PAK vs ENG: ತವರಿನಲ್ಲೇ ಬಾಬರ್ ತಂಡಕ್ಕೆ ಮುಖಭಂಗ; ಪಾಕ್ ನೆಲದಲ್ಲಿ ಟೆಸ್ಟ್ ಸರಣಿ ಗೆದ್ದ ಆಂಗ್ಲರು..!

17 ವರ್ಷಗಳ ನಂತರ ಪಾಕಿಸ್ತಾನದ ಮಣ್ಣಿನಲ್ಲಿ ಟೆಸ್ಟ್ ಸರಣಿಯನ್ನು ಆಡಲು ಬಂದಿರುವ ಆಂಗ್ಲರಿಗೆ ಸತತ ಎರಡು ಪಂದ್ಯಗಳಲ್ಲಿ ಗೆಲುವಿನ (England defeated Pakistan) ಶುಭಾರಂಭ ಸಿಕ್ಕಿದೆ. ರಾವಲ್ಪಿಂಡಿಯಲ್ಲಿ ಪಾಕಿಗಳನ್ನು ಬಗ್ಗುಬಡಿದಿದ್ದ ಸ್ಟೋಕ್ಸ್ ಪಡೆ (Ben Stokes), ಮುಲ್ತಾನ್‌ನಲ್ಲಿ ಆಡಿದ ಎರಡನೇ ಟೆಸ್ಟ್ ಪಂದ್ಯವನ್ನು 26 ರನ್​ಗಳಿಂದ ಗೆದ್ದುಬೀಗಿದೆ. ಇದರೊಂದಿಗೆ ಇಂಗ್ಲೆಂಡ್ ತಂಡ ಮೂರು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ ಅಜೇಯ 2-0 ಮುನ್ನಡೆ ಸಾಧಿಸಿದೆ. ಈ ಪಂದ್ಯದಲ್ಲಿ ಪಾಕಿಸ್ತಾನಕ್ಕೆ 355 ರನ್​ಗಳ ಗೆಲುವಿನ ಗುರಿ ನೀಡಿದ್ದ ಇಂಗ್ಲೆಂಡ್, ಬಾಬರ್ (Babar Azam) ಪಡೆಯನ್ನು 328 ರನ್‌ಗಳಲ್ಲಿ ಆಲೌಟ್ ಮಾಡುವಲ್ಲಿ ಯಶಸ್ವಿಯಾಯಿತು.

ಮೊದಲ ಇನ್ನಿಂಗ್ಸ್​​ನಲ್ಲಿ ಅಬ್ರಾರ್ ಅಬ್ಬರ

ಈ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ಇಂಗ್ಲೆಂಡ್ ತಂಡ ಮೊದಲ ಇನ್ನಿಂಗ್ಸ್​ನಲ್ಲಿ ಬೆನ್ ಡೆಕೆಟ್ ಹಾಗೂ ಓಲಿ ಪೋಪ್ ಅವರ ಅರ್ಧಶತಕದ ನೆರವಿನಿಂದ ಕೇವಲ 281 ರನ್​ಗಳಿಸಲಷ್ಟೇ ಶಕ್ತವಾಯಿತು. ಮೊದಲ ಇನ್ನಿಂಗ್ಸ್​ನಲ್ಲಿ ಪಾಕ್ ಪರ ಮಿಂಚಿದ ಅನಾನುಭವಿ ಬೌಲರ್ ಅಬ್ರಾರ್ ಅಹಮದ್ ಇಂಗ್ಲೆಂಡ್ ಪಾಳಾಯದ 7 ವಿಕೆಟ್ ಪಡೆದು ಮಿಂಚಿದ್ದರು. ಮೊದಲ ಟೆಸ್ಟ್​ನಲ್ಲಿ ದಾಖಲೆ ಆಟವಾಡಿದ್ದ ಆಂಗ್ಲರು, ಈ ಪಂದ್ಯದಲ್ಲಿ ಅಬ್ರಾರ್ ದಾಳಿಗೆ ನಲುಗಿ ಹೋದರು. ಈ ಗುರಿ ಬೆನ್ನಟ್ಟಿದ ಪಾಕಿಸ್ತಾನ ಬಾಬರ್ ಅಜಮ್ ಹಾಗೂ ಸೌದ್ ಶಕೀಲ್ ಅವರ ಅರ್ಧಶತಕದ ಹೊರತಾಗಿಯೂ ಕೇವಲ 202 ರನ್​ಗಳಿಗೆ ಆಲೌಟ್ ಆಯಿತು.

