ನ್ಯೂಝಿಲೆಂಡ್ ವಿರುದ್ಧ ನೈಜೀರಿಯಾ ತಂಡಕ್ಕೆ ಐತಿಹಾಸಿಕ ಜಯ

ಐಸಿಸಿ ಅಂಡರ್-19 ಮಹಿಳಾ ಟಿ20 ವಿಶ್ವಕಪ್​ ಟೂರ್ನಿಯಲ್ಲಿ ನೈಜೀರಿಯಾ ತಂಡವು ಐತಿಹಾಸಿಕ ಜಯ ಸಾಧಿಸಿದೆ. ಅದು ಕೂಡ ಈಗಾಗಲೇ ಕ್ರಿಕೆಟ್ ಅಂಗಳದಲ್ಲಿ ತನ್ನದೇ ಛಾಪು ಹೊತ್ತಿರುವ ನ್ಯೂಝಿಲೆಂಡ್ ತಂಡವನ್ನು ಮಣಿಸುವ ಮೂಲಕ ಎಂಬುದು ವಿಶೇಷ. ಮಲೇಷ್ಯಾದ ಸರವಾಕ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ನ್ಯೂಝಿಲೆಂಡ್ ಬೌಲಿಂಗ್ ಆಯ್ದುಕೊಂಡಿದ್ದರು.

ಮಳೆಯ ಕಾರಣ ತಲಾ 13 ಓವರ್​​ಗಳಿಗೆ ಸೀಮಿತವಾಗಿದ್ದ ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ನೈಜೀರಿಯಾ ಪರ ನಾಯಕಿ ಲಕ್ಕಿ ಪೈಟಿ 18 ರನ್ ಬಾರಿಸಿದರೆ, ಲಿಲಿಯನ್ ಉದೆ 19 ರನ್ ಕಲೆಹಾಕಿದರು. ಈ ಮೂಲಕ ನೈಜೀರಿಯಾ ತಂಡವು 13 ಓವರ್​ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 65 ರನ್​ ಗಳಿಸಿತು.

13 ಓವರ್​ಗಳಲ್ಲಿ 66 ರನ್​ಗಳ ಸುಲಭ ಗುರಿ ಪಡೆದ ನ್ಯೂಝಿಲೆಂಡ್ ತಂಡವು ಉತ್ತಮ ಆರಂಭ ಪಡೆದಿರಲಿಲ್ಲ. ಎಮ್ಮಾ ಮೆಕ್ಲಿಯೋಡ್ 3 ರನ್​ಗಳಿಸಿ ಔಟಾದರೆ, ಕೇಟ್ ಇರ್ವಿನ್ (0) ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದರು.

ಇನ್ನು ಈವ್ ವೊಲ್ಯಾಂಡ್ 14, ಅನಿಕಾ ಟಾಡ್ 19 ಹಾಗೂ ಕಿವೀಸ್ ತಂಡದ ನಾಯಕಿ ತಾಶ್ ವಾಕೆಲಿನ್ 18 ರನ್ ಬಾರಿಸಿದರು. ಪರಿಣಾಮ ನ್ಯೂಝಿಲೆಂಡ್ ತಂಡವು 12 ಓವರ್​​ಗಳ ಮುಕ್ತಾಯದ ವೇಳೆಗೆ 57 ರನ್ ಕಲೆಹಾಕಿತು.

ಕೊನೆಯ 6 ಎಸೆತಗಳಲ್ಲಿ ನ್ಯೂಝಿಲೆಂಡ್ ತಂಡಕ್ಕೆ ಗೆಲ್ಲಲು 9 ರನ್​ಗಳ ಅವಶ್ಯಕತೆಯಿತ್ತು. ಆದರೆ ಅಂತಿಮ ಓವರ್ ಎಸೆದ ಲಿಲಿಯನ್ ಉದೆ ಕೇವಲ 6 ರನ್ ಮಾತ್ರ ಬಿಟ್ಟುಕೊಟ್ಟರು. ಈ ಮೂಲಕ 2 ರನ್​ಗಳ ರೋಚಕ ಜಯದೊಂದಿಗೆ ನೈಜೀರಿಯಾ ಅಂಡರ್​-19 ತಂಡವು ಐಸಿಸಿ ಟೂರ್ನಿಯಲ್ಲಿ ತನ್ನ ಮೊದಲ ಗೆಲುವು ದಾಖಲಿಸಿದೆ.

ನ್ಯೂಝಿಲೆಂಡ್ ಮಹಿಳಾ ಅಂಡರ್ 19 ಪ್ಲೇಯಿಂಗ್ 11: ಎಮ್ಮಾ ಮೆಕ್ಲಿಯೋಡ್ , ಕೇಟ್ ಇರ್ವಿನ್ , ಈವ್ ವೊಲಂಡ್ , ಅನಿಕಾ ಟಾಡ್ , ತಾಶ್ ವಾಕೆಲಿನ್ (ನಾಯಕಿ) , ಡಾರ್ಸಿ ರೋಸ್ ಪ್ರಸಾದ್ , ಅಯಾನ್ ಲ್ಯಾಂಬಾಟ್ , ಎಲಿಜಬೆತ್ ಬುಕಾನನ್ (ವಿಕೆಟ್ ಕೀಪರ್) , ಹನ್ನಾ ಫ್ರಾನ್ಸಿಸ್ , ಅನಿಕಾ ಟೌವಾರೆ , ಹನ್ನಾ ಒಕಾನ್ನರ್.

ಇದನ್ನೂ ಓದಿ: Champions Trophy 2025: ಟೀಮ್ ಇಂಡಿಯಾದಲ್ಲಿ 6 ಹಳೆ ಹುಲಿಗಳು

ನೈಜೀರಿಯಾ ಮಹಿಳಾ ಅಂಡರ್ 19 ಪ್ಲೇಯಿಂಗ್ 11: ಪೆಕ್ಯುಲಿಯರ್ ಅಗ್ಬೋಯಾ , ಲಕ್ಕಿ ಪಿಯೆಟಿ (ನಾಯಕಿ) , ಅಡೆಶೋಲಾ ಅಡೆಕುನ್ಲೆ , ಕ್ರಿಸ್ಟಾಬೆಲ್ ಚುಕ್ವುಯೋನಿ , ಯುಸೆನ್ ಪೀಸ್ , ಲಿಲಿಯನ್ ಉದೆ , ವಿಕ್ಟರಿ ಇಗ್ಬಿನೆಡಿಯನ್ , ಡೆಬೊರಾ ಬಸ್ಸಿ (ವಿಕೆಟ್ ಕೀಪರ್) , ಅನೋಯಿಂಟೆಡ್ ಅಖಿಗ್ಬೆ , ಮುಹಿಬತ್ ಅಮುಸಾ , ಒಮೊಕುನ್ಸ್.