Viral Video: ಲಂಡನ್; ವಿದ್ಯುದ್ದೀಪವೇ ಇಲ್ಲದ ಈ ದ್ವೀಪದಲ್ಲಿ ಈ ವ್ಯಕ್ತಿ ಒಂಟಿಯಾಗಿ ವಾಸಿಸುತ್ತಿರುವುದೇಕೆ?
Flat Holm Island : ಕಾರ್ಡಿಫ್ ಹಾರ್ಬರ್ ಅಥಾರಿಟಿಯು ಸೈಮನ್ ಪಾರ್ಕರ್ ಇವರಿಗೆ ಇಲ್ಲಿ ವಾಸಿಸಲು ಅವಕಾಶ ಮಾಡಿಕೊಟ್ಟಿತು. ತಮ್ಮ ಆಪ್ತಸ್ನೇಹಿತರ ಅಗಲಿಕೆಯಿಂದಾಗಿ ಕುಗ್ಗಿಹೋದ ಸಂದರ್ಭದಲ್ಲಿ ಇಲ್ಲಿ ವಾಸಿಸುವ ನಿರ್ಧಾರವನ್ನು ತೆಗೆದುಕೊಂಡರು. ಇಡೀ ದಿನ ಇವರು ದ್ವೀಪದಲ್ಲಿ ಇವರು ಹೇಗೆ ಸಮಯ ಕಳೆಯುತ್ತಾರೆ? ಗೊತ್ತಾದರೆ ನಿಮಗೆ ಅಚ್ಚರಿಯಾಗುತ್ತದೆ.
London : 38 ವರ್ಷದ ಸೈಮನ್ ಪಾರ್ಕರ್ (Simon Parker) ಲಂಡನ್ನಿನ ವೆಲ್ಷ್ ಕರಾವಳಿಯಲ್ಲಿರುವ ಫ್ಲ್ಯಾಟ್ ಹೋಮ್ ದ್ವೀಪದ (Flat Holm Island) ವಾರ್ಡನ್ ಎನ್ನಿಸಿಕೊಂಡಿದ್ದಾರೆ. ಇಷ್ಟೆ ಅಲ್ಲ, ಇದೇ ದ್ವೀಪದಲ್ಲಿರುವ ಏಕೈಕ ಪಬ್ನ ಮಾಲಿಕರೂ ಕೂಡ. ಎಲ್ಲಕ್ಕಿಂಥ ಮುಖ್ಯವಾಗಿ ಇವರು ಈ ದ್ವೀಪದಲ್ಲಿ ವಾಸಿಸುವ ಏಕೈಕ ಮನುಷ್ಯಜೀವಿ. ಅಲ್ಲದೇ ಇವರು ವಾಸಿಸುವ ಈ ದ್ವೀಪದಲ್ಲಿ ವಿದ್ಯುತ್ ಕೂಡ ಇಲ್ಲ. ಇವರು ಇಲ್ಲಿದ್ದುಕೊಂಡು ದಿನವಿಡೀ ಏನು ಮಾಡುತ್ತಾರೆ, ಹೇಗೆ ಬದುಕುತ್ತಾರೆ, ಅವರಿಗೆ ಬೇಸರವಾಗುವುದಿಲ್ಲವೆ? ಎಂಬ ಪ್ರಶ್ನೆಗಳು ಯಾರಲ್ಲಿಯೂ ಹುಟ್ಟಿಕೊಳ್ಳುತ್ತವೆ. ಇವರೊಬ್ಬ ರಾಯಲ್ ಏರ್ಫೋರ್ಸ್ನ ಮಾಜಿ ಏರ್ಕ್ರಾಫ್ಟ್ ಎಂಜಿನಿಯರ್. ಬಿಬಿಸಿ ಇವರೊಂದಿಗೆ ನಡೆಸಿದ ಸಂದರ್ಶನದ ಆಧಾರದ ಮೇಲೆ ಇವರ ಕಥೆಯನ್ನು ಇಲ್ಲಿ ಅನಾವರಣಗೊಳಿಸಲಾಗಿದೆ.