79 ರನ್​ಗಳ ಮುನ್ನಡೆಯೊಂದಿಗೆ ಎರಡನೇ ಇನ್ನಿಂಗ್ಸ್ ಆರಂಭಿಸಿದ ಇಂಗ್ಲೆಂಡ್ 275 ರನ್ ಗಳಿಸಿ ಆಲ್​ಔಟ್ ಆಯಿತು. ಇದರೊಂದಿಗೆ ಪಾಕಿಸ್ತಾನಕ್ಕೆ 355 ರನ್​ಗಳ ಟಾರ್ಗೆಟ್ ನೀಡುವಲ್ಲಿ ಆಂಗ್ಲರು ಯಶಸ್ವಿಯಾದರು. ಎರಡನೇ ಇನ್ನಿಂಗ್ಸ್​ನಲ್ಲೂ ಬೆನ್ ಡಕೇಟ್ ಅರ್ಧಶತಕದ ಇನ್ನಿಂಗ್ಸ್ ಆಡಿದರೆ, ಹ್ಯಾರಿ ಬ್ರೂಕ್ ಶತಕ ಸಿಡಿಸಿ ಮಿಂಚಿದರು. ಈ ಇಬ್ಬರ ಆಟದಿಂದಾಗಿ ಇಂಗ್ಲೆಂಡ್ ಈ ಸ್ಫರ್ಧಾತ್ಮಕ ಮೊತ್ತ ಗಳಿಸಲು ಸಾಧ್ಯವಾಯಿತು.

ಎರಡನೇ ಇನ್ನಿಂಗ್ಸ್​ನಲ್ಲಿ ಬಾಬರ್ ವಿಫಲ

ಇಂಗ್ಲೆಂಡ್ ನೀಡಿದ ಈ ಗುರಿ ಬೆನ್ನಟ್ಟಿದ ಪಾಕಿಸ್ತಾನಕ್ಕೆ ಉತ್ತಮ ಆರಂಭವೇ ಸಿಕ್ಕಿತು. ಆರಂಭಿಕರಿಬ್ಬರು ಅರ್ಧಶತಕದ ಜೊತೆಯಾಟವಾಡಿ ತಂಡಕ್ಕೆ ನೆರವಾದರು. ಆದರೆ ಮೊದಲ ಇನ್ನಿಂಗ್ಸ್​ನಲ್ಲಿ ಅರ್ಧಶತಕ ಬಾರಿಸಿದ್ದ ಬಾಬರ್ ಈ ಇನ್ನಿಂಗ್ಸ್​ನಲ್ಲಿ ಕೇವಲ 1 ರನ್​ಗೆ ಸುಸ್ತಾದರು. ಆ ಬಳಿಕ ಬಂದ ಸೌದ್ ಶಕೀಲ್ ತಂಡದ ಪರ ಗರಿಷ್ಠ 94 ರನ್​ಗಳ ಇನ್ನಿಂಗ್ಸ್ ಆಡಿದರು.

‘ಭಾರತದಿಂದ ಸಿಗುವ ಗೌರವ ನಮಗೆ ಪಾಕಿಸ್ತಾನದಿಂದ ಸಿಗುವುದಿಲ್ಲ’: ಸ್ಟೋಕ್ಸ್ ಉದಾತ್ತ ಕಾರ್ಯಕ್ಕೆ ಅಫ್ರಿದಿ ಶ್ಲಾಘನೆ

ಹೀಗೆ 4 ವಿಕೆಟ್ ಕಳೆದುಕೊಂಡು 198 ರನ್​ಗಳೊಂದಿಗೆ ನಾಲ್ಕನೇ ದಿನದಾಟವನ್ನು ಆರಂಭಿಸಿದ ಪಾಕಿಸ್ತಾನ ಈ ಪಂದ್ಯದಲ್ಲಿ ಗೆಲುವು ಸಾಧಿಸುವ ನಿರೀಕ್ಷೆಯಲ್ಲಿತ್ತು. ಇದಕ್ಕೆ ಪೂರಕವೆಂಬಂತೆ, ಮೊಹಮ್ಮದ್ ನವಾಜ್, ಸೌದ್ ಶಕೀಲ್ ಅವರೊಂದಿಗೆ 80 ರನ್ಗಳ ಪಾಲುದಾರಿಕೆಯನ್ನು ಹಂಚಿಕೊಂಡರು. ಆದರೆ ಸೌದ್ ಶಕೀಲ್ 94 ರನ್ ಗಳಿಗೆ ತಮ್ಮ ವಿಕೆಟ್ ಒಪ್ಪಿಸಿದರೆ, 45 ರನ್​ಗಳಿಸಿದ ನವಾಜ್ ಮಾರ್ಕ್​ವುಡ್​ಗೆ ಬಲಿಯಾದರು. ಆದರೆ ಈ ಎರಡು ವಿಕೆಟ್​ಗಳ ಬಳಿಕ ಬಂದ ಬಾಲಂಗೋಚಿಗಳು ಎರಡಂಕಿ ಮೊತ್ತವನ್ನು ಪೇರಿಸಿದರಾದರೂ ತಂಡವನ್ನು ಗೆಲುವಿನ ದಡ ಸೇರಿಸುವಲ್ಲಿ ವಿಫಲರಾದರು. ಅಂತಿಮವಾಗಿ ಪಾಕಿಸ್ತಾನ ತಂಡ 328 ರನ್​ಗಳಿಗೆ ಆಲೌಟ್ ಆಗಿ, 26 ರನ್​ಗಳ ಸೋಲು ಅನುಭವಿಸಿತು.

ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