ಯುನೈಟೆಡ್ ಏರ್ಲೈನ್ಸ್ನ ಬಿಝಿನೆಸ್ ಕ್ಲಾಸ್ನಲ್ಲಿ ಹಾವು ಪತ್ತೆ, ಪ್ರಯಾಣಿಕರು ಆತಂಕಕ್ಕೆ
Snake Spotted in Flight : ಈ ಪಟ್ಟೆಹಾವಿಗೆ ವಿಮಾನ ಪ್ರಯಾಣ ಮಾಡುವ ಬಯಕೆ ಉಂಟಾಗಿತ್ತೋ ಏನೋ. ಫ್ಲೊರಿಡಾದಿಂದ ನ್ಯೂಜೆರ್ಸಿಗೆ ಹೊರಟಿದ್ದ ವಿಮಾನವೇರಿ ಕುಳಿತುಬಿಟ್ಟಿದೆ. ಕೆಲಹೊತ್ತು ಪ್ರಯಾಣಿಕರು ಭಯಭೀತರಾಗಿದ್ದರು.
Updated on:Oct 19, 2022 | 2:57 PM
Viral : ಬ್ಯಾಗಿನಲ್ಲಿ ಹಾವು ಪತ್ತೆ, ಬಸ್ಸಿನಲ್ಲಿ ಹೆಬ್ಬಾವು ಪತ್ತೆ, ಬೂಟಿನಲ್ಲಿ ಹಾವು ಪತ್ತೆ, ಕಮೋಡಿನಲ್ಲಿ ಹಾವು ಪತ್ತೆ ಹೀಗೆ ದಿನವೂ ಎಲ್ಲೆಂದರಲ್ಲಿ ಈ ನಾಗರಾಜನ ಹಾವಳಿ ಹೆಚ್ಚಾಗುತ್ತಿದೆ. ಇಷ್ಟು ದಿನ ನೆಲದ ಮೇಲೆ ಅಡಗಿ ಕುಳಿತುಕೊಳ್ಳುತ್ತಿದ್ದವನಿಗೆ ಆಕಾಶದಲ್ಲಿ ಹಾರಾಡುವ ಬಯಕೆಯಾಗಿದೆ. ಹೇಗೋ ಒಟ್ಟು ವಿಮಾನವೇರಿ ಕುಳಿತುಬಿಟ್ಟಿದ್ದಾನೆ, ಅದೂ ಬಿಝಿನೆಸ್ ಕ್ಲಾಸಿನಲ್ಲಿ! ಫ್ಲೊರಿಡಾದಿಂದ ನ್ಯೂಜೆರ್ಸಿಗೆ ಹೊರಟಿದ್ದ ವಿಮಾನದಲ್ಲಿ ಈ ಆತಂಕಕಾರಿ ಘಟನೆ ನಡೆದಿದೆ. ಪ್ರಯಾಣಿಕರು ಕೆಲ ಕಾಲ ಭಯಗ್ರಸ್ಥರಾಗಿದ್ದರು.
ಸೋಮವಾರದಂದು ಫ್ಲೊರಿಡಾದ ಟ್ಯಾಂಪಾದಿಂದ ನ್ಯೂಜೆರ್ಸಿಗೆ ಪ್ರಯಾಣಿಸುತ್ತಿದ್ದ ಯುನೈಟೆಡ್ ಏರ್ಲೈನ್ಸ್ನಲ್ಲಿ ಈ ಘಟನೆ ನಡೆದಿದೆ. ಬಿಝಿನೆಸ್ ಕ್ಲಾಸ್ನ ಪ್ರಯಾಣಿಕರು ವಿಮಾದಿಂದ ಕೆಳಗಿಳಿಯುತ್ತಿದ್ದಾರೆ ಈ ಪಟ್ಟೆ ಹಾವು ಕಣ್ಣಿಗೆ ಬಿದ್ದಿದೆ. ಕೆಲಕಾಲ ಭಯದಿಂದ ಪ್ರಕ್ಷುಬ್ಧ ವಾತಾವರಣ ಉಂಟಾಗಿದೆ. ನಂತರ ಪೊಲೀಸರು ಮತ್ತು ವನ್ಯಜೀವಿ ರಕ್ಷಣಾ ತಂಡವು ನಡೆಸಿದ ಕಾರ್ಯಾಚರಣೆಯಿಂದ ಹಾವನ್ನು ಬಂಧಿಸಲಾಗಿದೆ. ಸದ್ಯ ಯಾರಿಗೂ ಯಾವುದೇ ರೀತಿಯ ಗಾಯ ಸಂಭವಿಸಿಲ್ಲ. ಕಾರ್ಯಾಚರಣೆಯೂ ಸುಸೂತ್ರವಾಗಿ ಸಾಗಿದೆ.
ಸಾಮಾನ್ಯವಾಗಿ 18-26 ಇಂಚುಗಳಷ್ಟು ಉದ್ದದ ಹಾವುಗಳು ಮನುಷ್ಯರು ಮತ್ತು ಸಾಕುಪ್ರಾಣಿಗಳಿಂದ ದೂರವಿರುತ್ತವೆ. ಯಾರಾದರೂ ಉದ್ದೇಶಪೂರ್ವಕವಾಗಿ ಅವುಗಳಿಗೆ ತೊಂದರೆ ನೀಡಲು ನೋಡಿದರೆ ಮಾತ್ರ ಕಚ್ಚದೇ ಬಿಡುವುದಿಲ್ಲ ಎನ್ನುವುದನ್ನು ಈ ಸಂದರ್ಭದಲ್ಲಿ ನೆನಪಿಸಿಕೊಳ್ಳಬಹುದು.
ಇನ್ನು ನ್ಯೂಜೆರ್ಸಿಯಲ್ಲಿ ಪಟ್ಟೆಹಾವುಗಳು ಕಾಣಿಸಿಕೊಳ್ಳುವುದು ತೀರಾ ಸಾಮಾನ್ಯ. ಫೆಬ್ರವರಿಯಲ್ಲಿ ಮಲೇಷಿಯಾದ ಏರ್ ಏಷಿಯಾ ವಿಮಾನದಲ್ಲಿ ಇಂಥದೇ ಘಟನೆಯೊಂದು ನಡೆದಿತ್ತು. ವಿಮಾನ ಹಾರಾಡುತ್ತಿರುವಾಗ ಹಾವು ಪತ್ತೆಯಾಗಿತ್ತು.
ನೀವು ವಿಮಾನ ಏರಿದಾಗೆಲ್ಲ ಈ ಘಟನೆ ನೆನಪಾಗುವುದೇನೋ!
ಮತ್ತಷ್ಟು ಟ್ರೆಂಡಿಂಗ್ ನ್ಯೂಸ್ಗಾಗಿ ಕ್ಲಿಕ್ ಮಾಡಿ
Published On - 2:43 pm, Wed, 19 October 22