ಇದನ್ನೂ ಓದಿ : Viral Video: ಕಾವಾಲಾ ಕಾವು; ಸೀರೆಯುಟ್ಟು ಹೆಜ್ಜೆ ಹಾಕಿದ ಅದ್ವಿತಿ ಶೆಟ್ಟಿ ಮತ್ತು ಸೃಷ್ಟಿ ಶುಕ್ಲಾ
ಕಾರ್ಡಿಫ್ ಹಾರ್ಬರ್ ಅಥಾರಿಟಿ ಸೈಮನ್ ಪಾರ್ಕರ್ ಅವರಿಗೆ ಇಲ್ಲಿ ವಾಸಿಸಲು ಅವಕಾಶ ಮಾಡಿಕೊಟ್ಟಿತು. ತಮ್ಮ ಆಪ್ತ ಸ್ನೇಹಿತರ ಅಗಲಿಕೆಯಿಂದಾಗಿ ಅವರು ಬಹಳ ಕುಗ್ಗಿಹೋದ ಸಂದರ್ಭದಲ್ಲಿ ಅವರು ಇಲ್ಲಿ ವಾಸಿಸುವ ನಿರ್ಧಾರವನ್ನು ತೆಗೆದುಕೊಂಡರು. ವಿದ್ಯುತ್ ಇಲ್ಲದ ದ್ವೀಪದಲ್ಲಿ ಅವರು ವಾಸಿಸುವ ಸಾಹಸಕ್ಕೆ ತೆರೆದುಕೊಂಡರು. ‘ಇಲ್ಲಿಗೆ ಬಂದಮೇಲೆ ಜೀವನವು ಸುಂದರವೂ ಶಾಂತರೀತಿಯಿಂದಲೂ ಕೂಡಿದೆ. ಆಹಾರ ಬೇಕಾದರೆ ಅಂಗಡಿಗೆ ಹೋಗುತ್ತೀರಿ, ನೀರು ಬೇಕಾದರೆ ನಲ್ಲಿ ತಿರುಗಿಸುತ್ತೀರಿ. ಆದರೆ ಇಲ್ಲಿ ಹಾಗಿಲ್ಲ ಎಲ್ಲದಕ್ಕೂ ಅದರದೇ ಆದ ತಂತ್ರಗಳನ್ನು ಅನುಸರಿಸಬೇಕಾಗುತ್ತದೆ. ನಾನು ಜಗತ್ತನ್ನು ಹೇಗೆ ನೋಡುತ್ತೇನೆ ಎನ್ನುವುದಕ್ಕೆ ಫ್ಲ್ಯಾಟ್ ಹೋಮ್ ಸೂಕ್ಷ್ಮದರ್ಶಕದಂತೆ ಸಹಾಯ ಮಾಡುತ್ತದೆ’ ಎಂದಿದ್ದಾರೆ.
ಸೈಮನ್ ಪಾರ್ಕರ್ಗೆ ಪಕ್ಷಿಗಳೇ ಗೆಳೆಯರು
ಇಡೀ ದಿನ ಇವರು ದ್ವೀಪದಲ್ಲಿ ಸಮಯವನ್ನು ಹೇಗೆ ಕಳೆಯುತ್ತಾರೆ? ಗೊತ್ತಾದರೆ ನಿಮಗೆ ಅಚ್ಚರಿಯಾಗುತ್ತದೆ. ದಿನವೂ ಅವರು ದ್ವೀಪದ ಸಂರಕ್ಷಣೆಯ ಕೆಲಸದಲ್ಲಿ ಮುಳುಗಿರುತ್ತಾರೆ. ಬೇಸರವಾದಾಗ ಪಕ್ಷಿವೀಕ್ಷಣೆಯಲ್ಲಿ ತೊಡಗಿಕೊಳ್ಳುತ್ತಾರೆ ಮತ್ತು ವಿವಿಧ ಋತುಮಾನಗಳಲ್ಲಿ ದ್ವೀಪದಲ್ಲಿ ವಾಸಿಸಲು ಸಿದ್ಧತೆಗಳನ್ನು ಮಾಡಿಕೊಳ್ಳುತ್ತಾರೆ. ಸಾಂದರ್ಭಿಕವಾಗಿ ಪ್ರವಾಸಿಗರಿಗೆ ಮಾರ್ಗದರ್ಶಿಯೂ ಆಗುತ್ತಾರೆ! ‘ನಾನಿಲ್ಲಿ ತುಂಬಾ ಆರಾಮಾಗಿದ್ದೇನೆ ಎಂದು ಜನ ಅಂದುಕೊಳ್ಳಬಹುದು. ಆದರೆ ಕೆಲ ಆತಂಕಗಳ ಮಧ್ಯೆ ನನ್ನದೇ ಆದ ರೀತಿಯಲ್ಲಿ ಬದುಕುತ್ತಿದ್ದೇನೆ. ಆದರೆ ಸಮಾಧಾನವೂ ಇದೆ, ಏಕೆಂದರೆ ನಾನು ಸವಾಲುಗಳನ್ನು ಪ್ರೀತಿಸುತ್ತೇನೆ.’
