Manu Bhaker: ಪ್ರಮುಖ ಬ್ರ್ಯಾಂಡ್ಗಳ ವಿರುದ್ಧ ಕಾನೂನು ಕ್ರಮಕ್ಕೆ ಮುಂದಾದ ಮನು ಭಾಕರ್
Manu Bhaker: ಪ್ಯಾರಿಸ್ ಒಲಿಂಪಿಕ್ಸ್ನ ಶೂಟಿಂಗ್ನಲ್ಲಿ ಭಾರತದ ಮನು ಭಾಕರ್ 2 ಕಂಚಿನ ಪದಕಗಳನ್ನು ಗೆದ್ದಿದ್ದಾರೆ. ಮಹಿಳಾ 10 ಮೀಟರ್ ಏರ್ ಪಿಸ್ತೂಲ್ ಸ್ಪರ್ಧೆಯಲ್ಲಿ ಭಾರತಕ್ಕೆ ಮೊದಲ ಪದಕ ಗೆದ್ದುಕೊಟ್ಟ ಮನು ಭಾಕರ್, ಮಂಗಳವಾರ 10 ಮೀ ಏರ್ ಪಿಸ್ತೂಲ್ ಮಿಶ್ರ ಸ್ಫರ್ಧೆದಲ್ಲಿ ಸರಬ್ಜೋತ್ ಸಿಂಗ್ ಜೊತೆಗೂಡಿ ಕಂಚಿನ ಪದಕ ಗೆದ್ದುಕೊಂಡಿದ್ದಾರೆ. ಈ ಸಾಧನೆಯ ಬೆನ್ನಲ್ಲೇ ಭಾರತೀಯ ಶೂಟರ್ನ ಫೋಟೋಗಳನ್ನು ಕೆಲ ಕಂಪೆನಿಗಳು ಜಾಹೀರಾತುಗಳನ್ನು ಪ್ರಕಟಿಸಿದೆ.
ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಎರಡು ಕಂಚಿನ ಪದಕಗಳನ್ನು ಗೆದ್ದಿರುವ 22 ವರ್ಷದ ಶೂಟರ್ ಮನು ಭಾಕರ್ ಅವರ ತಂಡ ಪ್ರಮುಖ ಬ್ರ್ಯಾಂಡ್/ಕಂಪೆನಿಗಳ ವಿರುದ್ಧ ಕಾನೂನಿನ ಕ್ರಮ ಕೈಗೊಳ್ಳಲು ಮುಂದಾಗಿದೆ ಎಂದು ವರದಿಯಾಗಿದೆ. ಇದಕ್ಕೆ ಮುಖ್ಯ ಕಾರಣ ಒಲಿಂಪಿಕ್ಸ್ ಪದಕ ಗೆದ್ದ ಬೆನ್ನಲ್ಲೇ ಕೆಲ ಕಂಪೆನಿಗಳು ಅವರ ಫೋಟೋ ಮತ್ತು ವಿಡಿಯೋಗಳನ್ನು ಬಳಸಿಕೊಂಡು ಜಾಹೀರಾತುಗಳನ್ನು ಪ್ರಕಟಿಸಿರುವುದು.
ಮನು ಭಾಕರ್ ಅವರಿಗೆ ಪ್ರಾಯೋಜಕತ್ವ ವಹಿಸದಿರುವ ಕೆಲ ಪ್ರಮುಖ ಬ್ರ್ಯಾಂಡ್ ಇದೀಗ ಅವರ ಫೋಟೋಗಳು ಮತ್ತು ವೀಡಿಯೊಗಳನ್ನು ಅಭಿನಂದನಾ ಜಾಹೀರಾತುಗಳಲ್ಲಿ ಬಳಸಿ ಪ್ರಚಾರ ಪಡೆದುಕೊಳ್ಳುತ್ತಿದೆ. ಇಂತಹ ಕಂಪೆನಿಗಳ ಕಾನೂನು ಕ್ರಮ ಕೈಗೊಳ್ಳಲು ಐಒಎಸ್ ಸ್ಪೋರ್ಟ್ಸ್ ಕಂಪೆನಿ ಮುಂದಾಗುತ್ತಿದೆ.
ಐಒಎಸ್ ಸ್ಪೋರ್ಟ್ಸ್ & ಇಂಟರ್ಟೈನ್ಮೆಂಟ್ ಸಂಸ್ಥೆಯು ಮನು ಭಾಕರ್ ಅವರ ಕಾರ್ಯ ವ್ಯವಸ್ಥೆಗಳನ್ನು ನಿರ್ವಹಿಸುತ್ತಿದ್ದು, ಇದೀಗ ಕ್ರೀಡಾಪಟುವಿನ ವ್ಯಕ್ತಿತ್ವ ಹಕ್ಕುಗಳನ್ನು ಉಲ್ಲಂಘಿಸಿ ಫೋಟೋಗಳು ಅಥವಾ ವೀಡಿಯೊಗಳನ್ನು ಬಳಸಿದ ಬ್ರ್ಯಾಂಡ್‌ಗಳಿಗೆ ಕಾನೂನು ಸೂಚನೆಗಳನ್ನು ಕಳುಹಿಸಲು ಈ ಕಂಪೆನಿ ನಿರ್ಧರಿಸಿದೆ ಎಂದು ವರದಿಯಾಗಿದೆ.
