ಟೀಮ್ ಇಂಡಿಯಾದ ಪ್ರಮುಖ ಬ್ಯಾಟ್ಸ್​ಮನ್​ಗಳು ರನ್​ಗಳಿಗಾಗಿ ಬೌಲರ್​ಗಳನ್ನು ನೆಚ್ಚಿಕೊಳ್ಳುತ್ತಿರುವುದು ಸರಿಯಲ್ಲ!

ನಿರೀಕ್ಷೆಯಂತೆ ಪ್ರವಾಸಿ ಇಂಗ್ಲೆಂಡ್​ ತಂಡವನ್ನು ಟೆಸ್ಟ್​ ಸರಣಿಯಲ್ಲಿ ಮಣಿಸಿದೆ. ಕೊನೆಯ ಟೆಸ್ಟ್​​​ನ ಎರಡನೇ ಇನ್ನಿಂಗ್ಸನಲ್ಲಿ ಜೋ ರೂಟ್ ತಂಡ ಪ್ರತಿರೋಧ ನೀಡಬಹುದೆಂದು ಎಣಿಸಲಾಗಿತ್ತು, ಆದರೆ ಮೊಟೆರಾದ ನರೇಂದ್ರ ಮೋದಿ ಮೈದಾನದಲ್ಲಿ ಹಾಗಾಗಲಿಲ್ಲ. ಭಾರತದ ಸ್ಪಿನ್​ದ್ವಯರಾದ ರವಿಚಂದ್ರನ್ ಅಶ್ವಿನ್ ಮತ್ತು ಅಕ್ಷರ್ ಪಟೇಲ್ ಅವರ ದಾಳಿಯನ್ನು ಎದುರಿಸಲಾರದೆ ಆಂಗ್ಲರು ಭಾರತೀಯರಿಗೆ ಸುಲಭವಾಗಿ ಶರಣಾದರು. ಭಾರತ ಟೆಸ್ಟ್ ಮತ್ತು ಸರಣಿಯನ್ನು ಗೆದ್ದಿರಿವುದೇನೋ ನಿಜ; ಅದರೆ ಈ ಸರಣಿ ಮತ್ತು ಇತ್ತೀಚಿಗಷ್ಟೇ ಆಸ್ಟ್ರೇಲಿಯಾ ವಿರುದ್ಧ ಅಡಿದ ಸರಣಿಯಲ್ಲಿ ಭಾರತದ ಅನುಭವಿ ಬ್ಯಾಟ್ಸ್​ಮನ್​ಗಳು ತಾವು ನೀಡಿದ ಪ್ರದರ್ಶನಗಳ ಬಗ್ಗೆ ಅತ್ಮಾವಲೋಕನ ಮಾಡಿಕೊಳ್ಳಬೇಕಿದೆ. ನಿಮಗೆ ಗೊತ್ತಿರುವಂತೆ, ಕೊನೆ ಟೆಸ್ಟ್​ನ ಒಂದು ಹಂತದಲ್ಲಿ ಭಾರತ 146 ರನ್​ಗಳಾಗುವಷ್ಟರಲ್ಲಿ 6 ವಿಕೆಟ್ ಕಳೆದುಕೊಂಡು ಶೋಚನೀಯ ಸ್ಥಿತಿಯಲ್ಲಿತ್ತು. ಎದುರಾಳಿಗಳಿಗೆ ಲೀಡ್ ಬಿಟ್ಟುಕೊಡುವ ಭೀತಿ ಮೂಡಿದ್ದು ಸುಳ್ಳಲ್ಲ.

ಆದರೆ 7 ನೇ ವಿಕೆಟ್​ಗೆ ಇತ್ತೀಚಿನ ದಿನಗಳಲ್ಲಿ ಭಾರತದ ಬ್ಯಾಟಿಂಗ್​ಗೆ ಸಂಬಂಧಿಸಿದಂತೆ ಆಪತ್ಬಾಂಧವರಂತೆ ಗೋಚರಿಸುತ್ತಿರುವ ರಿಷಭ್ ಪಂತ್ ಮತ್ತು ಬೌಲಿಂಗ್ ಅಲ್​ರೌಂಡರ್ ವಾಷಿಂಗ್ಟನ್ ಸುಂದರ್ ಪಾಲುದಾರಿಕೆಯಲ್ಲಿ ಬಂದ 113 ರನ್​ಗಳು ಭಾರತವನ್ನು ಅಪಾಯದಿಂದ ಪಾರು ಮಾಡಿದ್ದೂ ಅಲ್ಲದೆ ಇಂಗ್ಲೆಂಡ್ ಮೊತ್ತವನ್ನು ದಾಟಲು ನೆರವಾಯಿತು. ಪಂತ್ 101 ರನ್ ಬಾರಿಸಿ ತಮ್ಮ ವೃತ್ತಿಬದುಕಿನ 3ನೇ ಶತಕ ದಾಖಲಿದರು.

