T20 Blast: 6 ಎಸೆತಗಳಲ್ಲಿ 6 ವಿಕೆಟ್..!

ಇಂಗ್ಲೆಂಡ್​ನಲ್ಲಿ ನಡೆಯುತ್ತಿರುವ ಟಿ20 ಬ್ಲಾಸ್ಟ್​ ಟೂರ್ನಿಯಲ್ಲಿ ಲಂಕಾಶೈರ್ ತಂಡವು ವಿಶೇಷ ದಾಖಲೆ ನಿರ್ಮಿಸಿದೆ. ಅದು ಕೂಡ 6 ಎಸೆತಗಳಲ್ಲಿ 6 ವಿಕೆಟ್ ಕಬಳಿಸುವ ಮೂಲಕ. ಆದರೆ ಹೀಗೆ ಆರು ವಿಕೆಟ್​ಗಳನ್ನು ಪಡೆದಿರುವುದು 2 ಮ್ಯಾಚ್​ಗಳಲ್ಲಿ ಎಂಬುದು ವಿಶೇಷ. ನಾರ್ಥಂಪ್ಟನ್​ನ ಕೌಂಟಿ ಮೈದಾನದಲ್ಲಿ ನಡೆದ ಮೊದಲ ಪಂದ್ಯದಲ್ಲಿ ನಾರ್ಥಾಂಪ್ಟನ್‌ಶೈರ್ ಮತ್ತು ಲಂಕಾಶೈರ್ ತಂಡಗಳು ಮುಖಾಮುಖಿಯಾಗಿದ್ದವು.

ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ನಾರ್ಥಾಂಪ್ಟನ್‌ಶೈರ್ 19 ಓವರ್​ಗಳಲ್ಲಿ 177 ರನ್ ಕಲೆಹಾಕಿದ್ದರು. ಆದರೆ ಕೊನೆಯ ಓವರ್​ನ ಅಂತಿಮ 4 ಎಸೆತಗಳಲ್ಲಿ ನಾಲ್ಕು ವಿಕೆಟ್ ಕಳೆದುಕೊಳ್ಳುವ ಮೂಲಕ ಆಲೌಟ್ ಆದರು. 20ನೇ ಓವರ್​ನ 3ನೇ ಎಸೆತದಲ್ಲಿ ಸೈಫ್ ಝೈಬ್ ಅವರನ್ನು ಜೋಸ್ ಬಟ್ಲರ್ ರನೌಟ್ ಮಾಡಿದರು. ಸಾಕಿಬ್ ಮಹಮೂದ್ ಎಸೆದ 4ನೇ ಎಸೆತದಲ್ಲಿ ಸಂಡರ್ಸನ್ (0) ಬೌಲ್ಡ್ ಆದರು. ಇನ್ನು 5ನೇ ಎಸೆತದಲ್ಲಿ ಲೌಯ್ಡ್ ಪೋಪ್ (0) ಕೂಡ ಕ್ಲೀನ್ ಬೌಲ್ಡ್ ಆದರು. 6ನೇ ಎಸೆತದಲ್ಲಿ ಸ್ಕ್ರೀಮ್​ಶೌ (0) ಕ್ಯಾಚ್ ನೀಡಿದರು. ಸಾಕಿಬ್ ಮಹಮೂದ್ ಅವರ ಈ ಹ್ಯಾಟ್ರಿಕ್​ನೊಂದಿಗೆ  ಲಂಕಾಶೈರ್ ತಂಡವು ಅಂತಿಮ ಓವರ್​ನಲ್ಲಿ 4 ವಿಕೆಟ್ ಕಬಳಿಸಿ ಮಿಂಚಿದರು.

ಇದಾದ ಬಳಿಕ ಮರುದಿನ ನಡೆದ ಮತ್ತೊಂದು ಪಂದ್ಯದಲ್ಲಿ ಲಂಕಾಶೈರ್ ಹಾಗೂ ಡರ್ಬಿಶೈರ್ ತಂಡಗಳು ಮುಖಾಮುಖಿಯಾಗಿದ್ದವು. ಈ ಪಂದ್ಯದ ದ್ವಿತೀಯ ಇನಿಂಗ್ಸ್​ ಮೊದಲ ಓವರ್​ನ ಮೊದಲ ಎಸೆತದಲ್ಲೇ ಲ್ಯೂಕ್ ವುಡ್, ಕಲೆಬ್ ಜುವೆಲ್ (0) ಅವರ ವಿಕೆಟ್ ಕಬಳಿಸಿದರು. ಎರಡನೇ ಎಸೆತದಲ್ಲಿ ಮಾರ್ಟಿನ್ ಅ್ಯಂಡರ್ಸನ್ (0) ಕ್ಲೀನ್ ಬೌಲ್ಡ್ ಆದರು.