ಒಲಿಂಪಿಕ್ಸ್ಗೂ ಮುನ್ನ ಮನು ಭಾಕರ್ ಅವರಿಗೆ ಪ್ರಾಯೋಕತ್ವ ನೀಡಿದ್ದು ಕ್ರೀಡಾ ಗೇರ್ ಮತ್ತು ಫಿಟ್‌ನೆಸ್ ಫ್ಯಾಶನ್ ಕಂಪನಿಯಾದ ಪರ್ಫಾರ್ಮ್ಯಾಕ್ಸ್ ಆಕ್ಟಿವ್‌ವೇರ್ ಮಾತ್ರ. ಆದರೀಗ ಒಲಿಂಪಿಕ್ಸ್ನಲ್ಲಿ ಪದಕ ಗೆಲ್ಲುತ್ತಿದ್ದಂತೆ ಬಜಾಜ್ ಫುಡ್ಸ್, ಕಾಪಿಫಿಟ್, ಎಲ್ಐಸಿ, FIITJEE, ಬಿಎಸ್ಸಿ ಇಂಟೀರಿಯರ್ಸ್, ಓಕ್‌ವುಡ್ ಇಂಟರ್‌ನ್ಯಾಶನಲ್ ಸ್ಕೂಲ್, ಮತ್ತು Kineto ನಂತಹ ಬ್ರ್ಯಾಂಡ್‌ಗಳು ಫೋಟೋ ಮತ್ತು ವಿಡಿಯೋಗಳೊಂದಿಗೆ ಜಾಹೀರಾತುಗಳನ್ನು ಪ್ರಕಟಿಸಿದೆ. ಆದರೆ ಈ ಕಂಪೆನಿಗಳು ಮನು ಭಾಕರ್ ಅವರಿಗೆ ಈ ಹಿಂದೆ ಯಾವುದೇ ನೆರವು ನೀಡಿಲ್ಲ. ಅಲ್ಲದೆ ಯಾವುದೇ ಪ್ರಾಯೋಜಕತ್ವವನ್ನು ಘೋಷಿಸಿಲ್ಲ.
ಇದಾಗ್ಯೂ ಇದೀಗ ಒಲಿಂಪಿಕ್ಸ್ ಪದಕವನ್ನು ಮುಂದಿಟ್ಟುಕೊಂಡು ಮನು ಭಾಕರ್ ಹೆಸರಿನಲ್ಲಿ ಉಚಿತ ಮಾರ್ಕೆಟಿಂಗ್ ಮಾಡುತ್ತಿದ್ದಾರೆ. ಇದು ಕಾನೂನುಬಾಹಿರವಾಗಿದ್ದು, ಹೀಗಾಗಿ ಮನು ಭಾಕರ್ ಅವರ ತಂಡ ಪ್ರಮುಖ ಬ್ರ್ಯಾಂಡ್ಗಳ ವಿರುದ್ಧ ಕಾನೂನಿನ ಕ್ರಮ ತೆಗೆದುಕೊಳ್ಳಲು ಮುಂದಾಗಿದೆ ಎಂದು ತಿಳಿದು ಬಂದಿದೆ.
ಇದನ್ನೂ ಓದಿ: Manu Bhaker: ಒಲಿಂಪಿಕ್ಸ್ನಲ್ಲಿ ಹೊಸ ಇತಿಹಾಸ ನಿರ್ಮಿಸಿದ ಮನು ಭಾಕರ್
ಮನು ಭಾಕರ್ ಹೊಸ ಸೆನ್ಸೇಷನ್:
ಒಲಿಂಪಿಕ್ಸ್ ಆವೃತ್ತಿಯಲ್ಲಿ ಎರಡು ಪದಕಗಳನ್ನು ಗೆದ್ದ ಭಾರತದ ಮೊದಲ ಕ್ರೀಡಾಪಟು ಎನಿಸಿಕೊಂಡಿರುವ ಮನು ಭಾಕರ್ ಅವರ ಅವರನ್ನು ಜಾಹೀರಾತಿನಲ್ಲಿ ಬಳಸಿಕೊಳ್ಳಲು ಇನ್ನೂ ಕೆಲ ಕಂಪೆನಿಗಳು ತುದಿಗಾಲಲ್ಲಿ ನಿಂತಿದೆ. ಸುಮಾರು ಅರ್ಧ ಡಝನ್ ಇತರ ಬ್ರ್ಯಾಂಡ್‌ಗಳು ಪ್ರಾಯೋಜಕತ್ವದ ವ್ಯವಹಾರಗಳಿಗಾಗಿ ಭಾಕರ್ ಅವರ ತಂಡದೊಡನೆ ಮಾತುಕತೆ ನಡೆಸುತ್ತಿವೆ ಎಂದು ತಿಳಿದು ಬಂದಿದೆ. ಹೀಗಾಗಿ ಮುಂಬರುವ ದಿನಗಳಲ್ಲಿ ಟಿವಿ ಜಾಹೀರಾತಿನಲ್ಲಿ ಮನು ಭಾಕರ್ ಮಿಂಚಲಿದ್ದಾರೆ.
