳಲುತ್ತಿದ್ದಾರೆ. ಐಪಿಎಲ್ 2025 ಆರಂಭಕ್ಕೆ ಕಡಿಮೆ ಸಮಯ ಉಳಿದಿರುವಾಗ, ಲಕ್ನೋ ತಂಡವು NCAಗೆ ಅವರ ಗಾಯದ ಬಗ್ಗೆ ಸುಳ್ಳು ವರದಿ ನೀಡುವಂತೆ ವಿನಂತಿಸಿದೆ. ಈ ವಿಚಿತ್ರ ಬೇಡಿಕೆಯಿಂದ NCA ಅಧಿಕಾರಿಗಳು ಆಶ್ಚರ್ಯಚಕಿತರಾಗಿದ್ದಾರೆ. ಈ ಕ್ರಮದಿಂದ ಬದಲಿ ಆಟಗಾರನನ್ನು ತಂಡಕ್ಕೆ ಸೇರಿಸಿಕೊಳ್ಳುವುದು ಲಕ್ನೋ ತಂಡದ ಯೋಜನೆಯಾಗಿದೆ.
2025 ರ ಐಪಿಎಲ್ (IPL 2025) ಆರಂಭವಾಗಲು ಈಗ 1 ವಾರಕ್ಕಿಂತ ಕಡಿಮೆ ಸಮಯ ಉಳಿದಿದೆ. ಆದರೆ ಇನ್ನೂ ಲಕ್ನೋ ಸೂಪರ್ ಜೈಂಟ್ಸ್ನ 3 ಪ್ರಮುಖ ವೇಗಿಗಳಾದ ಮೊಹ್ಸಿನ್ ಖಾನ್, ಆವೇಶ್ ಖಾನ್ ಮತ್ತು ಮಯಾಂಕ್ ಯಾದವ್ (Mayank Yadav) ಅವರಿಗೆ ಟೂರ್ನಮೆಂಟ್ನಲ್ಲಿ ಆಡಲು NCA ನಿಂದ ಗ್ರೀನ್ ಸಿಗ್ನಲ್ ಸಿಕ್ಕಿಲ್ಲ. ಇದರಿಂದ ಲಕ್ನೋ ತಂಡಕ್ಕೆ ಆರಂಭದಲ್ಲೇ ವಿಘ್ನ ಎದುರಾಗಿದೆ. ಹೀಗಾಗಿ ಇದೀಗ ಗಾಯದಿಂದ ಚೇತರಿಸಿಕೊಳ್ಳುತ್ತಿರುವ ಬೌಲರ್ಗಳನ್ನು ಇಡೀ ಟೂರ್ನಿಯಿಂದಲೇ ಹೊರಗಿಟ್ಟು, ಮತ್ತೊಬ್ಬ ವೇಗಿಯನ್ನು ತಂಡಕ್ಕೆ ಸೇರಿಸಿಕೊಳ್ಳಲು ಲೆಕ್ಕಾಚಾರ ಹಾಕಿಕೊಂಡರುವ ಲಕ್ನೋ ಫ್ರಾಂಚೈಸಿ, NCA ಅಧಿಕಾರಿಗಳ ಬಳಿ, ತನ್ನ ತಂಡದ ಗಾಯಗೊಂಡ ವೇಗಿಗಳ ಸುಳ್ಳು ವರದಿ ನೀಡಿ ಎಂದು ಕೇಳಿಕೊಳ್ಳುತ್ತಿದೆ ಎಂದು ವರದಿಯಾಗಿದೆ.
