ಅಝರ್ ಸಿಡಿಲಬ್ಬರ.. 42 ಸಿಕ್ಸರ್, 3 ಭರ್ಜರಿ ಸೆಂಚುರಿ, ಹೊಸ ದಾಖಲೆ!
ಐಪಿಎಲ್ 2021 ರಲ್ಲಿ ಮೊಹಮ್ಮದ್ ಅಝರುದ್ದೀನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದಲ್ಲಿ ಕಾಣಿಸಿಕೊಂಡಿದ್ದರು. ಆ ಸೀಸನ್ನಲ್ಲಿ ಅವರಿಗೆ ಆಡುವ ಬಳಗದಲ್ಲಿ ಅವಕಾಶ ಸಿಕ್ಕಿರಲಿಲ್ಲ. ಇದಾಗ್ಯೂ ವಿರಾಟ್ ಕೊಹ್ಲಿ, ಎಬಿ ಡಿವಿಲಿಯರ್ಸ್ ಮತ್ತು ಗ್ಲೆನ್ ಮ್ಯಾಕ್ಸ್ವೆಲ್ ಅವರಂತಹ ವಿಶ್ವದ ಶ್ರೇಷ್ಠ ಆಟಗಾರರೊಂದಿಗೆ ಡ್ರೆಸ್ಸಿಂಗ್ ರೂಮ್ ಹಂಚಿಕೊಂಡು ಬ್ಯಾಟಿಂಗ್ ಸಲಹೆಗಳನ್ನು ಪಡೆದಿದ್ದರು. ಇದೀಗ ಪ್ರಚಂಡ ಬ್ಯಾಟಿಂಗ್ನೊಂದಿಗೆ ಮತ್ತೊಮ್ಮೆ ಐಪಿಎಲ್ನಲ್ಲಿ ಅವಕಾಶ ಗಿಟ್ಟಿಸಿಕೊಳ್ಳುವ ಇರಾದೆಯಲ್ಲಿದ್ದಾರೆ ಅಝರ್.
ಕೇರಳ ಕ್ರಿಕೆಟ್ ಲೀಗ್ (KCL) 2026 ರ ಸೀಸನ್ನಲ್ಲಿ ಮೊಹಮ್ಮದ್ ಅಝರುದ್ದೀನ್ ಸಿಡಿಲಬ್ಬರ ಮುಂದುವರೆದಿದೆ. ಅಲೆಪ್ಪಿ ರಿಪಲ್ಸ್ ತಂಡದ ನಾಯಕನಾಗಿ ಕಣಕ್ಕಿಳಿಯುತ್ತಿರುವ ಭರ್ಜರಿ ಬ್ಯಾಟಿಂಗ್ನೊಂದಿಗೆ ಒಂದೇ ಸೀಸನ್ನಲ್ಲಿ ಮೂರು ಶತಕಗಳನ್ನು ಸಿಡಿಸಿದ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಅವರ ಈ ಅಮೋಘ ರನ್ ಬೇಟೆಯೊಂದಿಗೆ ಹೊಸ ದಾಖಲೆಯನ್ನು ಕೂಡ ಬರೆದಿದ್ದಾರೆ.
ಅಝರ್ ಸೆಂಚುರಿ:
- ಮೊದಲ ಶತಕ (ಆಗಸ್ಟ್ 25, 2026): ಏರೀಸ್ ಕೊಲ್ಲಂ ಸೈಲರ್ಸ್ ವಿರುದ್ಧ ಕೇವಲ 51 ಎಸೆತಗಳಲ್ಲಿ 100 ರನ್ ಚಚ್ಚಿ ತಮ್ಮ ಶತಕದ ಅಭಿಯಾನ ಆರಂಭಿಸಿದರು.
- ಎರಡನೇ ಶತಕ (ಆಗಸ್ಟ್ 28, 2026): ಕ್ಯಾಲಿಕಟ್ ಗ್ಲೋಬ್ಸ್ಟಾರ್ಸ್ ವಿರುದ್ಧದ ಪಂದ್ಯದಲ್ಲಿ ಕೇವಲ 60 ಎಸೆತಗಳಲ್ಲಿ ಅಜೇಯ 114 ರನ್ ಸಿಡಿಸಿದರು. ಈ ಮೂಲಕ ಕೆಸಿಎಲ್ ಇತಿಹಾಸದಲ್ಲೇ ಎರಡನೇ ಅತಿ ದೊಡ್ಡ ಯಶಸ್ವಿ ರನ್ ಚೇಸಿಂಗ್ ಸಾಧಿಸಲು ತಂಡಕ್ಕೆ ನೆರವಾದರು.
- ಮೂರನೇ ಶತಕ (ಆಗಸ್ಟ್ 29, 2026): ಏರೀಸ್ ಕೊಲ್ಲಂ ಸೈಲರ್ಸ್ ವಿರುದ್ಧ ಮತ್ತೆ ಅಬ್ಬರಿಸಿದ ಮೊಹಮ್ಮದ್ ಅಝರುದ್ದೀನ್ 52 ಎಸೆತಗಳಲ್ಲಿ 107 ರನ್ ಸೂರೆಗರೆದರು. ಈ ಇನಿಂಗ್ಸ್ನಲ್ಲಿ 8 ಭರ್ಜರಿ ಸಿಕ್ಸರ್ಗಳನ್ನು ಬಾರಿಸುವ ಮೂಲಕ ತಂಡದ ಮೊತ್ತವನ್ನು 253 ರನ್ಗಳಿಗೆ ಕೊಂಡೊಯ್ದರು.