ಈ ಎರಡು ವಿಕೆಟ್​ಗಳೊಂದಿಗೆ ಟಿ20 ಬ್ಲಾಸ್ಟ್ ಟೂರ್ನಿಯಲ್ಲಿ 6 ಎಸೆತಗಳಲ್ಲಿ 6 ವಿಕೆಟ್ ಕಬಳಿಸಿದ ಮೊದಲ ತಂಡವೆಂಬ ಕೀರ್ತಿಯನ್ನು ಲಂಕಾಶೈರ್ ತನ್ನದಾಗಿಸಿಕೊಂಡಿತು. ಅಂದರೆ ನಾರ್ಥಾಂಪ್ಟನ್‌ಶೈರ್ ವಿರುದ್ಧದ ಪಂದ್ಯ ಕೊನೆಯ ಓವರ್​ನಲ್ಲಿ 4 ವಿಕೆಟ್ ಕಬಳಿಸಿದ ಲಂಕಾಶೈರ್, ಡರ್ಬಿಶೈರ್ ವಿರುದ್ಧದ ಪಂದ್ಯದ ಮೊದಲ ಎರಡು ಎಸೆತಗಳಲ್ಲಿ 2 ವಿಕೆಟ್ ಕಬಳಿಸಿ ಈ ಸಾಧನೆ ಮಾಡಿದ್ದಾರೆ.

ಲಂಕಾಶೈರ್ ಬೌಲರ್​ಗಳ ಪರಾಕ್ರಮ:

ಇನ್ನು ಈ ಎರಡೂ ಪಂದ್ಯಗಳಲ್ಲೂ ಲಂಕಾ ಶೈರ್ ತಂಡವು ಭರ್ಜರಿ ಜಯ ಸಾಧಿಸಿದೆ. ನಾರ್ಥಂಪ್ಟನ್ ತಂಡ ನೀಡಿದ 178 ರನ್​ಗಳ ಗುರಿಯನ್ನು ಲಂಕಾಶೈರ್ ತಂಡವು 19.3 ಓವರ್​ಗಳಲ್ಲಿ ಚೇಸ್ ಮಾಡಿ 5 ವಿಕೆಟ್​ಗಳ ಗೆಲುವು ದಾಖಲಿಸಿದೆ. ಹಾಗೆಯೇ ಡರ್ಬಿಶೈರ್ ವಿರುದ್ಧದ ಮ್ಯಾಚ್​ನಲ್ಲಿ 42 ರನ್​ಗಳ ಗೆಲುವು ಸಾಧಿಸುವಲ್ಲಿ ಲಂಕಾಶೈರ್ ಪಡೆ ಯಶಸ್ವಿಯಾಗಿದೆ.

ಇದನ್ನೂ ಓದಿ: CSK ತಂಡವನ್ನು ಹಿಂದಿಕ್ಕಿದ RCB

ಲಂಕಾಶೈರ್ ಪ್ಲೇಯಿಂಗ್ ಇಲೆವೆನ್: ಫಿಲಿಪ್ ಸಾಲ್ಟ್ , ಕೀಟನ್ ಜೆನ್ನಿಂಗ್ಸ್ (ನಾಯಕ) , ಜೋಸ್ ಬಟ್ಲರ್ (ವಿಕೆಟ್ ಕೀಪರ್) , ಲಿಯಾಮ್ ಲಿವಿಂಗ್‌ಸ್ಟೋನ್ , ಲ್ಯೂಕ್ ವೆಲ್ಸ್ , ಆಷ್ಟನ್ ಟರ್ನರ್ , ಮೈಕೆಲ್ ಜೋನ್ಸ್ , ಕ್ರಿಸ್ ಗ್ರೀನ್ , ಜ್ಯಾಕ್ ಬ್ಲೇಥರ್‌ವಿಕ್ , ಸಾಕಿಬ್ ಮಹಮೂದ್ , ಲ್ಯೂಕ್ ವುಡ್

Published On - 7:58 am, Wed, 9 July 25