ಫ್ಲ್ಯಾಟ್ ಹೋಮ್ ದ್ವೀಪಕ್ಕೆ ಪ್ರವಾಸಿಗರೊಬ್ಬರು ಭೇಟಿ ನೀಡಿದಾಗಿನ ವಿಡಿಯೋ
‘ನನ್ನ ಒಂಟಿತನಕ್ಕೆ ಇಲ್ಲಿಯ ಪಕ್ಷಿಗಳು ಸಾಥ್ ಕೊಡುತ್ತವೆ ಮತ್ತು ಬದುಕಲು ಉತ್ತೇಜನವನ್ನು ತುಂಬುತ್ತವೆ. ನನ್ನ ಮನಸ್ಸು ಸರಿ ಹೋಗಲು ಮತ್ತಷ್ಟು ನಾನು ಇನ್ನೂ ಪ್ರಕೃತಿಯಲ್ಲಿ ಕಳೆದುಹೋಗಬೇಕು. ನಾನು ಯಾವಾಗಲೂ ದೂರದ ಸ್ಥಳಗಳಲ್ಲಿ ಒಬ್ಬಂಟಿಯಾಗಿ ಇರಲು ಇಷ್ಟಪಡುತ್ತೇನೆ. ಇದೇನು ಅಂಥಾ ದೂರವಲ್ಲ, ಕಾರ್ಡಿಫ್ನಿಂದ ಕೇವಲ ನಾಲ್ಕು ಮೈಲಿಗಳ ಅಂತರದಲ್ಲಿದ್ದೇನೆ. ಕೆಲವೊಮ್ಮೆ ನನಗಿದು ಮಿಲಿಯನ್ ಮೈಲಿ ದೂರದಂತೆ ಅನ್ನಿಸಿದ್ದೂ ಉಂಟು. ಇಲ್ಲಿಗೆ ಭೇಟಿ ನೀಡುವ ಜನರು ಮತ್ತವರ ಕಥೆಗಳನ್ನು ಕೇಳಲು ಉತ್ಸುಕನಾಗಿರುತ್ತೇನೆ. ಇದೆಲ್ಲದರೊಂದಿಗೆ ವನ್ಯಜೀವಿಗಳು, ಬದಲಾಗುವ ಋತುಮಾನಗಳು ಬದುಕನ್ನು ಅರ್ಥ ಮಾಡಿಕೊಳ್ಳಲು ಸಹಾಯ ಮಾಡುತ್ತವೆ. ಬದುಕಿನ ವೇಗವನ್ನು ನಿಧಾನಗೊಳಿಸುತ್ತವೆ’ ಎಂದು ಪಾರ್ಕರ್ ಹೇಳಿದ್ದಾರೆ.
ಇದನ್ನು ಓದಿದ ನಿಮ್ಮ ಅಭಿಪ್ರಾಯವೇನು?
ಮತ್ತಷ್ಟು ವೈರಲ್ ನ್ಯೂಸ್ಗಾಗಿ ಕ್ಲಿಕ್ ಮಾಡಿ
Published On - 5:47 pm, Tue, 22 August 23
