Virat Kohli vs Jonny Bairstow: ಭಯಂಕರ ಬೈರ್​ಸ್ಟೋವ್:​ ಕೊಹ್ಲಿ ಕೆಣಕಿದ್ದೇ ತಪ್ತಾಯ್ತಾ?

Virat Kohli vs Jonny Bairstow: ಟೀಮ್ ಇಂಡಿಯಾ ಬೌಲರ್​ಗಳ ಮುಂದೆ ಎಚ್ಚರಿಕೆಯಿಂದ ಆಡುತ್ತಿದ್ದ ಬೈರ್​ಸ್ಟೋವ್​ರನ್ನು ಬೇಗನೆ ಔಟ್ ಮಾಡಿದ್ದರೆ ಟೀಮ್ ಇಂಡಿಯಾ ಬೃಹತ್ ಮುನ್ನಡೆ ಪಡೆಯುತ್ತಿತ್ತು. ಆದರೆ ಬೈರ್​ಸ್ಟೋವ್ ಅಂತಿಮ ಹಂತದಲ್ಲಿ ಅಬ್ಬರಿಸುವ ಮೂಲಕ ಈ ಅಂತರವನ್ನು 132 ರನ್​ಗಳಿಗೆ ಇಳಿಸಿದರು.

Virat Kohli vs Jonny Bairstow: ಭಯಂಕರ ಬೈರ್​ಸ್ಟೋವ್:​ ಕೊಹ್ಲಿ ಕೆಣಕಿದ್ದೇ ತಪ್ತಾಯ್ತಾ?
Virat Kohli vs Jonny Bairstow
TV9kannada Web Team

| Edited By: Zahir PY

Jul 04, 2022 | 10:29 AM

ಬರ್ಮಿಂಗ್​ಹ್ಯಾಮ್​ನಲ್ಲಿ ನಡೆಯುತ್ತಿರುವ ಭಾರತ-ಇಂಗ್ಲೆಂಡ್ (India vs England) ನಡುವಣ 5ನೇ ಟೆಸ್ಟ್​ ಪಂದ್ಯದ 3ನೇ ದಿನದಾಟದಲ್ಲಿ ರೋಚಕ ಹೋರಾಟ ಕಂಡು ಬಂತು. ಅದರಲ್ಲೂ ವಿರಾಟ್ ಕೊಹ್ಲಿ ಹಾಗೂ ಜಾನಿ ಬೈರ್​ಸ್ಟೋವ್ ನಡುವಣ ವಾಕ್ಸಮರಕ್ಕೆ ಪಂದ್ಯವು ಸಾಕ್ಷಿಯಾಗಿತ್ತು. ಇಂಗ್ಲೆಂಡ್ ತಂಡದ ಮೊದಲ ಇನಿಂಗ್ಸ್​ನ 32ನೇ ಓವರ್​ನಲ್ಲಿ ಕೊಹ್ಲಿ ಹಾಗೂ ಬೈರ್​ಸ್ಟೋವ್ ನಡುವೆ ಮಾತಿಕ ಚಕಮಕಿ ನಡೆಯಿತು. ಇಬ್ಬರ ನಡುವಿನ ವಾಗ್ವಾದವನ್ನು ಅಂಪೈರ್​ಗಳು ಮಧ್ಯಪ್ರವೇಶಿಸುವ ಮೂಲಕ ತಣ್ಣಗಾಗಿಸಿದ್ದರು. ಆದರೆ ಇತ್ತ ವಿರಾಟ್ ಕೊಹ್ಲಿ ತಮ್ಮ ಕೋಪವನ್ನು ಅದುಮಿಟ್ಟುಕೊಂಡರೆ, ಬೈರ್​ಸ್ಟೋವ್ ಬ್ಯಾಟ್ ಮೂಲಕ ಟೀಮ್ ಇಂಡಿಯಾ ಬೌಲರ್​ಗಳ ಮೇಲೆ ಗದಾಪ್ರಹಾರ ನಡೆಸಿದರು. ಏಕೆಂದರೆ ಕೊಹ್ಲಿ ಜೊತೆಗಿನ ವಾಕ್ಸಮರದ ವೇಳೆ ಬೈರ್​ಸ್ಟೋವ್ ಕಲೆಹಾಕಿದ್ದು ಕೇವಲ 13 ರನ್​​. ಈ ಹದಿಮೂರು ರನ್ ಕಲೆಹಾಕಲು ಬರೋಬ್ಬರಿ 61 ಎಸೆತಗಳನ್ನು ಎದುರಿಸಿದ್ದರು.