NCA ಅಧಿಕಾರಿಗಳೇ ಶಾಕ್
ವರದಿಯ ಪ್ರಕಾರ, ಇಂಜುರಿಯಿಂದ ಚೇತರಿಸಿಕೊಳ್ಳುತ್ತಿರುವ ಲಕ್ನೋ ತಂಡದ ಪ್ರಮುಖ ವೇಗದ ಬೌಲರ್ ಮಾಯಾಂಕ್ ಯಾದವ್ ಅನ್ಫಿಟ್ ಎಂಬ ಸುಳ್ಳು ವರದಿ ನೀಡಿ ಎಂದು NCA ಅಧಿಕಾರಿಗಳ ಬಳಿ ಲಕ್ನೋ ಫ್ರಾಂಚೈಸಿ ಬೇಡಿಕೆ ಇಟ್ಟಿದೆ ಎಂದು ಬಿಸಿಸಿಐ ಮೂಲವೊಂದು ಬಹಿರಂಗಪಡಿಸಿದೆ. ‘ಐಪಿಎಲ್ ತಂಡವೊಂದು ಇಂತಹ ವಿಚಿತ್ರ ಬೇಡಿಕೆಯನ್ನು ಇಡುತ್ತಿರುವುದು ಇದೇ ಮೊದಲು’. ಲಕ್ನೋ ಫ್ರಾಂಚೈಸಿಯ ಈ ವಿನಂತಿಯನ್ನು ಕೇಳಿ ಎನ್ಸಿಎ ಅಧಿಕಾರಿಗಳು ಕೂಡ ಆಶ್ಚರ್ಯಚಕಿತರಾಗಿದ್ದಾರೆ ಎಂದು ವರದಿಯಾಗಿದೆ. ವಾಸ್ತವವಾಗಿ, ಐಪಿಎಲ್ ನಿಯಮಗಳ ಪ್ರಕಾರ, ಯಾವುದೇ ಫ್ರಾಂಚೈಸಿ ಯಾವುದೇ ಆಟಗಾರನನ್ನು ಕೈಬಿಡದ ಹೊರತು ಅವರ ಬದಲಿ ಆಟಗಾರನನ್ನು ತಂಡಕ್ಕೆ ಹೊಸದಾಗಿ ಆಯ್ಕೆ ಮಾಡಲು ಸಾಧ್ಯವಿಲ್ಲ. ಅದಕ್ಕಾಗಿಯೇ ಲಕ್ನೋ NCA ಮುಂದೆ ಇಂತಹ ಬೇಡಿಕೆಯನ್ನು ಇಟ್ಟಿದೆ.
ಮೊದಲಾರ್ಧಕ್ಕೆ ಮಯಾಂಕ್ ಡೌಟ್
ಮಾಯಾಂಕ್ ಯಾದವ್ 2024 ರ ಅಕ್ಟೋಬರ್ನಲ್ಲಿ ಬಾಂಗ್ಲಾದೇಶ ವಿರುದ್ಧ ಟೀಂ ಇಂಡಿಯಾ ಪರ ಅಂತರರಾಷ್ಟ್ರೀಯ ಕ್ರಿಕೆಟ್ಗೆ ಪಾದಾರ್ಪಣೆ ಮಾಡಿದರು. ಈ 3 ಪಂದ್ಯಗಳ ಟಿ20 ಸರಣಿಯಲ್ಲಿ ಅವರು ಅದ್ಭುತವಾಗಿ ಬೌಲಿಂಗ್ ಮಾಡಿದರು. ಆದರೆ, ಕೊನೆಯ ಪಂದ್ಯದಲ್ಲಿ ಗಾಯಗೊಂಡ ಅವರು ಅಂದಿನಿಂದ ಕ್ರಿಕೆಟ್ನಿಂದ ದೂರವಿದ್ದು, ಎನ್ಸಿಎಯಲ್ಲಿ ಪುನರ್ವಸತಿಗೆ ಒಳಗಾಗುತ್ತಿದ್ದಾರೆ. ಆದಾಗ್ಯೂ ಅವರ ಚೇತರಿಕೆಯ ಬಗ್ಗೆ ಬಿಸಿಸಿಐ ಯಾವುದೇ ಅಧಿಕೃತ ಮಾಹಿತಿ ನೀಡಿಲ್ಲ. ಆದರೆ ಕ್ರಿಕ್ಬಜ್ ವರದಿಯ ಪ್ರಕಾರ, ಅವರು ಐಪಿಎಲ್ನ ಮೊದಲಾರ್ಧದಲ್ಲಿ ಆಡಲು ಸಾಧ್ಯವಾಗುವುದಿಲ್ಲ ಎಂದು ಹೇಳಲಾಗುತ್ತಿದೆ.
ಒಂದು ವೇಳೆ ಮಯಾಂಕ್ ಮೊದಲಾರ್ಧದ ಐಪಿಎಲ್ಗೆ ಗೈರಾದರೆ ಇದು ಲಕ್ನೋ ತಂಡಕ್ಕೆ ದೊಡ್ಡ ಹಿನ್ನಡೆಯಾಗಲಿದೆ. ಏಕೆಂದರೆ ಮಯಾಂಕ್, ಲಕ್ನೋ ತಂಡದ ಪ್ರಮುಖ ವೇಗದ ಬೌಲರ್ ಆಗಿದ್ದಾರೆ. ಹೀಗಾಗಿಯೇ ಅವರನ್ನು 11 ಕೋಟಿ ರೂ.ಗಳಿಗೆ ತಂಡದಲ್ಲಿ ಉಳಿಸಿಕೊಳ್ಳಲಾಗಿದೆ. ಲಕ್ನೋ ತಂಡವು ಮಾರ್ಚ್ 24 ರಂದು ವಿಶಾಖಪಟ್ಟಣದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ತನ್ನ ಮೊದಲ ಪಂದ್ಯವನ್ನು ಆಡಲಿದೆ. ಮಾಯಾಂಕ್ ಹೊರತುಪಡಿಸಿ, ಈ ಪಂದ್ಯಕ್ಕೂ ಮುನ್ನ ಮೊಹ್ಸಿನ್ ಮತ್ತು ಆವೇಶ್ ಕೂಡ ಫಿಟ್ ಆಗದಿದ್ದರೆ, ಲಕ್ನೋದಲ್ಲಿ ಆಕಾಶ್ ದೀಪ್ ಮತ್ತು ಶಮರ್ ಜೋಸೆಫ್ ಮಾತ್ರ ವೇಗದ ಬೌಲರ್ಗಳಾಗಿ ಉಳಿಯುತ್ತಾರೆ. ಇಂತಹ ಸಂದರ್ಭದಲ್ಲಿ ಲಕ್ನೋ ತಂಡಕ್ಕೆ ಬೌಲರ್ಗಳ ಅವಶ್ಯಕತೆ ಇದೆ. ಹೀಗಾಗಿ NCA ಅನ್ಫಿಟ್ ಎಂಬ ವರದಿ ನೀಡಿದರೆ, ಮಯಾಂಕ್ರನ್ನು ಇಡೀ ಟೂರ್ನಿಯಿಂದ ಹೊರಗಿಟ್ಟು, ಅವರ ಸ್ಥಾನದಲ್ಲಿ ಮತ್ತೊಬ್ಬ ವೇಗಿಯನ್ನು ತಂಡಕ್ಕೆ ಕರೆತರುವುದು ಲಕ್ನೋ ಫ್ರಾಂಚೈಸಿಯ ಇಂಗಿತವಾಗಿದೆ.
ಇದನ್ನೂ ಓದಿ: IPL 2025: ಉಚಿತ ಬಸ್, ಮೆಟ್ರೋ ಸೌಲಭ್ಯ; ಅಭಿಮಾನಿಗಳಿಗೆ ಬಂಪರ್ ಗಿಫ್ಟ್ ನೀಡಿದ ಸಿಎಸ್ಕೆ
ಲಕ್ನೋ ತಂಡ: ನಿಕೋಲಸ್ ಪೂರನ್, ರವಿ ಬಿಷ್ಣೋಯ್, ಮಾಯಾಂಕ್ ಯಾದವ್, ಮೊಹ್ಸಿನ್ ಖಾನ್, ಆಯುಷ್ ಬದೋನಿ, ರಿಷಭ್ ಪಂತ್, ಡೇವಿಡ್ ಮಿಲ್ಲರ್, ಐಡೆನ್ ಮಾರ್ಕ್ರಾಮ್, ಮಿಚೆಲ್ ಮಾರ್ಷ್, ಆವೇಶ್ ಖಾನ್, ಅಬ್ದುಲ್ ಸಮದ್, ಆರ್ಯನ್ ಜುಯಾಲ್, ಆಕಾಶ್ ದೀಪ್, ಶಹಬಾಜ್ ಅಹ್ಮದ್, ಎಂ. ಸಿದ್ಧಾರ್ಥ್, ಆಕಾಶ್ ಸಿಂಗ್, ದಿಗ್ವೇಶ್ ಸಿಂಗ್, ಹಿಮ್ಮತ್ ಸಿಂಗ್, ಆರ್ಯನ್ ಜುಯಾಲ್, ಶಮರ್ ಜೋಸೆಫ್, ಯುವರಾಜ್ ಚೌಧರಿ, ಪ್ರಿನ್ಸ್ ಯಾದವ್, ಮ್ಯಾಥ್ಯೂ ಬ್ರೀಟ್ಜ್ಕೆ, ರಾಜವರ್ಧನ್ ಹಂಗರ್ಗೇಕರ್, ಅರ್ಶಿನ್ ಕುಲಕರ್ಣಿ.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
Published On - 6:40 pm, Sun, 16 March 25