ಈ ಜೊತೆಯಾಟದ ನಂತರ ಸುಂದರ್ ಮತ್ತೊಬ್ಬ ಟೇಲ್ಎಂಡರ್ ಅಕ್ಷರ್ ಪಟೇಲ್ ಅವರೊಂದಿಗೆ 8ನೇ ವಿಕೆಟ್​ಗೆ 106 ರನ್​ಗಳ ಜೊತೆಯಾಟದಲ್ಲಿ ಪಾಲ್ಗೊಂಡರು. ಅಕ್ಷರ್ 43 ರನ್ ಗಳಿಸದರೆ ಸುಂದರ್ 96 ರನ್ ಗಳಿಸಿ ಅಜೇಯರಾಗಿ ಉಳಿದರು.

ರಿಷಭ್ ಪಂತ್

ಭಾರತದ ಟಾಪ್ ಆರ್ಡರ್​ನಲ್ಲಿ ರೋಹಿತ್ ಶರ್ಮ ಮಾತ್ರ ಉತ್ತಮವಾಗಿ ಅಡಿ 49 ರನ್ ಗಳಿಸಿದರು. ಅವರ ಬ್ಯಾಟಿಂಗ್​ ಬಗ್ಗೆ ದೂರುಗಳಿಲ್ಲ. ನಾಯಕ ವಿರಾಟ್ ಕೊಹ್ಲಿ ಮತ್ತು ಆರಂಭ ಆಟಗಾರ ಶುಭ್ಮನ್ ಗಿಲ್ ಸೊನ್ನೆಗೆ ಔಟಾದರೆ, ಅನುಭವಿ ಆಟಗಾರ ಚೇತೇಶ್ವರ್ ಪೂಜಾರಾ 17 ರನ್ ಗಳಿಸಿದರು ಮತ್ತು ಉಪ ನಾಯಕ ಅಜಿಂಕ್ಯಾ ರಹಾನೆ 27 ರನ್​ ಬಾರಿಸಿದರು. ಪಿಚ್​ನಲ್ಲಿ ಅಂಥದ್ದೇನೂ ಇರಲಿಲ್ಲ, ರನ್ ಗಳಿಸಬಹುದೆಂದು ಪಂತ್, ಸುಂದರ್ ಮತ್ತು ಅಕ್ಷರ್ ಸಾಬೀತು ಮಾಡಿದರು. ಹಾಗಾಗಿ ಈ ಪ್ರಮುಖ ಬ್ಯಾಟ್ಸ್​ಮನ್​ಗಳ ವೈಫಲ್ಯ ಕ್ರಿಕೆಟ್ ಪ್ರೇಮಿಗಳಲ್ಲಿ ಬೇಜಾರು ಮೂಡಿಸಿದೆ.

ಹೀಗೆ ಪದೇಪದೆ ಆಗುತ್ತಿದೆ. ಇದೇ ಸರಣಿಯ ಎರಡನೇ ಟೆಸ್ಟನಲ್ಲಿ ಭಾರತದ ಪ್ರಮುಖ ಬ್ಯಾಟ್ಸ್​ಮನ್​ಗಳು ಫೇಲಾದಾಗ ರವಿಚಂದ್ರನ್ ಅಶ್ವಿನ್​ ಶತಕ ಬಾರಿಸಿ ಭಾರತಕ್ಕೆ ಗೆಲುವಿನ ಲೀಡ್ ಕೊಡಿಸಿದ್ದರು. ಇಂಗ್ಲೆಂಡ್ ಜುಗಳಿಸಿದ ಮೊದಲ ಟೆಸ್ಟ್​ನಲ್ಲಿ ಏನು ಘಟಿಸಿತು ಅಂತ ಎಲ್ಲರಿಗೂ ಗೊತ್ತಿದೆ. ಆ ಪಂದ್ಯದ ಮೊದಲ ಇನ್ನಿಂಗ್ಸ್​ನಲ್ಲಿ ಪಂತ್ 91 ರನ್, ಸುಂದರ್ ಅಜೇಯ 85 ಮತ್ತು ಅಶ್ವಿನ್ 31 ರನ್​ ಬಾರಿಸದ್ದರಿಂದಲೇ ಭಾರತ 337ರ ಮೊತ್ತ ಗಳಿಸಲು ಸಾಧ್ಯವಾಗಿತ್ತು.