ಆದರೆ ಕೆಣಕಿದ ಬಳಿಕ ಕೆಂಡವಾದ ಬೈರ್​ಸ್ಟೋವ್ ಅಕ್ಷರಶಃ ಅಬ್ಬರಿಸಿದರು. ಟೀಮ್ ಇಂಡಿಯಾ ಬೌಲರ್​ಗಳ ಬೆಂಡೆತ್ತಿದ ಜಾನಿ ಬಿ ಬೀಸ್ಟ್ ಮೋಡ್​ಗೆ ಬದಲಾದರು. ಪರಿಣಾಮ ಕೇವಲ 119 ಎಸೆತಗಳಲ್ಲಿ ಶತಕ ಪೂರೈಸಿದರು. ವಿಶೇಷ ಎಂದರೆ ವಾಕ್ಸಮರದ ಬಳಿಕ ಕೇವಲ 58 ಎಸೆತಗಳಲ್ಲಿ ಬೈರ್​ಸ್ಟೋವ್ 87 ರನ್​ಗಳನ್ನು ಚಚ್ಚಿ ಬಿಸಾಕಿದ್ದರು. ಈ ವೇಳೆ 14 ಫೋರ್ ಹಾಗೂ 2 ಸಿಕ್ಸರ್​ಗಳನ್ನು ಸಹ ಸಿಡಿಸಿದ್ದರು.

ಅಂದರೆ ಕೆಣಕುವ ಮುನ್ನ ಇದ್ದ ಬೈರ್​ಸ್ಟೋವ್ ಆ ಬಳಿಕ ಭಯಂಕರ ಬೈರ್​ಸ್ಟೋವ್ ಬದಲಾಗಿದ್ದರು. ತನ್ನೆಲ್ಲಾ ಕೋಪಗಳನ್ನು ಟೀಮ್ ಇಂಡಿಯಾ ಬೌಲರ್​ಗಳ ಮೇಲೆ ತೀರಿಸಿಕೊಂಡಿದ್ದರು. ಇಲ್ಲಿ ಮತ್ತೊಂದು ವಿಶೇಷ ಎಂದರೆ ಬೈರ್​ಸ್ಟೋವ್ ಬದಲಾಗಿ ಇಂಗ್ಲೆಂಡ್ ತಂಡದ ಯಾವುದೇ ಬ್ಯಾಟ್ಸ್​ಮನ್ ಅರ್ಧಶತಕ ಕೂಡ ಬಾರಿಸಿಲ್ಲ. ಅಂತಿಮವಾಗಿ ಇಂಗ್ಲೆಂಡ್​ ತಂಡವು ಮೊದಲ ಇನಿಂಗ್ಸ್​ನಲ್ಲಿ 284 ರನ್​ಗಳಿಗೆ ಆಲೌಟ್ ಆಯಿತು. ತಂಡದ ಒಟ್ಟು ಮೊತ್ತದಲ್ಲಿ ಬೈರ್​ಸ್ಟೋವ್ ಅವರ 106 ರನ್​ಗಳಿರುವುದು ವಿಶೇಷ.

ಹೀಗಾಗಿ ವಿರಾಟ್ ಕೊಹ್ಲಿ ಜಾನಿ ಬೈರ್​ಸ್ಟೋವ್​ರನ್ನು ಕೆಣಕಿ ತಪ್ಪು ಮಾಡಿದ್ರು ಎಂದು ವಿಶ್ಲೇಷಿಸಲಾಗುತ್ತಿದೆ. ಆರಂಭದಲ್ಲಿ ಟೀಮ್ ಇಂಡಿಯಾ ಬೌಲರ್​ಗಳ ಮುಂದೆ ಎಚ್ಚರಿಕೆಯಿಂದ ಆಡುತ್ತಿದ್ದ ಬೈರ್​ಸ್ಟೋವ್​ರನ್ನು ಬೇಗನೆ ಔಟ್ ಮಾಡಿದ್ದರೆ ಟೀಮ್ ಇಂಡಿಯಾ ಬೃಹತ್ ಮುನ್ನಡೆ ಪಡೆಯುತ್ತಿತ್ತು. ಆದರೆ ಬೈರ್​ಸ್ಟೋವ್ ಅಂತಿಮ ಹಂತದಲ್ಲಿ ಅಬ್ಬರಿಸುವ ಮೂಲಕ ಈ ಅಂತರವನ್ನು 132 ರನ್​ಗಳಿಗೆ ಇಳಿಸಿದರು. ಒಟ್ಟಿನಲ್ಲಿ ವಿರಾಟ್ ಕೊಹ್ಲಿ-ಜಾನಿ ಬೈರ್​ಸ್ಟೋವ್ ನಡುವಿನ ಜಗಳಕ್ಕೆ ಬೆಲೆ ತೆತ್ತಿದ್ದು ಮಾತ್ರ ಟೀಮ್ ಇಂಡಿಯಾ ಬೌಲರ್​ಗಳು.

ಇದನ್ನೂ ಓದಿ

ತಾಜಾ ಸುದ್ದಿ

Follow us on

Related Stories

Most Read Stories

Click on your DTH Provider to Add TV9 Kannada