Rohit Sharma: ಪಂದ್ಯ ಮುಗಿದ ಬಳಿಕ ಹೆಮ್ಮೆಯಿಂದ ರೋಹಿತ್ ಶರ್ಮಾ ಆಡಿದ ಮಾತುಗಳೇನು ಕೇಳಿ
IND vs ENG 3rd ODI: ಮ್ಯಾಂಚೆಸ್ಟರ್ನಲ್ಲಿ ನಡೆದ ಇಂಗ್ಲೆಂಡ್ ವಿರುದ್ಧದ ಮೂರನೇ ಏಕದಿನ ಪಂದ್ಯದಲ್ಲಿ 5 ವಿಕಟ್ಗಳಿಂದ ಗೆಲ್ಲುವ ಮೂಲಕ ಭಾರತ ಸರಣಿ ತನ್ನದಾಗಿಸಿತು. ಪಂದ್ಯ ಮುಗಿದ ಬಳಿಕ ನಾಯಕ ರೋಹಿತ್ ಶರ್ಮಾ (Rohit Sharma) ಮಾತನಾಡಿದ್ದು ಏನು ಹೇಳಿದರು ಕೇಳಿ
Updated on: Jul 18, 2022 | 9:06 AM
ಸಾಕಷ್ಟು ನಿರೀಕ್ಷೆಗಳೊಂದಿಗೆ ಆಂಗ್ಲರ ನಾಡಿಗೆ ಕಾಲಿಟ್ಟಿದ್ದ ಭಾರತ ಕ್ರಿಕೆಟ್ ತಂಡ (Indian Cricket Team) ನಿರೀಕ್ಷೆ ಹುಸಿಗೊಳಿಸದೆ ಒಂದಲ್ಲ ಎರಡು ಟ್ರೋಫಿಯೊಂದಿಗೆ ತವರಿಗೆ ಹಿಂತಿರುಗುತ್ತಿದೆ. ಇಂಗ್ಲೆಂಡ್ (England) ವಿರುದ್ಧದ ಏಕದಿನ ಸರಣಿಯನ್ನು ಹಾಗೂ ಟಿ20 ಸರಣಿಯನ್ನು 2-1 ಅಂತರದಿಂದ ಗೆದ್ದು ಬೀಗಿದ ಟೀಮ್ ಇಂಡಿಯಾ ವಿಶೇಷ ಸಾಧನೆ ಮಾಡಿ ಮೆರೆದಿದೆ. ಮ್ಯಾಂಚೆಸ್ಟರ್ನಲ್ಲಿ ನಡೆದ ಅಂತಿಮ ನಿರ್ಣಾಯಕ ಏಕದಿನ ಪಂದ್ಯದಲ್ಲಿ 5 ವಿಕಟ್ಗಳಿಂದ ಗೆಲ್ಲುವ ಮೂಲಕ ರೋಹಿತ್ ಪಡೆ ಏಕದಿನ ಸರಣಿ ತನ್ನದಾಗಿಸಿತು. ಮೊದಲು ಬ್ಯಾಟ್ ಮಾಡಿದ್ದ ಇಂಗ್ಲೆಂಡ್ 259 ರನ್ಗೆ ಆಲೌಟ್ ಆಯಿತು. ಗುರಿ ಬೆನ್ನಟ್ಟಿದ ಭಾರತ ರಿಷಭ್ ಪಂತ್ ಅವರ ಆಕರ್ಷಕ ಶತಕ ಹಾಗೂ ಹಾರ್ದಿಕ್ ಪಾಂಡ್ಯ ಅರ್ಧಶತಕದ ನೆರವಿನಿಂದ 42.1 ಓವರ್ನಲ್ಲೇ ಗುರಿ ಮುಟ್ಟಿ ಜಯ ಸಾಧಿಸಿತು. ಪಂದ್ಯ ಮುಗಿದ ಬಳಿಕ ಟೀಮ್ ಇಂಡಿಯಾ ನಾಯಕ ರೋಹಿತ್ ಶರ್ಮಾ (Rohit Sharma) ಮಾತನಾಡಿದ್ದು ಏನು ಹೇಳಿದರು ಕೇಳಿ.
“ಇಲ್ಲಿ ಬಂದು ಒಂದು ಗುಂಪಾಗಿ ತಂಡವನ್ನು ಕಟ್ಟಿ ವೈಟ್ ಬಾಲ್ ಕ್ರಿಕೆಟ್ನಲ್ಲಿ ಸಾಧನೆ ಮಾಡಿದ್ದು ತುಂಬಾ ಸಂತಸವಾಗಿದೆ. ನನಗೆ ಈಗಲೂ ನೆನಪಿದೆ ಕಳೆದ ಬಾರಿ ಕೂಡ ಇಲ್ಲಿ ಪಂದ್ಯವನ್ನು ಆಡಿ ಗೆದ್ದಿದ್ದೆವು. ಈ ಜಾಗಕ್ಕೆ ಬಂದು ಆಡಿ ಗೆಲುವು ಸಾಧಿಸುವುದು ಸುಲಭದ ಕೆಲಸವಂತೂ ಅಲ್ಲ. ಈ ಪಿಚ್ ತುಂಬಾನೆ ಚೆನ್ನಾಗಿತ್ತು. ಆರಂಭದಲ್ಲಿ ವಿಕೆಟ್ ಕಳೆದುಕೊಂಡರೆ ನಂತರ ರನ್ ಕಲೆಹಾಕುವುದು ಸುಲಭವಲ್ಲ ಎಂಬುದು ನಮಗೆ ತಿಳಿದಿತ್ತು. ಆದರೆ, ಪಂತ್-ಹಾರ್ದಿಕ್ ಅಮೋಘ ಪ್ರದರ್ಶನ ನೀಡಿದರು. ಈ ಹಿಂದೆ ಇವರು ಮಿಡಲ್ ಓವರ್ನಲ್ಲಿ ಹೆಚ್ಚು ಸಮಯ ಬ್ಯಾಟಿಂಗ್ ಮಾಡಿರಲಿಲ್ಲ. ಇವತ್ತು ಇವರಿಬ್ಬರು ಆಡಿದ ರೀತಿಯನ್ನು ನಾವೆಲ್ಲ ಕಂಡಿದ್ದೇವೆ.”