ಅದಕ್ಕೂ ಮೊದಲು ಆಸ್ಟ್ರೇಲಿಯಾ ವಿರುದ್ಧ ಎರಡನೇ ಟೆಸ್ಟ್​ನಲ್ಲಿ ರಹಾನೆ ಶತಕ ಬಾರಿಸಿದ್ದರೆ, ರವೀಂದ್ರ ಜಡೇಜಾ 57 ರನ್ ಬಾರಿಸಿದ್ದರು. ಅದೇ ಸರಣಿಯ ಮೂರನೇ ಪಂದ್ಯದ ಎರಡನೇ ಇನ್ನಿಂಗ್ಸ್​ನಲ್ಲಿ ಪಂತ್ 97 ರನ್ ಬಾರಿಸಿ ಔಟಾಗಿದ್ದರು. ನಂತರ ಅಶ್ವಿನ್ (ಅಜೇಯ 39) ಮತ್ತು ಹನುಮ ವಿಹಾರಿ (ಅಜೇಯ 23) ಭಾರತ ಟೆಸ್ಟ್​ ಡ್ರಾ ಮಾಡಿಕೊಳ್ಳಲು ನೆರವಾಗಿದ್ದರು. ಅಂದು ಬ್ಯಾಟ್​ ಮಾಡುವಾಗ ಅವರಿಬ್ಬರು ಆಸ್ಸೀ ವೇಗಿಗಳ ಎಸೆತಗಳಿಂದ ಹಲವಾರು ಬಾರಿ ಪೆಟ್ಟು ತಿಂದರು.

ಬ್ರಿಸ್ಬೇನ್​ನಲ್ಲಿ ನಡೆದ ಕೊನೆಯ ಟೆಸ್ಟ್ ಯಾರೂ ತಾನೆ ಮರೆತಾರು? ಸುಂದರ್ (62) ಮತ್ತು ಶಾರ್ದುಲ್ ಠಾಕುರ್ (67) ಅವರ ದಿಟ್ಟ ಬ್ಯಾಟಿಂಗ್ ನೆರವಿನಿಂದ ಭಾರತದ ಸ್ಕೋರ್ 186/6 ನಿಂದ 336 ಕ್ಕೆ ತಲುಪಿತ್ತು. ಆ ಟೆಸ್ಟ್ ಭಾರತ ಗೆದ್ದಿದ್ದು ಎರಡನೇ ಇನ್ನಿಂಗ್ಸ್​ನಲ್ಲಿ ​ಪಂತ್ ಅವರ ಅಜೇಯ 89 ರನ್​ಗಳ ಅಪ್ರತಿಮ ಆಟದಿಂದ . ಭಾರತಕ್ಕೆ ಗೆಲುವು ಕೊಡಿಸಲು ಪಂತ್ ಜೊತೆ ನೆರವಾಗಿದ್ದು 22 ರನ್​ಗಳ ಮಹತ್ವಪೂರ್ಣ ಕಾಣಿಕೆ ನೀಡಿದ ಸುಂದರ್.

ಇದನ್ನು ಯಾಕೆ ಹೇಳಬೇಕಾಗಿದೆಯೆಂದರೆ, ಭಾರತದ ಪ್ರಮುಖ ಬ್ಯಾಟ್ಸ್​ಮನ್​ಗಳು ರನ್​ಗಳಿಗಾಗಿ ಕೆಳ ಕ್ರಮಾಂಕದ ಆಟಗಾರರನ್ನು ನೆಚ್ಚಿಕೊಳ್ಳುತ್ತಿರುವುದು ಚಾಂಪಿಯನ್ ತಂಡದ ಲಕ್ಷಣವಲ್ಲ. ಬೌಲರ್​ಗಳು ತಮ್ಮ ಕೆಲಸವನ್ನು ಅದ್ಭುತವಾದ ರೀತಿಯಲ್ಲಿ ಮಾಡುತ್ತಿದ್ದಾರೆ, ಅವರ ಮೇಲೆ ರನ್​ ಗಳಿಸುವ ಜವಾಬ್ದಾರಿಯನ್ನೂ ಹೊರೆಸುವುದು ಸರ್ವಥಾ ತಪ್ಪು.

ಕೊಹ್ಲಿ, ಗಿಲ್, ರಹಾನೆ, ಪೂಜಾರಾ ಮೊದಲಾದವರು ತಮ್ಮ ಜವಾಬ್ದಾರಿಗಳನ್ನು ತಾವೇ ಹೊತ್ತುಕೊಳ್ಳುವುದು ಟೀಮ್ ಇಂಡಿಯಾ ದೃಷ್ಟಿಯಿಂದ ಲೇಸು.

ಇದನ್ನೂ ಓದಿ: India vs England 4th Test Day 3: ಭರ್ಜರಿ ಜಯದೊಂದಿಗೆ ಡಬ್ಲ್ಯೂಟಿಸಿ ಫೈನಲ್ ಪ್ರವೇಶಿಸಿದ ಭಾರತ

Published On - 7:01 pm, Sat, 6 March 21