T20 World Cup Qualifier: 39 ರನ್ಗಳಿಗೆ ಆಲೌಟ್: ಥೈಲ್ಯಾಂಡ್ಗೆ 101 ರನ್ಗಳ ಭರ್ಜರಿ ಜಯ
T20 World Cup Asia Qualifier: ಮ್ಯಾನ್ಮಾರ್ ಬ್ಯಾಟರ್ಗಳು ಕಲೆಹಾಕಿದ್ದು ಕೇವಲ 29 ರನ್ಗಳು ಮಾತ್ರ. ಇನ್ನುಳಿದ 10 ರನ್ಗಳನ್ನು ಥೈಲ್ಯಾಂಡ್ ಬೌಲರ್ಗಳು ಅತಿರಿಕ್ತವಾಗಿ ನೀಡಿದ್ದರು.
T20 World Cup Asia Qualifier 2023: ಟಿ20 ವಿಶ್ವಕಪ್ ಏಷ್ಯಾ ಕ್ವಾಲಿಫೈಯರ್-B ವಿಭಾಗದಲ್ಲಿ ನಡೆದ 5ನೇ ಪಂದ್ಯದಲ್ಲಿ ಥೈಲ್ಯಾಂಡ್ ತಂಡವು ಭರ್ಜರಿ ಜಯ ಸಾಧಿಸಿದೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಮ್ಯಾನ್ಮಾರ್ ತಂಡವು ಮೊದಲು ಬೌಲಿಂಗ್ ಮಾಡಿತು. ಅದರಂತೆ ಇನಿಂಗ್ಸ್ ಆರಂಭಿಸಿದ ಥೈಲ್ಯಾಂಡ್ ತಂಡವು ಉತ್ತಮ ಆರಂಭ ಪಡೆದಿರಲಿಲ್ಲ. 36 ರನ್ಗಳಿಗೆ 3 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದ ಥೈಲ್ಯಾಂಡ್ ತಂಡಕ್ಕೆ ಈ ಹಂತದಲ್ಲಿ ಜೆ ಕೋಟ್ಜಿ ಹಾಗೂ ರಾಬರ್ಟ್ ರೈನಾ ಆಸರೆಯಾದರು.
29 ಎಸೆತಗಳನ್ನು ಎದುರಿಸಿದ ಜೆ ಕೋಟ್ಜಿ 1 ಸಿಕ್ಸ್ ಹಾಗೂ 3 ಫೋರ್ಗಳೊಂದಿಗೆ 40 ರನ್ ಬಾರಿಸಿದರೆ, ರಾಬರ್ಟ್ ರೈನಾ 30 ಎಸೆತಗಳಲ್ಲಿ 7 ಫೋರ್ಗಳೊಂದಿಗೆ 42 ರನ್ ಕಲೆಹಾಕಿದರು. ಈ ಮೂಲಕ ಥೈಲ್ಯಾಂಡ್ ತಂಡವು ನಿಗದಿತ 20 ಓವರ್ಗಳಲ್ಲಿ 6 ವಿಕೆಟ್ ಕಳೆದುಕೊಂಡು 140 ರನ್ ಕಲೆಹಾಕಿತು.
141 ರನ್ಗಳ ಸುಲಭ ಗುರಿ ಬೆನ್ನತ್ತಿದ ಮ್ಯಾನ್ಮಾರ್ ತಂಡವು ಖಾತೆ ತೆರೆಯುವ ಮುನ್ನವೇ ಮೊದಲ ವಿಕೆಟ್ ಕಳೆದುಕೊಂಡಿತು. ಅಲ್ಲದೆ ನಾಲ್ಕನೇ ಓವರ್ನಲ್ಲಿ ಕೇವಲ 8 ರನ್ಗಳಿಗೆ 3 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಅತ್ತ ರನ್ಗಳಿಸಲು ಪರದಾಡಿದ ಮ್ಯಾನ್ಮಾರ್ ಬ್ಯಾಟರ್ಗಳು ಒಂದಷ್ಟು ಹೊತ್ತು ಕ್ರೀಸ್ ಕಚ್ಚಿ ನಿಲ್ಲುವ ಪ್ರಯತ್ನ ಮಾಡಿದರು.
ಅದರಂತೆ 10 ಓವರ್ಗಳನ್ನು ಎದುರಿಸಿದ ಮ್ಯಾನ್ಮಾರ್ ತಂಡವು 26 ರನ್ಗಳಿಸಿತು. ಆದರೆ ಅದಾಗಲೇ 6 ವಿಕೆಟ್ಗಳನ್ನು ಕಳೆದುಕೊಂಡಿದ್ದರು. ಅಂತಿಮವಾಗಿ 16 ಓವರ್ಗಳಲ್ಲಿ ಮ್ಯಾನ್ಮಾರ್ ತಂಡವನ್ನು 39 ರನ್ಗಳಿಗೆ ಆಲೌಟ್ ಮಾಡುವಲ್ಲಿ ಥೈಲ್ಯಾಂಡ್ ಬೌಲರ್ಗಳು ಯಶಸ್ವಿಯಾದರು.
ಇದನ್ನೂ ಓದಿ: Team India: ಟೀಮ್ ಇಂಡಿಯಾದ ಏಕದಿನ ವಿಶ್ವಕಪ್ ತಯಾರಿ ಶುರು..!
ಅಚ್ಚರಿ ಎಂದರೆ ಇಲ್ಲಿ ಮ್ಯಾನ್ಮಾರ್ ಬ್ಯಾಟರ್ಗಳು ಕಲೆಹಾಕಿದ್ದು ಕೇವಲ 29 ರನ್ಗಳು ಮಾತ್ರ. ಇನ್ನುಳಿದ 10 ರನ್ಗಳನ್ನು ಥೈಲ್ಯಾಂಡ್ ಬೌಲರ್ಗಳು ಅತಿರಿಕ್ತವಾಗಿ ನೀಡಿದ್ದರು. ಇನ್ನು ಈ ಪಂದ್ಯದಲ್ಲಿ ಮ್ಯಾನ್ಮಾರ್ನ ಐವರು ಬ್ಯಾಟರ್ಗಳು ಸೊನ್ನೆ ಸುತ್ತಿದ್ದರು. ಈ ಮೂಲಕ ಅತ್ಯುತ್ತಮ ದಾಳಿ ಸಂಘಟಿಸಿದ ಥೈಲ್ಯಾಂಡ್ ತಂಡವು 101 ರನ್ಗಳ ಭರ್ಜರಿ ಜಯ ತಮ್ಮದಾಗಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ.