IPL 2025: ಡೆವಾಲ್ಡ್ ಬ್ರೆವಿಸ್​ಗೆ ರಿವ್ಯೂ ಕೊಡದಿರಲು ಇದುವೇ ಕಾರಣ

ಐಪಿಎಲ್​ನ 52ನೇ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಜಯ ಸಾಧಿಸಿದೆ. ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಸಿಎಸ್​ಕೆ ತಂಡದ ನಾಯಕ ಮಹೇಂದ್ರ ಸಿಂಗ್ ಧೋನಿ ಬೌಲಿಂಗ್ ಆಯ್ದುಕೊಂಡಿದ್ದರು. ಅದರಂತೆ ಮೊದಲು ಬ್ಯಾಟ್ ಮಾಡಿದ ಆರ್​ಸಿಬಿ ತಂಡವು 20 ಓವರ್​ಗಳಲ್ಲಿ 5 ವಿಕೆಟ್ ಕಳೆದುಕೊಂಡು 213 ರನ್ ಕಲೆಹಾಕಿತು.

214 ರನ್​ಗಳ ಕಠಿಣ ಗುರಿ ಬೆನ್ನತ್ತಿದ ಸಿಎಸ್​ಕೆ ತಂಡವು 16.2 ಓವರ್​ಗಳಲ್ಲಿ 172 ರನ್ ಕಲೆಹಾಕಿತ್ತು. ಇನ್ನುಳಿದ 22 ಎಸೆತಗಳಲ್ಲಿ ಕೇವಲ 42 ರನ್​ಗಳ ಅವಶ್ಯಕತೆಯಿತ್ತು. ಈ ಹಂತದಲ್ಲಿ ಕಣಕ್ಕಿಳಿದ ಡೆವಾಲ್ಡ್ ಬ್ರೆವಿಸ್, ಲುಂಗಿ ಎನ್​ಗಿಡಿ ಎಸೆತದಲ್ಲಿ ಎಲ್​ಬಿಡಬ್ಲ್ಯೂ ಆಗಿದ್ದರು. ಆರ್​ಸಿಬಿ ಆಟಗಾರರು ಮನವಿ ಮಾಡುತ್ತಿದ್ದಂತೆ ಅಂಪೈರ್ ಔಟ್ ಎಂದು ತೀರ್ಪು ನೀಡಿದ್ದರು. ಆದರೆ ಆ ಬಳಿಕ ಡೆವಾಲ್ಡ್ ಬ್ರೆವಿಸ್ ಮೇಲ್ಮನವಿ ಅಂಪೈರ್​ಗೆ ಕೋರಿಕೆ ಸಲ್ಲಿಸಿದರೂ. ಡಿಆರ್​ಎಸ್​ಗೆ ಅವಕಾಶ ನೀಡಿರಲಿಲ್ಲ.

ಡಿಆರ್​ಎಸ್​ಗೆ ಅವಕಾಶ ಕೊಡದಿರಲು ಕಾರಣವೇನು?

ಐಪಿಎಲ್​ ನಿಯಮದ ಪ್ರಕಾರ, 15 ಸೆಕೆಂಡ್​ಗಳಲ್ಲಿ ಡಿಆರ್​ಎಸ್​ ತೆಗೆದುಕೊಳ್ಳಬೇಕು. ಆದರೆ ಡೆವಾಲ್ಡ್ ಬ್ರೆವಿಸ್ ಎಲ್​ಬಿಡಬ್ಲ್ಯೂ ಆದ ಬಳಿಕ ರನ್​ಗಾಗಿ ಓಡಿದ್ದರು. ಎರಡು ರನ್​ಗಳನ್ನು ಓಡಿದ ಬಳಿಕ ಅವರು ಅಂಪೈರ್​ ಬಳಿ ಡಿಆರ್​ಎಸ್​ಗೆ ಮನವಿ ಮಾಡಿದ್ದರು. ಅಷ್ಟರಲ್ಲಾಗಲೇ ರಿವ್ಯೂ ಸೆಕೆಂಡ್ಸ್​ 25 ಆಗಿತ್ತು.

ಬ್ರೆವಿಸ್ ರಿವ್ಯೂ ಮನವಿ ವಿಡಿಯೋ:

ಅಂದರೆ 25 ಸೆಕೆಂಡ್ಸ್ ಆದಮೇಲಷ್ಟೇ ಬ್ರೆವಿಸ್ ಎಲ್​ಬಿಡಬ್ಲ್ಯೂಗೆ ಮನವಿ ಮಾಡಿದ್ದರು. ಹೀಗಾಗಿ ಫೀಲ್ಡ್ ಅಂಪೈರ್ ನಿತಿನ್ ಮೆನನ್ ಈ ಮನವಿಯನ್ನು ತಿರಸ್ಕರಿಸಿದ್ದರು. ಅಲ್ಲದೆ ಫೀಲ್ಡ್ ಅಂಪೈರ್ ತೀರ್ಪಿನಂತೆ ನೀವು ಔಟಾಗಿದ್ದು, ಹಾಗಾಗಿ ಮೈದಾನ ತೊರೆಯುವಂತೆ ಸೂಚಿಸಿದ್ದರು. ಅದರಂತೆ ಡೆವಾಲ್ಡ್ ಬ್ರೆವಿಸ್ ಪೆವಿಲಿಯನ್​ಗೆ ಮರಳಿದ್ದರು.

ಅಚ್ಚರಿ ಎಂದರೆ, ರಿಪ್ಲೇನಲ್ಲಿ ಡೆವಾಲ್ಡ್ ಬ್ರೆವಿಸ್ ಕಾಲಿಗೆ ತಾಗಿದ ಚೆಂಡು ವಿಕೆಟ್​ನಿಂದ ಹೊರ ಹೋಗುತ್ತಿರುವುದು ಕಂಡು ಬಂದಿದೆ. ಅಂದರೆ ಎಲ್​ಬಿಡಬ್ಲ್ಯೂ ಆದ ಬೆನ್ನಲ್ಲೇ ಡಿಆರ್​ಎಸ್​ ತೆಗೆದುಕೊಳ್ಳದೇ ರನ್​ಗಾಗಿ ಓಡಿದ್ದು, ಸಿಎಸ್​ಕೆ ಪಾಲಿಗೆ ಮುಳುವಾಯಿತು. ಅಂತಿಮವಾಗಿ  ಈ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡವು 2 ರನ್​ಗಳ ಸೋಲನುಭವಿಸಿದೆ.

ಇದನ್ನೂ ಓದಿ: 11 ಫೋರ್, 3 ಸಿಕ್ಸ್: ಕೊನೆಗೂ ಶತಕ ಪೂರೈಸಿದ ಗ್ಲೆನ್ ಮ್ಯಾಕ್ಸ್​ವೆಲ್

ಈ ಗೆಲುವಿನೊಂದಿಗೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಅಂಕ ಪಟ್ಟಿಯಲ್ಲಿ ಮೊದಲ ಸ್ಥಾನ ಅಲಂಕರಿಸಿದೆ. ಇತ್ತ ಸತತ ಸೋಲುಗಳಿಂದ ಕಂಗೆಟ್ಟಿರುವ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಅಂಕ ಪಟ್ಟಿಯಲ್ಲಿ ಕೊನೆಯ ಸ್ಥಾನದಲ್ಲಿದೆ.