“ಪಂತ್ ಹಾಗೂ ಹಾರ್ದಿಕ್ ಯಾವುದೇ ಸಮಯದಲ್ಲಿ ಭಯ ಪಡಲಿಲ್ಲ. ಅವರು ಹೊಡೆದ ಹೊಡೆತಗಳು ಅದ್ಭುತವಾಗಿತ್ತು. ಇನ್ನು ಚಹಲ್ ನಮ್ಮ ತಂಡದ ಪ್ರಮುಖ ಅಸ್ತ್ರ. ಎಲ್ಲ ಮಾದರಿಯ ಕ್ರಿಕೆಟ್ನಲ್ಲಿ ಅವರಿಗೆ ಸಾಕಷ್ಟು ಬಾರಿ ಬೌಲಿಂಗ್ ಮಾಡಿ ಅಭ್ಯಾಸವಿದೆ. ವಿಶ್ವಕಪ್ ಬಳಿಕ ಅವರು ನೀಡಿದ ಪ್ರದರ್ಶನ ನೋಡಿದರೆ ಖುಷಿ ಆಗುತ್ತದೆ. ಹಾರ್ದಿಕ್ ಬ್ಯಾಟಿಂಗ್ ಕೂಡ ಅತ್ಯುತ್ತಮವಾಗಿತ್ತು. ಒಂದು ಕಡೆಯ ಬೌಂಡರಿ ತುಂಬಾ ದೂರವಿದೆ. ಬೌನ್ಸರ್ ಬಾಲ್ ಅನ್ನು ಚೆನ್ನಾಗಿ ಅರಿತು ರನ್ ಗಳಿಸುತ್ತಿದ್ದಾರೆ.”
“ನಮ್ಮ ತಂಡದ ಕ್ವಾಲಿಟಿ ಏನು ಎಂಬುದು ನನಗೆ ತಿಳಿದಿದೆ. ನಮ್ಮ ಬೆಂಚ್ ಸ್ಟ್ರೆಂತ್ ತುಂಬಾ ಬಲಿಷ್ಠವಾಗಿದೆ. ಅವರು ಪಂದ್ಯವನ್ನಾಡಲು ಕಾದು ಕುಳಿತಿದಿದ್ದಾರೆ. ಇಂಜುರಿಯಯ ಸಂದರ್ಭ ಈರೀತಿಯ ಆಟಗಾರರು ನಮಗೆ ಅಗತ್ಯವಿರುತ್ತದೆ. ಅವರನ್ನು ತಯಾರು ಮಾಡಬೇಕು. ನಮ್ಮ ಬೆಂಚ್ ಸ್ಟ್ರೆಂತ್ ಅನ್ನು ಇನ್ನಷ್ಟು ಬಲಿಷ್ಠವಾಗಿಸಬೇಕು. ವೆಸ್ಟ್ ಇಂಡೀಸ್ ಸರಣಿಗೆ ಕೂಡ ಅವರು ಆಯ್ಕೆ ಆಗಿದ್ದಾರೆ,” ಎಂದು ರೋಹಿತ್ ಶರ್ಮಾ ಹೇಳಿದ್ದಾರೆ.
ಇನ್ನು ಪಂದ್ಯಶ್ರೇಷ್ಠ ಪ್ರಶಸ್ತಿ ಬಾಜಿಕೊಂಡ ರಿಷಭ್ ಪಂತ್ ಮಾತನಾಡಿ, “ನಾನು ಕೊನೆಯ ವರೆಗೂ ಈ ಶತಕವನ್ನು ನೆನಪಿನಲ್ಲಿಟ್ಟುಕೊಳ್ಳುತ್ತೇನೆ. ನಾನು ಬ್ಯಾಟಿಂಗ್ ಮಾಡುವಾಗ ಒಂದು ಸಮಯಕ್ಕೆ ಆ ಎಸೆತದ ಬಗ್ಗೆ ಮಾತ್ರ ಯೋಚಿಸುತ್ತೇನೆ. ನಮ್ಮ ತಂಡ ಒತ್ತಡದಲ್ಲಿದ್ದಾಗ ಬ್ಯಾಟಿಂಗ್ನಲ್ಲಿ ತಂಡಕ್ಕೆ ಏನಾದರು ಮಾಡಲು ಬಯಸುತ್ತೇನೆ. ನನಗೆ ಇಂಗ್ಲೆಂಡ್ನಲ್ಲಿ ಆಡುವುದು ಎಂದರೆ ತುಂಬಾ ಇಷ್ಟ. ಈರೀತಿಯ ಪಂದ್ಯವನ್ನ ಆಡಿದಾಗ ನಮಗೆ ಇನ್ನಷ್ಟು ಅನುಭವ ಬರುತ್ತದೆ,” ಎಂದು ಹೇಳಿದರು.