ಅಗ್ರಸ್ಥಾನದಲ್ಲಿ ಅಝರ್:
ಮೊಹಮ್ಮದ್ ಅಝರುದ್ದೀನ್ ಅವರು ಕೆಸಿಎಲ್ 2026 ರಲ್ಲಿ ಈವರೆಗೆ ಆಡಿದ 7 ಪಂದ್ಯಗಳಿಂದ 3 ಭರ್ಜರಿ ಶತಕ ಹಾಗೂ 42 ಸಿಕ್ಸರ್ಗಳ ನೆರವಿನೊಂದಿಗೆ ಒಟ್ಟು 526 ರನ್ ಗಳಿಸಿದ್ದಾರೆ. ಈ ಮೂಲಕ ಆರೆಂಜ್ ಕ್ಯಾಪ್ ರೇಸ್ನಲ್ಲಿ ಅಗ್ರಸ್ಥಾನದಲ್ಲಿದ್ದಾರೆ.
ಭರ್ಜರಿ ದಾಖಲೆ:
ಈ ಬಾರಿ ಬಾರಿಸಿದ 526 ರನ್ಗಳೊಂದಿಗೆ ಮೊಹಮ್ಮದ್ ಅಝರುದ್ದೀನ್ ಕೇರಳ ಕ್ರಿಕೆಟ್ ಲೀಗ್ ಇತಿಹಾಸದಲ್ಲೇ 1,000 ರನ್ಗಳ ಗಡಿಯನ್ನು ದಾಟಿದ ಮೊದಲ ಬ್ಯಾಟರ್ ಎಂಬ ಕೀರ್ತಿಗೂ ಭಾಜನರಾಗಿದ್ದಾರೆ.
ಹಾಗೆಯೇ ಕೆಸಿಎಲ್ ಇತಿಹಾಸದಲ್ಲಿ ಒಂದೇ ಸೀಸನ್ನಲ್ಲಿ ಮೂರು ಶತಕಗಳನ್ನು ಸಿಡಿಸಿದ ಏಕೈಕ ಆಟಗಾರ ಎಂಬ ದಾಖಲೆ ಕೂಡ ಮೊಹಮ್ಮದ್ ಅಝರುದ್ದೀನ್ ಪಾಲಾಗಿದೆ.
ಇನ್ನು ಕೇವಲ 7 ಪಂದ್ಯಗಳಿಂದಲೇ ಬರೋಬ್ಬರಿ 42 ಸಿಕ್ಸರ್ಗಳನ್ನು ಚಚ್ಚಿ ಕೆಸಿಎಲ್ ಇತಿಹಾಸದಲ್ಲೇ ಒಂದೇ ಸೀಸನ್ನಲ್ಲಿ ಅತಿ ಹೆಚ್ಚು ಸಿಕ್ಸರ್ ಬಾರಿಸಿದ ಸಾರ್ವಕಾಲಿಕ ದಾಖಲೆಯನ್ನು ಅಝರ್ ಬರೆದಿದ್ದಾರೆ.
ಇದನ್ನೂ ಓದಿ: ಪಾಕಿಸ್ತಾನ್ ತಂಡದ WTC ಫೈನಲ್ ಕನಸು ನುಚ್ಚುನೂರು!
ಒಟ್ಟಾರೆಯಾಗಿ ಹೇಳುವುದಾದರೆ, ಕೆಸಿಎಲ್ 2026 ರಲ್ಲಿ ಮೊಹಮ್ಮದ್ ಅಝರುದ್ದೀನ್ ಅವರ ಬ್ಯಾಟಿಂಗ್ ಆರ್ಭಟ ಕೇವಲ ಅಲೆಪ್ಪಿ ರಿಪಲ್ಸ್ ತಂಡಕ್ಕೆ ಜಯ ತಂದುಕೊಡುತ್ತಿಲ್ಲ, ಬದಲಿಗೆ ಕೇರಳ ಕ್ರಿಕೆಟ್ ಇತಿಹಾಸದಲ್ಲೇ ಎಂದೂ ಅಳಿಸಲಾಗದ ಸುವರ್ಣ ದಾಖಲೆಗಳನ್ನು ಬರೆಯುತ್ತಿದೆ.
ಕೇವಲ 7 ಪಂದ್ಯಗಳಲ್ಲಿ 3 ಭರ್ಜರಿ ಶತಕ ಹಾಗೂ ಒಂದೇ ಸೀಸನ್ನಲ್ಲಿ ಸಾರ್ವಕಾಲಿಕ ದಾಖಲೆಯ 42 ಸಿಕ್ಸರ್ಗಳನ್ನು ಚಚ್ಚಿ 526 ರನ್ ಗಳಿಸಿರುವ ಅವರು, ಪ್ರಸಕ್ತ ಟೂರ್ನಿಯ ವಿಧ್ವಂಸಕ ಬ್ಯಾಟರ್ ಆಗಿ ಹೊರಹೊಮ್ಮಿದ್ದಾರೆ.